İdmanın 12 növü üzrə respublika yarışları yekunlaşıb

Azərbaycan Respublikası Xüsusi Olimpiya Komitəsinin idmanın 12 növü üzrə respublika yarışları yekunlaşıb.Azərtac xəbər verir ki, respublika yarışları atletika, basketbol, badminton, cüdo, döşəmə üzərində hokkey, florbol, futbol, həndbol, pauerliftinq, stolüstü tennis, üzgüçülük və voleybol idman növləri üzrə keçirilməklə seçmə xarakterli olub və 2017-2018-ci illərdə keçiriləcək beynəlxalq yarışlara hazırlıq mərhələsi daşıyıb.Yarışlarda Bakı və Abşeronun 15-dək sosial xidmət müəssisəsi, uşaq evləri, yardımçı və xüsusi internat məktəblərinin, eyni zamanda Gəncə, Sumqayıt, Şəki, Lənkəran, Göyçay və Salyan regional Xüsusi Olimpiya filiallarının komandaları və 1500-ə yaxın idmançısı iştirak edib. Müvafiq yarışlar cari ilin payızında da təşkil olunacaq.xeber100.com

Atçılıq Federasiyasının təşkilatçılığı ilə…

Atçılıq Federasiyasının təşkilatçılığı ilə ümummilli lider Heydər Əliyevin xatirəsinə həsr olunmuş atçılığın konkur növü üzrə CSI2*-W kateqoriyalı beynəlxalq turnirin ilk günü maraqlı idman mübarizəsi ilə yadda qalıb.Azərtac xəbər verir ki, turnirdə Azərbaycan, Türkiyə, Rusiya, Belarus, Gürcüstan və İrandan ümumilikdə 19 idmançı iştirak edir.Yarışın ilk gününün nəticələrinə əsasən, 1,2 metrlik maneədən tullanma üzrə rusiyalı Anna Qromzina sıralamada birinci olub. Müxtəlif atlarla ikinci və üçüncü yerdə isə həmyerlimiz Rahib İsmayılov qərarlaşıb.İdmançıların 1,35 metrlik maneədən tullanma yarışında isə iranlı Maziar Camşid Xani birinci olub. Sıralamada ikinci və üçüncü yerlərə isə həmyerlilərimiz Rəşad Səmədov və Rahib İsmayılov yüksəliblər.Bu turnir Qafqaz Liqasına daxil olan idmançıların Dünya Kubokuna təsnifat mərhələsi hesab edilir. Eyni zamanda, final yarışı idmançılara “Longines” dünya sıralaması üçün də 50 xal toplamaq imkanı verir.Turnirə iyunun 4-də yekun vurulacaq.xeber100.com

Boksçular arasında Azərbaycan birinciliyinə start verilir

Bu gün yeniyetmə boksçular arasında Azərbaycan birinciliyinə start veriləcək.Azərtac xəbər verir ki, Bakı Boks Mərkəzində keçiriləcək yarış 6 gün davam edəcək.Birincilikdə ölkəmizin müxtəlif şəhər və rayonlarını təmsil edən komandaların 200-dək idmançısı mübarizə aparacaq.Yarışa qatılacaq 2003-2004-cü il təvəllüdlü boksçular 16 çəki dərəcəsində mükafatçıları müəyyənləşdirəcəklər.Turnirin baş hakimi Anar Nağdiyev olacaq.Qeyd edək ki, yarış iyulda Bolqarıstanda təşkil olunacaq Avropa birinciliyinə seçim xarakteri daşıyır.xeber100.com

