UEFA Avropa Liqasının cavab qarşılaşmaları keçiriləcək

Aprelin 20-də UEFA Avropa Liqasının dörddəbir final mərhələsinin cavab qarşılaşmaları keçiriləcək.Azərtac xəbər verir ki, azərbaycanlı futbolsevərlərin əsas diqqəti “Beşiktaş” – “Lion” matçına yönələcək. Fransada keçirilən oyunda son dəqiqələrdə qələbəni əldən verən (1:2) Şenol Günəşin yetirmələri doğma “Vodafon Arena”da “revanş” almaq niyyətindədilər. İstanbulda minimal hesablı qələbə “Beşiktaş”ın yarımfinala yüksəlməsi üçün kifayət edir. Lakin hər iki komandanın heyətində ciddi itkilər var. “Ağ-qara”ların heyətində, Rikardo Quareşma, Adriano zədəli, Marselo və Abubakar cəzalı durumdadırlar. “Lion”da isə Rafael Da Silva, Emanuel Mammana zədə üzündən oyunu buraxmalı olacaqlar.UEFA Avropa Liqasının favoritlərindən olan “Mançester Yunayted” qrup mərhələsində “Qəbələ”nin rəqibi olan “Anderlext” ilə qarşılaşacaq. “Qırmızı şeytanlar” Belçikada 1:1 hesablı heç-heçə edərək cavab qarşılaşması üçün sərfəli nəticə əldə ediblər.Belçikanın digər təmsilçisi “Genk” isə İspaniyanın “Selta Viqo” komandasını qəbul edəcək. Səfərdə 3:2 hesabı ilə məğlub olan belçikalılar evdə minimal hesablı qələbə qazanaraq adlarını yarımfinal mərhələsinə yazdırmaq üçün səy göstərəcəklər.Hollandiyanın “Ayaks” klubu isə Almaniyada “Şalke”nin qonağı olacaq. Evdə iki cavabsız qolla (2:0) qalib gələn hollandiyalılar cavab oyununda qapılarını toxunulmaz saxlamağa çalışacaqlar.Dörddəbir final mərhələsinin bütün görüşləri Bakı vaxtı ilə saat 23:05-də başlayacaq.xeber100.com

Azərbaycan millisinin keçirəcəyi oyunların təqvimi açıqlanıb

“Bakı-2017” IV İslam Həmrəyliyi Oyunlarında iştirak edəcək 23 yaşadək futbolçulardan ibarət Azərbaycan millisinin keçirəcəyi oyunların təqvimi açıqlanıb.AFFA-dan Azərtac-a bildirilib ki, “A” qrupunda yer alan milli komandamız ilk matçını mayın 8-də “Bayıl Arena”da Kamerun yığması ilə keçirəcək. Futbolçularımız mayın 11-də həmin stadionda Səudiyyə Ərəbistanı, mayın 15-də isə Mərakeş yığmaları ilə qarşılaşacaqlar.xeber100.com  

Azərbaycan kuboku yarışlarının püşkatma mərasimi keçirilib

Aprelin 18-də futbol üzrə Azərbaycan kuboku yarışlarının final oyununun püşkatma mərasimi keçirilib.Azərtac xəbər verir ki, mərasimdə Peşəkar Futbol Liqasının, eləcə də “Qarabağ” və “Qəbələ” klublarının nümayəndəsi iştirak ediblər. “Qarabağ” Şahid Həsənov, “Qəbələ” isə Səbuhi Səfiyarlı ilə təmsil olunub.Püşkatmaya əsasən, “Qarabağ” nominal meydan sahibi olub.Qeyd edək ki, Azərbaycan kuboku yarışlarının final oyunu mayın 5-də Naxçıvan Muxtar Respublika stadionunda keçiriləcək.xeber100.com

