Cüdo üzrə “Böyük dəbilqə” turniri start götürəcək

Bu gün Təl-Əvivdə cüdo üzrə “Böyük dəbilqə” turniri start götürəcək. Turnirin birinci günündə tatami üzərinə Azərbaycanın üç cüdoçusu çıxacaq. Belə ki, Balabəy Ağayev Matan Kokolaev (İsrail) – Brayan Qarbo (Ekvador) cütünün qalibi, Tural Bayramov (hər ikisi 60 kq) Mohammed Raşnonejad (qaçqınlar komandası), Orxan Səfərov (66 kq) isə argentinalı Hoakin Tovaqliari ilə qarşılaşacaq. Azərbaycan milli komandası turnirdə yeddi çəki dərəsində 10 cüdoçu ilə təmsil olunacaq. Üç gün davam edəcək yarışda 52 ölkədən 398 idmançı iştirak edəcək.xeber100.com

UEFA Konfrans Liqasının pley-off mərhələsində ilk oyununu keçirəcək

“Qarabağ” bu gün UEFA Konfrans Liqasının pley-off mərhələsində ilk oyununu keçirəcək. Ağdam təmsilçisi Bakıda Belçikanın "Gent" komandasını qəbul edəcək. Tofiq Bəhramov adına Respublika stadionunda oynanılacaq görüş bu gün saat 21:45-da başlayacaq. Matçın baş hakimi İsveç Futbol Federasiyasından Məhəmməd Al-Hakim olacaq. Bu, Azərbaycan və Belçika təmsilçilərinin avrokuboklarda 11-ci görüşü olacaq. "Qarabağ" tarixində ikinci dəfə Konfrans Liqasının pley-off mərhələsində qüvvəsini sınayacaq. Ağdamlılar ötən mövsüm turnirin bu mərhələsində Fransanın "Marsel" komandasına məğlub olaraq (1:3, 0:3) avrokuboklarla vidalaşıb. Qeyd edək ki, bu komandalar arasında cavab oyunu fevralın 23-də Gent şəhərində keçiriləcək.xeber100.com  

UEFA Avropa Konfrans Liqasının pley-off mərhələsinin ilk oyunu çərçivəsində

UEFA Avropa Konfrans Liqasının pley-off mərhələsinin ilk oyunu çərçivəsində fevralın 16-da keçiriləcək “Qarabağ” – “Gent” (Belçika) qarşılaşmasının hakimləri açıqlanıb. “CBC Sport” televiziya kanalı vasitəsilə canlı yayımlanacaq oyunu İsveçdən olan hakimlər briqadası idarə edəcək. Matçın baş hakimi Mohammed Al-Hakim olacaq. Ona Fredrik Klyver və Robin Vilde kömək edəcəklər. Dördüncü hakim funksiyasını Bojan Pandzic yerinə yetirəcək. Oyunun hakim-inspektoru estoniyalı Uno Tutk, UEFA nümayəndəsi İrlandiya təmsilçisi Peadar Ryan olacaq. “Qarabağ”- “Gent” oyunu saat 21:45-də Tofiq Bəhramov adına Respublika Stadionunda start götürəcək.xeber100.com

Polşa – Azərbaycan görüşünə hakim təyinatları açıqlanıb

Futzal üzrə dünya çempionatının əsas mərhələsinin altıncı qrupunda keçiriləcək Polşa – Azərbaycan görüşünə hakim təyinatları açıqlanıb. Azərbaycan Futzal Federasiyası xəbər verir ki, martın 7-də Koszalin idman zalında keçiriləcək oyunu Estoniya və Latviyadan olan hakimlər idarə edəcəklər. Matçın əsas hakimi Yaqnar Yakobson (Estoniya) olacaq. Ona İnqus Purins (Latviya) və Qriqori Oşomkov (Estoniya) kömək edəcəklər. Matçın hakim-inspektoru Silvo Borosak (Sloveniya), UEFA nümayəndəsi Joao Roça (Portuqaliya) olacaqlar.xeber100.com

“Neftçi” klubu daha bir futbolçusu ilə yollarını ayırmağa hazırlaşır

Bakının “Neftçi” klubu daha bir futbolçusu ilə yollarını ayırmağa hazırlaşır. “Marcouno Esporte” nəşri xəbər verir ki, Gilyerme Pato tezliklə komandanı tərk edəcək. Braziliya KİV-i 22 yaşlı hücumameyilli oyunçunun “Fiqueyrense” klubuna keçəcəyini iddia edib. Qeyd edək ki, Gilyermo Pato cari mövsüm Azərbaycan Premyer Liqasında 12 oyunda 1 qol vurub. Futbolçu 2023-cü ildə heç bir matçda iştirak etməyib.xeber100.com