UEFA-nın 2016-2017-ci il mövsümünə yekun vurulacaq

İyunun 3-də “Real Madrid” və “Yuventus” komandaları arasında keçirilən final qarşılaşması ilə UEFA Çempionlar Liqasının 2016-2017-ci il mövsümünə yekun vurulacaq.AZƏRTAC xəbər verir ki, komandalar Kardiff şəhərindəki 74,5 min tamaşaçı tutumuna malik Uels milli stadionunda üz-üzə gələcəklər.Madridlilər qarşılaşmada qalib gəlsələr qitənin ən nüfuzlu klub turnirinin kubokunu ardıcıl iki dəfə qazanan ilk komanda kimi tarixə düşəcəklər. Bu, həm də “Real Madrid”in bu turnirdə ümumilikdə 12-ci çempionluğu ola bilər. Zinəddin Zidanın yetirmələri bu baxımdan da Avropada liderliyi qorumağa cəhd edəcəklər. Turin təmsilçisi isə 21 illik fasilədən sonra kuboku yenidən muzeyinə aparmağa çalışacaq.Hər iki komanda sonuncu dəfə 2015-ci ildə bu turnirin yarımfinalında üzləşib. Həmin vaxt mərhələni adlayan komanda “Yuventus” olmuşdu. Komandalar indiyədək finalda cəmi bir dəfə - 1998-ci ildə qarşılaşıblar. “Real Madrid” Miyatoviçin qolu ilə minimal hesabla qalib gələrək 30 illik fasilədən sonra kuboka yiyələnmişdilər.Dünyada milyonlarla futbolsevərin maraqla gözlədiyi qarşılaşma Bakı vaxtı ilə saat 22:45-də başlayacaq.Qeyd edək ki, üzəri açılıb bağlana bilən Uels milli stadionu 1999-cu ildə istifadəyə verilib. Bu möhtəşəm idman qurğusunda ilk qolu 2000-ci il martın 29-da finlandiyalı məşhur futbolçu Yari Litmanen vurub. Həmin gün Uels-Finlandiya qarşılaşması qonaqların 2:1 hesablı qələbəsi ilə başa çatıb.xeber100.com

Qılıncoynatma Federasiyasının məlumatına görə…

Qılıncoynatma üzrə Bakı çempionatına yekun vurulub.Azərtac xəbər verir ki, Azərbaycan Qılıncoynatma Federasiyasının zalında keçirilən yarışda “Neftçi İdman Klubu” İctimai Birliyinin təmsilçiləri də bacarıqlarını nümayiş etdiriblər.Klubun yetirmələri sablya yarışlarında mübarizə aparıblar. Bu növdə bütün medallara klubun qılıncoynadanları yiyələniblər. Belə ki, 12 sablyaçının qatıldığı kişilərin yarışında Cavanşir Ağakişiyev paytaxt çempionatının qalibi olub. Yalnız finalda məğlub olan Elvin Rzazadə gümüş, Abdulla Əhmədov və Xalid Əsədov isə bürünc medala layiq görülüblər.Qadınlar arasında Sabina Mikina yarışın qızıl medalına sahib olub. Sevil Bünyatova 2-ci, Nərminə Cəfərova və Sevinc Bünyatova isə 3-cü yeri tutublar.xeber100.com

Cüdo üzrə açıq Bakı birinciliyi keçirilib

“Sərhədçi” İdman Olimpiya Mərkəzində cüdo üzrə açıq Bakı birinciliyi keçirilib. İyirmi üç yaşadək gənclər arasında təşkil olunan yarışda 23 komandadan 308 idmançı (280 oğlan, 28 qız) qüvvəsini sınayıb.Azərtac xəbər verir ki, “Neftçi İdman Klubu” İctimai Birliyinin cüdoçuları paytaxt birinciliyinin 6 medalına (3 qızıl,1 gümüş, 2 bürünc) sahib olublar.İki gün davam edən və 14 çəki dərəcəsi üzrə keçirilən yarışda xanım idmançılardan Ülviyyə Bayramova (52 kq) və Nigar Cəfərova (78 kq-dan yuxarı) fəxri kürsünün ən yüksək pilləsinə qalxıblar. Cəmalə Muqumova (70 kq) gümüş, Aytac Quluzadə (48 kq) və Əsmər İsgəndərova (52 kq) isə bürünc medala layiq görülüblər.Oğlanlar arasında 90 kiloqram çəki dərəcəsində mübarizə aparan Cavid Muradov bütün qarşılaşmaları qələbə ilə başa vuraraq paytaxt birinciliyinin qalibi adını qazanıb.xeber100.com

