İspaniya La Liqasının XXIV turunda

Futbol üzrə İspaniya La Liqasının XXIV turunda lider "Barselona" səfərdə "Eibar"ın qonağı olub.Azərtac xəbər verir ki, matçda hesabı qonaqlar açıblar. Görüşün 16-cı dəqiqəsində Luis Suares fərqlənib. İlk hissə bu hesabla da başa çatıb.Fasilədən sonra "Eibar"ın hücumçusu Fabian Orellana etdiyi qayda pozuntusuna görə ikinci sarı vərəqəni alaraq komandasını azlıqda qoyub. Təzyiqi artıran Kataloniya təmsilçiləri oyunun 88-ci dəqiqəsində Jordi Albanın qolu ilə hesab arasındakı fərqi iki topa çatdırıblar.Beləliklə matç "Barselona"nın 2:0 hesablı qələbəsi ilə yekunlaşıb.Həftənin qarşılaşmasında isə "Atletiko Madrid" klubu doğma meydanda "Atletik Bilbao"nu məğlub edib. Görüşün 67-ci dəqiqəsində Kevin Gameiro oyunda hesabı açıb. Qarşılaşmanın 80-ci dəqiqədə Dieqo Kosta komandasının ikinci qolunu vurub - 2:0. Oyun bu hesabla da bitib.Turun maraqla gözlənilən matçlarından biridə "Real Betis" və "Real Madrid" klubları arasında olub. Matçda hesab 11-ci dəqiqədə açılıb. Kral klubunun yarımmüdafiəçisi Marko Asensio hədəfi dəqiq nişan alıb. Görüşün 33-cü dəqiqəsində Aissa Mandi meydan sahiblərinin bərabərlik qolunu vurub. İlk hissənin 37-ci dəqiqəsində müdafiəçi Fernandez vurduğu avtoqol ilə "Betis" hesabda önə çıxıb -2:1. Komandalar fasiləyə bu hesabla yollanıblar.Oyunun 50-ci dəqiqəsində Serxio Ramos hesabı bərabərləşdirib. Bu qoldan yeddi dəqiqə sonra M.Asensio komandasını hesabda önə çıxarıb. Görüşün 66-cı dəqiqəsində Kriştianu Ronaldu hesab arasındakı fərqi bir qədərdə artırıb - 2:4."Betis"in hücumçusu Serxio Leon 85-ci dəqiqədə hesab arasındakı fərqi minimuma endirib - 3:4. Matçın əsas vaxtının son dəqiqəsində Kərim Benzema komandasının beşinci qoluna imza atıb.Beləliklə oyun "Real Madrid"in 5:3 hesablı qələbəsi ilə başa çatıb.xeber100.com

“Hamburq” futbol klubunun yeni prezident müəyyənləşib

Almaniyanın “Hamburq” futbol klubunun yeni prezident müəyyənləşib.Azərtac xəbər verir ki, Bernd Hoffman seçkilərdə qalib gələrək “Hamburq”un yeni prezidenti olub. Ona 585 nəfər səs verib.B.Hoffman klubun rəsmi saytında qələbəsini belə şərh edib: “Qarşımızda böyük tapşırıq var. Elə işləməliyik ki, bizim əleyhimizə səs verənləri də təəccübləndirək”.Qeyd edək ki, Hoffman əvvəllər də “Hamburq”da prezident postunu tutub. O, 2011-ci ildə bu vəzifəni tərk edib.xeber100.com

