“Yuventus” klubu 34-cü dəfə İtaliya çempionu adını qazanıb

“Yuventus” klubu tarixində 34-cü dəfə futbol üzrə İtaliya çempionu adını qazanıb.Azərtac xəbər verir ki, Turin komandası buna A Seriyasının sonuna bir tur qalmış nail olub. 37-ci turda səfərdə “Roma” ilə qolsuz heç-heçə edən “Qoca Sinyora” xallarını 92-yə çatdırıb. Meydan sahibləri 68-ci dəqiqədə Raca Nainqqolanın qırmızı vərəqə alması səbəbindən görüşü azlıqda başa vurublar.“Yuventus”un ən yaxın izləyicisi “Napoli” səfərdə “Sampdoriya”nı 72-ci dəqiqədə Arkadiuş Milik və 81-ci dəqiqədə Raul Albiolun qolları sayəsində 2:0 hesabı məğlub edib. Bu qələbədən sonra Neapol komandası xallarını 88-ə çatdırsa da, liderdən 4 xal geri qalıb.Nəticədə “ağ-qaralar” son turun nəticəsindən asılı olmayaraq, ardıcıl 7-ci dəfə A Seriyasının qalibi adını qazanıblar. Xallarını 74-ə çatdıran “Roma” isə bürünc medal qazanmaq şansını son tura saxlayıb.UEFA Avropa Liqasına düşmək uğrunda mübarizə aparan "Milan" və "Atalanta" üz-üzə qəlib. Oyunda hesabı qonaqlar açıblar. Yanik Kesi fərqlənib - 1:0. Matçın əsas vaxtına əlavə olunmuş birinci dəqiqədə meydan sahibləri hesabı bərabərləşdirməyə nail olublar. Masiello adını tabloya yazdırıb - 1:1. Beləliklə görüş 1:1 hesabı ilə başa çatıb.Turun digər oyunlarında aşağıdakı nəticələr qeydə alınıb: “Bonevento” – “Genoya” - 1:0 “İnter” – “Sasuolo” - 1:2 “Bolonya” – “Kievo” - 1:2 “Fiorentino” – “Kalyari” - 0:1 “Verona” – “Udineze” - 0:1 “Torino” – “Spal” - 2:1 Beləliklə 37 turdan sonra İtaliya A Seriyasının bitməsinə bir tur qalmış çempionluğunu təmin edən “Yuventus” 92 xalla turnir cədvəlinə başçılıq edir. “Napoli” 88 xalla ikinci, “Roma” 74 xalla üçüncü, “Lazio” isə 72 xalla dördüncü sırada qərarlaşıblar.Qeyd edək ki, İtaliya çempionatının son turu mayın 19-da və 20-də keçiriləcək.xeber100.com

“Liverpul” klubunun futbolçusu mövsümün ən yaxşı oyunçusu seçilib

İngiltərənin “Liverpul” klubunun misirli futbolçusu Məhəmməd Salah 2017/2018 mövsümün ən yaxşı oyunçusu seçilib.Azərtac xəbər verir ki, Misir milli futbol komandasının heyətində hücumçu kimi çıxış edən peşəkar futbolçu İngiltərə Premyer Liqası tərəfindən mövsümün oyunçusu nominasiyasında qalib olub. O, bu nominasiyaya namizəd olan belçikalı Kevin de Brüyne, Rəhim Sterlinq (hər ikisi “Mançester Siti”), ispan David De Xeya (“Mançester Yunayted”), Hari Keyn (“Tottenxem”) və ingiltərəli Ceyms Tarkovskini (“Börnli”) qabaqlayıb.Qeyd edək ki, İngiltərə Premyer Liqasında sona bir tur qalmış 36 oyunda 32 qol vurmuş Məhəmməd Salah artıq üçüncü dəfədir ki, bu mükafata layiq görülüb. O, daha əvvəl isə Premyer Liqanın oyunçuları və ingiltərəli jurnalistlər tərəfindən ilin futbolçusu nominasiyasında qalib olub. Bundan başqa, 25 yaşlı Salah noyabr, dekabr, fevral və mart aylarının ən yaxşı oyunçusu seçilib.xeber100.com

