Həndbol Federasiyasının məlumatı əsasında…

Qadın həndbolçuların Azərbaycan çempionatında mübarizəsi davam edir.Azərbaycan Həndbol Federasiyasından Azərtac-a bildiriblər ki, Mingəçevirdə yerləşən “Kür” Olimpiya İdman Mərkəzində son ölkə çempionu olan “Nur” komandası “İdman Akademiyası”nı qəbul edib. Meydan sahiblərinin üstünlüyü ilə keçən görüş Mingəçevir təmsilçisinin xeyrinə başa çatıb – 32:16. Bu, çempionata elə də yaxşı başlamayan “Nur”un yeni ildən etibarən ardıcıl üçüncü qələbəsi olub.Xatırladaq ki, “Nur” komandası “Gənclər Birliyi” həndbolçularını 44:20, “Azəryol” kollektivini isə 22:20 hesabı ilə məğlub edib.xeber100.com

“Pxençan-2018” Qış Olimpiya Oyunlarının yeddinci günündə

“Pxençan-2018” Qış Olimpiya Oyunlarının yeddinci günündə - fevralın 15-də atletlər 9 dəst medal uğrunda yarışıblar. Almaniya millisi öz hesabına əlavə iki qızıl və bir bürünc medal yazdıraraq liderliyini möhkəmləndirib. İspaniya snoubord, Sloveniya isə biatlon yarışlarında ilk medalını qazanıb.Azərtac xəbər verir ki, sərbəst xizək üzrə qadınlar arasında 10 kilometr məsafəyə mübarizədə məsafəni 25 dəqiqəyə qət edən norveçli Ragnhild Haqa “Pxençan-2018”in çempionu olub. İsveç təmsilçisi Şarlotte Kallanın gümüş medal qazanıb. Yarışda eyni nəticə göstərdikləri üçün Norveç xizəkçisi Marit Byoergen və finlandiyalı Krista Parmakoski bürünc medala layiq görülüblər.Kişilərin 10 min metr məsafəyə konkisürmə yarışlarında kanadalı Ted-Yan Bloemen 12 dəqiqə 39 saniyə nəticə ilə Olimpiya rekorduna imza ataraq qızıl medal qazanıb. Digər iki pillədə isə niderlandlı Yorrit Berqsmay və İtaliya atleti Nikola Tumolerom yer alıblar.Kişilər arasında snoubord yarışlarının kross növündə qalib adına Fransa təmsilçisi Piyer Vaultier sahib olub. Avstraliya təmsilçisi Jerrid Huqes gümüş, İspaniya idmançısı Regino Hernandez isə bürünc medal əldə ediblər.Oyunların yeddinci günündə biatlon yarışlarında iki dəst medal sahibini tapıb. Qadınlar arasında 15 kilometr məsafəyə fərdi yarışlarında İsveç idmançısı Anna Oeberq marşrutu 47 dəqiqə 7 saniyəyə qət edərək bütün rəqiblərini qabaqlayıb. Slovakiyalı Anastasiya Kuzmina yarışı ikinci, Almaniya atleti Laura Dahlmeyer isə üçüncü pillədə başa vurublar.Kişilər arasında 20 kilometr məsafəyə fərdi yarışlarda isə norveçli Yohannes Tingnes Boe 48 dəqiqə 3 saniyə nəticə ilə fəxri kürsünün ən yüksək pilləsinə qalxıb. Sloveniya idmançısı Yakov Fak gümüş, Avstriya təmsilçisi Dominik Landertinger bürünc medala sahib olublar.Fiqurlu konkisürmə yarışlarının sərbəst proqramında 235,90 xalla Almaniya təmsilçiləri Alyona Savçenko və Bruno Massot Olimpiya çempionu adını qazanıblar. Çinli cütlük Vencinq Sui və Conq Han gümüş, Kanada atletləri Meqan Dunamel və Erik Radford bürünc medal qazanıblar.Olimpiadada atletlər dağ xizəkçiliyi yarışlarında da iki dəst medal uğrunda mübarizə aparıblar. Kişilər arasında sürətli eniş yarışlarında ilk iki pillədə norveçli xizəkçilər Aksel Lund Svindal və Kyetil Cansurd qərarlaşıblar. İsveçrəli atlet Bit Feuz isə yarışı üçüncü pillədə tamamlayıb.Qadınların böyük slalom yarışlarında isə ABŞ təmsilçisi Mikaela Şiffrin bütün rəqiblərindən üstün olub. Norveçli Ragnhild Movinkel gümüş, italiyalı Federika Brinyone bürünc medala layiq görülüblər.Kirşəsürmə idmanı üzrə kişilərin komanda yarışında Almaniya birinci, Kanada ikinci, Avstriya isə üçüncü pillədə yer alıblar.“Ağ Olimpiada”da yeddinci günün yekunlarına görə, Almaniya millisi “Pxençan-2018” Qış Olimpiya Oyunlarının medal sıralamasında liderliyini davam etdirir. Bu ölkənin hesabında 9 qızıl, 2 gümüş və 4 bürünc medal var. Ümumilikdə 21 ölkədən idmançılar medalçılar arasında yer alıblar.Norveç (6-7-4) ikinci, Niderland (5-5-2) üçüncü, ABŞ (5-1-2) dördüncü, Kanada (4-5-4) isə beşinci pillədə qərarlaşıb.xeber100.com

