Azərbaycan millisinin Makedoniya ilə yoxlama oyununun keçiriləcəyi stadion dəqiqləşib

Azərbaycan – Makedoniya oyunu 5 minlik stadionda keçiriləcək. Apasport.az saytının məlumatına görə, Avstriyadakı təlim-məşq toplanışı çərçivəsində baş tutacaq qarşılaşma Şvadorf şəhərinin eyniadlı klubuna məxsus kiçik stadionda keçiriləcək. Rəsmi adı “Rixard-Gebert-Sportanlage” olan, amma çoxlarının elə klubun adı ilə “Şvadorf” kimi tanıdığı stadion cəmi 5 min tamaşaçı tutumuna malikdi. Əslində, bu klub Avstriya çempionatının aşağı liqasında çıxış etdiyindən stadionun turumu komandanın özü üçün kifayət qədər yetərli sayılır. Qeyd edək ki, mayın 29-da keçiriləcək Azərbaycan – Makedoniya oyunu Bakı vaxtı ilə saat 19:00-da başlayacaq.xeber100.com

Milli Qurtuluş Gününə həsr olunmuş mini-futbol turniri keçirilir

İqtisadiyyat Nazirliyinin Birləşmiş Həmkarlar İttifaqı Komitəsinin təşkilatçılığı ilə ümummilli liderimiz Heydər Əliyevin anadan olmasının 93-cü ildönümünə və Milli Qurtuluş Gününə həsr olunmuş mini-futbol turniri keçirilir. İqtisadiyyat Nazirliyinin mətbuat xidmətindən Azərtac-a bildiriblər ki, mayın 7-də start verilən və 14 komandanın iştirak etdiyi turnir iyunun 4-də başa çatacaq. Turnirdə ilk dörd yeri tutan komandalara və fərqlənən idmançılara diplom və mükafat, turnirin qalibinə isə kubok təqdim ediləcək. Qeyd edək ki, 2009-cu ildən başlayaraq bu cür turnir ənənəvi olaraq hər il təşkil edilir.xeber100.com

Milli komandamız Almatı Qran-prisinə hazırlaşır

Bu gün Heydər Əliyev adına İdman Sarayında cüdo üzrə Azərbaycan milli komandasının təlim-məşq toplanışı keçirilir.Azərtac  xəbər verir ki, toplanışda millimizin əvəzedici heyəti, yeniyetmə və gənc cüdoçular, həmçinin paralimpiyaçılarımız iştirak edib. Məşqlərə millinin əsas üzvlərindən yalnız Orxan Səfərov qatılıb. Qazaxıstanda keçiriləcək Almatı Qran-prisinə yola düşmələri səbəbindən milli komandamızın digər aparıcı cüdoçularına istirahət verilib.xeber100.com

“Dalğa Arena”da oynanılacaq yarımfinal matçları müəyyənləşib

Paytaxtımızda keçirilən 17 yaşadək futbolçular arasında Avropa çempionatında iki qrupun oyunları başa çatıb. Azərtac xəbər verir ki, artıq ilk dörddəbir finalçı cütlüklər də müəyyənləşib. Azərbaycan yığmasının da yer aldığı “A” qrupunu lider kimi tamamlayan Portuqaliya millisi növbəti mərhələdə “B” qrupunun ikincisi Avstriyaya rəqib olub. Komandamızın bərabərə qaldığı Belçika yığması isə ikinci yeri tutduğundan digər qrupun birincisi olan Almaniya ilə üz-üzə gələcək. Hər iki qarşılaşma mayın 14-də “Dalğa Arena”da oynanılacaq. Portuqaliya–Avstriya matçı saat 15:00-da keçiriləcək. Saat 20:00-da isə Almaniya ilə Belçika komandaları üz-üzə gələcəklər. Bu gün “C” və “D” qruplarında keçiriləcək oyunlarla digər dörddəbir finalçılar da bəlli olacaq.xeber100.com