“Synergy Baku Cycling Project” komandasıilk uğuruna imza atıb

Ölkəmizin şose velosipedi üzrə “Synergy Baku Cycling Project” kontinental komandası 2018-ci ildə ilk uğuruna imza atıb. Türkiyədə keçirilən birgünlük Alanya Qran-Prisi elit yığmamızın və “Synergy Baku”nun üzvü Kiril Pozdnyakovun qələbəsi ilə yekunlaşıb.Azərtac xəbər verir ki, Beynəlxalq Velosipedçilər İttifaqının (UCİ) 175 kilometrdən ibarət 1.2 kateqoriyalı yarışında ümumilikdə 21 komanda iştirak edib.Alanya Qran-Prisində Elçin Əsədov, Elgün Əlizadə, Kiril Pozdnyakov, Ənvər Asanov, Samir Cəbrayılov, Musa Mikayılzadə və Aleksandr Polivadadan ibarət heyətlə mübarizə aparan “Synergy Baku”nun əla komanda işinin nəticəsi olaraq Kiril Pozdnyakov məsafəni 4 saat, 3 dəqiqə, 42 saniyəyə başa vurub və ən yaxın izləyicisini 1 dəqiqə, 20 saniyə qabaqlamaqla “solo-finiş” edib. Bu qalibiyyət velosipedçimizə, həmçinin 40 reytinq xalı da qazandırıb. Bundan başqa, finişi 4-cü keçən Polivada komandamızın aktivinə daha 20 xal əlavə edib.Qeyd edək ki, “Synergy Baku”nu həftəsonu Türkiyədə keçiriləcək daha bir yarış gözləyir. Velosipedçilərimiz fevralın 22-25-də təşkil olunacaq 2.2 kateqoriyalı 4 mərhələdən ibarət Antalya Turunda mübarizə aparacaqlar.xeber100.com

Azərbaycan yığmasının növbəti təlim-məşq toplanışı keçiriləcək

Fevralın 20-25-də gənc boksçulardan ibarət Azərbaycan yığmasının növbəti təlim-məşq toplanışı keçiriləcək.Azərtac Azərbaycan Boks Federasiyasının saytına istinadən xəbər verir ki, milli komandamız Balakəndə başladığı hazırlıq prosesini Belarusun Qomel şəhərində davam etdirəcək.Yığmamızın baş məşqçisi Vaqif Şirinov toplanışda 15 idmançını sınaqdan keçirəcək.Millimizin Belarusdakı təlim-məşq toplanışına Maqsud Xasmətov, Vüqar Hüseynov (hər ikisi 49 kq), Əflatun Babayev, Mirmehdi Mehdizadə (hər ikisi 52 kq), Orxan Həsənov, Əlizamin Səlimov (hər ikisi 56 kq), Nurlan Səfərov, Nəbi İsgəndərov (hər ikisi 60 kq), Səbuhi Abışov (64 kq), Nicat Həsənov, Məhəmməd Yusifov, Cahid Qurbanov (hamısı 69 kq), Rəsul Rzayev (75 kq), Zaur Musayev (81 kq), İsmayıl Yaqubov (91 kq) cəlb olunublar.Fevralın 19-da səfərə yollanan millimiz Qomeldə əsasən ümumi və fiziki hazırlıq üzərində çalışacaqlar.xeber100.com

Peşəkar Tennisçilər Assosiasiyasının reytinqində

İsveçrəli Rocer Federer idmanın tennis növü tarixində reytinq cədvəlinin ən yaşlı lideri kimi Peşəkar Tennisçilər Assosiasiyasının (ATP) reytinqinə başçılıq edir. Federer 36 yaşında dünyanın birinci raketkası adını qazanıb.Bu vaxtadək ən yaşlı tennisçi kimi reytinqə amerikalı Andre Aqassi başçılıq edirdi. O, 2003-cü ildə 33 yaşında ikən bu zirvəni fəth etmişdi.Federer ötən həftə Rotterdamda keçirilən turnirin qalibi olub və mövsüm ərzində toplanan xalların sayına görə ispaniyalı Rafael Nadalı qabaqlayıb. Lakin o, bu yarışların yarımfinalına çıxmaqla, artıq özünə reytinqdə birinci yeri təmin edib.Hazırda isveçrəlinin hesabında 20-si “Böyük dəbilqə” seriyası yarışlarında qazanılmaqla, ATP-nin 97 tutulu var.Federer ilk dəfə reytinqə 2004-cü ildə başçılıq edib və ümumilikdə, birinci yerdə mövqeyini 302 həftə (237 həftə ardıcıl olmaqla) qoruyub. Sonuncu dəfə o, bu zirvədə 2012-ci ildə olub.Əlavə edək ki, Rocer hələ ən azı 4 həftə, yəni İndian-Uels turniri başa çatanadək (martın 18-dək) birinci raketka mövqeyində qalmasını təmin edib. Həmin turnirdə o öz titulunu qoruyub saxlamaq uğrunda mübarizə aparacaq.Beləliklə, o, reytinq zirvəsində olması müddətini rekord səviyyəyə - 306 həftəyə çatdıracaq. Bu göstərici üzrə ikinci yerdə Pit Sampras (286), hazırkı tennisçilərdən isə Novak Cokoviçdir (223).xeber100.com

