2018-ci il dünya çempionatının seçmə qrup mərhələsi çərçivəsində

Futbol üzrə Azərbaycan milli komandasının 2018-ci il dünya çempionatının seçmə qrup mərhələsi çərçivəsindəki Çexiya yığması ilə oyunun hakimləri müəyyənləşib.Azərtac UEFA-nın rəsmi saytına istinadla xəbər verir ki, qarşılaşmanı fransalı hakimlər briqadası idarə edəcək. Oyunun baş hakimi Benua Miyo olacaq. Ona həmyerliləri - yan xətt hakimləri Julien Paçelli və Bertran Juanno kömək edəcəklər. Matçda dördüncü hakim funksiyasını Frank Şnayder yerinə yetirəcək.Qeyd edək ki, "C" qrupunda yer alan Azərbaycan millisi Çexiya ilə oktyabrın 5-də Bakı Olimpiya Stadionunda qarşılaşacaq. Görüşə saat 20:00-da start veriləcək.Qrupda Almaniya 21 xalla vahid liderdir. Şimali İrlandiya 16 xalla ikinci, Azərbaycan 10 xalla üçüncü, Çexiya 9 xalla dördüncü, Norveç 7 xalla beşinci, hesabında xal olmayan San-Marino isə sonuncu pillədə qərarlaşıb.xeber100.com

Ümumdünya Boks Şurasının 55-ci Konvensiyasının açılış mərasimi keçirilib

Oktyabrın 2-də Bakıda Ümumdünya Boks Şurasının (WBC) 55-ci Konvensiyasının açılış mərasimi keçirilib.Azərtac xəbər verir ki, əvvəlcə boksun tarixindən bəhs edən videoçarx nümayiş olunub.Azərbaycanın gənclər və idman naziri Azad Rəhimov tədbirə dünyanın ən məşhur boksçularının qatıldığını vurğulayaraq, Konvensiyanın boksun inkişafına yeni təkan verəcəyini diqqətə çatdırıb. Nazir bildirib ki, Azərbaycan müstəqilliyini bərpa etdikdən sonra ilk dəfə 1996-cı ildə Atlanta Yay Olimpiya Oyunlarına qatılıb və 1 medala sahib olub. Ötən il idmançılarımız Rio-de-Janeyroda təşkil olunan Olimpiadada 18 medal qazanıblar. Bu, Azərbaycan dövlətinin idmanın inkişafına göstərdiyi yüksək diqqət və qayğının təzahürüdür.“Azərbaycan dünyada idman ölkəsi kimi tanınır. Ölkəmizdə irimiqyaslı yarışların təşkili üçün beynəlxalq standartlara cavab verən idman infrastrukturu var. Milli Gimnastika Arenası, Bakı Atıcılıq Mərkəzi və Bakı Olimpiya Stadionu möhtəşəmliyi ilə fərqlənir”, - deyə A.Rəhimov əlavə edib.Azərbaycanın boks üzrə də mühüm nailiyyətlərinin olduğunu qeyd edən Azad Rəhimov Məhəmmədrəsul Məcidovun Almaniyada üçqat dünya çempionu adını qazandığını xatırladıb.Sonra Konvensiyaya qatılan çempionlar təqdim edilib. Ardınca dünya çempionu Vitali Kliçkonun karyerasından bəhs edən qısa film nümayiş olunub.V.Kliçko yüksək təşkilatçılığa görə Azərbaycan hökumətinə minnətdarlığını bildirib. Qeyd edib ki, Azərbaycanda idmanın inkişafı üçün hər cür şərait var. O, idmana göstərdiyi qayğıya və Konvensiyanın yüksək səviyyədə keçirilməsində dəstəyinə görə Prezident İlham Əliyevə minnətdarlığını bildirib.“Azərbaycan gözəl ölkədir. Burada idman infrastrukturu beynəlxalq standartlara cavab verir. Ümid edirəm ki, Azərbaycan boksçuları WBC-də çempion olacaqlar. Çünki burada kifayət qədər peşəkar boksçular var”, - deyə V.Kliçko vurğulayıb.Konvensiya digər təqdimatlarla davam edib.xeber100.com

