Avropa kuboku yarışı keçirilib

Sankt-Peterburqda gənclər arasında cüdo üzrə Avropa kuboku yarışı keçirilib. Mötəbər turnirdə Azərbaycan millisi 3 medal qazanıb.Azərtac xəbər verir ki, ölkəmizi beynəlxalq yarışda təmsil edən Natiq Qurbanlı (55 kq) bütün rəqiblərinə qalib gələrək qızıl medal qazanıb. Gənc cüdoçularımız Kəramət Hüseynov (60 kq) və Musa Şəkərəliyev (100 kq) isə Avropa kubokunun bürünc medallarına sahib olublar.Qeyd edək ki, beynəlxalq yarışda qitənin 17 ölkəsindən 290 cüdoçu (200 oğlan, 90 qız) mübarizə aparıb.xeber100.com

Həndbol Federasiyasının məlumatı

Yeniyetmələrin XI Respublika oyunlarının proqramına daxil olan həndbol yarışı başa çatıb.Azərbaycan Həndbol Federasiyasından Azərtac-a bildiriblər ki, iki qrupda dairəvi sistem üzrə keçirilən yarışların finalında 2 saylı Respublika İxtisaslaşdırılmış Olimpiya Ehtiyatları Uşaq-Gənclər İdman Məktəbinin (RİOEUGİM) komandası “Şirvan”ı 13:2, “Mingəçevir” həndbolçuları 12 saylı İxtisaslaşdırılmış Olimpiya Ehtiyatları Uşaq-Gənclər İdman Məktəbinin (İOEUGİM) təmsilçilərini 9:7 hesabı ilə məğlub edib.Bu nəticələrdən sonra RİOEUGİM-in komandası yarışın qalibi adını qazanıb. “Şirvan” ikinci, “Mingəçevir” klubu isə üçüncü pillədə qərarlaşıb. İlk üç yeri tutan komandalara respublika Gənclər və İdman Nazirliyinin diplomları verilib.İsmayıllı Olimpiya İdman Kompleksində keçirilən yarışlarda şəhər və rayonlardan 8 komanda qalib adı uğrunda mübarizə aparıb.xeber100.com

Cüdo Federasiyasının dəstəyi ilə…

Cüdo Federasiyasının dəstəyi və “Judo Club 2012”nin təşkilatçılığı ilə aprelin 20-də 21 yaşadək oğlanlar və qızlar arasında cüdo üzrə klub komandaları arasında beynəlxalq turnir keçiriləcək.Azərtac xəbər verir ki, turnir aprel döyüşlərində qəhrəmancasına həlak olmuş polkovnik-leytenant Raquf Orucovun və digər hərbçilərimizin əziz xatirəsinə həsr edilib.“Raquf Orucov Kuboku” turnirində Azərbaycan ilə yanaşı, Rusiya, İran və Gürcüstanın klub komandaları da iştirak edəcəklər.Turnir Bakı İdman Sarayında təşkil olunacaq.xeber100.com

Beynəlxalq turnir keçiriləcək

Aprelin 20-dən 25-dək Gürcüstanda “Dinamo” (Tbilisi) futbol komandasının məşhur yarımmüdafiəçisi Vitali Daraseliyanın xatirəsinə həsr olunmuş beynəlxalq turnir keçiriləcək.Turnirdə Azərbaycanın “Qəbələ”, Gürcüstanın “Dinamo”, İtaliyanın “İnter”, Belçikanın “Gent”, Xorvatiyanın “Dinamo”, Ukraynanın “Dinamo” (Kiyev), Türkiyənin “Trabzonspor” və Hollandiyanın “AZ” klublarının 16 yaşadək komandaları mübarizə aparacaqlar.Oyunlar Tbilisinin “Dinamo” akademiyasının meydançasında, final qarşılaşması isə “Dinamo Arena”da keçiriləcək.V.Daraseliyanın xatirəsinə həsr olunmuş ilk beynəlxalq turnir Tbilisidə 2016-cı ildə təşkil edilib. Həmin turnirdə Hollandiyanın “AZ” komandası qalib olub.Tbilisinin “Dinamo” klubunun prezidentinin məsləhətçisi Levan Salukvadze jurnalistlərə bildirib ki, budəfəki turnirə daha güclü komandalar qatılıblar. V.Daraseliyanın xatirəsinə həsr olunmuş turnirə maraq daha da artır və gələcəkdə iştirakçı komandaların sayı artacaq.xeber100.com