UEFA Avropa Liqası final mərhələsi çərçivəsində

Bu gün UEFA Avropa Liqasında onaltıdabir final mərhələsi çərçivəsində növbəti görüşlər keçirilib.Azərtac xəbər verir ki, bu mərhələnin ilk oyunları çərçivəsində daha 15 görüş baş tutub.Cari mövsümdə “Qarabağ”ın Çempionlar Liqasında rəqibləri olmuş Danimarkanın “Kopenhagen” klubu ilə Madridin “Atletiko” komandasının dueli qarşılıqlı idman mübarizəsi şəraitində keçib. Matçın sonunda sevinən tərəf Madrid təmsilçiləri olublar - 4:1.Londonun “Arsenal” klubu səfərdə İsveçin “Ostersund” kollektivinə qalib gəlib - 3:0. “Ludoqorets”in qonağı olan “Milan” da rəqibin qapısından üç cavabsız top keçirib. Dortmund “Borussiya”sı isə öz meydanında “Atalanta”nı son dəqiqələrdə vurulan qolla məğlub edə bilib - 3:2 . Günün mərkəzi görüşlərindən sayılan “Lion” və “Vilyarreal” klublarının qarşılaşmasında qalib tərəf meydan sahibləri olublar - 3:1.Günün digər oyunlarında isə aşağıdakı nəticələr qeydə alınıb: “Astana” (Qazaxıstan) – “Sportinq” (Portuqaliya) - 1:3 “Marsel” (Fransa) – “Braqa” (Portuqaliya) - 3:0 “Nitsa” (Fransa) – “Lokomotiv” (Rusiya) - 2:3 “Real Sosyedad” (İspaniya) – “Zalsburq” (Avstriya) - 2:2 “Spartak” (Moskva, Rusiya) – “Atletik” (İspaniya) - 1:3 AEK (Yunanıstan) – “Dinamo”(Ukrayna) - 1:1 “Seltik” (Şotlandiya) – “Zenit” (Rusiya) - 1:0 “Styaua” (Rumıniya) – “Latsio” (İtaliya) - 1:0 “Napoli” (İtaliya) – “Leypsiq” (Almaniya) - 1:3 “Partizan" (Serbiya) – “Viktoriya” (Çexiya) - 1:1.xeber100.com

