Boks yarışlarının proqramında dəyişiklik edilib

“Tokio-2020” Yay Olimpiya Oyunlarının boks yarışlarının proqramında dəyişiklik edilib.Boks Federasiyasından Azərtac-a bildirilib ki, Beynəlxalq Olimpiya Komitəsinin (BOK) tövsiyəsinə əsasən, Beynəlxalq Həvəskar Boks Assosiasiyası (AİBA) Yaponiyanın paytaxtında mübarizə aparacaq boksçuların çəki dərəcələri ilə bağlı qərar verib.Yeni proqrama əsasən, “Gündoğar ölkə”də də bu növ üzrə mübarizədə 13 dəst medal oynanılacaq. Ancaq növbəti Olimpiadada kişi boksçular 10 deyil, 8 çəki dərəcəsində qalibi müəyyənləşdirəcəklər. Əvəzində qadın boksçularda iki çəki dərəcəsi artırılaraq, beşə çatdırılıb. BOK bu qərarı gender balansının qorunması ilə izah edib.Bununla əlaqədar AİBA tərkibindəki müvafiq komissiyalarla müzakirələr aparıb, optimal variantların tapılmasını tapşırıb. Həmin komissiyaların işinin nəticəsi isə iyulun sonunda bir araya gələcək İcraiyyə Komitəsinin illik yığıncağında müzakirəyə çıxarılacaq. Toplantıda “Tokio-2020”də boks yarışlarının hansı çəki dərəcələrində olacağı təsdiqlənəcək.xeber100.com

“Qəbələ” futbol klubu hazırlığını davam etdirir

Avropa liqasının 2017-2018-ci il mövsümündə ölkəmizi təmsil edəcək “Qəbələ” futbol klubu hazırlığını davam etdirir.Azərtac xəbər verir ki, iyunun 7-dən Avstriyada olan “qırmızı-qaralar” məşqlərini İnnsburk şəhəri yaxınlığındakı Fulpmes qəsəbəsində gerçəkləşdirirlər. Roman Qriqorçukun baş məşqçisi olduğu komanda gündə iki hazırlıq keçir. Günün ilk yarısında fitness-zalda fiziki hazırlıq üzrə çalışmalara üstünlük verilir. İkinci məşq isə meydançada toplu çalışmalardan ibarət olur.İyirmi yaşadək futbolçulardan ibarət Azərbaycan yığmasının toplanışından dönən Qismət Alıyev və Yusif Nəbiyev də artıq “qırmızı-qaralar”ın məşqlərinə qoşulublar. Dünya çempionatının seçmə mərhələsində Şimali İrlandiya ilə qarşılaşan əsas yığmanın düşərgəsində olan futbolçular isə komandanın hazırlığına iyunun 15-də qatılacaqlar.Xatırladaq ki, “Qəbələ” Avstriyada ilk yoxlama oyununu iyunun 12-də yerli “Fulpmes”ə qarşı keçirəcək.xeber100.com

İtaliya Futbol Federasiyasının məlumatı

Futbol üzrə İtaliya çempionatının “A” seriyasında artıq növbəti mövsümdə videotəkrar sistemi tətbiq ediləcək.İtaliya Futbol Federasiyasının (İFF) prezidenti Karlo Tavekkio bildirib ki, arbitrlərə videoyardım sistemindən istifadə etmək üçün hər bir stadion əlavə videokameralarla təchiz edilməlidir. İFF Beynəlxalq Futbol Federasiyasının (FIFA) da icazəsini almalıdır.TASS agentliyi K.Tavekkionun aşağıdakı sözlərini sitat gətirib: “Biz bütün stadionlara yeni videotəkrarlar sistemini tətbiq etdiyimiz üçün klublardan bir balaca anlayış gözləyirik. Bundan ötrü baş hakimin assistentlərinə ayrıca otaq və azı 8 televiziya kamerası lazım gələcək. “A” seriyası bu məqsəd üçün tələb olunan 2 milyon avro məbləğində xərcləri təmin edəcək. FIFA hələlik tam icazə verməyib, amma bütün işarələr aydın şəkildə göstərir ki, biz gələn mövsümün əvvəlindən başlayaraq videotəkrarlardan istifadə edəcəyik”.Videotəkrarlar sistemi beynəlxalq yoldaşlıq görüşlərində və bir neçə turnirdə, məsələn, dünya klub çempionatında və gənclərdən ibarət komandalar arasında dünya çempionatında sınaqdan keçirilib. İFF daha əvvəl bu sistemi İtaliya birinciliyinin ikinci divizionuna tətbiq edib.Arbitrlərə videoyardım sistemi 2017-ci və 2018-ci illərdə Rusiyada keçiriləcək Konfederasiyalar Kuboku turnirində və dünya çempionatında da işləyəcək.xeber100.com

