Beynəlxalq velosiped turunun ikinci mərhələsinə start verilib

Mayın 5-də Beynəlxalq Velosipedçilər İttifaqının 2.1 kateqoriyalı “Tour d’Azerbaïdjan-2016” veloyürüşünün ikinci mərhələsi başlayıb.Azərtac xəbər verir ki, saat 10:30-da Veloparkdan start götürən iştirakçılar 186,5 kilometr məsafə qət edəcək və İsmayıllıda finiş xəttini keçəcəklər. Xatırladaq ki, beş mərhələdən ibarət turun birinci günündə məsafəni hamıdan tez başa vuran Almaniyanın “Bora-Argon 18” peşəkar kontinental komandasının üzvü Fil Bauhauz 3 saat 34 dəqiqə 19 saniyəlik göstərici ilə mərhələnin qalibi olub. ABŞ-ın “İlluminate” komandasının üzvü Skott Sanderlend və Birləşmiş Ərəb Əmirliklərinin “Nəsr Dubay” klubunun nümayəndəsi Luka Vakerman müvafiq olaraq ikinci və üçüncü yerləri tutublar. Azərbaycanın “Synergy Baku” komandasının üzvləri Yannis Tamuridis, Maksim Averin, Matey Müqerli, Matiya Kvasina, Kiril Pozdnyakov və Elçin Əsədov da mərhələni ilk pelotonda başa vurublar. Fotofinişə əsasən, idmançılarımız arasında ən yüksək göstərici Yannis Tamuridisə məxsusdur. O, beşinci olub. Mərhələni qalib kimi başa vuran Fil Bauhauz bununla ümumi təsnifatın lideri üçün nəzərdə tutulan mavi rəngli “Synergy Group” köynəyini əldə edib. O, həm də ən yaxşı sprinter kimi yaşıl rəngli “SOCAR”, eyni zamanda, ən yaxşı gənc velosipedçi kimi bənövşəyi rəngli “Ataholding” köynəyinə də sahib çıxıb. Ən yaxşı dağ velosipedçisi kimi qırmızı rəngli “AZAL” köynəyini isə Malayziyanın “Terengganu” klubunun üzvü Saleh Mohd Zamri əldə edib. Qaliblərə mükafatları veloturun Təşkilat Komitəsinin sədri, Azərbaycan Velosiped İdmanı Federasiyasının vitse-prezidenti Sahib Ələkbərov, Avropa Velosipedçilər Birliyinin vitse-prezidenti Aleksandr Qusyatnikov və Sumqayıt Şəhər İcra Hakimiyyətinin başçısı Zakir Fərəcov təqdim ediblər. Məlumat üçün qeyd edək ki, iştirakçılar 3-cü mərhələdə Qəbələ-Şəki-Qəbələ (177,2 km), 4-cü mərhələdə Qəbələ-Pirqulu (115,3 km), sonuncu mərhələdə isə Bakı-Abşeron-Bakı (158 km) marşrutu üzrə ümumilikdə 791 kilometr məsafə qət edəcəklər.xeber100.com  

V Asiya Oyunları münasibətilə mərasim keçiriləcək

Mayın 5-də Aşqabadda qapalı binalarda və döyüş sənətləri üzrə V Asiya Oyunlarının başlamasına 500 gün qalması münasibətilə təntənəli mərasim keçiriləcək. Azərbaycan Dövlət İnformasiya Agentliyi  və Türkmənistan Dövlət İnformasiya Agentliyi (TDH) arasında informasiya mübadiləsi sahəsində əməkdaşlıq haqqında 2015-ci il fevralın 28-də imzalanan sazişə əsasən Türkmənistanın ölkəmizdəki səfirliyinin dəvəti ilə Azərtac-ın müxbiri bu tədbiri işıqlandırmaq üçün Aşqabada ezam olunub. Mayın 4-də müxtəlif ölkələrdən olan jurnalistlərin Türkmənistan paytaxtının görməli yerlərinə ekskursiyası təşkil olunub, media nümayəndələri üçün Oyunların keçiriləcəyi Olimpiya şəhərciyini və bir sıra obyektləri ziyarət etmək imkanı yaradılıb. Media nümayəndələri 450 yerlik Olimpiya oteli, basketbol, voleybol, həndbol, badminton, bədii və idman gimnastikası, qılıncoynatma, stolüstü tennis, batut gimnastikası, cüdo və güləş kimi yarışların keçirilməsi üçün nəzərdə tutulan 15 min tamaşaçı tutumuna malik çoxfunksiyalı arena ilə tanış olublar, həmçinin 6 min tamaşaçı tutan velodromu ziyarət ediblər. Xatırladaq ki, 21 növ üzrə keçiriləcək Oyunlarda 62 ölkədən idmançılar (45 Asiya və 17 Okeaniya ölkəsi) iştirak edəcək.xeber100.com

