“Milan” futbol klubu avrokuboklardan kənarlaşdırılıb

UEFA İtaliyanın “Milan” klubunu maliyyə “fair play” qaydalarını pozduğuna görə, iki il müddətinə avrokuboklardan kənarlaşdırıb.Azərtac xəbər verir ki, komanda 2018-2019-cu il mövsümündə Avropa Liqasında iştirak edə bilməyəcək.Milan təmsilçisinin əvəzinə “Atalanta” turnirdə çıxış edəcək, “Fiorentina” isə təsnifat mərhələsində mübarizə aparacaq.“Milan” Avropa Liqasından uzaqlaşdırılma cəzasının ləğvi üçün UEFA-ya müraciət etsə də, istəyi baş tutmayacaq. Qitə futbol qurumu əksinə, “rossonyerlər”i böyük məbləğdə cərimələmək qərarına gəlib. Belə ki, maliyyə “fair play” qaydalarını pozduğu üçün “Milan” 30 milyon avro məbləğində cərimələnib. UEFA-nın tezliklə bunu rəsmən açıqlaması gözlənilir. Hətta qərarın kluba bildirildiyi vurğulanıb.xeber100.com

“Keşlə” futbol klubu UEFA Avropa Liqasının birinci təsnifat mərhələsində

Bakı toplanışını başa vuran “Keşlə” futbol klubu UEFA Avropa Liqasının birinci təsnifat mərhələsinin ilk oyununa hazırlığını davam etdirmək məqsədilə Türkiyəyə gedib.Azərtac kluba istinadla xəbər verir ki, iyulun 10-dək davam edəcək təlim-məşq toplanışında Bakı təmsilçisi 3 yoxlama matçı keçirməyi planlaşdırır.Komandamız ilk yoxlama matçını iyunun 30-da Bolu vilayətində Bosniya və Herseqovinanın “NK Celik Zenica” komandasına qarşı keçirəcək. Oyun Bakı vaxtı ilə saat 17.00-da başlayacaq.İkinci yoxlama matçında rəqibimiz “Levadia” komandası olacaq. Estoniya təmsilçisi ilə qarşılaşma iyulun 3-də Bakı vaxtı ilə saat 17.00-da baş tutacaq.Toplanış çərçivəsində sonuncu yoxlama matçı iyulun 6-da keçiriləcək. Bu dəfə “Keşlə” İranın “Traktorzasi” komandası ilə üz-üzə gələcək. Oyunun başlanma saatı hələ dəqiqləşməyib.xeber100.com

“Çempionlar” beynəlxalq turniri keçiriləcək

İyulun 4-7-də İstanbulda sərbəst, yunan-Roma və qadın güləşi üzrə gənclər arasında “Çempionlar” beynəlxalq turniri keçiriləcək. İyirmi birinci dəfə baş tutacaq turnirdə gənclərdən ibarət sərbəst güləş üzrə yığmamızın üzvləri iştirak edəcəklər.Azərtac xəbər verir ki, böyük məşqçi Saypulla Absaidov və məşqçi Nazim Əlicanovun rəhbərliyi altında 10 güləşçimiz turnirdə mübarizə aparacaq.Heyətdə Əliabbas Rzazadə (57 kq), İntiqam Vəliyev, Əsgər Məmmədəliyev (hər ikisi 61 kq), Elmar Kazımov (65 kq), Hacımurad Hacıyev (70 kq), İsmayıl Abdullayev (74 kq), Orxan Abbasov (79 kq), İslam İlyasov (86 kq), Asxab Həmzətov (92 kq) və Alimaqomed Alixmayev (97 kq) yer alıblar.Görüşlərin idarə edilməsində ölkəmizi beynəlxalq dərəcəli hakim Vaqif Zeynallı təmsil edəcək.xeber100.com

Həndbol Federasiyasının məlumatı əsasında…

Avropa Həndbol Federasiyası (EHF) yığma komandaların yeni reytinq cədvəlini açıqlayıb.Azərbaycan Həndbol Federasiyasından Azərtac-a verilən məlumata görə, 2015-2016-cı, 2016-2017-ci və 2017-2018-ci illər mövsümünün nəticələrinə əsasən, qadın həndbolçulardan ibarət millimiz reytinq cədvəlində yeddi pillə irəliləyib. Belə ki, qadın həndbolçularımız hazırda 23-cü pillədə qərarlaşıblar.Beləliklə, reytinq cədvəlindəki bu mövqe Azərbaycanın qadınlardan ibarət dörd həndbol klubuna qitə turnirlərində iştirak etmək hüququ qazandırıb. İlk dəfə olaraq qitənin ən nüfuzlu klub turnirində - Çempionlar Liqasında Azərbaycanın həndbol klubu da mübarizə aparacaq. Bundan əlavə, ölkəmiz EHF kuboku yarışlarında bir komanda, "Çağırış kuboku" turnirində isə iki klubla təmsil olunacaq.xeber100.com

