U-16 komandası “İnter” klubu ilə qarşılaşıb

“Qəbələ” futbol klubunun U-16 komandası Tbilisidə keçirilən Vitali Dareseliya turnirində mübarizəyə start verib.Azərtac xəbər verir ki, “Qəbələ” “A” qrupunda İtaliyanın “İnter” komandası ilə gücünü sınayıb. Matç İtaliya təmsilçisinin 2:1 hesablı qələbəsi ilə yekunlaşıb. Komandamızın qolunu Məhəmməd Məhərrəmov vurub.Baş məşqçi Şəhruz Mustafayevin komandası ikinci oyununda meydan sahibi Tbilisinin “Dinamo” klubu ilə qarşılaşacaq. “Qəbələ”nin qrupdakı digər rəqibi Belçika “Gent”i olacaq.xeber100.com

Cüdo üzrə Avropa çempionatı davam edir

Polşanın paytaxtı Varşavada cüdo üzrə Avropa çempionatı davam edir.Azərtac xəbər verir ki, yarışın ikinci günündə - aprelin 21-də Azərbaycan milli komandasının üç üzvü tatami üzərinə çıxıb. Onlardan ikisi aktivinə medal yazdırıb.Bütün rəqiblərinə qalib gələn Hidayət Heydərov (73 kq) fəxri kürsünün ən yüksək pilləsinə qalxıb. Həmin çəki dərəcəsində çıxış edən digər cüdoçumuz, “Rio-2016”nın mükafatçısı Rüstəm Orucov bürünc medalla kifayətlənib.Qeyd edək ki, çempionatın ilk günündə millimizin üzvləri Orxan Səfərov (60 kq) və Nicat Şıxəlizadə (66 kq) bürünc medala sahib olublar.xeber100.com

Beynəlxalq velosiped turunun Təşkilat Komitəsinin iclası keçirilib

Aprelin 21-də "Tour d'Azerbaidjan-2017" beynəlxalq velosiped turunun Təşkilat Komitəsinin geniş iclası keçirilib.AZƏRTAC xəbər verir ki, iclasda Azərbaycan Respublikasının Daxili İşlər, Səhiyyə, Nəqliyyat, Rabitə və Yüksək Texnologiyalar nazirliklərinin, Bakı şəhər Baş Polis İdarəsinin, Daxili İşlər Nazirliyinin Baş Dövlət Yol Polisi İdarəsinin rəhbər vəzifəli şəxsləri, Bakı şəhərinin, habelə velosiped turunun marşrutlarının keçdiyi rayonların və şəhərlərin icra hakimiyyətləri başçılarının müavinləri, veloturun təşkilinə cəlb olunmuş digər qurumların nümayəndələri iştirak ediblər.Mayın 3-də start götürəcək "Tour d'Azerbaidjan-2017" beynəlxalq velosiped turu əvvəlki illərdə olduğu kimi 5 mərhələdə keçiriləcək. Qeyd olunub ki, bu günə "Tour d'Azerbaidjan-2017" yarışında 19 ölkədən 23 komandanın iştirakı təsdiqlənib. Onlardan da 6-sı pro-kontinental, "Synergy Baku" da daxil olmaqla, 17-si kontinental komandadır. İştirakçılar 1-ci mərhələdə Bakı-Sumqayıt (150 km), 2-ci mərhələdə Bakı-İsmayıllı (187 km), 3-cü mərhələdə Qəbələ-Şəki-Qəbələ (177 km), 4-cü mərhələdə Qəbələ-Ağsu-Pirqulu (164 km) və sonuncu mərhələdə Bakı-Abşeron-Bakı (158 km) marşrutu üzrə ümumilikdə 836 kilometr məsafə qət edəcəklər.xeber100.com    