2018-ci ildə Rusiyada keçiriləcək dünya çempionatında…

Futbol üzrə İran milli komandası 2018-ci ildə Rusiyada keçiriləcək dünya çempionatına vəsiqəni təmin edib.Azərtac xəbər verir ki, Asiya üzrə seçmə mərhələnin “A” qrupunda keçirdiyi ev oyununda Özbəkistan yığmasına 2:0 hesabı ilə qalib gələn İran millisi mundialda iştirak hüququ qazanıb. Oyunda qolları Sərdar Azmoun (23) və Mehdi Taremi (88) vurublar.Bununla da qrupda keçirdiyi səkkiz oyunda 20 xal toplayan İran komandası Braziliyadan sonra Rusiyaya yollanacaq ikinci komanda olub.İran yığma komandası seçmə mərhələdə keçirdiyi səkkiz oyunda öz qapısından top buraxmayıb.xeber100.com

Avropa çempionatının final mərhələsi start götürəcək

İyunun 16-da Polşada 21 yaşadək futbolçular arasında Avropa çempionatının final mərhələsi start götürəcək.Azərtac xəbər verir ki, çempionatda 12 komanda üç qrupda mübarizə aparacaq. “A” qrupunda İngiltərə, Polşa, Slovakiya və İsveç milliləri yer alıblar. “B” qrupunda isə Makedoniya, Portuqaliya, Serbiya, İspaniya, “C” qrupunda isə Çexiya, Danimarka, Almaniya və İtaliya yığma komandaları yarımfinal uğrunda yarışacaqlar.Çempionatın yarımfinal görüşləri iyunun 27-də, final qarşılaşması isə iyunun 30-da keçiriləcək.Qarşılaşmalar altı şəhərdə oynanılacaq.İki il əvvəl Çexiyada keçirilən qitə birinciliyinin finalında İsveç yığması Portuqaliyaya qalib gələrək çempion olub.xeber100.com

Dünya çempionatının Avropa üzrə seçmə mərhələsi çərçivəsində…

İyunun 11-də futbol üzrə dünya çempionatının Avropa üzrə seçmə mərhələsi çərçivəsində “D”, “G” və “I” qruplarında görüşlər keçirilib.Azərtac xəbər verir ki, azərbaycanlı futbolsevərlər üçün maraq doğuran qarşılaşma “I” qrupunda yer alan Türkiyə milli komandasının görüşü olub. Qardaş ölkə təmsilçiləri səfərdə Kosovo millisinə 4:1 hesabı ilə qalib gələrək çempionata qatılmaq yolunda vacib olan üç xalı qazanıblar. Türkiyə millisinin heyətində Volkan Şen (6), Cengiz Ünder (31), Burak Yılmaz (61) və Ozan Tufan (82) fərqləniblər. Ev sahiblərinin qolunu isə matçın 22-ci dəqiqəsində Əmir Rəhmani vurub.Bu qrupun digər oyununda Ukrayna yığması səfərdə Finlandiyanı 2:1 hesabı ilə məğlub edib. Növbəti oyunda isə İslandiya millisi doğma meydanda qrupun lideri Xorvatiya yığmasına son dəqiqədə vurduğu bir qol sayəsində qalib gəlib – 1:0.Bu turdan sonra İslandiya millisi qrup lideri ilə xalları bərabərləşdirib. Hər iki komandanın aktivində 13 xal olsa da, xorvatiyalılar top fərqinə görə liderliyi qoruya biliblər. Türkiyə millisi isə eyni xala (11) malik olduğu Ukrayna yığmasını top fərqində üstələyərək üçüncü sırada qərarlaşıb. Hər ikisi bir xal toplayan Finlandiya beşinci, Kosovo isə altıncı sıradadır.“D” qrupunda keçirilən hər üç görüş qollu heç-heçə ilə nəticələnib. İrlandiya–Avstriya (1:1), Moldova–Gürcüstan (2:2) və Serbiya–Uels (1:1) matçlarında qalib müəyyənləşməyib. Bu qrupda Serbiya və İrlandiya yığmalarının 12, Uels və Avstriyanın isə 8 xalı var. Gürcüstan 3 xalla beşinci, Moldova isə 2 xalla altıncıdır.“G” qrupuna liderlik edən İspaniya və İtaliya milliləri öz oyunlarını qələbə ilə başa vurublar. İspaniya yığması səfərdə Makedoniyanı (2:1), dördqat dünya çempionları isə doğma meydanda Lixtenşteyni (5:0) məğlub edib. Albaniya isə səfərdə İsrailin qapısından üç cavabsız top keçirib.İspaniya və İtaliya milliləri 16 xalla qrupa liderlik edirlər. Pireney təmsilçisi top fərqinə görə italiyalıları qabaqlayırlar. Albaniya və İsrail milliləri 9, Makedoniya yığması isə 3 xal toplayıb. Lixtenşteynin isə aktivində xal yoxdur.xeber100.com

