Türkiyə Superliqasının XX turunun ilk görüşündə

Fevralın 1-də futbol üzrə Türkiyə Superliqasının XX turunun ilk görüşündə turnir cədvəlində 14-cü pillədə qərarlaşan İstanbulun “Fənərbağça” komandası doğma meydanda “Göztəpə” ilə qarşılaşıb.Azərtac xəbər verir ki, “Şükrü Saracoğlu” stadionunda baş tutan görüş qarşılıqlı hücumlar şəraitində keçsə də, oyunda qalib meydan sahibləri olub. Qarşılaşmanın 7-ci dəqiqəsində “Fənərbağça”nın hücumçusu Andre Ayev hesabı açıb. Meydan sahibləri görüşün 73-cü dəqiqəsində yeni transfer olmuş Viktor Mozesin qolu ilə hesabı 2-yə çatdırıblar. Oyun elə bu hesabla da başa çatıb.Bu qalibiyyət sayəsində “Fənərbağça” xallarının sayını 23-ə çatdıraraq turnir cədvəlində 12-ci pilləyə qalxıb. “Göztəpə” isə 22 xalla geriləyərək 13-cü yerdə qərarlaşıb.Qeyd edək ki, turun digər oyunları fevralın 2, 3 və 4-ü keçiriləcək. Türkiyə Superliqasının XX turunun digər oyunları aşağıdakılardır: “Yeni Malatyaspor” - “Kayserispor”, “Kasımpaşa” - “Sivasspor”, “Trabzonspor” - “Ankaragücü”, “Alanyaspor” - “Qalatasaray”, “Ərzurumspor” - “Rizespor”, “Akhisar Bələdiyəspor” - “Başakşəhər”, “Antalyaspor” - “Beşiktaş”, “Bursaspor”-“Konyaspor”.xeber100.com  

Topaz Premyer Liqasının XV turuna start veriləcək

Fevralın 2-də qış fasiləsindən sonra Topaz Premyer Liqasının XV turuna start veriləcək.Azərtac xəbər verir ki, iki günü əhatə edəcək XV turun ilk oyunu Zirə İdman Kompleksinin stadionunda baş tutacaq. “Zirə” komandası “Sabah”ı qəbul edəcək. Rauf Cabbarovun idarə edəcəyi oyun saat 16:30-da başlayacaq.Bu komandalar cari mövsümdə iki dəfə üz-üzə gəliblər. Hər iki oyunda “Sabah”a məğlub olan Samir Abasovun yetirmələri bu dəfə qalib gələrək sonuncu pillədən qurtulmağa çalışacaqlar. Elşad Əhmədovun yetirmələri əvvəlki iki görüşdə “Zirə”ni iki qolla məyus edə bilib. Hazırda “Sabah” 17 xalla turnir cədvəlində dördüncü, “Zirə” isə 10 xalla səkkizinci pillədə qərarlaşıb.“ASK Arena”da keçiriləcək digər oyunda “Keşlə” komandası “Səbail”i sınağa çəkəcək. Komandalar indiyədək Premyer Liqada 6 dəfə qarşılaşıblar. Bu oyunların üçündə “Keşlə”, ikisində isə “Səbail” qələbə qazanıb. Digər görüşdə isə qalib müəyyənləşməyib. Top fərqində də “Səbail” öndədir - 6:5. Autsayderlər sırasından uzaqlaşmaq istəyən “Keşlə” son iki oyunda Aftandil Hacıyevin komandasına 1:2 hesabı ilə uduzub. Tərlan Əhmədovun rəhbərlik etdiyi kollektiv “Səbail”ə qarşı keçirdiyi son dörd qarşılaşmada meydanı qolsuz tərk etməyib. “Səbail” hazırda 21 xalla üçüncü, “Keşlə” isə 12 xalla yeddincidir. Rəhim Həsənovun idarə edəcəyi oyun saat 19:00-da start götürəcək.Turun digər qarşılaşmaları isə fevralın 3-də keçiriləcək. Günün ilk oyunu saat 14:00-da Qəbələ şəhər stadionunda başlayacaq. Meydan sahibləri “Sumqayıt” ilə qarşılaşacaqlar. Matçı Əliyar Ağayev idarə edəcək.XV turun sonuncu və mərkəzi qarşılaşmasında isə “Qarabağ” və “Neftçi” komandaları üz-üzə gələcəklər. Saat 18:30-da başlayacaq qarşılaşmanın idarə olunması Rəvan Həmzəzadəyə tapşırılıb. Oyun Tofiq Bəhramov adına Respublika stadionunda keçiriləcək.Hazırda 33 xalla çempionata liderlik edən “Neftçi” qalib gələcəyi təqdirdə ikinci sıradakı “Qarabağ” ilə xal fərqini 6-ya çatdıracaq.xeber100.com