Beynəlxalq Şahmat Festivalının ilk iki turu yekunlaşıb

“Naxçıvan-2016” Beynəlxalq Şahmat Festivalının ilk iki turu artıq yekunlaşıb və nəticələr məlum olub. Azərtac xəbər verir ki, “A” turnirində 10 ölkənin 48 zəka sahibinin gərgin mübarizəsi elə ilk turdan özünü büruzə verib. Belə ki, yarışın ən yüksək reytinqli şahmatçısı, azərbaycanlı qrossmeyster Şəhriyar Məmmədyarov (2748) Naxçıvan şahmatçısı, FİDE ustası Toğrul Həsənzadə (2326) ilə üz-üzə gəlib. Görüşdə üstün olan Şəhriyar Məmmədyarov ilk turu qələbə ilə başa vurub. O, ikinci turda FİDE ustası Nail Bəşirli ilə (2384) qarşılaşmada növbəti xalını əldə edib. Digər azərbaycanlı qrossmeyster, turnirin ötənilki qalibi Eltac Səfərli (2664) də ilk iki turda maksimum nəticə göstərib. O, müvafiq olaraq qrossmeyster Gülnar Məmmədovanı (2319 və FİDE ustası Məhəmməd Muradlını (2352) məğlub edib. Digər maraqlı oyun isə turnirin ən reytinqli 3 şahmatçısından biri olan, rusiyalı qrossmeyster Yevgeni Alekseyevlə (2633) azərbaycanlı qrossmeyster Günay Məmmədzadə (2318) arasında olub. Gərgin keçən oyun heç-heçə nəticələnib. İkinci turda rusiyalı qrossmeyster azərbaycanlı FİDE ustası Aydan Höcətova ilə (2300), qrossmeyster Günay Məmmədzadə isə qrossmeyster Nicat Abasovla (2571) heç-heçə edib. Beynəlxalq qrossmeyster Zeynəb Məmmədyarova (2236) ilk turda gürcü rəqibi İrakli Beradze (2424) ilə xalları yarı bölüb, ikinci turda isə belaruslu beynəlxalq qrossmeyster Vadim Malaxatkonu (2501) məğlub etməyi bacarıb. Naxçıvan şahmatçısı FİDE ustası Pərviz Qasımov (2375) ilk görüşündə beynəlxalq usta Nərmin Xəlifovaya (2193) məğlub olub, ikinci görüşündə isə beynəlxalq qrossmeyster Xəyalə Abdulla (2209) ilə xalları yarı bölüb. Ağ-qara taxtada mübarizə aparan digər həmyerlimiz beynəlxalq qrossmeyster Ürfan Sevdimalıyev (2400) türkiyəli FİDE ustası Sevgi Volkanla (2210) heç-heçə etdikdən sonra monqolustanlı beynəlxalq qrossmeyster Enxtuul Altan Ulziyə (2208) uduzub. Toğrul Həsənzadə isə ilk turda məğlub olsa da, ikinci turda Əhməd Əhmədzadəyə (2207) qalib gəlib. İlk iki turdan sonra “A” turnirinə hər birinin hesabında 2 xal olan Şəhriyar Məmmədyarov, Eltac Səfərli, Azər Mirzəyev və Vüqar Əsədli başçılıq edirlər. Əmsalı 2200-dən aşağı olan şahmatçıların mübarizə apardığı “B” turnirində isə iki turdan sonra 21 şahmatçı maksimum xal toplayıb. Bu turnirdə 100 şahmatçı mübarizə aparır. “Naxçıvan-2016” Beynəlxalq Şahmat Festivalının “C” turnirində 164 zəka sahibi qüvvəsini sınayır. İlk iki turdan sonra 37 şahmatçı maksimum xal toplamağa nail olub.xeber100.com

Premyer Liqasında 34-cü turun oyunlarına start veriləcək

Bu gün Azərbaycan Premyer Liqasında 34-cü turun oyunlarına start veriləcək. Azərtac xəbər verir ki, turun bütün görüşləri eyni gündə oynanılacaq. AZAL Şüvəlanda turnir cədvəlinin ikincisi – “Zirə”ni qonaq edəcək. “Zirə” hazırda 60 xalla turnir cədvəlində ikinci, AZAL isə 45 xalla 6-cı pillədə qərarlaşıb. Bu görüşlə eyni vaxtda Gəncə şəhər stadionunda “Kəpəz” və “Neftçi” komandaları görüşəcək. Bu qarşılaşma hər iki komanda üçün əhəmiyyətlidir. Artıq avrokuboklara vəsiqəni təmin etmiş meydan sahibləri qələbə sayəsində mükafatçılar sırasındakı mövqeyini qoruyacaq. Paytaxt təmsilçisi isə üç xal qazanacağı təqdirdə AZAL – “Zirə” matçının nəticəsindən asılı olaraq bir pillə irəliləyə bilər. “Kəpəz” 55 xalla üçüncü, “Neftçi” isə 43 xalla yeddinci pillədədir. Günün növbəti matçında “İnter” və “Xəzər Lənkəran” komandaları qarşılaşacaq. Cənub təmsilçisi üçün bu matç elitada qalmaq uğrunda mübarizə sayılırsa, meydan sahibi mükafatçılar sırasına düşmək üçün mübarizə aparır. “İnter” 53 xalla beşınci, “Xəzər Lənkəran” 14 xalla doqquzuncudur. Premyer Liqada heç bir iddiası olmayan “Sumqayıt” autsayder “Rəvan”la üz-üzə gələcək. Bu qarşılaşma qonaq komanda üçün böyük əhəmiyyət kəsb edir. Çünki səfərdə “Rəvan” qələbə qazanarsa, sonuncu pilləni “Xəzər Lənkəran”a təhvil verəcək. Turun və günün son oyunu Masazırda keçiriləcək. “Qarabağ” “Qəbələ”ni qəbul edəcək. “Qarabağ” artıq çempionluğu təmin edib və Çempionlar Liqasına vəsiqə qazanıb. “Qəbələ” isə həm mükafatçılar sırasına düşmək, həm də avrokubok üçün mübarizə aparır. Roman Qriqorçukun yetirmələri qələbə sayəsində ən azı hazırkı mövqeyində qalaraq avrokuboklara vəsiqəni təmin edə bilər.xeber100.com

