“Neftçi” futbol klubuna yeni baş məşqçi təyin edilib

“Neftçi” futbol klubunun Müşahidə Şurasının və təsisçilərin növbədənkənar ümumi yığıncağı keçirilib.Azərtac xəbər verir ki, iclasda əsas komandanın baş məşqçisi postuna namizədin müzakirəsi aparılıb və italiyalı mütəxəssis Roberto Bordin bu vəzifəyə təyin edilib.Komandanın yeni baş məşqçisi 1965-ci il yanvarın 10-da anadan olub. 2005-ci ildə futbolçu karyerasını bitirən Roberto Bordin həmin il məşqçilik fəaliyyətinə başlayıb. O, İtaliyanın “Bolonya”, “Padova”, “Hellas Verona”, “Sassuolo”, Rumıniyanın ÇFR klublarında məşqçi, İtaliyanın “Triestina” və Moldovanın “Şerif” klublarında baş məşqçi vəzifələrində çalışıb.Məşqçi kimi 2010-cu ildə Rumıniya çempionu olub. 2016-2018-ci illərdə çalışdırdığı “Şerif” Moldova çempionatının, kubokunun və Superkubokunun qalibi olub. İtaliyalı məşqçi 2017-ci ildə komandanı UEFA Avropa Liqasının qrup mərhələsinə çıxarıb. 2018-ci ildə İtaliya Futbol Federasiyasının qərarı ilə “Qızıl skamya” mükafatına layiq görülüb.xeber100.com

Beynəlxalq idman turniri keçiriləcək

İyunun 16-da Gənclər və İdman Nazirliyinin, Milli Olimpiya Komitəsinin təşkilati dəstəyi ilə beynəlxalq səviyyəli ekstremal idman turniri - “Mübarizlər” yarışı keçiriləcək.Azərtac xəbər verir ki, ötən il Bakıda təşkil olunan və böyük maraq doğuran “Mübarizlər” layihəsi ikinci mövsümdə ekstremal idman həvəskarlarına fəal istirahətin tamamilə yeni formatını - çətin keçilən ərazidə maneəli qaçış təklif edir. Maneələr məxsusi olaraq elə hazırlanıb ki, trasın qət edilməsi zamanı iştirakçıların bütün qrup əzələləri hərəkətdə olur. Qaydalara əsasən, iştirakçılar yarış ərzində 5 kilometr uzunluğunda trası qət etməlidirlər. Daha sonra çempionat iştirakçıları uzunluğu 7 kilometr olan 42 maneədən ibarət məsafə üzrə qüvvələrini sınayacaqlar.Ötənilki yarışdan fərqli olaraq bu mövsümdə “Mübarizlər” layihəsində hər iki formatda iştirak edənlər üçün pul mükafatı nəzərdə tutulub. Yarışın ümumi mükafat fondu 15 min manatdır. Qalib komandalar və fərdi iştirakçılar sentyabrda keçiriləcək Super Finala vəsiqə qazanacaqlar. Bundan əlavə, fəal iştirakçılar çoxlu sayda qiymətli hədiyyələrlə təltif ediləcəklər.Hər iki format üçün avtopark, idman və əyləncə fəaliyyəti təqdim edən fan-zona, konsert proqramı, duş kabinələri və soyunub-geyinmə otaqları nəzərdə tutulub. Fiziki formasından asılı olmayaraq, yarışda arzu edən hər kəs iştirak edə bilər.Hazırda maneəli yarışlar bütün dünyada məşhurlaşan fəaliyyətlərdən biridir. Yeni idman növünə çevrilən bu yarışlar artıq klassik idman növlərini geridə qoyur. Dünyanın ən məşhur trendlərdən birinə qovuşmaq, idman və sağlamlıq festivalında əylənmək və həmfikirləri ilə ünsiyyət yaratmaq üçün gənclərə bu unikal şansdan istifadə etmək təklif olunur.Yarışda iştirak etmək üçün biletləri “Iticket” kassalarından əldə etmək mümkündür.xeber100.com