“Yuventus” klubu “Real Madrid”in müdafiəçisini transfer edəcək

“Yuventus” klubu “Real Madrid”in braziliyalı müdafiəçisi Marselonu transfer etməyi planlaşdırır.Azərtac xəbər verir ki, Turin təmsilçisi cari mövsümün sonunda Marselo üçün 45 milyon avro təklif edəcək. Futbolçuya isə illik 12 milyon avro məbləğində məvacibin təklif olunması nəzərdə tutulur.Marselonun “kral klubu” ilə hazırkı müqaviləsinin müddəti 2022-ci ildə başa çatır. Transfer reallaşacağı təqdirdə, “Yuventus” hazırda həmin mövqedə çıxış edən Aleks Sandronu İngiltərənin əsas klublarından birinə satacağı ehtimal olunur.xeber100.com  

“İnter” futbol komandası “Latsio” ilə qarşılaşıb

İtaliya kubokunun dörddəbir final mərhələsinin sonuncu görüşü keçirilib.Azərtac xəbər verir ki, “San Siro” stadionunda baş tutan görüşdə “İnter” komandası “Latsio” ilə qarşılaşıb. Gərgin keçən görüşdə hesab açılmayıb.Oyunun əlavə olunmuş dəqiqələrində hər iki komanda bir dəfə fərqlənib - 1:1. Qalibi müəyyən etmək üçün 11 metrlik cərimə zərbələri təyin olunub. Penalti seriyasında "Latsio" komandası üstün olub (4:3). Beləliklə, “Latsio” İtaliya kubokunun yarımfinal mərhələsinə vəsiqə qazanıb. Paytaxt təmsilçisi yarımfinal mərhələsində “Milan” klubu ilə qarşılaşacaq. Digər yarımfinal görüşündə “Atalanta” – “Fiorentino” ilə üz-üzə gələcək.xeber100.com  

İspaniya kuboku final mərhələsində

İspaniya kubokunun dörddəbir final mərhələsinin sonuncu görüşü keçirilib.Azərtac xəbər verir ki, görüşdə "Jirona" "Real Madrid" klubunu qəbul edib. Bu komandaların arasında ilk görüş 4:2 hesabı ilə "kral" klubunun xeyrinə başa çatmışdı.Cavab qarşılaşmasında da, inamlı oyun keçirən "Real Madrid" 3:1 hesabı ilə qələbə qazanıb. Bu qələbədən sonra Madrid təmsilçisi yarımfinal mərhələsinə vəsiqə qazanıb. Madridlilərin rəqibi püşkatmadan sonra məlum olacaq.xeber100.com

Beynəlxalq Şahmat Federasiyası reytinq siyahısını açıqlayıb

Beynəlxalq Şahmat Federasiyası (FIDE) fevral ayı üçün reytinq siyahısını açıqlayıb.Azərtac xəbər verir ki, norveçli Maqnus Karlsenin (2845) başçılıq etdiyi siyahıda Azərbaycan şahmatçısı Şəhriyar Məmmədyarov beşincidir (2790).Dünyanın 100 ən güclü şahmatçıları arasında təmsilçilərimiz Teymur Rəcəbov (2756) 13-cü, Arkadi Naydiç (2732) 22-ci, Rauf Məmmədov (2703) 42-ci, Eltac Səfərli (2681) 63-cü, Qədir Hüseynov (2664) 82-ci pillədə qərarlaşıblar.Qadınlar arasında ilk 100-lükdə isə şahmatçılarımız Günay Məmmədzadə (2422), Xanım Balacayeva (2397) və Gülnar Məmmədova (2368) yer alıblar. Qadınların reytinq siyahısına çinli şahmatçı Hou Yifan (2662) başçılıq edir.xeber100.com

