Tbilisidə keçirilən futbol turnirinə yekun vurulub

Tbilisidə Nodar Axalkatsinin xatirəsinə futbol turnirinə yekun vurulub.Azərtac xəbər verir ki, “Qəbələ”nin 11 yaşadək futbolçulardan ibarət komandası turnirin sonuncu günündə 5-ci yer uğrunda matçda qüvvəsini sınayıb.“Qırmızı-qaralar” Ağdamın “Qarabağ” klubu ilə qarşılaşıblar. Cuma Hüseynovun qol sevinci yaşadığı görüşdə Ağdam təmsilçisi qalib gəlib – 3:1.Beləliklə, “Qəbələ”nin U-11 komandası turniri 6-cı pillədə başa vurub. Yarışın qalibi isə Gürcüstanın “Saburtalo” komandası olub.xeber100.com

“Qarabağ” 2017/2018-ci il mövsümünün hazırlığına start verib

Ağdamın “Qarabağ” futbol klubu 2017/2018-ci il mövsümünün hazırlığına start verib.Azərtac xəbər verir ki, komandanın baş məşqçisi Qurban Qurbanov mayın 5-dən - ölkə kubokunun finalından sonra futbolçulara istirahət vermişdi. Mövsümün ilk məşqi günorta saatlarında klubun bazasında start götürüb.Komandanın ilk məşqində Dino Ndlovu, Arif Daşdəmirov və Elvin Yunuszadə və əvəzedici heyətin bir neçə futbolçusu iştirak edib. Millimizin heyətində olan 8 futbolçu - Rəşad Sadıqov, Bədavi Hüseynov, Maksim Medvedev, Ağabala Ramazanov, Əfran İsmayılov, Qara Qarayev, Rahid Əmirquliyev və Riçard Almeyda, Bosniya və Herseqovina yığmasına dəvət alan İbrahim Şehiç və U-21 yığmamızın toplanışına dəvət alan Mahir Mədətov, Elgün Uluxanov və Eltun Turabov ilk məşqdə iştirak etməyiblər.Daha bir futbolçumuz Ansi Aqolli isə bir neçə gün sonra komandaya qoşulacaq.xeber100.com

Bakı Şəhər Gənclər və İdman Baş İdarəsinin məlumatı

Bakı Şəhər Gənclər və İdman Baş İdarəsi (BŞGİBİ) tərəfindən skvoş üzrə paytaxt çempionatı keçirilib.BŞGİBİ-dən Azərtac-a bildiriblər ki, çempionatda 20 idmançı iştirak edib.Gərgin idman mübarizəsi şəraitində keçən yarışda Ömər Qəhrəmanov birinci olub. Yaroslav Şuvayev yarışı ikinci, Genadiy Klim isə üçüncü pillədə başa vurublar.Mükafatçılara Baş İdarə tərəfindən diplom və medallar təqdim olunublar.xeber100.com

U-16 turnirinin mükafatlandırma mərasimi keçirilib

“UNICEF Azerbaijan”ın ofisində AFFA-nın futbol üzrə U-16 qızlar Liqası turnirinin qaliblərinin mükafatlandırılma mərasimi keçirilib.Azərtac xəbər verir ki, tədbirdə AFFA-nın baş katibinin müavini Sərxan Hacıyev, UNICEF-in Azərbaycandakı nümayəndəsi Edvard Karvardin, müğənni Samira Allahverdiyeva iştirak ediblər.Liqanın ən yaxşı oyunçusu “Mingəçevir”in futbolçusu Nigar Mirzəliyeva seçilib. Ən məhsuldar oyunçu 47 qolla “Təhsil” FM-in futbolçusu Sona Rəhimova olub. Ən yaxşı məşqçi nominasiyasında “Təhsil” FM-in məşqçisi Elvin Həmidov təltif edilib.Xatırladaq ki, liqanın qalibi “ Təhsil” FM komandası olub. “Mingəçevir” ikinci, “Fidan” isə üçüncü yeri tutublar.xeber100.com

