Albaniya milli komandasının yeni baş məşqçisi müəyyənləşib

Futbol üzrə Albaniya milli komandasının yeni baş məşqçisi müəyyənləşib. Bu barədə Albaniya Futbol Federasiyanın mətbuat xidməti məlumat yayıb. Milli komanda braziliyalı Silvio Mendes Kampos Juniora tapşırılıb. Silvinyo kimi tanınan mütəxəssislə ilyarımlıq müqavilə imzalanıb. O, yığmada uğursuz nəticələrə görə istefaya göndərilən italiyalı Edoardo Rejanı əvəz edəcək. “Korintians”ın baş məşqçisi olmuş Silvinyo futbolçu karyerası ərzində “Arsenal”, “Selta”, “Barselona” və “Mançester Siti” klublarında forma geyinib. O, Braziliya millisində 6 oyun keçirib.xeber100.com

Azərbaycan Həndbol Federasiyası: Avropa çempionatına hazırlıq davam edir

Yanvarın 13-dən 15-dək kişi həndbolçulardan ibarət milli komandamız 2026-cı il Avropa çempionatının təsnifat turnirində qüvvəsini sınayacaq. Azərbaycan Həndbol Federasiyasından bildiriblər ki, millimiz “AHF Arena”da təlim məşq-toplanışını davam etdirir. On altı idmançının qatıldığı hazırlıq prosesi baş məşqçi Nasser Salimi və köməkçi məşqçi Rəşad Hüseynovun rəhbərliyi ilə aparılır. Fiziki hazırlığı başa çatdıran komanda toplanışın sonuncu günlərində taktiki və texniki çalışmaları yerinə yetirir. Gündə 1 dəfə olmaqla, hər gün məşq edən millinin düşərgəsində nikbin ab-hava və mübariz əhval-ruhiyyə hökm sürür. Qeyd edək ki, millimiz Bakı İdman Sarayında keçiriləcək təsnifat turnirinə yanvarın 13-də saat 17:00-da Malta seçməsinə qarşı oyunla start verəcək. Həndbolçularımız yanvarın 14-də saat 17:00-da Böyük Britaniya seçməsi ilə qarşılaşacaqlar. Ertəsi gün isə saat 15:00-da millimiz Kipr kollektivi ilə oyuna çıxacaq.xeber100.com

“Qarabağ” futbol klubu heyətini daha bir futbolçu ilə gücləndirə bilər

Ağdamın “Qarabağ” klubu heyətini daha bir futbolçu ilə gücləndirə bilər. Ağdam təmsilçisi Belçikanın “Beveren” klubunun yarımmüdafiəçisi Lukas Ribeyrunu transfer etmək istəyir. “Qarabağ”ın braziliyalı oyunçu üçün rəsmi təklif göndərdiyi bildirilib. Rusiyanın iki klubunun da Ribeyru ilə maraqlandığı, ancaq oyunçunu Ağdam təmsilçisinin təklifinin cəlb etdiyi vurğulanıb. Qeyd edək ki, son Azərbaycan çempionunun fransalı vinger Aama Diakabi ilə yaxın günlərdə müqavilə imzalayacağı gözlənilir.xeber100.com

Kriştiano Ronaldonun yeni klubu “Əl-Nəsr”də debüt edəcəyi vaxt açıqlanıb

Kriştiano Ronaldonun yeni klubu “Əl-Nəsr”də debüt edəcəyi vaxt açıqlanıb. Bu barədə “L'Equipe” nəşri məlumat yayıb. Onun yanvarın 22-də Səudiyyə Ərəbistanı çempionatında ilk oyuna çıxacağı bildirilir. Həmin gün rəqib “Əl-İstiqlal” komandası olacaq. Görüş Bakı vaxtı ilə saat 21:30-da başlayacaq. O vaxtadək portuqaliyalı hücumçuya İngiltərə Futbol Assosiasiyası tərəfindən noyabrda qoyulmuş iki oyunluq cəzanın müddəti başa çatacaq.xeber100.com

Almaniyanın “Bohum” klubu heyətini yeni futbolçu ilə gücləndirib

Almaniyanın “Bohum” klubu heyətini yeni futbolçu ilə gücləndirib. Bundesliqa təmsilçisi Yunanıstanın “Olimpiakos” klubundan yarımmüdafiəçi Pyer Kundeni icarəyə götürüb. Bu barədə Almaniya klubunun rəsmi saytı məlumat yayıb. Kamerun yığmasının da üzvü olan futbolçu satınalma şərti ilə heyətə cəlb olunub. Kunde 2021-ci ildən “Olimpiakos”da forma geyinirdi. İyirmi yeddi yaşlı futbolçu Yunanıstan təmsilçisində 39 oyuna çıxıb və 1 məhsuldar ötürmə ilə yadda qalıb. Yarımmüdafiəçi Kamerun yığmasında 34 oyuna 1 qol vurub.xeber100.com

