Futbolçular arasında beynəlxalq turnirə start verilib

Koreya Respublikasının Kyoncu şəhərində 13 yaşadək futbolçular arasında beynəlxalq turnirə start verilib. Qəbələ ilə qardaşlaşmış şəhərdə təşkil olunan yarışa “Qəbələ” Futbol Akademiyasının U-13 komandası da qatılıb.Azərtac xəbər verir ki, Qəbələ Şəhər İcra Hakimiyyəti başçısının birinci müavini Abil Ağasəfovun rəhbərlik etdiyi nümayəndə heyəti Kyoncu meriyasının qonağı olub. Şəhərin meri “qırmızı-qaralar”ı qəbul edib, onlara xüsusi diqqət göstərib. O, həmçinin “Qəbələ”nin oyununu da izləyib. Qardaşlaşmış şəhərlərin nümayəndələri arasında rəsmi görüş də baş tutub. Kyoncu şəhər rəhbərliyi komandamızın üzvləri üçün ziyafət təşkil edib.“E” qrupunda çıxış edən “qırmızı-qaralar” turnirdə 4 matç keçiriblər. Komandamız ilk oyununda Yaponiyanın “Nara” klubunu məğlub edib – 4:1. U-13-ün heyətində Ömər Qurbanov 2, Sadiq Şəfiyev və Murad Musayev hərəyə 1 dəfə fərqləniblər. Ardınca İspaniyanın “Selta” və Koreyanın “Çonqyonq” klubları ilə görüşən “Qəbələ” hər iki matçda 0:2 hesabı ilə uduzub. Ardınca futbolçularımız Yaponiyanın “İçinomiya” komandasına qalib gəlib – 3:2. Bu matçda komandamızın qollarını Elmir Hüseynli, Okan Təhməzli və Murad Musayev vurublar.Qrup mərhələsində “Selta” və “Çonqyonq” daha çox – 9 xal toplayıb. “Qəbələ” “İçinomiya” ilə eyni 6 xal toplasa da, yaponiyalılar daha yaxşı top fərqinə malik 3-cü olub. Qrup dördüncüsü olan “qırmızı-qaralar” turnirdə növbəti oyunlarını avqustun 30-da keçirəcəklər. Komandamız Yaponiyanın “Vejitto” və Tailandın BBC klubları ilə üz-üzə gələcək.xeber100.com

Voleybol komandası növbəti yoxlama matçını keçirib

Sloveniyada təlim-məşq toplanışında olan qadın voleybolçulardan ibarət Azərbaycan millisi növbəti yoxlama matçını keçirib.Azərtac xəbər verir ki, baş məşqçi Faiq Qarayevin yetirmələri bu dəfə Xorvatiya millisi ilə üz-üzə gəliblər.Qarşılaşma 2:2 hesablı heç-heçə ilə yekunlaşıb.xeber100.com

Azərbaycan millisinin formasında dəyişiklik edilib

Futbol üzrə Azərbaycan milli komandasının formasında dəyişiklik edilib.AFFA-dan Azərtac-a bildirilib ki, yığmamızın formasına Azərbaycan bayrağı əlavə olunub.Dünya çempionatının seçmə mərhələsi çərçivəsində yığmamızın üzvləri Norveçlə səfər, San-Marino ilə evdə keçirəcəyi matçlara göy rəngli formada çıxacaqlar.Qeyd edək ki, Norveçlə matç sentyabrın 1-də "Ullevaal" stadionunda, San-Marino ilə qarşılaşma sentyabrın 4-də "Bakcell Arena"da keçiriləcək.xeber100.com

K-1 döyüş növü üzrə beynəlxalq turnir keçirilib

Avqustun 28-də Bakıda muay-tay və K-1 döyüş növü üzrə beynəlxalq turnir keçirilib.Azərtac xəbər verir ki, sayca 20-ci dəfə təşkil olunan turnirdə Azərbaycan idmançıları ilə yanaşı, İran, Rusiya və Gürcüstan atletləri də mübarizə aparıb. Turnirdə peşəkar döyüşçülər 7 çəki dərəcəsində yarışıblar.Gərgin idman mübarizəsi şəraitində davam edən turnirdə Azərbaycan millisi 5 qızıl medalla komanda hesabında birinci yeri tutub. İran komandası 3 qızıl medalla ikinci, Rusiya təmsilçiləri 2 qızıl medalla üçüncü olublar. Aktivində bir qızıl medal olan Gürcüstan komandası isə dördüncü yerdə qərarlaşıb.Qızıl mükafatları millimizə böyüklərin mübarizəsində Cavidan Cəfərli (51 kq), Babək Qənbərov (54 kq), Murad Babayev (71 kq), gənclərin yarışında isə Fazil Nuriyev (51 kq) və Rəşad Mikayilov (67 kq) qazanıblar.Qeyd edək ki, sentyabrın 22-24-də Bakıda muay-tay üzrə beynəlxalq Açıq Xəzər Dəniz Kuboku, daha sonra Gürcüstanda, oktyabrda isə Türkiyədə beynəlxalq turnirlər, noyabrda Belarusda Avropa çempionatı keçiriləcək. Azərbaycan idmançılarının bu turnirlərdə də iştirakı nəzərdə tutulub.xeber100.com