Ağır Atletika Federasiyasının məlumatına görə…

Kosovonun paytaxtı Priştina şəhərində keçirilən 15 və 17 yaşlı yeniyetmə ağır atletlər arasında Avropa birinciliyi başa çatıb.Azərbaycan Ağır Atletika Federasiyasından Azərtac-a bildirilib ki, yarışda 40-a yaxın ölkədən 264 atlet medallar uğrunda mübarizə aparıb.Azərbaycan ağır atletika yığmasının yeddi üzvü yaşı 15-ə qədər olan atletlərin mübarizəsinə qoşulub. Onların birdən və təkanla qaldırma hərəkətləri, həmçinin toplamda qazandıqları medal sayı 11-ə bərabər olub. Bunlardan altısı qızıl, ikisi gümüş, üçü bürünc medaldır. Elşən Məmmədov (50kq) birdən qaldırma və toplamda bürünc, Rüstəm Qasımov (56 kq) birdən, təkanla qaldırma və toplamda qızıl, Tarmenxan Babayev (85 kq) birdən, təkanla qaldırma və toplamda qızıl, Rəhman Kazımov (94 kq) birdən qaldırma və toplamda gümüş, təkanla qaldırmada isə bürünc medalla fərqləniblər.Azərbaycanın yeniyetmə oğlan ağır atletlərdən ibarət yığma komandası medal sayında Avropa birinciliyinin ən yaxşı komandası seçilib.Həmçinin yığma komandamızın üzvləri yeddi Avropa rekordunu yeniləməklə də yadda qalıblar. Rüstəm Qasımov birdən qaldırma hərəkətində, Tarmenxan Babayev isə üç dəfə təkanla qaldırma, 3 dəfə də toplamda Avropa rekordlarını yeniləyiblər.Yaşı 17-yə qədər olan atletlərin mübarizəsində isə qızlar arasında Səbinə Əzimova (53 kq) qızıl medala sahib çıxaraq, üçqat Avropa çempionu tituluna yiyələnib.Bununla yanaşı, gözəl çıxışla yadda qalan Səbinə Əzimova Sinkleyr cədvəli üzrə hesablanan reytinqdə yeniyetmələr arasında Avropa birinciliyinin ən güclü qadın atletləri arasında ikinci yeri tutub.Beləliklə, Azərbaycanın yeniyetmələrdən ibarət yığma komandası Kosovoda tarixi nailiyyətə imza atıb. İndiyə qədər heç bir yarışda milli komandamız Avropanın ən yaxşısı adını qazanmamışdı.xeber100.com

Voleybol üzrə Avropa çempionatına yekun vurulacaq

Oktyabrın 1-də qadınlar arasında voleybol üzrə Avropa çempionatına yekun vurulacaq.Azərtac xəbər verir ki, çempionatın sonuncu günündə bürünc və qızıl medallar uğrunda görüşlər keçiriləcək. Finalda Serbiya və Niderland milliləri çempion adı uğrunda mübarizə aparacaqlar. Azərbaycan millisi isə Türkiyə yığması ilə üçüncü yer uğrunda yarışacaq. Milli komandamız bu oyunda qalib gəlsə, bu, Azərbaycan voleybolçularının Avropa çempionatları tarixində ən yaxşı nəticəsi olacaq.Ötən gün keçirilən yarımfinal görüşündə Azərbaycan millisi güclü Niderland səddini keçə bilməyib – 2:3. Serbiya yığması isə yarımfinalda Türkiyə millisinə 3:0 hesabı ilə qalib gəlib.Sentyabrın 22-də start götürən çempionatın final mərhələsi Azərbaycanın və Gürcüstanın birgə ev sahibliyi ilə təşkil olunub. Çempionatda 16 komanda dörd qrupda mübarizə aparıb. Azərbaycan millisi Almaniya, Polşa və Macarıstan yığma komandaları ilə birgə yer aldığı “A” qrupunu ilk sırada başa vuraraq dörddəbir finala birbaşa vəsiqəni təmin edib. Dörddəbir finalda Almaniya yığmasını 3:0 hesabı ilə məğlub edərək yarımfinala yüksələn milli komandamız yarımfinalda Niderland kollektivi ilə görüşdən sonra üçüncü yer uğrunda mübarizə aparmalı olub.Xatırladaq ki, Azərbaycanın qadın voleybolçuları Avropa çempionatlarında ən yaxşı nəticəni 2005-ci ildə Xorvatiyada keçirilən qitə birinciliyində göstəriblər. Həmin vaxt millimiz Avropa çempionatlarında ilk dəfə iştirak etməsinə baxmayaraq, dördüncü yeri tutub. Azərbaycanın qadın voleybolçuları həmin çempionatdan başlayaraq, sonrakı qitə birinciliklərinin final mərhələlərində çıxış ediblər.xeber100.com