Beynəlxalq turnir başlayır…

Mayın 5-7-də Su İdmanı Sarayında ümummilli lider Heydər Əliyevin anadan olmasının 93-cü ildönümünə həsr olunmuş su polosu üzrə “Prezident kuboku” üzrə ənənəvi beynəlxalq turnir keçiriləcək. Su İdmanı Növləri Federasiyasından Azərtac-a bildiriblər ki, turnirdə Azərbaycan idmançıları ilə yanaşı, Moldova, Rumıniya və İsveçrə komandaları da iştirak edəcəklər. Turnir çərçivəsində su polosu üzrə U-19 Avropa çempionatının seçmə mərhələsi keçiriləcək. Azərbaycan Su İdmanı Növləri Federasiyasının mətbuat xidmətinin rəhbəri Məqsəd Rəhimov bildirib ki, bu çox mötəbər yarış hesab olunur. Azərbaycanda ilk dəfə olaraq su polosu üzrə Avropa çempionatının seçmə mərhələsi keçiriləcək. Bu turnirdə birinci və ikinci yeri tutan komandalar üzrə U-19 Avropa çempionatının final mərhələsinə birbaşa vəsiqə qazanacaqlar. Azərbaycan millisi var qüvvəsi ilə iki yerdən birini tutmağa çalışacaq. Əgər buna nail ola bilsək Azərbaycanın su polosu tarixində böyük nailiyyət hesab olunacaq.xeber100.com

“Tour d’Azerbaidjan-2016” beynəlxalq velosiped turuna start verilib

Bu gün “Tour d’Azerbaidjan-2016” beynəlxalq velosiped turuna start verilib. Apasport.az saytının məlumatına görə, Beynəlxalq Velosipedçilər İttifaqının 2.1 kateqoriyalı yarışı əvvəlki illərdə olduğu kimi 5 mərhələdə keçiriləcək. Turda 19 ölkədən 21 komandanın iştirakı edəcək ki, onlardan da 6-sı pro-kontinental, “Synergy Baku” da daxil olmaqla 14-ü kontinental, 1-i isə milli komandadı. İştirakçılar 1-ci mərhələdə Bakı - Sumqayıt (154 km), 2-ci mərhələdə Bakı - İsmayıllı (186,5 km), 3-cü mərhələdə Qəbələ - Şəki - Qəbələ (177,2 km), 4-cü mərhələdə Qəbələ - Pirqulu (115,3 km) və sonuncu mərhələdə Bakı - Abşeron - Bakı (158 km) marşrutu üzrə ümumilikdə 791 km məsafə qət edəcəklər.  