Boksçular arasında keçirilən turnirin qalibləri müəyyənləşəcək

Bu gün yeniyetmə boksçular arasında “Heydər Əliyev Kuboku-2018” beynəlxalq turnirinin qalibləri müəyyənləşəcək.Azərtac xəbər verir ki, Sumqayıt Olimpiya İdman Kompleksində keçirilən yarışın yarımfinal mərhələsində 26 döyüşdə Azərbaycan millisinin 17 boksçusu rinqə çıxıb. Onlardan 10-u adını finala yazdırıb. Yeddi idmançımız isə turniri bürünc medalla başa vurub.Qazaxıstan millisinin də finalda 10 boksçusu mübarizə aparır. Həlledici döyüşlərdə Ukrayna 4, Gürcüstan 2 idmançı ilə təmsil olunur. Rusiya və Qırğızıstan boksçuları isə yarımfinal səddini keçə bilməyiblər.Qeyd edək ki, yarışa Azərbaycanın 2 komandası ilə yanaşı, Qazaxıstan, Rusiya, Gürcüstan, Qırğızıstan və Ukrayna yığmaları qatılıblar.xeber100.com  

Güləş üzrə dünya çempionatı keçiriləcək

Mərkəzi Ordu İdman Klubunun (MOİK) idmançıları Rusiya paytaxtında keçiriləcək hərbçilər arasında güləş üzrə dünya çempionatında iştirak etmək məqsədilə Moskvaya yola düşüblər.AZərtac xəbər verir ki, MOİK-in komandası mayın 14-dən 20-dək Moskvada keçiriləcək hərbçilər arasında güləş üzrə 33-cü dünya çempionatında mübarizə aparacaq.MOİK növbəti dəfə dünya arenasında uğur qazanmaq üçün yarışlara klubun rəisi, Beynəlxalq Hərbi İdman Şurasında (CISM) Azərbaycan nümayəndə heyətinin rəhbəri Rəşad Quliyevin rəhbərliyi ilə qatılib.Sərbəst və yunan-Roma güləşçilərimizi yüksək səviyyəli yarışlara beynəlxalq dərəcəli idman ustası Nazim Əlicanov və hərbçilər arasında Avropa və dünya birinciliklərinin dördqat çempionu Taleh İsrafilov hazırlayıblar.MOİK-in komandasının heyətində üç qadın güləşçi də mübarizə aparacaq.Qeyd edək ki, çempionata qatılan komandamızın tərkibində dünya və Avropa çempionları, eləcə də Olimpiya Oyunlarının, respublika birinciliklərinin qalibi olan idmançılar əksəriyyət təşkil edirlər.Komandamızın tərkibində beynəlxalq dərəcəli hakimlər Elman İsmayılov və Sədi Quliyev də Moskvaya yola düşüblər.xeber100.com

Futbol üzrə yoldaşlıq oyununun vaxtı müəyyənləşib

Futbol üzrə Azərbaycan milli komandasının Latviya yığması ilə yoldaşlıq oyununun vaxtı müəyyənləşib.Azərtac AFFA-nın saytına istinadən xəbər verir ki, qarşılaşma iyunun 9-da Latviyanın paytaxtı Riqada keçiriləcək.Qeyd edək ki, qarşılaşma Bakı vaxtı ilə saat 20:00-da başlayacaq.xeber100.com

Azərbaycan millisi növbəti yoxlama matçını keçirib

Qadın voleybolçulardan ibarət Azərbaycan millisi növbəti yoxlama matçını keçirib.Azərtac xəbər verir ki, Sloveniyada Qızıl Avropa Liqasına hazırlaşan Faiq Qarayevin yetirmələri bu dəfə Slovakiya yığmasını sınağa çəkiblər. Yığmamız çətinlik çəkmədən qələbə qazanıb - 3:0 (25:19, 25:14, 25:12).Komandamız ilk görüşdə Avstriyaya 4:1 (25:15, 25:22, 25:20, 25:17, 10:15) hesabı ilə qalib gəlmişdi.Qeyd edək ki, mayın 16-dək Mariborda təlim-məşq toplanışında olacaq millimizin Sloveniya və Xorvatiya ilə yoxlama oyunları da nəzərdə tutulub.xeber100.com

“Bakı Marafonu 2018”-in qalibi müəyyənləşib

Heydər Əliyev Fondunun təşəbbüsü ilə keçirilən “Bakı Marafonu 2018”-in qalibi müəyyənləşib.Apa-nın məlumatına görə, “Küləyə qalib gəl” şüarı altında keçirilən Bakı marafonunda marşrutu 1 saat 6 dəqiqəyə qət edən Ukrayna vətəndaşı İqor Qlofrenko birinci olub.Dövlət Bayrağı Meydanından start götürən marafon 21 kilometr məsafəni əhatə edib və Bakı Olimpiya Stadionunda başa çatıb.Bakı marafonu idmanın inkişafına dəstək göstərmək, sağlam həyat tərzini təbliğ etmək, insanları xeyirxah amallar ətrafında bir araya gətirmək məqsədi ilə təşkil olunub.xeber100.com

