Futbol üzrə Argentina millisi dünya çempionu olub

Futbol üzrə Argentina millisi dünya çempionu olub. Qətərdə keçirilən futbol üzrə dünya çempionatının final oyunu – Argentina-Fransa matçının əsas vaxtı 2:2 hesabı ilə başa çatıb. Matçın qalibini, eyni zamanda, dünya çempionunu müəyyən etmək üçün əlavə vaxt oynanılıb. Əlavə vaxtda tərəflər bir dəfə fərqləniblər – 3:3. Qolları matçın 109-cu dəqiqəsində argentinalı Lionel Messi, 118-ci dəqiqəsində Fransa millisinin üzvü Kilyan Mbappe vurublar. Qalib penalti seriyasında müəyyənləşib. Zərbələri dəqiq yerinə yetirən Argentina millisi dünya çempionatının qalibi adını qazanıb. Qeyd edək ki, oyunda hesabı Lionel Messi açıb. O, matçın 23-cü dəqiqəsində Fransanın qapısına təyin olunan penaltini dəqiq yerinı yetirib. Matçın 36-cı dəqiqəsində isə Lionel Messinin ötürməsindən sonra Anxel Di Mariya Argentinanın ikinci qolunu vurub - 2:0. İlk hissə bu hesabla başa çatıb. Matçın ikinci hissəsinə fransızlar fəal başlayıblar. Fransa yığması matçın sonlarına doğru hesabı bərabərləşdirməyi bacarıb. Kilyan Mbappe matçın 80-ci dəqiqəsində rəqibin qapısına təyin olunmuş penaltini dəqiq yerinə yetirib – 2:1. Bu qoldan bir dəqiqə sonra səhnəyə yenidən Kilyan Mbappe çıxıb. Bu dəfə Markus Türamın ötürməsini dəqiq tamamlayan Fransa yığmasının ulduzu hesabı bərabərləşdirib. – 2:2.xeber100.com

Klublararası növbəti dünya çempionatı gələn il Mərakeşdə keçiriləcək

Futbol üzrə klublararası növbəti dünya çempionatı gələn il Mərakeşdə keçiriləcək. Bu barədə FIFA qərar qəbul edib. Çempionat 2023-cü il fevralın 1-dən 11-dək təşkil olunacaq. Yarışda altı qitə konfederasiyasının ən yaxşı klubları, həmçinin Mərakeşin ali futbol divizionunun çempionu iştirak edəcəklər. Turnirdə “Real Madrid” (İspaniya), “Flamenqo” (Braziliya), “Əl-Hilal” (Səudiyyə Ərəbistanı), “Əl-Əhli” (Misir), “Oklend Siti” (Yeni Zelandiya), “Siyetl Saunders” (ABŞ) və "Vidad" (Mərakeş) komandaları mübarizə aparacaqlar.xeber100.com

Azərbaycan Cüdo Federasiyası pilot layihəyə başlayıb

Azərbaycan Cüdo Federasiyası pilot layihəyə başlayıb. “Hədəf” idman klubunun tərkibində qızlardan ibarət cüdo klubu fəaliyyətə başlayıb. Bu barədə federasiyanın baş katibi Rəşad Rəsullu məlumat verib. Qeyd edilib ki, cüdo klubunun fəaliyyətində əsas məqsəd qızlar arasında bu idman növünün kütləviliyinə nail olmaqdır. Qızlar klubda bu idman növünün sirlərinə Kifayət Həsənova və Afaq Sultanovanın rəhbərliyi altında yiyələnirlər.xeber100.com

Xorvatiya millisi dünya çempionatının bürünc medalına sahib olub

Futbol üzrə Xorvatiya millisi ikinci dəfə dünya çempionatının bürünc medalına sahib olub. Qətərdə keçirilən dünya çempionatında Xorvatiya millisi Mərakeş yığması ilə qarşılaşıb. Matçda hesabı Xorvatiya millisi açıb. Oyunun 7-ci dəqiqəsində Yosko Qvardiol fərqlənib. İki dəqiqə sonra mərakeşli futbolçu Əşrəf Dari hesaba tarazlıq gətirib. Qarşılaşmanın 42-ci dəqiqəsində Mislav Orsiç Xorvatiya millisini hesabda önə keçirib. Avropa təmsilçisi fasiləyə üstün yollanıb - 2:1. Qarşılıqlı hücumlar şəraitində keçən ikinci hissədə komandalar fərqlənə bilməyiblər. Beləliklə, rəqibini 2:1 hesabı ilə məğlub edən Xorvatiya seçməsi mundialı üçüncü pillədə başa vurub. Xorvatiya millisi ikinci dəfə dünya üçüncüsü olub. Komanda ilk dəfə 1998-ci ildə Niderlandı 2:1 hesabı ilə məğlub edərək bu titula sahib çıxıb. Qeyd edək ki, dünya çempionatına dekabrın 18-də Argentina və Fransa milli komandaları arasında keçiriləcək final matçı ilə yekun vurulacaq.xeber100.com