Almaniyada boks turniri keçirilib

Almaniyanın Vaysvasser şəhərində ulu öndər Heydər Əliyevin anadan olmasının 93-cü ildönümünə həsr edilən peşəkar boks turniri keçirilib. Diasporla İş üzrə Dövlət Komitəsindən Azərtac-a bildiriblər ki, turnirin finalında alman boksçu Matthias Pelk ilə Gürcüstan boksçusu Jaba Çautaşvili mübarizə aparıblar. Rəqibini xal hesabı ilə məğlub edən almaniyalı idmançı rinqdə qalib gələrək 5-ci dəfə Heydər Əliyev adına Dünya Boks Komitəsinin kəmərinə sahib olub. Turnirdə Belarus, Gürcüstan, Ukrayna, Tacikistan, Polşa, Keniya boksçuları da mübarizə aparıblar. 2007-ci ildən bəri Almaniyada keçirilməsi ənənə halını alan bu turnir Azərbaycanın Almaniyadakı səfirliyi, Diasporla İş üzrə Dövlət Komitəsi, Azərbaycan Boks Federasiyası, “Qəbələ” idman klubu, Almaniya Azərbaycanlılarının Koordinasiya Mərkəzi, Maqdeburq şəhərində fəaliyyət göstərən Alman-Azərbaycan Mədəniyyət Cəmiyyətinin təşkilatçılığı ilə baş tutur.xeber100.com

Beynəlxalq Qran-Pri yarışlarına start verilib

Mayın 7-də Qəbələ rayonunda Heydər Əliyevin xatirəsinə həsr edilən olimpiya atıcılıq növləri üzrə Beynəlxalq Qran-Pri yarışlarına start verilib. APA-nın yerli bürosunun xəbərinə görə rayonun Bum qəsəbəsindəki stend və ox atıcılığı kompleksində keçirilən beynəlxalq yarışda 9 ölkədən 73 idmançı mükafatlar uğrunda mübarizə aparır. Beynəlxalq İdman Atıcılıq Federasiyasının təqvim planına uyğun olaraq keçirilən 2014-cü ildən başlayaraq ənənəvi olaraq hər il keçirilən bu yarış Avropa və Dünya çempionatından sonra ən mühüm yarışlar sırasındadır. “Qəbələ” atıcılıq klubunun təşkilatçılığı, Milli Olimpiya Komitəsinin, Gənclər və İdman Nazirliyinin, Azərbaycan Atıcılıq Federasiyasının dəstəyi ilə keçirilən Beynəlxalq Qran-Pri yarışları mayın 16-dək davam edəcək. Turnirdə ölkəmizlə yanaşı, Türkiyə, Gürcüstan, İran, Rusiya, Ukrayna, Qazaxıstan, Finlandiya, Qətər və BƏƏ-ni təmsil edən idmançılar yarışırlar. Azərbaycanı bu mötəbər turnirdə 26 idmançı təmsil edir. Qran-Pri yarışlarında Braziliyanın Rio de Janeyro şəhərində keçiriləcək Yay Olimpiya Oyunlarına lisenziya qazanmış dünyanın tanınmış idmançıları da iştirak edir. Bu yarış onlar üçün həm də Olimpiada ərəfəsində bir daha sınaq yarışları hesab olunur.xeber100.com

“Qarabağ” və “Neftçi” komandaları qarşılaşacaq

Mayın 4-də futbol üzrə Azərbaycan kubokunun yarımfinal mərhələsinə yekun vurulub. Azərtac xəbər verir ki, yarımfinalın ikinci görüşündə “İnter” komandasına 1:0 hesabı ilə qalib gələn “Qarabağ” həlledici mərhələyə yüksəlib. Oyunda yeganə qolu matçın 23-cü dəqiqəsində Migel Madera vurub. Beləliklə, ağdamlılar finalda “Qəbələ”ni mübarizədən kənarlaşdıran “Neftçi” ilə üz-üzə gələcəklər. Final görüşü mayın 25-də oynanılacaq. Xatırladaq ki, “Qarabağ” komandası Premyer Liqada çempionluğunu artıq elan edib.xeber100.com  

34-cü Avropa çempionatı başladı

Bu gün Bakıda start götürən 17 yaşadək futbolçular arasında Avropa çempionatı bu qəbildən sayca 34-cü turnir olacaq.Azərtac xəbər verir ki, əvvəlki 33 turnirin 19-u U-16, 14-ü isə U-17-lər arasında keçirilib. 1982-ci ildə start götürən yarışın tarixində 13 komanda çempion tituluna yiyələnib. Hamıdan çox çempion olan komanda İspaniya millisidir. İspanlar 8 dəfə qalib gəliblər. Portuqaliya millisi isə 5 dəfə qitə çempionu olub. Almaniya və (AFR və ADR daxil olmaqla) və Rusiya (SSRİ nəzərə alınmaqla) 3, Fransa, Hollandiya, İngiltərə, Türkiyə isə 2 dəfə qalib gəliblər. İtaliya, Çexiya (Çexoslovakiya nəzərə alınmaqla), Polşa, İsveçrə, İrlandiya milliləri isə bir dəfə qızıl medal əldə edib.xeber100.com