İstanbulda atletika üzrə beynəlxalq turnirdə

İstanbulda qapalı məkanlarda atletika üzrə beynəlxalq turnirdə Azərbaycan idmançısı Zəkiyyə Həsənova bürünc medal qazanıb.Azərtac xəbər verir ki, atletimiz 60 metr məsafəyə qaçış yarışlarında 7,45 saniyə nəticə ilə üçüncü olub. Bu nəticə ilə Z.Həsənova Azərbaycan rekordunu yeniləyib.xeber100.com

İngiltərə Federasiya Kuboku 1/8 final mərhələsində

İngiltərə Federasiya Kubokunda 1/8 final mərhələsinə start verilib. Apasport.az saytının məlumatına görə, bu gün 2 qarşılaşma baş tutub. "Lester" öz meydanında "Şeffild Yunayted"i Ceymi Vardinin yeganə qolu sayəsində məğlub edib. Digər görüşdə isə "Çelsi" "Hall Siti"yə çətinlik çəkmədən qalib gəlib - 4:0.Bu qələbə sayəsində "Çelsi" və "Lester" adlarını 1/4 final mərhələsinə yazdırıblar. İngiltərə Federasiya Kuboku 1/8 final "Lester" - "Şeffild Yunayted" - 1:0 Qol: Vardi, 66 "Çelsi" - "Hall Siti" - 4:0 Qollar: Villian, 2, 32; Pedro, 27; Jiru, 42 Qeyd edək ki, mərhələnin digər oyunları fevralın 17-18-də keçiriləcək.xeber100.com

“Football Italia”nın məlumatına görə…

FİFA prezidenti Canni İnfantino qış transfer pəncərəsini ləğv etməyi təklif edib.Apa-nın məlumatına görə, bu barədə “Football Italia” xəbər verib.Məlumata əsasən, qurumun rəhbəri həmçinin klublarda oyunçuların sayının azaldılması və futbolçulara məvacib məhdudiyyətinin tətbiq edilməsi təşəbbüsü ilə çıxış edib.Təklif edilən islahatlara fevralın 28-də FİFA-nın icraiyyə komitəsində baxılacaq.xeber100.com

Həndbol Federasiyasının məlumatı əsasında…

Qadın həndbolçuların Azərbaycan çempionatında mübarizəsi davam edir.Azərbaycan Həndbol Federasiyasından Azərtac-a bildiriblər ki, Mingəçevirdə yerləşən “Kür” Olimpiya İdman Mərkəzində son ölkə çempionu olan “Nur” komandası “İdman Akademiyası”nı qəbul edib. Meydan sahiblərinin üstünlüyü ilə keçən görüş Mingəçevir təmsilçisinin xeyrinə başa çatıb – 32:16. Bu, çempionata elə də yaxşı başlamayan “Nur”un yeni ildən etibarən ardıcıl üçüncü qələbəsi olub.Xatırladaq ki, “Nur” komandası “Gənclər Birliyi” həndbolçularını 44:20, “Azəryol” kollektivini isə 22:20 hesabı ilə məğlub edib.xeber100.com