Qətərdə təşkil olunan futbol üzrə dünya çempionatında

Qətərdə təşkil olunan futbol üzrə dünya çempionatında Xorvatiya və Mərakeş yığmaları arasında oynanılacaq üçüncü yer uğrunda görüşün hakimləri müəyyənləşib. Matçın baş hakimi qətərli Əbdülrəhman Əl-Cassim olacaq. Ona həmyerliləri Taleb Əl-Mari və Səud Əl-Maqali kömək edəcəklər. Dördüncü hakim funksiyasını braziliyalı Rafael Klaus yerinə yetirəcək.Qeyd edək ki, dekabrın 17-də keçiriləcək Xorvatiya - Mərakeş matçı Bakı vaxtı ilə saat 19:00-da başlayacaq.xeber100.com

Argentina – Fransa matçına hakim təyinatları açıqlanıb

Qətərdə təşkil olunan dünya çempionatının finalında keçiriləcək Argentina - Fransa matçına hakim təyinatları açıqlanıb. Həlledici oyun polşalı FIFA referisi Şimon Marçinyaka həvalə olunub. Ona həmyerliləri Pavel Sokolnitski və Tomaş Listkeviç kömək edəcəklər. Dördüncü hakim funksiyasını ABŞ-dan olan İsmail Elfat yerinə yetirəcək.Qeyd edək ki, dekabrın 18-də oynanılacaq Argentina - Fransa matçı Bakı vaxtı ilə saat 19:00-da başlayacaq.xeber100.com

Azərbaycan Cüdo Federasiyası: Cüdoçuların Bakı birinciliyi başa çatıb

On səkkiz yaşadək cüdoçuların Bakı birinciliyi başa çatıb.Azərbaycan Cüdo Federasiyasından bildiriblər ki, Hövsan qəsəbəsində yerləşən Fövqəladə Hallar Nazirliyinin (FHN) İdman Sağlamlıq Mərkəzində keçirilən yarışa 56 klub, cəmiyyət və idman təşkilatından 613 (41 qız, 572 oğlan) cüdoçu qatılıb.Üç gün davam edən yarışda 16 çəki dərəcəsində mükafatçılar bəlli olub. Belə ki, oğlanların yarışında Səid İsayev (46 kq), Telman Abdullayev (50 kq), Zamin Alıyev (55 kq), Məhəmməd Musayev (60 kq), Mehdi Cəfərov (66 kq), Əbil Yusubov (73 kq), Hüseyn Hüseynov (81 kq), Tuncay Şamil (90 kq), Ramazan Əhmədov (+90 kq) birinci yeri tutublar. Qızların mübarizəsində isə Dərya Bıkova (40 kq), Aytac Yolçuzadə (44 kq), Vüsalə Hacıyeva (48 kq), Fəridə Mirzəyeva (52 kq), Röya Cəfərova (57 kq), Mələk Bayramlı (63 kq), Zeynəbxanım Əsədova (70 kq) qalib adına layiq görülüblər.Yarışda Bakı 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbi ümumi komanda hesabında, qızlar və oğlanlar arasında medal sayına görə birinci olub. “Cüdo Klub 2012” ikinci, Respublika Kompleks İdman Məktəbi isə üçüncü pillədə qərarlaşıblar.Yarışın keçirilməsində əsas məqsəd müvafiq yaş qrupu üzrə gələn il baş tutacaq Azərbaycan birinciliyinə namizədlərin seçilməsidir.Birincilik çərçivəsində Azərbaycanda cüdo idman növünün yaranmasının 50 illik yubileyi münasibəti ilə cüdo ailəsinin üzvlərinə Azərbaycan Cüdo Federasiyası tərəfindən diplom və sertifikatlar təqdim edilib.Diplom və sertifikat alanlar sırasında məşqçilər, hakimlər, tibbi heyət üzvləri, cüdo üzrə milli yığmaların sabiq və hazırkı idmançıları və digər şəxslər olublar.xeber100.com