“İzmir Cup” turnirinə yekun vurulub

Türkiyədə 12 yaşadək futbolçular arasında təşkil olunan “İzmir Cup” turnirinə yekun vurulub.Azərtac xəbər verir ki, “Qəbələ” turnirin son günündə 4 oyun keçirib.“Qırmızı-qaralar” 17-24-cü yerlər uğrunda mübarizədə “B” qrupunda çıxış edib. Komandamız əvvəlcə Elmir Hüseynlinin qolu ilə “Şiltiqeym”ə qalib gəlib -1:0. Ardınca “Hamborn”la qarşılaşan Zaur Hacıyevin yetirmələri 2:1 hesablı qələbə əldə ediblər. Rəqib qapısına qolları Eşqin Əhmədov və Məhəmməd Fahlulov vurublar. Qrupdakı son matçında “Tuzlaspor”la qolsuz heç-heçə edən komandamız 1-ci yeri tutub. Bu, “qırmızı-qaralar”a 17-ci yer uğrunda matçda oynamaq imkanı verib. Son matçında “Krasnodar”la görüşən “Qəbələ” 2:1 hesablı qələbə qazanıb. Murad Ələkbərov və Elmir Hüseynlinin qolları komandamızı yekun sıralamada 17-ci olması üçün kifayət edib.Beləliklə, 3 gün ərzində 15 oyun keçirən “Qəbələ” İzmirdə 8 qələbə qazanıb, 4 heç-heçə edib və 3 dəfə məğlub olub. 18 qol vuran komandamız 9 top buraxıb.xeber100.com

Voleybol Federasiyasının məlumatı

Sloveniyada təlim-məşq toplanışında olan qadın voleybolçulardan ibarət Azərbaycan millisi yoldaşlıq oyunu keçirib.Azərtac Azərbaycan Voleybol Federasiyasına istinadla xəbər verir ki, millimiz İran yığması ilə qarşılaşıb.Gərgin idman mübarizəsi şəraitində keçən oyunda millimiz 3:0 hesablı qələbə qazanıb.Təlim-məşq toplanışı mayın 12-22-də Bakıda təşkil olunacaq IV İslam Həmrəyliyi Oyunlarına hazırlıq xarakteri daşıyır.xeber100.com

“Tour du Maroc” yarışına yekun vurulub

Mərakeşdə Beynəlxalq Velosipedçilər İttifaqının 2.2 kateqoriyalı 10 günlük “Tour du Maroc” yarışına yekun vurulub. Velotur ölkəmizin “Synergy Baku” kontinental komandası üçün uğurlu sonluqla başa çatıb.Azərtac xəbər verir ki, sonuncu - 10-cu mərhələdə iştirakçılar Rabatdan Kasablankaya qədər olan 120 kilometr məsafəni qət ediblər. Velosipedçilərimizin hamısı – Elçin Əsədov, Samir Cəbrayılov, Kiril Pozdnyakov və Yosip Rumaç məsafəni 2 saat, 30 dəqiqə, 31 saniyəyə başa vuran pelotunun içərisində olublar və bununla da yekun sıralanma mövqeyində demək olar ki, heç bir dəyişiklik baş verməyib. Yarışın 1-ci və 4-cü mərhələlərində qalib olan elit yığma komandamızın üzvü Kiril Pozdnyakov ümumi təsnifatda 3-cü yeri tutmaqla fəxri kürsüyə qalxıb. İlk 20-likdə “Synergy Baku”nun daha 2 üzvü yer alıb – bunlar müvafiq olaraq 11 və 13-cü yerdə qərarlaşan Yosip Rumaç və 7-ci mərhələnin qalibi olmuş elit yığmamızın digər üzvü Elçin Əsədovdur. Samir Cəbrayılov sıralanmada 25-ci olub.Mərakeş turunu “Synergy Baku” üçün əlamətdar edən ən önəmli məqamlardan biri də Yosip Rumaçın yarışın ən yaxşı dağ velosipedçisi üçün nəzərdə tutulan “dağlar kralı” köynəyinə yiyələnməsidir. Dördüncü mərhələdən etibarən liderliyə yüksələn velosipedçimiz bu üstünlüyünü sonadək qorumağı bacarıb və cari mövsümdə komandasına ilk köynəyi qazandırıb.xeber100.com