Beynəlxalq turnirlərə hazırlıq davam edir

Güləş üzrə yığma komandalarımız reytinq xarakterli beynəlxalq turnirlərə hazırlığı davam etdirirlər.Azərtac xəbər verir ki, böyüklərdən ibarət sərbəst güləş üzrə yığma komandamızın üzvləri iyunun 24-dən Göygöl Olimpiya İdman Kompleksində təlim-məşq toplanışındadır. Yığma komandanın baş məşqçisi Firdovsi Umudovun rəhbərlik etdiyi məşqçilər korpusu toplanışa yığmanın üzvü olan 22 idmançını cəlb edib. İyulun 7-dək davam edəcək ümumi və xüsusi fiziki hazırlıq üzrə təlim-məşq toplanışından sonra yığmanın üzvləri Olimpiya Güləş Mərkəzində hazırlığı davam etdirəcək və iyulun 27-29-da İstanbulda keçiriləcək Yaşar Doğunun xatirəsinə reytinq xarakterli beynəlxalq turnirdə sınaqdan keçiriləcəklər.Olimpiya Güləş Mərkəzində məşqləri davam etdirən böyüklərdən ibarət yunan-Roma güləşi üzrə yığma komandamızın üzvləri isə iyulun 2-də Türkiyəyə yollanacaqlar. Baş məşqçi Şaban Donatın rəhbərlik etdiyi məşqçilər korpusu bu ölkənin yığma komandası ilə birgə təlim-məşq toplanışına qatılacaq heyətə əsas yığma ilə yanaşı, gənclərdən ibarət komandanın üzvlərindən də bir neçəsini cəlb edib. Ümumilikdə 16 yunan-Roma güləşçisi qonşu ölkədə hazırlıq keçəcək. Təlim-məşq toplanışı başa çatdıqdan sonra yığmamızın üzvləri iyulun 20-22-də İstanbulda Vehbi Emrenin xatirəsinə reytinq xarakterli beynəlxalq turnirdə qüvvələrini sınayacaqlar.xeber100.com

“Qəbələ” futbol klubu üçillik müqavilə imzalayıb

2018/2019-cu il mövsümünün hazırlığını Sloveniyada davam etdirən “Qəbələ” futbol klubu növbəti transferini gerçəkləşdirib. “Qırmızı-qaralar” nigeriyalı futbolçu Ceyms Adeniyini heyətinə qatıb.Azərtac kluba istinadla xəbər verir ki, 26 yaşlı hücumçu ilə 3 illik müqavilə imzalanıb.Nigeriyanın U-17 yığmasında çıxış etmiş hücumçu 2012-ci ildən Avropada legioner həyatı yaşayır. İyirmi yaşında Albaniyaya yollanan Ceyms 6 il bu ölkə klublarının formasını geyinib. O, 2012-2013-cü illərdə “Byulis”də çıxış edib. Hücumçu 2013-cü ilin ilk yarısını icarə əsasında “Tomori”də keçirib. 2014-cü ilin əvvəlində “Laçi” ilə anlaşan Adeniyi 2 il bu komandanın uğurları üçün çalışıb. Nigeriyalı legioner son 2,5 ili “Skenderbeu”da çıxış edib. Albaniya karyerasında 2 çempionluq, 2 kubok və 1 Superkubok qazanan afrikalı hücumçu bu müddətdə 216 oyunda 76 qol vurub. O, Superliqada 51 (170 oyun), kubokda 19 (26), Superkubokda 2 (2), avrokuboklarda 4 (18) dəfə rəqib qapılarına yol tapıb.xeber100.com