“Caspian Cup” beynəlxalq turnirində…

“Neftçi” futbol klubunun U-14 komandası Rusiyanın Mahaçqala şəhərində keçirilən “Caspian Cup” beynəlxalq turnirində beşinci yeri tutub.Azərtac xəbər verir ki, qrupda Tbilisi "Dinamo”su (1:5), Vladiqafqaz "Yunost”u (2:3) və Mahaçqala "Anji”si (0:5) ilə qarşılaşan “Neftçi” 5-8-ci yerlər uğrunda oyunlarda Qroznı "Ramzan”ına (1:0) və Vladiqafqaz "Yunost”una (1:0) qalib gəlib.“Neftçi”nin turnirdə vurduğu 5 qoldan 3-nə Gülağa Əsədov, hərəyə birinə isə Mirəli Əhmədov və Yaşar Əhmədov imza atıblar.Turnir daha iki əlamətdar hadisə ilə yadda qalıb. Yarışın ən yaxşı futbolçusuna “Neftçi”nin əfsanəvi hücumçusu Anatoli Banişevskinin adını daşıyan mükafat təqdim olunub. Bu şərəfə Tbilisi "Dinamo”sunun üzvü Georgi Abuaşvili layiq görülüb. "Neftçi”nin futbolçusu Mirəli Əhmədov isə turnirin ən yaxşı müdafiəçisi seçilib. M.Əhmədov Aleksandr Çivadzenin adını daşıyan mükafata sahib çıxıb.xeber100.com

“Zirə” futbol klubu təlim-məşq toplanışına start verib

Mayın 24-dən Bakıda təlim-məşq toplanışına start verən “Zirə” futbol klubu hazırlığın ilk mərhələsini iyunun 9-da başa vurub.Azərtac kluba istinadla xəbər verir ki, “qartallar” hazırlığın ikinci mərhələsinə başlayıblar.Komanda Türkiyənin Bolu şəhərinə yola düşüb və ilk məşqinə çıxıb. Hazırlığın bu mərhələsində baş məşqçi Ayxan Abbasovun komandası 3 yoxlama oyunu keçirməyi planlaşdırır.“Zirə” iyunun 13-də Kamerunun “Kolombe Sportive”, bir həftə sonra isə Rumıniyanın “Vitorul” klubu ilə üz-üzə gələcək. Daha bir yoxlama oyunu isə iyunun 17-də və ya 16-da keçiriləcək.xeber100.com

2017/2018-ci il mövsümü üçün növbəti transfer həyata keçirilib

“Sumqayıt” futbol klubu 2017/2018-ci il mövsümü üçün növbəti transferini həyata keçirib.Azərtac kluba istinadla xəbər verir ki, “Sumqayıt” son olaraq “Zirə”də çıxış etmiş Cavid Tağıyevi heyətinə qatıb. İyirmi dörd yaşlı futbolçu komanda ilə birillik müqavilə imzalayıb.Qeyd edək ki, Cavid Tağıyev “Zirə”dən başqa, “Turan”, AZAL və “Qarabağ"ın şərəfini qoruyub. O, həmçinin vaxtilə Azərbaycanın U-19, U-21 və “A” millisinin şərəfini qoruyub.xeber100.com

“İnter” futbol klubu ilk yoxlama oyununu keçirib

Türkiyədə təlim-məşq toplanışında olan Bakının “İnter” futbol klubu ilk yoxlama oyununu keçirib.Azərtac xəbər verir ki, Kamerunun "Colombe Sportive du Dja et Lobo" komandası ilə qarşılaşan Bakı təmsilçisi görüşdən qalib ayrılıb – 1:0.Rauf Əliyevin vurduğu top rəqib komandanın müdafiəçisinə dəyərək qapıdan keçib.xeber100.com