Şahmat üzrə dünya birinciliyi keçirilir

Bu günlərdə Minskdə tarixdə ilk dəfə olaraq kadetlər arasında sürətli şahmat və blits üzrə dünya birinciliyi keçirilir. Turnirdə 24 ölkədən 662 gənc şahmatçı, o cümlədən Azərbaycandan iki şahmatçı iştirak edir.Azərtac xəbər verir ki, medallar oğlanlar və qızlar arasında 8, 10 və 12 yaş kateqoriyasında keçirilir.Bu gün və sabah sürətli şahmat çempionatı keçirilir. Azərbaycanlılar arasında mükafat yerlərinə iddialılar ustalığa namizəd Ümid Aslanov (12 yaşadək oğlanlar arasında) və Rauf Seyidovdur (8 yaşadək).İyunun 4-də blitsdə ən güclülər müəyyən ediləcək.On iki yaşadək oğlanlar və qızlar arasında rapid üzrə dünya çempionatı İsveçrə sistemi üzrə keçirilir və 9 turdan ibarətdir (10 dəqiqə + 5 saniyə).

“Atletiko” klubunun transfer qadağası ilə bağlı şikayəti rədd edilib

Beynəlxalq İdman Arbitraj Məhkəməsi “Atletiko” (Madrid) futbol klubunun transfer qadağası ilə bağlı apellyasiya şikayətini rədd edib.Azərtac xəbər verir ki, beləliklə Madrid klubu bu yay da heyətinə futbolçu cəlb edə bilməyəcək.Qeyd edək ki, 18 yaşına çatmayan futbolçuların transferi zamanı qanun pozuntusuna yol verdiyi üçün “Atletiko”nun bu qış və yay transferləri dövründə oyunçu alması qadağan olunub.xeber100.com

“Bakı Şəhər Halqası” Əməliyyat Şirkətinin məlumatı

Formula-1 Azərbaycan Qran-Prisinə bilet alan tamaşaçılar şəhərin kassalarında vauçerlərini biletlərlə dəyişdirə bilərlər. Bu proses iyunun 25-dək davam edəcək.Azərtac “Bakı Şəhər Halqası” Əməliyyat Şirkətinin saytına istinadla xəbər verir ki, bilet dəyişdirməyə gələn tamaşaçılar özləri ilə şəxsiyyət vəsiqələrini gətirməlidirlər. Vauçerləri yalnız adları onların üzərində qeyd olunan şəxslər dəyişdirə bilərlər. Bilet satışı kassalarda, həmçinin onlayn qaydada davam edəcək.Onlayn alınan vauçerlər Formula-1 Azərbaycan Qran-Prisi başlayanadək müvafiq kassalarda biletlərin əsli ilə dəyişdirilməlidir. Vauçerlərlə yarış məkanına daxil olmağa icazə verilməyəcək.Yarış həftəsonu ərzində tamaşaçılar şəhərin kassaları ilə yanaşı, yarış məkanının girişlərində quraşdırılmış bilet satışı məntəqələrində də vauçerləri dəyişə biləcəklər. Bilet sahiblərindən xahiş olunur ki, vauçerlərin dəyişdirilməsini sonuncu günə saxlamasınlar. Əks halda kassaların önündə uzun növbələr yarana bilər.xeber100.com

2018-ci il dünya çempionatının seçmə mərhələsi çərçivəsində…

İyunun 1-də Bakı İdman Sarayında qadın voleybolçular arasında 2018-ci il dünya çempionatının seçmə mərhələsi çərçivəsində üçüncü günün sonuncu matçı İsrail və Hollandiya milliləri arasında oynanılıb.Azərtac xəbər verir ki, qarşılaşma Hollandiya voleybolçularının 3:1 hesablı qələbəsi ilə başa çatıb. Matçın ilk iki setində Hollandiya komandası rəqibinə asanlıqla qalib gəlib - 25:19 və 25:11. Lakin üçüncü hissədə İsrail millisi gərgin mübarizənin sonunda 25:22 hesablı qələbəyə sevinib. Buna baxmayaraq, İsrail təmsilçiləri dördüncü setdə rəqiblərinə müqavimət göstərə bilməyərək 15:25 hesabı ilə yeniliblər.Bununla da, Hollandiya yığması ardıcıl üçüncü qələbəsini qazanıb.xeber100.com