UEFA Çempionlar Liqasında yarımfinal mərhələsinin cavab oyunlarına start verilib

Apasport.az saytının məlumatına görə, ilk oyun günündə “Bavariya” və “Atletiko” qarşılaşıblar. Madriddə keçirilmiş ilk görüşdə “Atletiko”ya uduzan (0:1) “Bavariya” öz meydanında məğlubiyyətin əvəzini çıxa bilsə də, bu, finala çıxmaq üçün yetərli olmayıb. Gərgin məcrada keçən oyunda azarkeşlər 3 qola şahidlik ediblər. Meydan sahibləri hesabı açan tərəf olublar. İlk hissə bu hesabla bitsə də, ikinci hissənin 10-cu dəqiqəsində Qrizman status-kvonu bərpa edib. Buna qədər isə artıq "Bavariya"lı Müller penaltidən fərqlənmək şansını boşa vermişdi. Yan Oblak yaxşı oynayaraq komadasını xilaskarı olmuşdu. 74-cü dəqiqədə Levandovski meydan sahiblərini ümidləndirsə də, münhenlilərin bundan artığına gücü çatmayıb. Üstəlik, az qala öz qapılarında qol da görəcəkdilər. Ancaq Fernando Torres də Müller kimi əlinə düşən 99%-lik imkanı boşa verib. Bu dəfə isə qurtarıcı rolunda Manuel Noyer çıxış edib. Beləliklə "Atletiko" məğlub olsa da, səfərdə vurduğu qolun verdiyi üstünlüklə ilk finalçı olub. Çempionlar Liqası Yarımfinal mərhələsi, cavab oyunları 3 may “Bavariya” (Almaniya) – “Atletiko” (İspaniya) - 2:1 Qollar: Xabi Alonso, 31, Levandovski, 74 - Qrizman, 54 İstifadə olunmayan penaltilər: Müller, 34 (qapıçı) - Torres, 84 (qapıçı) İlk oyun - 0:1 Hakimlər: Cüneyt Çakır, Çem Satman, Tarık Ongün, Sərkan Ok Əlavə köməkçi hakimlər: Hüseyin Göçək, Barış Şimşək (hamısı Türkiyə) Münhen. “Allyanz Arena” “Bavariya”: Noyer, Xavi Martinez, Riberi,  Levandovski, Duqlas Kosta, Xabi Alonso, Boatenq, Lam (k), Vidal, Alaba, Müller Ehtiyat oyunçular: Ulrayx, Taşçı, Tiaqo Alkantara, Rafinya, Qötze, Koman, Kimmix “Atletiko”: Oblak, Felipe Luis, Qodin, Koke, Qrizmann, Torres, Fernandes, Qabi (k),  Saul Niqes, Xuanfran, Ximenes Ehtiyat oyunçular: Moya, Saviç, Korrea, Karrasko, Lukas Hernandes, Partey, Vietto  

II Budapeşt Kuboku başa çatıb

Macarıstanda idman gimnastikası üzrə gənclər arasında keçirilən II Budapeşt Kuboku başa çatıb. Azərbaycan Gimnastika Federasiyasından apasport.az saytına verilən məlumata görə, yarış millimiz üçün uğurlu alınıb. Belə ki, Murad Ağarzayev, Timur Bayramov, Ağamurad Qəhrəmanov, Sergiy Onbış, Cavidan Babayev, Səməd Məmmədli və Mənsum Səfərovla turnirə qatılan yığmamız yarışı 8 medalla başa vurub. I yaş qrupunda (1998-1999) çıxış edən Ağarzayev sərbəst hərəkətlər və dayaqlı tullanma üzrə finallarda müvafiq olaraq gümüş və bürünc medal qazanıb. Çoxnövçülükdə 8-ci yerdə qərarlaşan Murad turnik üzərində hərəkətlərin finalında 4-cü, halqalarda isə 5-ci olub. Elə həmin yaş qrupunda beynəlxalq arenada debüt çıxışını nümayiş etdirən digər gimnast Bayramov turnik (5-ci yer), halqalar (6-cı yer) və dayaqlı tullanma (8-ci yer) üzrə finallarda iştirak edib. Onbış, Babayev və Qəhrəmanov II yaş qrupunda (2000-2001) çıxış ediblər. Dayaqlı tullanma üzrə final çıxışı Sergiyə “qızıl” medal gətirib, paralel qollar üzərində çıxışından sonra isə o, fəxri kürsünün ikinci pilləsinə yüksəlib. Bu yaş qrupunda onun komanda yoldaşları – beynəlxalq arenada ilk dəfə çıxış edən Babayev halqalar üzərində finalda 4-cü mövqedə qərarlaşıb, Ağamurad Qəhrəmanov isə sərbəst hərəkətlərdə 4-cü yeri Böyük Britaniyadan olan gimnastla bölüşüb və dayaqlı tullanma üzrə çıxışında 5-ci pillədə qərarlaşıb. Gənclərin ən kiçik, III yaş qrupunda (2002-2003) çıxış edən Səməd Məmmədli bir dəst medalla kifayətlənmədi (sərbəst hərəkətlər - “qızıl”, gimnastika atı - “gümüş”, çoxnövçülük - “bürünc”). Paralel qollar üzərində çıxışı isə ona ikinci gümüş medalı qazandırıb. Bu alət üzərində hərəkətlərdə beynəlxalq yarış meydançasına ilk dəfə qədəm qoyan Səfərov isə Almaniyanı təmsil edən gimnastla 4-cü yeri paylaşıb. Qeyd edək ki, gənc gimnastlarımızı qarşıda Avropa birinciliyi (Bern, İsveçrə - 25-29 may) gözləyir. Burada Azərbaycan ilk dəfə olaraq komanda hesabı yarışlarda çıxış edəcək.xeber100.com  