“Barselona” futbol klubu müdafiəçisini transfer edib

İspaniyanın “Barselona” futbol klubu müdafiəçi Emersonu Braziliyanın “Atletiko Minero” komandasından transfer edib.Azərtac klubun saytına istinadla xəbər verir ki, 20 yaşlı müdafiəçi ilə 2024-ci ilin yayınadək qüvvədə olan müqavilə imzalanıb. Emerson Kataloniya təmsilçisinin heyətinə cari ilin iyununda qoşulacaq. “Barselona” bu transferə görə Braziliya klubuna 12 milyon avro ödəyib.Cari mövsümdə “Atletiko Minero”nun heyətində 23 oyunda meydana çıxan müdafiəçi bir qol vurub.xeber100.com

FIFA transferlərə xərclədiyi məbləğı açıqlayıb

FIFA 2018-ci ildə futbol klublarının transferlərə xərclədiyi məbləğı açıqlayıb.TASS informasiya agentliyi xəbər verir ki, klublar transferlərə ümumilikdə 7,03 milyard dollar xərcləyib. Bu, 2017-ci ildəki göstərici ilə müqayisədə 10 faiz çoxdur.2018-ci ildə 16,533 beynəlxalq transfer reallaşıb ki, bu da əvvəlki ilə nisbətən 5,6 faiz artım deməkdir. Bu transferlərə 175 millətdən 14 min 186 oyunçu qatılıb.Açıqlanan məbləğin yarıdan çoxunu 31 klub xərcləyib. Bütün bu xərclərin 78,2 faizi UEFA-ya üzv olan klubların payına düşüb.Ötən il ən çox transfer olunan oyunçular braziliyalılar təşkil edib (1753). Bu göstəriciyə görə, ikinci yeri argentinalılar tutub (891). Üçüncü yerdə isə ingilislər (693) qərarlaşıblar. Ən çox pul yenə də, braziliyalılara xərclənib (1,154 milyard dollar).xeber100.com

“Səbail” klubu heyətinə daha bir futbolçu cəlb edib

Bakının “Səbail” klubu heyətinə daha bir futbolçu cəlb edib.Azərtac kluba istinadla xəbər verir ki, ukraynalı qapıçı Oleksandr Rıbka ilə “Səbail” arasında cari mövsümün sonunadək müqavilə imzalanıb.Daha əvvəl Ukraynanın “Dinamo” (Kiyev), “Dinamo-2”, “Dinamo-3”, “Obolon”, “Şaxtyor” (Donetsk), Türkiyənin “Karabükspor”, “Afjet Afyonspor” klublarında çıxış edən 32 yaşlı qolkiper müəyyən vaxtlarda Ukrayna milli komandasına da cəlb olunub.Dörd dəfə Ukrayna çempionu, 4 dəfə Ukrayna Kubokunun, 1 dəfə Ukrayna Superkubokunun qalibi olan Oleksandr Rıbka 2011-ci ildə ölkəsində “Ən yaxşı qapıçı” mükafatına layiq görülüb.xeber100.com

Fransa çempionatının 22-ci turu çərçivəsində

Fransa çempionatının 22-ci turu çərçivəsində “Nant” doğma azarkeşlər önündə “Sent-Etyen” komandasını qəbul edib.Azərtac xəbər verir ki, qarşılaşmanın 9-cu dəqiqəsində itkin düşmüş futbolçu Emiliano Salanın xatirəsi bir dəqiqəlik sükutla yad edilib. Xatırladaq ki, Emiliano Sala “Nant” klubunda 9 nömrəli formanı geyinib.İngiltərə Premyer Liqasında çıxış edən Uelsin “Kardiff Siti” klubunun yeni transferi Emiliano Salanın olduğu təyyarə yanvarın 21-də Kardiffə uçmaq üçün Fransanın Nant şəhərindən havaya qalxıb. Ancaq təyyarə təyinat məntəqəsinə çatmağa saat yarım qalmış radarlardan itib.Təyyarənin axtarışına iki helikopter və bir neçə gəmi cəlb olunsa da, sonradan axtarışlar dayandırılıb.Qeyd edək ki, “Kardiff Siti” argentinalı futbolçunun transferi üçün klub tarixində rekord məbləğ - 15 milyon funt sterlinq ödəyib. Klub futbolçu ilə 2022-ci ilin yayına qədər müqavilə imzalamışdı.xeber100.com