Futbol yarışlarında mübarizə aparacaq yığmanın heyəti açıqlanıb

Mayın 12-dən 22-dək Bakıda təşkil olunacaq IV İslam Həmrəyliyi Oyunlarının futbol yarışlarında mübarizə aparacaq Əlcəzair yığmasının heyəti açıqlanıb.Azərtac xəbər verir ki, Əlcəzair millisi “B” qrupunda Türkiyə, Fələstin və Oman yığmaları ilə qarşılaşacaq.Heyətdə qapıçılar - Çemseddin Rahmani (“Bejaya”), Abdelmumen Sifur (“USM Əlcəzair”), Zakaria Buhalfaya (“Hussein Dey”), müdafiəçilər - Hamza Muali, Yusef Duar (hər ikisi “Paradu”), Abdelqani Buzidi, Mohamed Xaçef (hər ikisi “Hussein Dey”), Aymen Attu (“Setif”), Abdelcalil Semmane (“USM Əlcəzair”), yarımmüdafiəçilər - Abderrahim Hamra, Abderrauf Benqui (hər ikisi “USM Əlcəzair”), Maher Azzuz (“Batna”), Muhammed Meruani (“Klef”), Messala Merbah (“Saura”), Zakaria Drui (“Beluizdad”), Ahmed Qaqa (“Paradu”), Laid Uadji (“El Harraç”), hücumçular - Farid Melali, Tayeb Meziani (hər ikisi “Paradu”), İlyes Yayçe (“USM Əlcəzair”), İsmail Sadi (“Setif”), Karim Aribi (“Beluizdad”) və Dayeddin Qudcil (“Medea”) yer alıblar.xeber100.com

Karate növləri üzrə dünya çempionati keçirilib

Portuqaliyanın Kaldes de Rainha şəhərində karate növləri üzrə dünya çempionati keçirilib.Azərtac xəbər verir ki, Bakı Şəhər Gənclər və İdman Baş İdarəsinin dəstəyi ilə ezamiyyə edilən hapki-do üzrə paytaxt yığma komandasının üzvü Natiq Mehdiyev çempionatda uğurla çıxış edərək birinci olub.xeber100.com

Voleybol yarışlarının təqvimi müəyyənləşib

“Bakı-2017” IV İslam Həmrəyliyi Oyunlarının voleybol yarışlarının təqvimi müəyyənləşib.Azərtac xəbər verir ki, qadın voleybolçuların yarışında 5 komanda birincilik uğrunda mübarizə aparacaq.Millimiz ilk oyununu mayın 11-də Qırğızıstan yığmasına qarşı keçirəcək. İki gün sonra voleybolçularımız Tacikistan yığması ilə üz-üzə gələcəklər. Mayın 14-də Azərbaycan millisi Türkiyə yığmasını qəbul edəcək.Yarışın yarımfinal mərhələsi mayın 17-də, final oyunu isə bir gün sonra təşkil olunacaq.Kişi voleybolçuların mübarizəsində isə 8 milli iki qrupda yarışacaq. “A” qrupunda yer alan yığmamız IV İslam Həmrəyliyi Oyunlarına mayın 11-də Pakistan ilə oyunla başlayacaq. Millimiz mayın 13-də Türkiyə, mayın 16-da Fələstin, bir gün sonra isə Türkmənistanı sınağa çəkəcək.Kişilərin mübarizəsində yarımfinal görüşləri mayın 20-də, qızıl medal uğrunda oyun isə bir gün sonra keçiriləcək.xeber100.com

IV İslam Həmrəyliyi Oyunları ilə əlaqədar proqram hazırlanıb

Mayın 12-dən 22-dək Bakıda keçiriləcək IV İslam Həmrəyliyi Oyunları ilə əlaqədar mədəni proqram hazırlanıb. Hazırda proqram təsdiqlənmək üzrədir.Azərtac xəbər verir ki, bunu jurnalistlərə müsahibəsində mədəniyyət və turizm naziri Əbülfəs Qarayev söyləyib.Nazir deyib: “IV İslam Həmrəyliyi Oyunları günlərində bütün teatrlarda, konsert və sərgi salonlarında İslam mədəniyyəti, ənənələri, tarixi ilə bağlı mədəni proqramlar həyata keçiriləcək. Lakin bu o demək deyil ki, biz yalnız İslam dininə aid tamaşaları təqdim edəcəyik. Azərbaycan xalqı, eyni zamanda, bu gün cərəyan edən digər proseslərdə də iştirak edir. Ona görə bunu sintez etməyi düşünürük. Hesab edirik ki, mədəni proqramlar qonaqlarımız üçün çox böyük maraq kəsb edəcək”.Ə.Qarayev onu da qeyd edib ki, İslam Həmrəyliyi Oyunları və ondan sonra keçiriləcək “Formula-1” yarışları zamanı mədəniyyət obyektləri əməkdaşlarının iş cədvəlinin dəyişdiriləcəyi gözlənilir. İslam Həmrəyliyi Oyunları zamanı turistlərin gəlməsi mədəniyyət obyektlərinin maliyyə durumuna da müsbət təsir göstərəcək.xeber100.com