“Bakı Şəhər Halqası” Əməliyyat Şirkətinin məlumatı

Formula-1 yarışının təşkilatçısı “Bakı Şəhər Halqası” Əməliyyat Şirkəti (BŞH) iyunun 23-25-də baş tutacaq Azərbaycan Qran-prisinə hazırlıqla əlaqədar yarışın keçdiyi küçələrdə təhlükəsizlik baryerlərinin quraşdırılması işlərini, həmçinin trekin asfalt örtüyünün yarışa tam hazır vəziyyətə gətirilməsi istiqamətində təmir-bərpa işlərini davam etdirir.BŞH-dən Azərtac-a bildiriblər ki, iyunun 22-si saat 09:00-dan iyunun 23-ü saat 18:00-dək Neftçilər prospekti ilə olan kəsişmələri arasındakı hissəsində təmir-bərpa işləri aparılacaq. Bu səbəbdən yolun həmin hissəsi nəqliyyatın hərəkəti üçün bağlı olacaq.xeber100.com

Atçılıq Federasiyasının təşkilatçılığı ilə turnir keçirilir

Aprelin 22-də “Binə Atçılıq Mərkəzi”nin açıq manejində atçılığın konkur növü üzrə A**-S* kateqoriyalı “Murad kuboku” uğrunda turnir keçirilir.Azərtac xəbər verir ki, Azərbaycan Respublikası Atçılıq Federasiyasının təşkilatçılığı və “Murad” atçılıq klubunun sponsorluğu ilə keçirilən yarışda 15-dək idmançı və 30-a yaxın at iştirak edir.Turnirin ümumi mükafat fondu 5 min manatdır.xeber100.com

IV İslam Həmrəyliyi Oyunlarının açılış və bağlanış günü…

“Bakı-2017” IV İslam Həmrəyliyi Oyunlarının açılış və bağlanış günü Bakı Olimpiya Stadionuna gələn tamaşaçılar mərasim bitdikdən sonra “Koroğlu” metro stansiyasına pulsuz daxil olacaqlar.Bu barədə “Bakı Metropoliteni” QSC-nin mətbuat xidmətinin rəhbəri Nəsimi Paşayev Azərtac-a eksklüziv olaraq deyib.O bildirib ki, IV İslam Həmrəyliyi Oyunlarının açılış və bağlanış günü Bakı Olimpiya Stadionundan çıxan tamaşaçılar yaradılmış koridor vasitəsilə stansiyaya yönələcəklər. Bu mərasimi izləməyə gələn tamaşaçılar üçün tətbiq edilən xüsusi proqramdır: “İnsanların rahatlığı üçün tətbiq edilən bu proqram həm də təhlükəsizlik baxımından əlverişlidir. Tamaşaçıların təhlükəsizliyi üçün koridora kənardan heç bir şəxs buraxılmayacaq. Stadiona daxil olarkən insanlar yoxlanıldığı üçün stansiyaya daxil olduqda təkrar yoxlamağa ehtiyac yaranmayacaq”, - deyə N.Paşayev vurğulayıb.xeber100.com

Beynəlxalq cüdo yarışı keçirilib

Aprelin 20-də Bakı İdman Sarayında aprel döyüşlərinə həsr edilmiş 21 yaşadək cüdoçular arasında beynəlxalq komanda yarışı keçirilib.Azərtac xəbər verir ki, 101 idmançının (82 oğlan, 19 qız) iştirak etdiyi beynəlxalq turnirdə 12 komanda qalib adı uğrunda mübarizə aparıb.“Aran-Qarabağ”, “Gəncə”, “Judo 2012”, “Masallı”, “Neftçi İdman Klubu” İB, “Qəbələ”, “Sumqayıt”, “Şimal Qərb” zonası, Bakı UGİM-11, İOEUGİM-13 klubları ilə yanaşı, Rusiya və Gürcüstan milliləri də turnirdə iştirak ediblər.Gərgin idman mübarizəsi şəraitində keçən yarışlarda “Neftçi” idman klubu və Rusiya yığması üçüncü olub.Final qarşılaşmalarından əvvəl yarışın açılış mərasimi keçirilib.Həlledici görüşdə Gürcüstan millisi ilə “Judo 2012” komandası qarşılaşıb. Gürcüstan millisi qalib gələrək beynəlxalq yarışın qalibi olub.xeber100.com