Cüdoçular arasında açıq Bakı birinciliyinə yekun vurulub

İyirmi üç yaşadək cüdoçular arasında açıq Bakı birinciliyinə yekun vurulub.Azərtac xəbər verir ki, yarışda “Qəbələ” idman klubunun təmsilçiləri də çıxış ediblər.Komandanın üzvləri birincilikdən 4 medalla ayrılıblar. Klubun yetirmələri 3 qızıl və 1 gümüş mükafata sahib olublar.Yarışın ilk günündə tatami üzərinə çıxan Rəşad Yelkiyev (60 kq) bütün rəqiblərinə qalib gəlməklə fəxri kürsünün ən yüksək pilləsinə qalxıb. Turnirin ikinci günündə isə 100 kiloqram çəki dərəcəsində “Qəbələ” idmançıları finalda üz-üzə gəliblər. Bu dueldə Vasif Şərbətli İmran Yusifovdan güclü olub. Komandaya daha bir çempionluğu 100 kiloqramdan yuxarı çəki dərəcəsində qüvvəsini sınayan Vüsal Orucov qazandırıb.xeber100.com

“Zirə” futbol klubu heyətini gücləndirir

“Zirə” klubu heyətini daha bir futbolçu ilə gücləndirib.Azərtac kluba istinadla xəbər verir ki, komanda yarımmüdafiəçi Orxan Əliyevlə anlaşıb. Gənc futbolçu ilə birillik müqaviləyə imza atılıb.Orxan Əliyev “Sumqayıt”, “Xəzər-Lənkəran” və “Kəpəz” klublarının formasını geyinib.xeber100.com

Beynəlxalq Velosipedçilər İttifaqının yarışlar silsiləsinə yekun vurulub

Kiyevdə Beynəlxalq Velosipedçilər İttifaqının 1.2 kateqoriyalı “Horizon Park” yarışları silsiləsinə yekun vurulub.Azərtac xəbər verir ki, 21 Pro-kontinental, kontinental və milli komandanın iştirak etdiyi 3 günlük yarış Azərbaycanın kontinental velosiped komandası “Synergy Baku”nun reytinqimizə növbəti xallar əlavə etməsi ilə yadda qalıb.Ukraynaya Elçin Əsədov, Samir Cəbrayılov, Elgün Əlizadə, Musa Mikayılzadə, Kənan Qəhrəmanlı və İsmayıl İlyasovdan ibarət heyətlə yollanan “Synergy Baku” ilk gündə 160 kilometrlik “Horizon Park Race for Peace” turunda mübarizə aparıb. Elçin Əsədovun finiş xəttini 7-ci keçməsi aktivimizə 5 reytinq xalı qazandırıb.Ümumi uzunluğu 116 kilometr olan “Horizon Park Race Maidan” turu Elçin Əsədovun 9-cu olması və 3 reytinq xalının qazanılması ilə yadda qalıb. Yarışlar silsiləsinin sonuncu günündə isə Samir Cəbrayılovun 96 kilometrdən ibarət “Horizon Park Classic”də 8-ci yeri tutması daha 3 xalla əlamətdar olub.Qeyd edək ki, yığma komandamızın üzvlərinin yarışlarda qazandıqları xallar onların öz reytinqləri ilə yanaşı, milli komandamızın da aktivinə əlavə olunub. Hazırda Beynəlxalq Velosipedçilər İttifaqının 112 ölkənin yer aldığı reytinq sıralanmasında Azərbaycan 832 xalla 38-ci yerdədir. Siyahının ilk 5 pilləsində Belçika, Kolumbiya, İspaniya, İtaliya və Fransa yer alır.xeber100.com