“Pxençan-2018” Qış Olimpiya Oyunlarının yeddinci günündə

“Pxençan-2018” Qış Olimpiya Oyunlarının yeddinci günündə - fevralın 15-də atletlər 9 dəst medal uğrunda yarışıblar. Almaniya millisi öz hesabına əlavə iki qızıl və bir bürünc medal yazdıraraq liderliyini möhkəmləndirib. İspaniya snoubord, Sloveniya isə biatlon yarışlarında ilk medalını qazanıb.Azərtac xəbər verir ki, sərbəst xizək üzrə qadınlar arasında 10 kilometr məsafəyə mübarizədə məsafəni 25 dəqiqəyə qət edən norveçli Ragnhild Haqa “Pxençan-2018”in çempionu olub. İsveç təmsilçisi Şarlotte Kallanın gümüş medal qazanıb. Yarışda eyni nəticə göstərdikləri üçün Norveç xizəkçisi Marit Byoergen və finlandiyalı Krista Parmakoski bürünc medala layiq görülüblər.Kişilərin 10 min metr məsafəyə konkisürmə yarışlarında kanadalı Ted-Yan Bloemen 12 dəqiqə 39 saniyə nəticə ilə Olimpiya rekorduna imza ataraq qızıl medal qazanıb. Digər iki pillədə isə niderlandlı Yorrit Berqsmay və İtaliya atleti Nikola Tumolerom yer alıblar.Kişilər arasında snoubord yarışlarının kross növündə qalib adına Fransa təmsilçisi Piyer Vaultier sahib olub. Avstraliya təmsilçisi Jerrid Huqes gümüş, İspaniya idmançısı Regino Hernandez isə bürünc medal əldə ediblər.Oyunların yeddinci günündə biatlon yarışlarında iki dəst medal sahibini tapıb. Qadınlar arasında 15 kilometr məsafəyə fərdi yarışlarında İsveç idmançısı Anna Oeberq marşrutu 47 dəqiqə 7 saniyəyə qət edərək bütün rəqiblərini qabaqlayıb. Slovakiyalı Anastasiya Kuzmina yarışı ikinci, Almaniya atleti Laura Dahlmeyer isə üçüncü pillədə başa vurublar.Kişilər arasında 20 kilometr məsafəyə fərdi yarışlarda isə norveçli Yohannes Tingnes Boe 48 dəqiqə 3 saniyə nəticə ilə fəxri kürsünün ən yüksək pilləsinə qalxıb. Sloveniya idmançısı Yakov Fak gümüş, Avstriya təmsilçisi Dominik Landertinger bürünc medala sahib olublar.Fiqurlu konkisürmə yarışlarının sərbəst proqramında 235,90 xalla Almaniya təmsilçiləri Alyona Savçenko və Bruno Massot Olimpiya çempionu adını qazanıblar. Çinli cütlük Vencinq Sui və Conq Han gümüş, Kanada atletləri Meqan Dunamel və Erik Radford bürünc medal qazanıblar.Olimpiadada atletlər dağ xizəkçiliyi yarışlarında da iki dəst medal uğrunda mübarizə aparıblar. Kişilər arasında sürətli eniş yarışlarında ilk iki pillədə norveçli xizəkçilər Aksel Lund Svindal və Kyetil Cansurd qərarlaşıblar. İsveçrəli atlet Bit Feuz isə yarışı üçüncü pillədə tamamlayıb.Qadınların böyük slalom yarışlarında isə ABŞ təmsilçisi Mikaela Şiffrin bütün rəqiblərindən üstün olub. Norveçli Ragnhild Movinkel gümüş, italiyalı Federika Brinyone bürünc medala layiq görülüblər.Kirşəsürmə idmanı üzrə kişilərin komanda yarışında Almaniya birinci, Kanada ikinci, Avstriya isə üçüncü pillədə yer alıblar.“Ağ Olimpiada”da yeddinci günün yekunlarına görə, Almaniya millisi “Pxençan-2018” Qış Olimpiya Oyunlarının medal sıralamasında liderliyini davam etdirir. Bu ölkənin hesabında 9 qızıl, 2 gümüş və 4 bürünc medal var. Ümumilikdə 21 ölkədən idmançılar medalçılar arasında yer alıblar.Norveç (6-7-4) ikinci, Niderland (5-5-2) üçüncü, ABŞ (5-1-2) dördüncü, Kanada (4-5-4) isə beşinci pillədə qərarlaşıb.xeber100.com