X Azərbaycan birinciliyi və çempionatının açılış mərasimi keçirilib

Aprelin 30-da Bakıda ulu öndər Heydər Əliyevin anadan olmasının 93-cü ildönümünə həsr olunan sindo-ryu və pençak-silat üzrə X Azərbaycan birinciliyi və çempionatının açılış mərasimi keçirilib. AZƏRTAC xəbər verir ki, tədbir idmançıların paradı ilə başlayıb. Azərbaycanın dövlət himni səsləndirilib, ölkəmizin ərazi bütövlüyü uğrunda şəhid olanların xatirəsi bir dəqiqəlik sükutla yad edilib. Azərbaycan Sindo-ryu və Pençak-silat Federasiyasının prezidenti vəzifəsini icra edən Ceyhun Əşrəfov qeyd edib ki, turnirin keçirilməsində əsas məqsəd xalqımızın ümummilli lideri Heydər Əliyevin zəngin siyasi irsinin təbliğinə, dahi rəhbərin Azərbaycan dövlətçiliyinin xilasında, müstəqilliyimizin möhkəmləndirilməsi istiqamətində misilsiz xidmətlərinin ictimaiyyətə daha geniş çatdırılmasına dəstək verməkdir. Həmçinin son illərdə ölkəmizdə inkişaf etməkdə olan sindo-ryu və pençak-silatın kütləviləşdirilməsinə, idmanın bu növünə marağın daha da artırılmasına çalışmaqdır. O, ölkəmizdə idmanın, o cümlədən sindo-ryu və pencak-silatın inkişafına göstərdiyi diqqət və qayğıya görə dövlətimizin başçısına təşəkkürünü bildirib. Turnirin açılış mərasimində İndoneziyanın Azərbaycandakı səfiri Hüsnan Bəy Fanani pençak-silatın qədim tarixə malik olduğunu söyləyib. Səfir qeyd edib ki, vətəni İndoneziya sayılan bu idman növünün Azərbaycanda bu səviyyədə inkişaf etməsi sevindiricidir. İndoneziyada pençak-silatın təkcə idman kimi deyil, incəsənət və yaşam tərzi olaraq da geniş yayıldığını qeyd edən diplomat bildirib ki, ölkəsində kiçik yaşda olan uşaqlara belə bu idman növü öyrədilir. “Sərhədçi” İdman Olimpiya Mərkəzində təşkil olunan X Azərbaycan birinciliyi və çempionatı ilə yanaşı, azarkeşlərin marağını nəzərə alaraq “One silat” idman növü üzrə də beynəlxalq yarış keçirəcək. “One silat” bizə məlum olan qaydasız döyüşə çox yaxındır və ona Asiya ölkələrində böyük maraq var. Bu yarışda əsasən Azərbaycan və Özbəkistan idmançıları güclərini sınayacaqlar. Qaliblər diplom və qiymətli hədiyyələrlə yanaşı, Asiya və Avropa çempionatlarında iştirak etmək hüququ da qazanacaqlar.xeber100.com