Rusiyada keçiriləcək XXI dünya çempionatı ərəfəsində

Rusiyada keçiriləcək futbol üzrə XXI dünya çempionatı ərəfəsində Moskva vilayətinin Odintsovo rayonundakı Bakovkada məşqlərə başlayan İran yığmasının hücumçusu Reza Quçannecad müqəddəs Ramazan ayının komandaya təsirindən danışıb.Azərtac xəbər verir ki, futbolçu deyib: “Ramazan ayında oruc tutmağımız məşq prosesinə o qədər də güclü təsir etmir. Futbol böyük fiziki yük səbəbindən xüsusi yanaşma tələb edən idman növüdür. Ona görə özümüzü bir az zəif hiss edirik. Dünya çempionatının qrup mərhələsində üç mühüm matçımız, o cümlədən bizim üçün müəyyən mənada final olacaq Mərakeş komandası ilə görüşümüz var. Ona görə də bütün diqqətimizi məşq prosesinə yönəltmişik”.xeber100.com

“Real Madrid” klubu “Santos”un hücumçusunu heyətinə qatıb

İspaniyanın “Real Madrid” klubu Braziliyanın “Santos” komandasının 17 yaşlı hücumçusu Rodriqonu heyətinə qatıb.Azərtac xəbər verir ki, transferin məbləği 45 milyon avrodur. Rodriqo 18 yaşı tamam olanadək “Kral klubu”nun əvəzedici heyətində çıxış edəcək.Bu futbolçuya “Barselona” klubu da maraq göstərirdi.xeber100.com

Futbolçulardan ibarət yığma komandalar arasında yoldaşlıq oyunu keçiriləcək

İyunun 8-də 21 yaşadək futbolçulardan ibarət Azərbaycan və Macarıstan yığma komandaları arasında yoldaşlıq oyunu keçiriləcək.Azərtac xəbər verir ki, Macarıstan yığmasının heyətinə 1997-1998-ci il təvəllüdlü futbolçular daxil edilib. “Dalğa Arena”da oynanılacaq qarşılaşmanı referi İnqilab Məmmədov idarə edəcək. Onun köməkçiləri Knyaz Əmiraslanov və Cəmil Quliyev olacaq. Dördüncü hakim funksiyasını Orxan Məmmədov yerinə yetirəcək. Görüş Bakı vaxtı ilə saat 19:00-da başlayacaq.xeber100.com  

BMX üzrə dünya çempionatının nəticələrinə əsasən…

Bakıda BMX üzrə dünya çempionatında ilk üç günün nəticələrinə əsasən artıq 28 ölkənin velosipedçiləri mükafatçılar sırasında yer alıblar.Azərtac xəbər verir ki, medal sayına görə birinci yerdə Niderland idmançıları qərarlaşıblar. Onlar 19 dəfə podiuma qalxıblar.Qırx üç ölkədən 1500-dək idmançının qatıldığı mundialda 15 fransalı, 13 avstraliyalı, 9 braziliyalı və britaniyalı, 7 ABŞ, eyni sayda Latviya və Yeni Zelandiya velosipedçisi fərqlənməyi bacarıb.Gərgin idman mübarizəsi şəraitində keçən yarışlarda Estoniya, Venesuela, Danimarka, Çexiya, İtaliya və Almaniya velosipedçiləri Bakı mundialında ilk podium sevinci yaşayıblar.Dünya çempionatına iyunun 9-da yekun vurulacaq.xeber100.com

FIFA dünya çempionatının matçlarında

FIFA dünya çempionatının matçlarına 2. 403.116 bilet satıb. Azərtac FIFA-nın rəsmi saytına istinadla xəbər verir ki, biletlərin çoxu (871.797) rusiyalı azarkeşlərin payına düşüb, 54 faizi isə xarici azarkeşlər arasında paylaşdırılıb.Ən çox bilet alan ilk on ölkə sırasına ABŞ (88.825), Braziliya (72.512), Kolumbiya (65.234), Almaniya (62.541), Meksika (60.302), Argentina (54.031), Peru (43.583), Çin (40.251), Avstraliya (36.359) və İngiltərə (32.362) daxil olub.FIFA-nın müxtəlif müştəri qrupları üçün ehtiyatda saxlanılan 100.000-dən çox əlavə bilet iyunun 8-də qurumun rəsmi saytında satışa çıxarılacaq.Bu kvota bütün matçlara, habelə müəyyən matçlara 4-cü dərəcəli biletləri ehtiva edir.xeber100.com