“Atletiko Madrid” komandası yarımfinala vəsiqə qazanıb

UEFA Çempionlar Liqasının ilk yarımfinalçısı “Atletiko Madrid” komandası olub. İlk oyunda Madriddə minimal hesabla qalib gələn “Atletiko” komandası İngiltərədə “Lester Siti” ilə matçda 1:1 hesablı heç-heçə edərək adını yarımfinala yazdırıb.Azərtac xəbər verir ki, oyunda hesab matçın 26-cı dəqiqəsində açılıb. Madridlilərin heyətində Saul Niguez dəqiq zərbə ilə komandasını hesabda irəli çıxarıb. İlk hissə bu hesabla başa çatıb.Qarşılaşmanın ikinci hissəsində oyunda dönüş yaratmaq istəyən “Lester Siti” 61-ci dəqiqədə hesabı bərabərləşdirib. Komandanın ulduz futbolçusu Ceymi Vardi adını tabloya yazdırıb.Qalan dəqiqələrdə qapılara top vurulmayıb və iki oyunun nəticəsinə görə 2:1 hesabı ilə qalib gələn “Atletiko Madrid” komandası UEFA Çempionlar Liqasının ilk yarımfinalçısı olub.Xatırladaq ki, “Atletiko” komandası ötən il UEFA Çempionlar Liqasının finalında əzəli rəqibi “Real”a məğlub olmuşdu.xeber100.com

“Real Madrid” “Bavariya”nı 6:3 hesabı ilə məğlub edib

Aprelin 18-də UEFA Çempionlar Liqasının dörddəbir final mərhələsinin digər oyununda “Real Madrid” komandası “Bavariya”nı iki oyunun nəticəsinə görə 6:3 hesabı ilə məğlub edərək yarımfinala vəsiqə qazanıb.Azərtac xəbər verir ki, ilk oyunda Münxendə “Real Madrid”ə 1:2 hesabı ilə məğlub olan “Bavariya” cavab qarşılaşmasında dönüş yaratmaq üçün təşəbbüsü ələ almağa çalışıb. Lakin komandaların səylərinə baxmayaraq, birinci hissədə qapılara top vurulmayıb.Matçda hesabı münxenlilər açıblar. Oyunun 53-cü dəqiqəsində “Real Madrid” komandasının qapısına təyin olunan 11 metrlik cərimə zərbəsini dəqiq yerinə yetirən Robert Levandovski adını tabloya yazdırıb – 1:0.Bu qol oyunun tempinin daha da artmasına səbəb olub. Matçın 76-cı dəqiqəsində “Bavariya”nın cərimə meydançasına hava ötürməsindən sonra müdafiəçilərinin səhvindən istifadə edərək əla mövqe seçən Kriştiano Ronaldo topa başla dəqiq zərbə vurub – 1:1.Bir sözlə, “Real Madrid” iki oyunun nəticəsində görə 6:3 hesabı ilə qalib gələrək “Atletiko Madrid”dən sonra UEFA Çempionlar Liqasının yarımfinalına yüksəlib.UEFA Çempionlar Liqasının digər yarımfinalçıları isə aprelin 19-da “Barselona” – “Yuventus” və “Monako” – “Borussiya Dortmund” görüşlərinin nəticəsində məlum olacaq. Xatırladaq ki, ilk görüşdə “Barselona” səfərdə 0:3, “Borussiya Dortmund” isə doğma meydanda 2:3 hesabı ilə məğlub olub.xeber100.com

Şahmatçılar arasında Avropa çempionatının altıncı turu başa çatıb

Riqada qadın şahmatçılar arasında Avropa çempionatının altıncı turu başa çatıb.Azərtac xəbər verir ki, altı turdan sonra rusiyalı Aleksandra Qoryaçkina və gürcü Nana Dzaqnidze müvafiq olaraq birinci və ikinci yerləri bölüşürlər. Onların hər biri 5 xal toplayıb. On dörd iştirakçı onlardan yarım xal geri qalır.On altı şahmatçı, o cümlədən Azərbaycan təmsilçisi Ülviyyə Fətəliyeva 4 xal toplayıb. Qrossmeysterlər Zeynəb Məmmədyarova, Xəyalə Abdulla və beynəlxalq dərəcəli usta Gülnar Məmmədova 3,5 xal toplayıblar. Günay Məmmədzadənin aktivində 3 xal, Türkan Məmmədyarova, Nərmin Məmmədova, Xanım Balacayeva və Gövhər Beydullayevanın hər birinin aktivində 2,5 xal var.Yeddinci turdan sonra iştirakçılara istirahət günü veriləcək.Xatırladaq ki, bu çempionatda 33 ölkədən 146 şahmatçı, o cümlədən FIDE-nin beynəlxalq titullarına sahib olan 125 nəfər iştirak edir.Avropa çempionatı İsveçrə sistemi üzrə keçirilir və 11 turdan ibarətdir.xeber100.com