Azərbaycan Voleybol Federasiyasının məlumatı

Qadın voleybolçulardan ibarət Azərbaycan millisinin üzvləri Odina Əliyeva və Mariya Kirilyuk Çin çempionatında bürünc medal qazanıblar. Azərbaycan Voleybol Federasiyasından bildiriblər ki, idmançıların formasını geyindiyi “Şenzen Jonqsay” Çin Liqasında üçüncü yeri tutub. Komanda üçüncülük uğrunda görüşdə “Fujian”la qarşılaşıb. İkioyunluq mübarizədə 3:2 və 3:1 hesabı ilə qalib gələn “Şenzen Jonqsay” klubu yarışın bürünc medalına sahib çıxıb.xeber100.com

Beynəlxalq Futbol Tarixi və Statistikaları Federasiyasının açıqlaması…

Beynəlxalq Futbol Tarixi və Statistikaları Federasiyası (IFFHS) ötən ilin ən yaxşı baş məşqçisini açıqlayıb. Bu ada futbol üzrə Argentina millisinin baş məşqçisi Lionel Skaloni layiq görülüb. Mütəxəssis 240 xalla digər həmkarlarını qabaqlayıb. İkinci yeri Fransa yığmasının baş məşqçisi Didye Deşam (45 xal) tutub. İlk üçlüyü 30 xalla Mərakeş seçməsinin çalışdırıcısı Valid Reqraqi tamamlayıb. Bununla tarixdə ilk dəfə Afrika təmsilçisinin baş məşqçisi ilk üçlükdə yer alıb. Qeyd edək ki, Lionel Skaloni ötən il Argentina yığmasına dünya çempionluğunu qazandırıb.xeber100.com

Azərbaycan Şahmat Federasiyasının məlumatı

Azərbaycan şahmatçısı Günay Məmmədzadə Çinin Sian şəhərində keçirilən “The Belt and Road 2023 to World Chess Woman’s Summit” beynəlxalq turnirinin qalibi olub. Azərbaycan Şahmat Federasiyasından bildiriblər ki, 11 turdan sonra 8,5 xal toplayan Günay Məmmədzadə Yeni ildə iştirak etdiyi ilk turnirdə qızıl medala layiq görülüb. Eyni xala malik Bibisara Assaubayeva (Qazaxıstan) əlavə göstəricilərə görə yarışı ikinci pillədə başa vurub. Qeyd edək ki, turnirdə yeddi ölkədən 12 şahmatçı iştirak edib.xeber100.com

Futbol üzrə Türkiyə Super Liqasında İstanbul derbisi oynanılıb

Bu gün futbol üzrə Türkiyə Super Liqasında İstanbul derbisi oynanılıb. XVIII tura təsadüf edən prinsipial oyunda "Fənərbağça" öz meydanında "Qalatasaray"ı qəbul edib. “Ülkər” stadionunda oynanılan yeni ilin ilk derbi görüşündə qonaq komanda rəqibini 3:0 hesabı ilə məğlub edib. Baş hakim Halil Umut Melerin idarə etdiyi qarşılaşmada “sarı-qırmızılılar”ın heyətində Serjio Oliveira (32), Kərəm Aktürkoğlu (78) və Mauro Icardi (90) fərqləniblər. Bu oyundan sonra “Qalatasaray” 39 xalla turnir cədvəlindəki liderliyini möhkəmləndirib. Əzəli rəqibindən dörd xal az toplayan “Fənərbağça” ikinci pillədə qərarlaşıb. “Başakşehir” komandası 31 xalla üçüncü sırada yer alıb.xeber100.com

“Səbail” futbol klubu Türkiyədəki təlim-məşq toplanışı çərçivəsində

Bakının “Səbail” futbol klubu bu gün Türkiyədəki təlim-məşq toplanışı çərçivəsində ilk yoxlama matçına çıxıb. Paytaxt təmsilçisi Polşanın "Legiya" (Varşava) komandası ilə qarşılaşıb. Görüş 2:2 hesabı ilə başa çatıb. "Səbail"in qollarını Qustavo və Mirabdulla Abbasov vurublar. Qeyd edək ki, "Səbail" hazırlıq prosesi çərçivəsində daha 2 yoxlama oyunu keçirəcək. Komanda yanvarın 12-də “Bohemians” (Çexiya), 16-da isə “Spartak”la (Serbiya) qarşılaşacaq.xeber100.com