“AEON CUP-2017” keçirilir

Yaponiyanın paytaxtı Tokioda bədii gimnastika üzrə klublararası dünya çempionatı – “AEON CUP-2017” keçirilir. Yarışda dünyanın 23 ölkəsinin 26 klubunu təmsil edən 78 gimnast mübarizə aparır.Azərbaycanı çempionatda təmsil edən “Ocaq Sport Club” komandası yarışlara Rusiyanın “Qazprom”, Belarusun “Dinamo” və Yaponiyanın “AEON” klubları ilə birlikdə birbaşa final mərhələsində qatılıb. Komandamızın tərkibində yuniorka gimnast Dərya Farşbafşəhriyari, sinyorka gimnastlar Ayşən Bayramova və Zöhrə Ağamirova çıxış ediblər. Həmin günün nəticələrinə görə, komandamız 83250 xalla altıncı yerdə qərarlaşıb.Dünyanın bədii gimnastika üzrə ən güclü komandalarının qatıldıqları çempionat oktyabrın 1-də başa çatacaq.xeber100.com

“Səbail” komandası “Sumqayıt” klubu ilə qarşılaşıb

Sentyabrın 30-da futbol üzrə Azərbaycan çempionatının VII turunda paytaxtın “Səbail” komandası “Sumqayıt” klubu ilə qarşılaşıb.Azərtac xəbər verir ki, “Dalğa Arena”da keçirilən görüş “Sumqayıt” təmsilçisinin qələbəsi ilə yekunlaşıb – 2:0. Görüşün 10-cu dəqiqəsində Azər Salahlı hesabı açıb. Matçın 60-cı dəqiqəsində isə Amil Yunanov hesab arasındakı fərqi iki topa çatdırıb. Bununla da xallarının sayını 10-a çatdıran “Sumqayıt” dördüncü pilləyə yüksəlib. “Səbail” isə altı xalla altıncı pillədə qərarlaşıb.Tura oktyabrın 1-də “Qarabağ”-“Zirə” oyunu ilə yekun vurulacaq.Tofiq Bəhramov adına Respublika stadionunda keçiriləcək oyun saat 18:00-da başlayacaq.xeber100.com

Futbol üzrə altıncı tura start verilib

Sentyabrın 29-da futbol üzrə Azərbaycan çempionatında altıncı tura start verilib.Azərtac xəbər verir ki, turun ilk oyununda “İnter” komandası “Neftçi”ni qəbul edib.“İnter Arena”da keçirilən qarşılaşma qonaqların qələbəsi ilə yekunlaşıb - 0:2. Görüşün 60-cı dəqiqəsində Derlis Meza Kolli hesabı açıb. Matçın 72-ci dəqiqəsində isə Rəhman Hacıyev fərqlənib. Bununla da cari mövsümdə ilk qələbəsini qazanan “Neftçi” xallarının sayını dördə çatdırıb və yeddinci pillədə möhkəmlənib.Daha bir oyun “Qəbələ” və “Kəpəz” komandaları arasında oynanılıb. Qəbələ şəhər stadionundakı keçirilən qarşılaşma Gəncə təmsilçisinin qələbəsi ilə yekunlaşıb - 0:2. Qolları 48-ci dəqiqədə Kərim Diniyev və 58-ci dəqiqədə İlkin Sadıqov ev sahiblərinin qapısından keçiriblər. Bu, “Kəpəz”in cari mövsümdə ilk qələbəsi olub. Hazırda aktivində dörd xalı olan Gəncə təmsilçisi sonuncu pillədə qalıb. Tur çərçivəsində sentyabrın 30-da “Səbail” komandası “Dalğa Arena”da “Sumqayıt”ı, oktyabrın 1-də Ağdamın “Qarabağ” klubu isə Tofiq Bəhramov adına Respublika stadionunda “Zirə”ni qəbul edəcək.xeber100.com