Formula-1 yarışı ilə əlaqədar seminarlar keçiriləcək

“Bakı Şəhər Halqası” Əməliyyat Şirkəti (BŞH) Azərbaycan Avtomobil Federasiyası (AAF) ilə birlikdə regionlarda avtoidman üzrə maarifləndirmə ayı çərçivəsində “Sənin sürət formulan” şüarı altında simulyatorda Formula-1 (F1) çempionatı keçirəcək. Çempionat çərçivəsində, həmçinin yol hərəkəti təhlükəsizliyinə dair seminarlar da təşkil olunacaq.Azərtac xəbər verir ki, layihənin məqsədi Azərbaycanın regionlarında gənclər arasında F1 və yol hərəkəti təhlükəsizliyi haqqında məlumatlılığı artırmaqdır. Fevralın 19-dan martın 10-dək davam edəcək layihə çərçivəsində keçiriləcək çempionat və seminarlarda Lənkəran, Şirvan, Füzuli, Mingəçevir, Qax və Qubanın yuxarı sinif şagirdləri iştirak edəcəklər.Çempionatın ilk mərhələsində hər regiondan bir qalib seçiləcək. Həmin qaliblər Novruz bayramı ərəfəsində Bakıda təşkil olunacaq final turunda yarışacaqlar. Yarışın sonunda qaliblərlə yanaşı, final mərhələsinin digər iştirakçılarına da sertifikat və qiymətli hədiyyələr təqdim olunacaq.xeber100.com

Tennis üzrə Azərbaycan çempionatı keçiriləcək

Fevralın 20-23-də stolüstü tennis üzrə Azərbaycan çempionatı keçiriləcək. Gənclər və İdman Nazirliyinin, Azərbaycan Stolüstü Tennis Federasiyasının təşkilatçılığı ilə keçiriləcək çempionat 5 mart - Bədən Tərbiyəsi və İdman Gününə həsr olunacaq.Azərbaycan Stolüstü Tennis Federasiyasından Azərtac-a bildiriblər ki, çempionatda respublikanın şəhər və rayonlarından 120-dən çox idmançı iştirak edəcək. Şəxsi, komanda, qoşa və qarışıq qoşa dərəcələri üzrə yarışlarda Bakı, Sumqayıt, Şəki, Şirvan, Salyan, Gədəbəy, Samux və digər rayonların tennisçiləri mübarizə aparacaqlar.xeber100.com

“Neftçi” futbol klubunun məlumatı

Bakının “Neftçi” futbol klubunun prezidenti Orxan Hüseynzadə şəxsi istəyi ilə tutduğu vəzifədən istefa verib.Azərtac kluba istinadla xəbər verir ki, o, fevralın 16-da istefa ərizəsi ilə klubun təsisçisinə müraciət edib. O.Hüseynzadənin istefası qəbul olunub.Klub rəhbərliyi Orxan Hüseynzadəyə gələcək fəaliyyətində uğurlar arzulayıb.xeber100.com

“Səbail” futbol klubu yeni müqavilə bağlayıb

“Səbail” klubu daha bir legioner futbolçunun xidmətindən yararlanacaq.Azərtac kluba istinadla xəbər verir ki, uqandalı hücumçu Faruku Miya “Səbail”in heyətinə cəlb olunub. Daha əvvəl Belçikanın “Standard” (Liege) komandasında çıxış edən F.Miya mövsümün sonunadək icarə əsasında Bakı təmsilçisində oynayacaq.Futbolçu “transfer pəncərəsi” dövründə Peşəkar Futbol Liqasında müvafiq qaydada qeydiyyatdan keçirilsə də, Azərbaycan Premyer Liqasının qış fasiləsindən sonra keçirilmiş ilk turunda viza məsələsinin həlli ilə əlaqədar adı heyətə daxil olunmamışdı. Artıq bütün sənədləşmə işləri tam həllini tapıb və uqandalı futbolçunu növbəti turlarda “Səbail”in heyətində görmək mümkün olacaq.xeber100.com