Cüdo üzrə dünya çempionatı davam edir

Macarıstanın paytaxtı Budapeştdə cüdo üzrə dünya çempionatı davam edir.Azərtac xəbər verir ki, bu gün daha 2 çəki dərəcəsində qaliblər müəyyənləşəcək.İkinci yarış günündə qadınlar 52, kişilər isə 66 kiloqram çəkidə qüvvələrini sınayacaqlar. Qadınların yarışında Azərbaycanı Buyanxişiq Purevsuren və Nəzakət Əzizova, kişilər arasında isə Nicat Şıxəlizadə təmsil edəcək.Artıq cüdoçularımızın ilk rəqibləri müəyyənləşib. Belə ki, Nicat Şıxəlizadə qazaxıstanlı Yeldos Jumaxanov, Buyanxişiq Purevsuren Rusiya cüdoçusu Natalya Kuzyutina, Nəzakət Əzizova isə mərakeşli İkram Sukate ilə qarşılaşacaqlar.Qeyd edək ki, ilk yarış günündə Azərbaycan millisinin üzvü Orxan Səfərov (60 kq) finalda yaponiyalı dünya və Asiya çempionu Naohişa Takatoya məğlub olaraq gümüş medala sahib olub.xeber100.com

Dünya çempionatında final mərhələsinə yekun vurulub

Almaniyanın Hamburq şəhərində kişi boksçular arasında keçirilən dünya çempionatında 1/8 final mərhələsinə yekun vurulub.Azərtac xəbər verir ki, mərhələnin sonuncu günündə Azərbaycan millisinin 2 boksçusu da rinqə çıxıb. Onlardan biri - Məhəmmədrəsul Məcidov (91 kq-dan yuxarı) mundialda növbəti qələbəsini qazanıb. İkiqat dünya çempionumuz iordaniyalı Hüseyn İşayşi məğlub edib - 5:0.M.Məcidov 1/4 finalda Camili-Dini Aboudo-Moindze (Fransa) ilə üz-üzə gələcək. Döyüş avqustun 29-da olacaq.Dünya çempionumuzdan fərqli, Pərviz Bağırov yarışla vidalaşıb. Turnirdə 69 kiloqram çəki dərəcəsində mübarizə aparan boksçumuz 1/8 finalda Tuvşinbat Byambaya (Monqolustan) 1:4 hesabı ilə məğlub olub.xeber100.com

“Fənərbağça” komandası “Zenit” klubunun futbolçusunu heyətinə cəlb edib

Türkiyənin “Fənərbağça” komandası Rusiyanın “Zenit” klubunun futbolçusu Luis Netonu heyətinə cəlb edib.Azərtac İstanbul klubunun saytına istinadla xəbər verir ki, iyirmi doqquz yaşlı futbolçu artıq İstanbula gəlib. Portuqaliyalı oyunçu ilə bu gün rəsmi müqavilə imzalanacağı gözlənilir.Qeyd edək ki, peşəkar karyerasına 2006-cı ildə Portuqaliyanın “Varzim” komandasında başlayan təcrübəli futbolçu sonralar bu ölkənin “Nasional”, İtaliyanın “Siena” kollektivlərinin heyətində çıxış edib. 2013-cü ildə İtaliya klubundan 6,5 milyon avroya “Zenit”ə keçən Luis Neto bu klubun heyətində 105 oyunda forma geyinib.Mərkəz müdafiəçisi Portuqaliya yığma komandasının heyətində 14 qarşılaşmada meydana çıxıb.Xatırladaq ki, İstanbul təmsilçisi bir müddət əvvəl Rusiyanın “Zenit” klubunun digər futbolçusu Juliano Viktor de Paulanı icarəyə götürüb.xeber100.com

“Real Madrid” futbol klubu transfer çalışmalarını yekunlaşdırıb

“Real Madrid” futbol klubu cari mövsüm üçün transfer çalışmalarını yekunlaşıdırıb.Azərtac tribuna.com saytına istinadla xəbər verir ki, Madrid təmsilçisinin məşqçilər korpusu komandaya yeni futbolçunun cəlb olunmasını istəmir.“Real Madrid” yay transfer pəncərəsində müdafiəçi Teo Ernandes və xavbek Dani Sebalosanı heyətinə cəlb edib. Forvard Alvaro Morata, müdafiəçilər Danilo, Fabiu Koentrau, Pepe və yarımmüdafiəçi Hames Rodriqes isə komandanı tərk ediblər.xeber100.com