Milli Atçılıq Festivalı çərçivəsində…

Azərbaycan Respublikası Atçılıq Federasiyasının (ARAF) Azərbaycan Xalq Cümhuriyyətinin yaradılmasının 100 illik yubileyi münasibətilə təşkil etdiyi Milli Atçılıq Festivalı çərçivəsində iyunun 7-də çövkən milli atüstü oyunu üzrə “100 İllik Yubiley Kuboku” turnirinin yarımfinal mərhələsinə start verilib.Azərtac xəbər verir ki, yarımfinalda “Sərhədçi”, “Polad”, “Buta Qolden” və “Omar” kollektivləri mübarizə aparırlar. İlk görüşdə “Polad” və “Omar” komandaları qarşılaşırlar. Günün ikinci oyununda isə “Buta Qolden” və “Sərhədçi” komandaları finala vəsiqə uğrunda mübarizə aparacaqlar.Turnirdə üçüncü yer uğrunda oyun və final görüşü iyunun 9-da keçiriləcək. Yarışın mükafat fondu 50 min manatdır.İyunun 2-də start götürən Milli Atçılıq Festivalına bu ayın 17-də yekun vurulacaq. Festivalın birinci günündə Binə Atçılıq Mərkəzində cıdır üzrə “100 İllik Yubiley Kuboku” turniri keçirilib.Festival çərçivəsində iyunun 8-də atçılığın konkur növü üzrə Heydər Əliyev Kuboku turniri təşkil olunacaq. “Elite Horse & Polo Club”un yaşıl arenasında keçiriləcək və iki kateqoriyadan ibarət olacaq turnirin ümumi mükafat fondu 34 min manatdır.İyunun 15-17-də isə Azərbaycan, Almaniya, İrlandiya və Hindistanı təmsil edən klubların iştirakı ilə artıq altıncı dəfə ölkəmizdə arena polo üzrə Dünya Kuboku yarışları keçiriləcək. Üç gün davam edəcək turnirdə ümumilikdə altı oyun olacaq. Azərbaycanı bu mötəbər yarışda milli polo komandasının idmançılarından ibarət “Elite Horse & Polo Club”u təmsil edəcək.xeber100.com

“Altibox Norway Chess 2018” superturnirində

Norveçin Stavanger şəhərində keçirilən “Altibox Norway Chess 2018” superturnirində liderlik edən 4 qrossmeyster – Maqnus Karlsen, Fabiano Karuana, Hikaru Nakamura və Uesli So eyni nəticə göstərir.Azərtac xəbər verir ki, bu qrossmeysterlərdən hər birinin aktivində 7 mümkün xaldan 4 xal var. Azərbaycan qrossmeysteri Şəhriyar Məmmədyarovun və daha 3 iştirakçının hərəsinin 3,5 xalı var. Lakin Məmmədyarov onlardan bir oyun çox keçirib.Səkkizinci turda Amerika nümayəndəsi Hikaru Nakamura rusiyalı Sergey Karyakinə qalib gəlib, hindistanlı Vişvanatan Anand ABŞ təmsilçisi Fabiano Karuanaya uduzub, norveçli Maqnus Karlsen ilə Şəhriyar Məmmədyarovun, habelə amerikalı Uesli So ilə fransız Maksim Vaşye-Laqravın görüşləri sülhlə başa çatıb.Sonuncu, doqquzuncu turda bu cütlüklər qarşılaşacaqlar: Fabiano Karuana – Uesli So, Levon Aronyan – Hikaru Nakamura, Maksim Vaşye-Laqrav – Maqnus Karlsen, Sergey Karyakin - Vişvanatan Anand. Bu turda Şəhriyar Məmmədyarov oynamayacaq.xeber100.com

“Yuventus” və “Milan” arasında oyun Səudiyyə Ərəbistanında keçiriləcək 

Futbol üzrə İtaliya Superkuboku uğrunda “Yuventus” və “Milan” komandaları arasında oyun Səudiyyə Ərəbistanında keçiriləcək. “Calciomercato” saytı xəbər verir ki, komandaların görüşünün avqustda keçirilməsi nəzərdə tutulsa da, matçın vaxtı 2019-cu il yanvarın 13-nə dəyişdirilib. Beləliklə, görüş həmin tarixdə Səudiyyə Ərəbistanının Ciddə şəhərində oynanılacaq.Bununla əlaqədar əldə olunan razılaşmaya əsasən, Səudiyyə Ərəbistanı Futbol Federasiyası İtaliya Futbol Federasiyasına 7 milyon avro vəsait ödəyəcək. Məbləğin 45 faizinin “Yuventus” və “Milan” komandaları arasında bölüşdürülməsi nəzərdə tutulur.xeber100.com