“Barselona” futbol klubuna yeni baş məşqçi təyin edilib

İspaniyalı mütəxəssis Ernesto Valverde İspaniyanın “Barselona” futbol klubunun yeni baş məşqçisi təyin edilib. Bunu kataloniyalıların prezidenti Xosep Bartomeu mətbuat konfransında elan edib.Komandanın mətbuat xidmətinin məlumatında deyilir ki, 53 yaşlı məşqçi ilə müqavilə müddəti daha bir mövsüm uzadılma imkanı ilə iki il müddətinə nəzərdə tutulub. E.Valverde rəsmi surətdə iyunun 1-də təqdim ediləcək.X.Bartomeu deyib: “E.Valverdedə bizə lazım olan istedad, bilik və təcrübə var. O, işləyən adamdır, oyunun fəlsəfəsini və klubumuza münasib olan iş üslubunu bilir, habelə məşqlərdə və oyunlarda yüksək texnologiyalardan istifadənin tərəfdarıdır”.E.Valverde “Barselona”nın baş məşqçisi vəzifəsində mövsüm başa çatandan sonra klubu tərk edəcəyini qabaqcadan elan etmiş Luis Enrikeni əvəzləyəcək.E.Valverde son dörd mövsümdə Bilbaonun “Atletik” klubuna hamilik edib. Onun rəhbərliyi ilə komanda ötən mövsümdə İspaniya çempionatında yeddinci yeri tutub.E.Valverde 1988-1999-cu illərdə “Barselona”nın hücumçusu olub. 2001-ci ildə “Atletik”in məşqçilər qərargahına daxil olandan sonra məşqçilik fəaliyyətinə başlayıb, sonralar bu kluba başçılıq edib. O, bu illər ərzində İspaniyanın “Espanyol”, “Vilyarreal”, “Valensiya”, habelə Yunanıstanın “Olimpiakose” klublarında müvəffəqiyyətlə çalışıb.xeber100.com

İngiltərə Premyer Liqasında sonuncu komanda müəyyənləşib

Futbol üzrə İngiltərə Premyer Liqasında növbəti mövsüm mübarizə aparacaq sonuncu komanda müəyyənləşib.Azərtac xəbər verir ki, Çempionşipin pley-off oyununda “Haddersfild” və “Ridinq” komandaları qarşılaşıblar. Əsas vaxtı qolsuz bərabərliklə nəticələnən matçın penaltilər seriyasında 4:3 hesabı ilə rəqibini məğlub edən “Haddersfild” elitaya vəsiqə qazanan sonuncu komanda olub.Bununla da, komanda 45 ildən sonra ilk dəfə yüksək liqada çıxış edəcək.Xatırladaq ki, bundan əvvəl “Nyukasl” və “Brayton” Premyer Liqada oynamaq hüququ qazanıb.xeber100.com

Stolüstü tennis üzrə dünya çempionatı keçirilir

Almaniyanın Düsseldorf şəhərində stolüstü tennis üzrə dünya çempionatı keçirilir.Azərbaycan Stolüstü Tennis Federasiyasından Azərtac-a bildiriblər ki, çempionat ərəfəsində mayın 30-da Avropa Stolüstü Tennis Birliyinin konqresi təşkil olunacaq.Konqresdə Azərbaycanı federasiyanın vitse-prezidentləri Fazil Məmmədov və Səbuhi Mehdizadə təmsil edirlər. Konqresdə idarə heyəti ilə bağlı yeniliklər, Avropa çempionatının və digər yarışlar, milli çempionatların, milli liqaların tarixləri məsələsi müzakirə olunur.Eyni zamanda, mayın 31-də Dünya Stolüstü Tennis Federasiyasının illik ümumi yığıncağı keçiriləcək. Yığıncaqda qitə federasiyalarının illik hesabatları, 2017-2020-ci illər Beynəlxalq Stolüstü Tennis Federasiyasının yeni prezidenti və icraedici orqana seçkilər keçiriləcək.Dünya çempionata iyunun 6-da yekun vurulacaq.xeber100.com