Futbol üzrə dünya çempionatının on dördüncü günündə…

İyunun 27-də - Rusiyada keçirilən futbol üzrə dünya çempionatının on dördüncü günündə “E” və “F” qruplarında mübarizəyə yekun vurulacaq.Azərtac xəbər verir ki, “E” qrupunda sonuncu turda Serbiya ilə Braziliya və İsveçrə ilə Kosta-Rika milliləri üz-üzə gələcəklər. “F” qrupunda isə Cənubi Koreya – Almaniya və Meksika – İsveç görüşləri keçiriləcək. “F” qrupunun görüşləri Bakı vaxtı ilə saat 18:00-da, “E” qrupunun oyunları isə saat 22:00-da başlayacaq.Hazırda hər iki qrupda üç komandanın səkkizdəbir finala yüksəlmək şansı qaldığından bugünkü qarşılaşmaların gərgin idman mübarizəsi şəraitində keçəcəyi şübhə doğurmur. “E” qrupunda Braziliya və İsveçrə millilərinin 4 xalı olsa da, beşqat dünya çempionları top fərqinə görə birincidirlər. Birinci turda bu komandalar arasındakı qarşılaşma 1:1 hesablı heç-heçə ilə başa çatıb. Braziliya ikinci turda Kosta-Rikanı (2:0), İsveçrə isə Serbiyanı (2:0) məğlubiyyətə uğradıb. Serbiya birinci turda Kosta-Rikanı minimal hesabla məğlub etdiyi üçün 3 xalla qrupdan çıxmaq şansını saxlayır.“F” qrupunda da komandalar səkkizdəbir finala yüksəlmək üçün ciddi mübarizə aparacaqlar. İlk iki turda Almaniyaya (1:0) və Cənubi Koreyaya (2:1) qalib gəlməsinə baxmayaraq, Meksika millisi səkkizdəbir finala vəsiqəni tam təmin etməyib. Birinci turda Cənubi Koreyanı 1:0 hesabı ilə məğlubiyyətə uğradan İsveç yığması Almaniyaya uduzmasına baxmayaraq (1:2), Meksika millisini məğlub edəcəyi təqdirdə səkkizdəbir finala yüksələ biləcək. Üç xalla qrupda ikinci olan Almaniya yığması isə səkkizdəbir finala vəsiqəni təmin etmək üçün Cənubi Koreya yığmasına qalib gəlməyə çalışacaq. İsveç Meksikaya, Almaniya isə Cənubi Koreyaya qalib gələcəyi təqdirdə qrupda üç komandanın 6 xalı olacaq və qalib top fərqinə görə müəyyənləşəcək.FIFA-nın qaydalarına görə, əgər qrupda iki komandanın xalları və top fərqi eyni olarsa, bu zaman rəqib qapılarına daha çox qol vuran komandaya üstünlük verilir. Əgər bu göstərici də eyni olarsa, o zaman həmin komandalar arasındakı oyunun nəticəsi əsas götürülür. Komandaların qarşılaşması da heç-heçə başa çatıbsa, onda üstünlük “Fair play” göstəricilərinə əsasən daha yaxşı vəziyyətdə olan komandaya verilir.Cənubi Koreya – Almaniya (18:00) və İsveçrə - Kosta-Rika (22:00) görüşləri Azərbaycan Televiziyasında təqdim olunacaq. Meksika – İsveç (18:00) və Serbiya – Braziliya görüşləri isə İdman Azərbaycan və İctimai Televiziyada yayımlanacaq.xeber100.com

Portuqaliya-İran matçında sayca 19-cu penalti təyin edilib

DÇ-2018-də penaltilər üzrə yeni rekord qeydə alınıb.Apa-nın məlumatına görə, ötən axşam Portuqaliya-İran matçında sayca 19-cu penalti təyin edilib.Hakim VAR (Video Assistant Referee) sistemindən istifadə edərək 11 metrlik cərimə zərbəsi təyin edib.Bununla da penaltilər üzrə Dünya Çempionatlarının rekordu yenilənib. Bundan əvvəl 1990-cı ildə İtaliyada, 1998-ci ildə Fransada və 2002-ci ildə Cənubi-Koreya və Yaponiyada keçirilən turnirlərdə hakimlər 18 dəfə penalti təyin ediblər.Qeyd edək ki, DÇ-2018-də futbolçular 19 penaltidən yalnız 14-ü dəqiq yerinə yetirə bilib.xeber100.com

“Qarabağ” futbol klubu kinci transferini gerçəkləşdirib

“Qarabağ” yay fasiləsində ikinci əcnəbi transferini gerçəkləşdirib. Apasport.az saytı xəbər verir ki, bu barədə məlumatı Ağdam klubu feysbuk səhifəsində video-paylaşımla yayıb.Videoda futbolçunun üzü görünməsə də, onun “Lans”ın “11 nömrəsi” Abdullah Zubir olduğunu müəyyənləşdirmək çətin deyil. Mərakeş əsilli fransalı yarımmüdafiəçi yeni mövsümdən Azərbaycan çempionunun formasını geyinəcək.Qeyd edək ki, son klubu “Lans” olan Abdullah Zubir karyerası ərzində “Qrenobl”, “İstr”, “Hibernian” və “Petrolul”da da çıxış edib. 27 yaşlı futbolçu pleymeyker və vinger mövqelərində oynamağı bacarır.xeber100.com

Çimərlik futbolu üzrə III turun oyunları keçirilib

Bakıda təşkil edilən çimərlik futbolu üzrə Avropa Liqası turnirində III turun oyunları keçirilib.Azərtac xəbər verir ki, turnirin sonuncu oyununda Azərbaycan milli komandası Portuqaliya yığması ilə qarşılaşıb. Görüş rəqibin 6:0 hesablı qələbəsi ilə başa çatıb.Oyunlar başa çatdıqdan sonra mükafatlandırma mərasimi keçirilib. Portuqaliya millisindən Andrade Elinton turnirin ən yaxşı qapıçısı, Leonardo Santos isə ən yaxşı oyunçusu seçilib. Hərəyə 6 qol vuran İsveçrə millisinin üzvləri Dejan Stankoviç və Noel Ott turnirin ən məhsuldar oyunçuları olublar. Müvafiq olaraq birinci və ikinci qrupun qalibi olan Portuqaliya və Ukrayna komandalarına kubok təqdim edilib.Komandalara mükafatları Azərbaycan Çimərlik Futbolu Federasiyasının prezidenti Fərid Novruzi, vitse-prezident Fərid Axundov, Dünya Çimərlik Futbolu Federasiyasının vitse-prezidentinin müavini Gabina Renales veriblər.xeber100.com