“YAP K-2016”

İyunun 17-19-da Bakıda keçiriləcək “Formula 1” Avropa Qran-prisinə dəstək məqsədilə Yeni Azərbaycan Partiyası Gənclər Birliyi tərəfindən Bakı, Sumqayıt şəhər və Abşeron rayon YAP təşkilatlarının Gənclər birlikləri arasında “YAP K-2016” adlı kartinq yarışı keçirilib. Tədbiri YAP Gənclər Birliyinin sədri Seymur Orucov açaraq deyib ki, Monako və Sinqapur Qran-priləri kimi, biz də Bakıda ənənəvi şəhər yarışına ev sahibliyi edəcəyik. İyirmi ölkənin ev sahibliyi etdiyi “Formula 1” yarışı təqviminin tam mərkəzində yer almış, sayca 10-cu Qran-pri olan Bakı Avropa Qran-prisi öz unikallığı ilə seçilir. Belə ki, bu yarış zamanı avtomobillər dənizkənarı bulvar boyunca hərəkət edərək paytaxtımızın ən qədim hissəsi olan və UNESCO Ümumdünya İrs Siyahısına daxil edilən “İçərişəhər” Dövlət Tarixi-Memarlıq Qoruğunun ətrafında dövr edəcək. “Formula 1” yarışlarının 500 milyondan çox televiziya tamaşaçısı var və yarış zamanı dünyadakı “Formula 1” fanatlarının diqqəti Bakıda olacaq. Beləliklə, yarışı izləyən televiziya tamaşaçıları və qonaqlar şəhərimizin tam simasını görə biləcəklər. YAP təşkilatlarının Gənclər Birlikləri arasında “YAP K-2016” adlı kartinq yarışının sonunda qaliblər kubok və diplomlarla təltif ediliblər. Yarışda birinci yeri YAP Nəsimi rayon təşkilatının Gənclər Birliyi tutub.

Rio-de Janeyroda keçiriləcək XXXI Yay Olimpiya Oyunlarına az qaldı

“Rio-2016”-a az qaldı. Azərtac xəbər verir ki, 34 idman növündə 306 medalçını müəyyənləşdirəcək XXXI Yay Olimpiya Oyunları Avqustun 5-dən 21-dək Rio-de Janeyroda keçiriləcək. Bu gündən sonra təşkilatçı ölkə olan Braziliya Yunanıstandan rəmzi Olimpiya məşəlini təhvil alacaq. Məhz bu tarixdən başlayaraq nəhəng idman mərasiminin vaxtı geriyə hesablanacaq. Olimpiya məşəli Afinada Braziliya səfirliyinə təhvil verildikdən sonra İsveçrənin Cenevrə şəhərinə, ardından mayın 3-də Cənubi Amerika ölkəsinə gətiriləcək. Olimpiya simvolu Braziliyanın müxtəlif ştatlarının 334 şəhərinə aparılacaq.xeber100.com  

Məktəblilər arasında keçirilən şahmat festivalının ikinci mərhələsinə start verilib

Heydər Əliyevin anadan olmasının 93-cü ildönümünə həsr edilən respublika şahmat festivalının ikinci mərhələsinə start verilib. Təhsil Nazirliyindən Azərtac-a bildiriblər ki, Bakı şəhərindəki 12 nömrəli məktəbdə keçirilən festivala şahmat fənni tədris olunan pilot ümumi təhsil məktəblərinin şagirdləri qatılıb. Festivalın ikinci mərhələsində birinci mərhələdə - rayondaxili yarışlarda birinci yeri tutan komandalar iştirak edir. Ümumilikdə, 63 komanda üzrə 400-dək şagird final mərhələsində mübarizə aparacaq. Festivalın şəxsi və komanda xarakterli final mərhələsində II-IV sinif şagirdlərindən ibarət 6 nəfərlik (3 oğlan və 3 qız) komandalar iştirak edir. Doqquz turdan ibarət olan final mərhələsinə mayın 2-də yekun vurulacaq.xeber100.com