Futbol üzrə XXVI tura yekun vurulub

Aprelin 16-da futbol üzrə Azərbaycan Premyer Liqasında XXVI tura yekun vurulub. Premyer Liqanın lideri Ağdamın “Qarabağ” komandası sona iki tur qalmış 2016-2017-ci il mövsümündə çempionluğunu elan edib.Azərtac xəbər verir ki, “Qarabağ” çempionluğu rəsmiləşdirmək üçün lazım olan 3 xalı səfərdə paytaxt təmsilçisi “İnter” komandasını 3:0 hesabı ilə məğlubiyyətə uğradaraq əldə edib.Paytaxtdakı “İnter Arena”da keçirilən oyunun birinci hissəsinin 4-cü dəqiqəsində “Qarabağ”ın heyətində Mahir Mədətov “İnter”in qapısından ilk topu keçirərək hesabı açıb - 1:0. İlk hissədə “Qarabağ futbolçuları daha bir neçə dəfə qol vurmaq imkanı əldə etsələr də, uğur qazana bilməyiblər.İkinci hissəyə sürətli hücumlarla başlayan Ağdam klubu matçın 54-cü dəqiqəsində ikinci qolu meydan sahiblərinin qapısından keçiriblər. Oyunda Cənubi afrikalı hücumçu Dino Ndlovu fərqlənib - 2:0. Dino Ndlovu görüşün 78-ci dəqiqəsində dubl etməklə hesabı 3:0-a çatdırıb. Bununla da lider ən yaxın izləyicisi “Qəbələ”ni 7 xal geridə qoyub.Beləliklə, oyunda üç xala sahib olan Qurban Qurbanovun yetirmələri bu qələbə sayəsində sona iki tur qalmış ardıcıl dördüncü dəfə Azərbaycan Premyer Liqasının çempionu adını qazanıblar.Xatırladaq ki, günün ilk görüşündə “Qəbələ” klubu çempionluq mübarizəsində “Kəpəz”ə Gəncədə 2:0 hesabı ilə məğlub olaraq səfərdə xal itirib. Bununla da “Qəbələ” çempionluq şanslarını faktiki itirib.İyirmi altı oyundan sonra xalların sayını 56-ya çatdıran “Qarabağ” komandası turnir cədvəlində birinci sırada yer alıb. “Qəbələ” 49 xalla ikinci, “İnter” isə 43 xalla üçüncü pillədə qərarlaşıb. Digər yerləri isə müvafiq olaraq, “Zirə” (33), “Sumqayıt” (32), Kəpəz (30), “Neftçi”(29) komandaları tuturlar. Aktivində 10 xal olan “AZAL” isə sonuncu pillədədir.xeber100.com

Triatlon Federasiyasının məlumatına görə…

Azərbaycan triatlon yığmasının üzvü Rostislav Pevtsov Mərakeşin Rabat şəhərində təşkil olunan açıq Afrika kuboku yarışlarında qızıl medal qazanıb.Azərbaycan Triatlon Federasiyasından Azərtac-a bildiriblər ki, təmsilçimiz 44 idmançının mübarizə apardığı yarışda 57 dəqiqə 28 saniyə nəticə göstərərək Afrika kubokunun qalibi olub. R.Pevtsov yarış zamanı ona ən yaxın olan fransalı Maksim Нüber-Müsbrügerı 1 saniyə qabaqlayıb.Qadınların mübarizəsində isə komandamızın üzvü Darina Moskalenko 1 saat 6 dəqiqə 53 saniyəlik nəticə ilə altıncı olub.Azərbaycan komandası yarışda baş məşqçi Sergey Yatsenkonun rəhbərliyi ilə təmsil olunub.Qeyd edək ki, R.Pevtsov İspaniyanın Las-Palmas şəhərində keçirilən Avropa kuboku yarışında da birinci yeri tutub.xeber100.com

Gənclər və İdman Nazirliyinin məlumatı

Aprelin 17-də Gənclər və idman naziri A.Rəhimov Sumqayıt şəhərində Sumqayıt, Abşeron, Qobustan, Şamaxı, Xızı şəhər və rayonlarının sakinlərini qəbul edib.Gənclər və İdman Nazirliyinin mətbuat xidmətindən Azərtac-a bildiriblər ki, 30-a yaxın sakinin iştirak etdiyi qəbulda müraciətlər əsasən gənclər, idman, tikinti sahələri, sahibkarlığın inkişafı ilə bağlı kreditlərin verilməsi və işlə təminat məsələlərinə dair olub.Əksəriyyəti idman sahəsi üzrə olan müraciətlər fəxri adların verilməsi, idman mərkəzlərinin lazımi avadanlıqlarla təmini, təmirə ehtiyacı olan idman obyektlərinin bərpası, Olimpiya İdman komplekslərinin, idman qurğularının tikintisi və təmiri, idmançıların beynəlxalq yarışlarda iştirakına dair olub.Gənclər sahəsində müraciətləri qeyri-hökumət gənclər təşkilatlarının yaradılması, layihələrin maliyyələşdirilməsi, gənclərin beynəlxalq layihələrdə iştirakı, yay istirahət düşərgələrinin təşkili, gənclər mərkəzlərinin müvafiq avadanlıqla təmin olunması və fəaliyyəti məsələləri təşkil edib.Bir sıra müraciətlər yerində həllini tapıb. Araşdırılması tələb edilən məsələlər isə aidiyyəti qurumlara göndərilməsi üçün nəzarətə götürülüb.xeber100.com