Futbol üzrə Azərbaycan Premyer Liqasında XVII tura yekun vurulub

Futbol üzrə Azərbaycan Premyer Liqasında XVII tura yekun vurulub. Sonuncu oyun günündə bir qarşılaşma keçirilib. “Turan Tovuz” doğma meydanda “Neftçi” ilə qarşılaşıb. Paytaxt təmsilçisi çətin səfərdə tək qolla 3 vacib xal qazanıb – 1:0.Yeganə qolu 73-cü dəqiqədə penaltidən Emin Mahmudov vurub. Bu nəticədən sonra xallarının sayını 35-ə çatdıran paytaxt təmsilçisi üçüncü pillədə qərarlaşıb. Tovuz klubu 16 xalla 6-cı sıradadır. Xatırladaq ki, turun əvvəl keçirilmiş oyunlarında “Qarabağ” “Qəbələ”yə (1:0), “Sumqayıt” isə “Səbail”ə (2:0) qalib gəlib, “Şamaxı” – “Zirə” (0:0) və “Kəpəz” – “Sabah” (2:2) matçlarında heç-heçə qeydə alınıb.xeber100.com

2026-cı ildə Formula 1-də “Ford” mühərriklərindən istifadə olunacaq

2026-cı ildə Formula 1-də “Ford” mühərriklərindən istifadə oluna bilər. Bu barədə “Motorsport” nəşri məlumat yayıb.Hazırda “Red Bull” komandası ABŞ avtomobil şirkəti ilə danışıq aparır. Amma “Ford” “Red Bull”un səhmlər paketinə sahib çıxmaq fikrində deyil. Bir müddət əvvəl Avstriya komandası ilə “Porşe” arasında da bu istiqamətdə danışıqlar olmuşdu. Nəticədə, Fransa kompaniyası “Red Bull”un şərtləri ilə razılaşmamışdı. “Ford” da “Red Bull”un bu təklifini qəbul etmək istəmir. Tərəflər arasında razılıq əldə olunsa, ABŞ şirkəti “Red Bull” üçün mühərrikləri elə onların öz zavodlarında hazırlayacaq.xeber100.com

Azərbaycan çempionatlarında 2022/2023-cü il mövsümünün açılış mərasimi olub

Dekabrın 15-də voleybol üzrə qadınlar və kişilər arasında Azərbaycan çempionatlarında 2022/2023-cü il mövsümünün açılış mərasimi olub. Voleybol Mərkəzində təşkil edilən tədbirə Milli Olimpiya Komitəsinin (MOK) vitse-prezidenti Çingiz Hüseynzadə, Heydər Əliyev adına Hərbi İnstitutun rektor müavini, Vətən Müharibəsi Qəhrəmanı polkovnik Nizami Mövlanov, Azərbaycan Voleybol Federasiyasının (AVF) prezidenti Cavid Qurbanov, birinci vitse-prezident Faiq Qarayev və digər rəsmi qonaqlar qatılıblar. AVF rəhbəri komandalara uğurlar arzuladıqdan sonra bildirib ki, Azərbaycan voleybolçuları həmişə Avropada və dünyada öz sözlərini deyiblər: “Bu idman növü ölkəmizdə çox sevilib və bu gün də sevilir”. O, voleybolun ölkəmizdə daha da kütləviləşəcəyinə, həmçinin yeni inkişaf yoluna qədəm qoyacağına və yenidən beynəlxalq arenalarda yığmalarımızın öz sözünü deyəcəklərinə inam ifadə edib. C.Qurbanov vurğulayıb ki, Azərbaycan voleybolu əvvəlki səviyyəsini tezliklə bərpa edəcək. Ardınca Ç.Hüseynzadə MOK adından voleybol bayramının başlaması münasibətilə hamını təbrik edib, iştirakçılara uğurlar arzulayıb: “Əminəm ki, Azərbaycan voleybolu çox qısa vaxtda öz əvvəlki nüfuzuna qayıdacaq". N.Mövlanov isə Azərbaycan xalqının, qalib ordumuzun hər şeyə nail ola biləcəyini deyib. O, çempionluq uğrunda əzmkar mübarizənin gedəcəyinə inandığını söyləyib. Ardınca Müdafiə Nazirliyinin Əlahiddə Nümunəvi Orkestrinin ifasında Dövlət Himni səslənib. Ötən illərdən fərqli olaraq, bu il həm qadınların, həm də kişilərin çempionatı Yüksək Liqa adlanacaq. Qadınların yarışında “Azərreyl”, “Abşeron”, “Murov” və UNEC klubları çempion adı uğrunda mübarizə aparacaqlar. Kişilərin mübarizəsində isə MOİK, “Neftçi”, “Murov” və mədəniyyət paytaxtı Şuşanı təmsil edəcək “Xarıbülbül” qüvvəsini sınayacaq. Qadın və kişi voleybolçuların yarışı 6 dövrədən ibarət olacaq. Əgər yekunda xallar bərabər olarsa, çempion qələbə sayına əsasən elan ediləcək. Dekabrda, həmçinin qadın və kişi voleybolçular arasında I liqa yarışlarına start veriləcək.xeber100.com