İdman dırmanmasının boldrinq növü üzrə yarış keçiriləcək

Aprelin 29-da “ClimBaku” idman dırmanması mərkəzində Azərbaycan Dağçılıq və Ekstremal İdman Növləri Federasiyaları Assosiasiyasının (ADEİNFA)  təşkilatçılığı ilə idman dırmanmasının boldrinq növü üzrə yarış keçiriləcək.Azərbaycan Hava və Ekstremal İdman Növləri Federasiyasından (FAIREX) Azərtac-a bildiriblər ki, aprel döyüşləri şəhidlərinin xatirəsinə həsr olunan yarış Prezident yanında Qeyri-Hökumət Təşkilatlarına Dövlət Dəstəyi Şurasının yardımı reallaşdırılan “Vətənpərvərliyin təbliğində aprel döyüşləri” layihəsi çərçivəsində baş tutacaq.Yarışda aprel döyüşlərinin iştirakçıları, şəhidlərimizin ailə üzvləri və Qarabağ müharibəsinin veteranları, ictimaiyyətin nümayəndələri iştirak edəcəklər.Gənclər və İdman Nazirliyi, FAIREX, Səfərbərlik və Hərbi Xidmətə Çağırış üzrə Dövlət Xidməti yarışın keçirilməsinə təşkilati dəstək göstərirlər.xeber100.com

Futbol üzrə “Elit Neon Cup” turnirinə start verilib

Yunanıstanın paytaxtı Afinada futbol üzrə "Elit Neon Cup" turnirinə start verilib.Azərtac xəbər verir ki, "Qəbələ" klubunun 15 yaşadək futbolçulardan ibarət komandası ilk oyun günündə iki matç keçirib. Baş məşqçi Famil Xəlilovun komandası əvvəlcə yerli "Apollon" klubu ilə üz-üzə gəlib. Görüş 1:1 hesabı ilə nəticələnib. "Qırmızı-qaralar"ın heyətində Samir Məhərrəmli fərqlənib."B" qrupunda mübarizə aparan "Qəbələ" II turda "Partizan"la görüşüb. Matç Serbiya təmsilçisinin 3:0 hesablı qələbəsi ilə başa çatıb.Qeyd edək ki, komandamız bu gün keçiriləcək III turda "Panatinaikos"la (Yunanıstan) görüşəcək.xeber100.com

UEFA Çempionlar Liqasının püşkatma mərasimi olacaq

Aprelin 21-də İsveçrənin Nyon şəhərində UEFA Çempionlar Liqasının və Avropa Liqasının yarımfinal mərhələlərinin püşkatma mərasimi olacaq.Azərtac xəbər verir ki, Bakı vaxtı ilə saat 14:00-da Çempionlar Liqasının, bir saat sonra isə Avropa Liqasının püşkü atılacaq.UEFA Çempionlar Liqasının yarımfinalçıları “Real Madrid”, “Atletiko Madrid”, “Yuventus” və “Monako” komandalarıdır.“Olimpik Lion”, “Mançester Yunayted”, “Ayaks” və “Selta Viqo” komandaları isə ötən gün keçirilən cavab qarşılaşmalarından sonra UEFA Avropa Liqasının yarımfinal mərhələsinə vəsiqə qazanıblar.UEFA Çempionlar Liqasının yarımfinal mərhələsinin ilk görüşləri mayın 2-də və 3-də, cavab qarşılaşmaları isə bir həftə sonra oynanılacaq.Avropa Liqasında isə yarımfinal mərhələsinin ilk oyunları mayın 4-də, cavab matçları mayın 11-də keçiriləcək.Çempionlar Liqasının final matçı iyunun 3-də Uelsin paytaxtı Kardifdə, Avropa Liqasının son oyunu mayın 24-də İsveçin paytaxtı Stokholmda baş tutacaq.xeber100.com