Azərbaycan çempionatında növbəti oyunların keçirilmə vaxtı dəqiqləşib

Qadın voleybolçular arasında Azərbaycan çempionatında növbəti oyunların keçirilmə vaxtı dəqiqləşib. Azərbaycan Voleybol Federasiyası xəbər verir ki, fevralın 16-da Yüksək Liqada üçüncü dövrə çərçivəsində iki matç keçiriləcək. Səkkizinci turun ilk qarşılaşmasında “Abşeron” klubu “Azərreyl”i sınağa çəkəcək. Matç saat 16:00-da başlayacaq. Ardınca saat 18:00-da UNEC - “Murov” oyunu baş tutacaq. Hər iki görüş Voleybol Mərkəzində oynanılacaq.xeber100.com

Voleybolçular arasında üçüncü dövrənin ilk turu keçirilib

Bu gün kişi voleybolçular arasında Azərbaycan Yüksək Liqasında üçüncü dövrənin ilk turu keçirilib. Azərbaycan Voleybol Mərkəzində baş tutan çempionatın VII turuna “Murov”-“Neftçi” matçı ilə start verilib. Çempionatın lideri “Murov” komandası yenə qələbəyə sevinib. Komanda rəqibini 3:0 (25:20, 25:19, 25:22) hesabı ilə məğlub etməklə aktivinə yazıb. Qeyd edək ki, bu gün VII tur çərçivəsində keçirilməsi nəzərdə tutulan “Xarıbülbül” - MOİK qarşılaşması təxirə salınıb. Buna səbəb hakimlərin oyuna çıxmaqdan imtina etməsi olub. Turnir cədvəli: “Murov” 17 xalla turnir cədvəlində liderliyini davam etdirir. Doqquz xala malik “Xarıbülbül” ikinci, 9 xalla “Neftçi” üçüncü yerdə qərarlaşıb. MOİK isə bir xalla sonuncudur.xeber100.com

Azərbaycan Basketbol Liqasında təxirə salınmış oyun keçirilib

Azərbaycan Basketbol Liqasında XV turdan təxirə salınmış oyun keçirilib. "Sərhədçi" İdman Mərkəzində "Gəncə" "Olimpik Şəki" ilə qarşılaşıb. Görüş qərb təmsilçisinin 89:76 hesablı qələbəsi ilə tamamlanıb. Ən məhsuldar basketbolçular "Gəncə"dən Amil Həmzəyev (21 xal, 12 ribaund), "Olimpik Şəki"dən isə Larri Robinson (22 xal, 8 ribaund) olublar.xeber100.com

Basketbolçuları arasında 17-ci turun növbəti oyunu keçirilib

Fevralın 12-də Şəki Olimpiya İdman Kompleksində "Olimpik Şəki BK" və "Sərhədçi PİK" basketbolçuları arasında 17-ci turun növbəti oyunu keçirilib. Görüşə üstünlüklə başlayan "Sərhədçi PİK" 106-83 hesablı qələbə qazanaraq, turnir cədvəlinin ikinci pilləsindəki mövqeyini qoruyub saxlayır. Ən məhsuldar basketbolçular "Olimpik Şəki BK"dən Larri Robinson (27 xal, 6 asist), "Sərhədçi PİK"dən Endar Poladxanlıdır (41 xal, 13 ribaund). Qeyd edək ki, 17-ci turun son oyunu ("Sabah BK" - "Neftçi İK") fevralın 13-də keçiriləcək.xeber100.com

Azərbaycan Triatlon Federasiyasının növbəti yarışı keçirilib

Fevralın 11-i və 12-sində Bakı Su İdmanı Sarayında “Triterra Triathlon Club”-ın təşkilatçılığı ilə Azərbaycan Triatlon Federasiyasının növbəti “Aquathlon” yarışı keçirilib. Federasiyadan bildirilib ki, 45 idmançının iştirak etdiyi yarış “Absolute” və müxtəlif yaş kateqoriyalarından ibarət idi. Yarışın ilk günündə 1500 metr məsafədə üzgüçülük mərhələsi yer aldı. İkinci gün isə 10 km məsafə üzrə qaçış yarışına həsr olundu. “Absolute” kateqoriyasının kişilər arası qalibləri ardıcıl olaraq Togrul Məmmədli, Kam Bular və Vitaliy Yakovlev oldular. Qadınlardan birinci yerə Fatimə Əlkərəmova, ikinci yerə Nataliya Mordasova, üçüncü yerə Adilə Süleymanova yiyələndi. Komandalar arası gərgin rəqabətdə 3 qalib təyin olundu: birinci yer “Triterra” idman klubu, ikinci yer “Alphatriclub” idman klubu, üçüncü yer isə “TriStar” idman klubu.xeber100.com