ANSA agentliyinin məlumatı əsasında…

“Pxençan-2018” Qış Olimpiya Oyunlarında 500 metr məsafəyə sürətli xizəksürmə yarışlarında Arianna Fontana İtaliyanın ilk qızıl medalını qazanıb.İtaliyanın ANSA agentliyi xəbər verir ki, “Pxençan-2018” Qış Olimpiya Oyunlarının açılış mərasimində İtaliya bayrağını daşıyan A.Fontana hollandiyalı xizəkçi Yara Van Kerxofu geridə qoyaraq qızıl medala yiyələnib.Həmçinin kişilər arasında qısa məsafəyə sərbəst xizək yarışlarında italyan Federiko Pelleqrino gümüş medal qazanıb. O, rusiyalı xizəkçi Aleksandr Bolşunovu 200 saniyə qabaqlayaraq gümüş medala sahib çıxıb. Qızıl medalı isə Norveç xizəkçisi Yohannes Hoesflot Klaebo qazanıb.xeber100.com

Cüdo üzrə açıq Avropa kuboku yarışları keçiriləcək

Fevralın 17-18-də Avstriyanın Obervart şəhərində cüdo üzrə açıq Avropa kuboku yarışları keçiriləcək.Azərtac xəbər verir ki, turnirdə ölkəmizi Mehman Sadıqov, Tofiq Məmmədov, Kəramət Hüseynov, Sadiq Məhərrəmov (hamısı 60 kq), İlkin Babazadə (66 kq), Telman Vəliyev, Paşa Əliyev (hər ikisi 73 kq), Afiq Səfərli, Coşqun Abdullayev (hər ikisi 81 kq), Məmmədəli Mehdiyev, Tural Səfquliyev, Firudin Dadaşov, Qurban Qurbanov (hamısı 90 kq), Zelim Koçev, Adil Kərimli (hər ikisi 100 kq), Uşanqi Kokauri və Şahin Qəhrəmanov (hər ikisi 100 kq-dan yuxarı) təmsil edəcəklər.Qeyd edək ki, açıq Avropa kuboku yarışlarında 40 ölkədən 323 cüdoçu birincilik uğrunda mübarizə aparacaq.xeber100.com

“Real Madrid”in hücumçusu 100 qol vuran futbolçu kimi tarixə düşüb

İspaniyanın “Real Madrid” klubunun portuqaliyalı hücumçusu Kriştiano Ronaldo Çempionlar Liqasında bir komandanın heyətində 100 qol vuran ilk futbolçu kimi tarixə düşüb.TASS-a agentliyi xəbər verir ki, onun ən yaxın izləyicisi olan “Barselona”nın futbolçusu Lionel Messinin hesabında 97 qol var.Çempionlar Liqasının səkkizdəbir final mərhələsində “Real” və Fransanın PSJ komandaları arasında keçirilən matçda 33 yaşlı Ronaldo dubla imza atıb.Portuqaliyalı hücumçuya bu nailiyyəti əldə etmək üçün 95 oyun bəs edib. O, İngiltərənin “Mançester Yunayted” klubundan “Real”a 2009-cu ilin yayında keçib. Çempionlar Liqasında onun hesabında ümumilikdə 117 qol var. Ronaldo turnir tarixinin ən yaxşı bombardiridir.Həmçinin Ronaldo yeddi mövsüm ardarda Çempionlar Liqasında ən azı 10 qol vuran ilk futbolçu olub. O, 2011-2012-ci il mövsümündə 10, 2012-2013–cü il mövsümündə 11, 2013-2014 –cü il mövsümündə 17, 2014-2015-ci illərdə 10, 2015-2016-cı il mövsümündə 17, 2016-2017-ci il mövsümündə isə 12 dəfə fərqlənib. Hazırkı mövsümdə onun hesabında 11 qol var.Qeyd edək ki, Ronaldo dörd dəfə Çempionlar Liqası, Avropa çempionu, beş dəfə “Qızıl top”, İspaniya və İngiltərə çempionu, İspaniya və İngiltərə kubok və superkubokunun sahibi, klublararası dünya çempionatının və UEFA Superkubokunun qalibi olub.xeber100.com