Ən yüksək ödənişli futbolçuların siyahısı açıqlanıb

MLS-in (ABŞ çempionatı) ən yüksək ödənişli futbolçularının siyahısı açıqlanıb.Apasport.az saytının məlumatına görə, liqanın futbolçular assosiasiyası 2018/19 mövsümündə ən çox qazanacaq oyunçuları müəyyənləşdirib.Cədvələ “Toronto”nun yarımmüdafiəçisi Sebastyan Covinko başçılıq edir. Onun qazancı 7,1 milyon dollar olacaq. İlk onluqda Maykl Bredli (“Toronto”, 6,5 milyon), Karlos Vela (“Los-Anceles”, 6,29 milyon), Bastian Şvaynştayger (“Çikaqo”, 6,1 milyon), Covanni dos Santos (“Los-Anceles Qalaksi”, 6 milyon), David Vilya (“Nyu York Siti”, 5,6 milyon, Jozi Altidor (“Toronto”, 5 milyon), İqnasio Pyati (“Monreal”, 4,7 milyon), Tim Hovard (“Kolorado”, 2,47 milyon) və Diyeqo Valeri (“Portlend”, 2,39 milyon) də ilk “onluq”da yer alıb.Maraqlıdı ki, isveçli Zlatan İbrahimoviç liderlərdən uzaq düşüb. “Los Anceles Qalaksi”dəki qazancı 1,5 milyon dollar olan futbolçu siyahıda 25-cidi.xeber100.com

UEFA “Qalatasaray” klubu ilə bağlı qərarını açıqlayıb

UEFA “Qalatasaray”ı cəzalandırmayacaq. Apasport.az saytının Türkiyə mətbuatına istinadən məlumatına görə, bunu “sarı-qırmızılılar”ın prezidenti Mustafa Cengiz deyib.O bildirib ki, komandanın gələn mövsüm avrokuboklarda iştirakında hər hansı bir problem olmayacaq: “UEFA-dan xəbər aldım. Avrokuboklara qatılmağımıza əngəl törədilməyəcək. Yəni avrokuboklardan kənarlaşdırılma cəzası almayacağıq. Yaxın günlərdə Cenevrəyə gedib bir müqavilə imzalayacam. UEFA-nın bizdən bəzi tələbləri olacaq. Bu tələblərə əməl etməklə avrokuboklara qatılacağıq”.Qeyd edək ki, “Qalatasaray” Superliqada sona 2 tur qalmış turnir cədvəlinə başçılıq edir.xeber100.com

Şirkətlər arasında ticarət sazişi imzalanıb

Formula 1 və “Fanatics” şirkətləri arasında ticarət sazişi imzalanıb.Azərtac xəbər verir ki, lisenziyalı idman ticarətində dünya lideri olan “Fanatics” şirkəti 2018-ci ildən etibarən Qran-Pri həftəsonlarında və onlayn şəkildə yarışın eksklüziv ticarət tərəfdaşı olacaq.Bu əməkdaşlığa imza atmaqla Formula 1 istehlak mallarının artımı istiqamətində böyük addım atmaq niyyətindədir. Şirkətin məqsədlərindən biri də Qran-Pri zamanı, onlayn, eləcə də telefon vasitəsilə alış-veriş edən yarış azarkeşləri üçün fərqli satış kanalları yaratmaqdır.“Fanatics” şirkəti ticarətin həcmini artıraraq, Formula 1, həmçinin Formula 1 üzrə dünya çempionatında iştirak edən komandaların premium məhsullarının və hər Qran-Pri üçün xarakterik olan əşyaların satışını həyata keçirəcək.Formula 1-in kommersiya şöbəsinin icraçı direktoru Şon Breçes əməkdaşlıqla bağlı deyib: “Bütün Qran-prilərdə apardığımız araşdırmalardan məlum oldu ki, azarkeşlər daha səmərəli alış-veriş etmək istəyirlər. İnanırıq ki, bu əməkdaşlıq Qran-Pri zamanı azarkeşlərin növbəsiz şəkildə daha çox çeşidli və keyfiyyətli alış-veriş etmələrinə şərait yaradacaq. Əməkdaşlığın əsas müsbət nəticəsi isə istər Formula 1 brendi altında, istərsə də komandaların təklif etdiyi məhsulların satışında olacaq artımdır”.xeber100.com