Ağır atletika üzrə Avropa birinciliyi başa çatır

Kosovanın paytaxtı Priştinada 15 və 17 yaşlı yeniyetmə ağır atletlər arasında Avropa birinciliyi başa çatır.Azərtac xəbər verir ki, yarışda 40-a yaxın ölkədən 305 atlet (175 oğlan və 130 qız) medallar uğrunda mübarizə aparır.Yarışda millimiz növbəti medalını qazanıb. Rəhman Kazımov körpücük üzərinə yaşı 15-dək olan oğlan atletlərin yarışında 94 kiloqramdan yuxarı çəki dərəcəsində çıxıb.Atletimiz birdən qaldırma hərəkətində hər üç yanaşmanı uğurla yerinə yetirib və 115 kiloqram nəticə ilə bu hərəkətdə ikinci olub.Təmsilçimiz təkanla qaldırma hərəkətində 149 kiloqramı ram edərək bu hərəkətdə üçüncü pillədə qərarlaşıb.Toplam 264 kiloqram (115+149) nəticə göstərən atletimiz yekun sıralamada Avropa birinciliyinin gümüş medalını qazanıb.Qeyd edək ki, millimiz yarışı 3 qızıl, 1 gümüş və 1 bürünc medalla başa vurub.xeber100.com

UEFA Avropa Liqasının qrup mərhələsində

Sentyabrın 28-də futbol üzrə UEFA Avropa Liqasının qrup mərhələsində ikinci turun oyunları keçirilib.Azərtac xəbər verir ki, turun ilk oyunu Qazaxıstanda “Astana” klubu ilə Çexiyanın “Slavia” komandası arasında olub. Görüş 1:1 hesablı heç-heçə ilə başa çatıb. Avroliqada çıxış edən Türkiyə təmsilçiləri isə Portuqaliya klubları ilə qarşılaşıblar. “Konyaspor” doğma meydanda “Gimarayş” klubunu 2:1 hesabı ilə məğlub edib, “Başakşəhər” isə səfərdə “Braqa”ya uduzub – 1:2. Turun sürpriz nəticəsi isə İspaniyada qeydə alınıb. Bilbaonun “Atletik” klubu öz meydanında Ukrayna təmsilçisi “Zorya”ya məğlub olub – 0:1.xeber100.com  

Voleybolçular arasında final mərhələsinə yekun vurulacaq

Sentyabrın 29-da qadın voleybolçular arasında Avropa çempionatının Milli Gimnastika Arenasında keçirilən dörddəbir final mərhələsinə yekun vurulacaq.Azərtac xəbər verir ki, saat 18:00-da start götürəcək ilk oyunda Azərbaycan və Almaniya yığmaları meydana çıxacaqlar. Voleybolçularımız qrup mərhələsindəki nailiyyəti təkrarlayıb yarımfinal mərhələsinə vəsiqə qazanmağa çalışacaqlar. Komandamız qrup mərhələsində Almaniya kollektivini 3:1 hesabı ilə məğlub edib. Bu qarşılaşmanın qalibi finala gedən yolda Niderland yığması ilə qarşılaşacaq.Saat 20:30-da isə Rusiya və Türkiyə komandaları mübarizəyə qoşulacaqlar. Türkiyə millisi qrup mərhələsində 1:3 hesablı məğlubiyyətin revanşını almaq üçün yarışacaq. Oyunu öz xeyrinə başa vuran komanda yarımfinalda çempionatın favoritlərindən sayılan Serbiya kollektivinin rəqibi olacaq.