Boks Federasiyasının məlumatına görə…

Almaniyanın Hamburq şəhərində kişi boksçular arasında dünya çempionatı davam edir. Mundialın 3-cü günündə Azərbaycan millisinin 2 üzvü mübarizəyə qoşulub.Azərbaycan Boks Federasiyasından Azərtac-a bildirilib ki, 75 kiloqram çəki dərəcəsində rinqə çıxan Kamran Şahsuvarlı səkkizdəbir final mərhələsi çərçivəsində keçirilən döyüşdə Maks Van der Pasla (Hollandiya) üz-üzə gəlib. Gərgin keçən görüş Olimpiya mükafatçımızın qələbəsi ilə başa çatıb. K.Şahsuvarlı rəqibini 3:2 hesabı ilə məğlub edib. O, dörddəbir finalda kolumbiyalı Xorxe Vivas Palasiosla qüvvəsini sınayacaq. Döyüş avqustun 29-da baş tutacaq.Şahsuvarlıdan fərqli olaraq, Lorenzo Sotomayorun debütü uğurlu alınmayıb. 64 kiloqram çəki dərəcəsində mübarizə aparan təmsilçimiz səkkizdəbir final səddini keçə bilməyib. O, çətin keçən görüşdə misirli Eslam Muhamedə 2:3 hesabı ilə məğlub olub.xeber100.com

Cüdo üzrə dünya çempionatı start götürür

Avqustun 28-də Macarıstanın paytaxtı Budapeştdə cüdo üzrə dünya çempionatı start götürür.Azərtac xəbər verir ki, sentyabrın 3-də yekun vurulacaq çempionatda ölkəmizi 17 cüdoçu (9 kişi, 8 qadın) təmsil edir. Azərbaycan Cüdo Federasiyasının prezidenti Rövnəq Abdullayevin başçılıq etdiyi nümayəndə heyəti hazırda Macarıstanda səfərdədir.Çempionatın püşkatma mərasimində Beynəlxalq Cüdo Federasiyasının rəhbərliyi və İcraiyyə Komitəsinin üzvləri, milli federasiyaların rəsmiləri, yığma komandaların məşqçiləri, tanınmış cüdoçular iştirak ediblər.Püşkatma nəticəsində Azərbaycan cüdoçularının da ilk rəqibləri məlum olub. Çempionatda 60 kiloqram çəki dərəcəsində yarışacaq Orxan Səfərov Tapiva Pavari (Zimbabve) - Yanislav Qerçev (Bolqarıstan) cütlüyünün qalibi, Nicat Şıxəlizadə (66 kq) isə qazaxıstanlı Eldos Jumaxanov ilə üz-üzə gələcəklər. Rüstəm Orucov (73 kq) Aqil Qjakov (Kosovo) - Xavyer Ramires (İspaniya) qarşılaşmasının qalibini sınağa çəkəcək. Hidayət Heydərov (73 kq) Mərakeş təmsilçisi Əhməd Əl Mezaati, Məmmədəli Mehdiyev (90 kq) rumıniyalı Kristian Bodirlau, Tural Səfquliyev (90 kq) perulu Xose Aroyo ilə döyüşəcək. Dünya çempionatında 100 kiloqram çəki dərəcəsində mübarizə aparacaq Elxan Məmmədov Luis Medina (Dominikan) - Kayl Reyes (Kanada) görüşünün, Elmar Qasımov isə Otqonbatar Lxaqvasuren (Monqolustan) - Səidcəlal Səidov (Tacikistan) qarşılaşmasının qalibləri ilə yarışacaqlar. Yüz kiloqramdan yuxarı çəki dərəcəsində isə Uşanqi Kokauri braziliyalı Rafael Silva ilə qarşılaşacaq.Qadınların yarışında 48 kiloqram çəki dərəcəsində Leyla Əliyeva (48 kq) yaponiyalı Funa Tonaki, Erdenabat Bazarraqça (48 kq) rumıniyalı Aleksandra Pop ilə üz-üzə gələcəklər. Çempionatda 52 kiloqram çəki dərəcəsində Nəzakət Əzizova Mərakeş təmsilçisi İkram Soukate, Purevsuren Buyankışinq rusiyalı Natalya Kuzyutina ilə görüşəcəklər. Həmçinin 57 kiloqram çəki dərəcəsində Munktsedev İçinkolo Joan Ekusoan (İspaniya), Səkinə Zairova slovakiyalı Viktoriya Mayorosovanı sınağa çəkəcəklər. Gülsədəf Kərimova (63 kq) Anrikelis Barrios (Venesuela), İrina Kindzerska (78 kq-dan yuxarı) toqolu Essoxanam Koros ilə qarşılaşacaqlar.xeber100.com