Azərbaycan Həndbol Federasiyasının məlumatına görə…

Kişi həndbolçulardan ibarət milli komanda təlim-məşq toplanışındadır.Azərbaycan Həndbol Federasiyasının mətbuat xidmətinin məlumatına görə, ölkə çempionatında göstərdiyi oyunla əsas komandaya layiq olduğunu sübut edən həndbolçularımız bir araya gələrək baş məşqçi Nasser Salimi və məşqçi Eldar Fərəcovun rəhbərliyi ilə qarşıdakı beynəlxalq yarışlara hazırlığı davam etdirir.Qeyd olunub ki, Bakıda keçirilən toplanışın əsas məqsədi hədbolçuların fiziki, texniki və taktiki keyfiyyətlərinin artırılması, komandanın qarşıdakı beynəlxalq yarışlar ərəfəsində hazır vəziyyətə gətirilməsidir.xeber100.com

Şose velosipedi üzrə Azərbaycan çempionatı keçiriləcək

iyunun 18-19-da Gənclər və İdman Nazirliyinin və Azərbaycan Velosiped Federasiyasının (AVF) birgə təşkilatçılığı ilə şose velosipedi üzrə Azərbaycan çempionatı keçiriləcək.Federasiyanın mətbuat xidmətindən məlumat verilib ki, Beynəlxalq Velosipedçilər İttifaqının (UCİ) mövcud qaydalarına əsasən təşkil ediləcək yarışda 17 yaşadək, gənclər və U23-Elit yaş kateqoriyası üzrə oğlanlar və qızlar mübarizə aparacaqlar.İlk yarış günündə velosipedçilər Pirallahı rayonunda “Nərəkənd” parkının yaxınlığından start götürməklə fərdi ötüşmələr, ikinci yarış günündə isə “Dreamland” Qolf Klubun yaxınlığından Qala qəsəbəsi istiqamətində start götürməklə qrup ötüşmələrində yarışacaqlar.Çempionatın proqramına əsasən, fərdi ötüşmələrdə U17 yaş kateqoriyasındakı idmançılar, gənc oğlanlar və qızlar, həmçinin U23-Elit yaş kateqoriyasında olan qadınlar 20 kilometr, U23-Elit yaş kateqoriyasında olan kişilər isə 38 kilometr məsafə qət edəcəklər.Qrup ötüşmələrində 17 yaşadək oğlanlar və qızlar, həmçinin gənc qızlar və 23 yaşadək qadınlar 75 kilometr, gənc oğlanlar 90 kilometr, 23 yaşadək kişilər 120 kilometr və elit yaş kateqoriyasında olan kişilər isə 135 kilometr məsafədə yarışacaqlar.Yarışın qaliblərinə medal, diplom və qiymətli hədiyyələr təqdim ediləcək.Azərbaycan çempionatının nəticələri Beynəlxalq Velosipedçilər İttifaqına da göndəriləcək və həm ölkəmizin, həm də idmançıların şəxsi reytinqində nəzərə alınacaq.xeber100.com

“Çelsi” futbol klubu yarımmüdafiəçisi ilə müqaviləni yeniləyib

İngiltərənin “Çelsi” klubu yarımmüdafiəçisi Billi Gilmorla müqaviləni yeniləyib.Bu barədə London klubunun rəsmi saytı məlumat yayıb.Tərəflər arasındakı yeni sözləşmənin müddəti 2024-cü ilin yayınadəkdir.2019-cu ildən “Çelsi”nin əsas komandasında forma geyinən futbolçu London təmsilçisinin heyətində 11 matçda meydana çıxıb. Şotlandiya yığmasının da üzvü olan 21 yaşlı futbolçu ötən mövsümü icarə əsasında “Norviç Siti”də keçirib.xeber100.com  

Futbol üzrə dünya çempionatında iştirak edəcək 31-ci ölkə müəyyənləşib

Qətərdə keçiriləcək futbol üzrə dünya çempionatında iştirak edəcək 31-ci ölkə müəyyənləşib.Mundiala vəsiqə uğrunda Qətərin Əl-Rayyan şəhərində Avstraliya və Peru milliləri qarşılaşıb. Matçın əsas və əlavə vaxt qolsuz bərabərliklə başa çatdığı üçün qalib penaltilər seriyasından müəyyənləşib. Burada daha dəqiq olan Avstraliya (5:4) dünya çempionatına vəsiqəni təmin edib.Qeyd edək ki, “Qətər-2022”nin sonuncu iştirakçısı Kosta-Rika və Yeni Zelandiya yığmaları arasında keçiriləcək oyundan sonra müəyyənləşəcək.xeber100.com

UEFA Çempionlar Liqasının təsnifat mərhələsindəki rəqibi müəyyənləşib

Ağdamın “Qarabağ” klubunun UEFA Çempionlar Liqasının birinci təsnifat mərhələsindəki rəqibi müəyyənləşib. Bu, UEFA-nın İsveçrənin Nyon şəhərindəki mənzil-qərargahında atılmış püşk nəticəsində məlum olub. Qurban Qurbanovun baş məşqçilik etdiyi kollektiv Polşanın “Lex” komandasına rəqib olub.Qeyd edək ki, Çempionlar Liqasında birinci təsnifat mərhələsinin oyunları iyulun 5-6-da və 12-13-də keçiriləcək. "Qarabağ" ilk matçını səfərdə keçirəcək.xeber100.com

UEFA Millətlər Liqasının qrup mərhələsi çərçivəsində

Bu gün UEFA Millətlər Liqasının qrup mərhələsi çərçivəsində üz-üzə gələcək Azərbaycan və Belarus yığmalarının start heyətləri açıqlanıb.Azərbaycan millisinin start heyətində Şahruddin Məhəmmədəliyev, Azər Salahlı, Bəhlul Mustafazadə, Emin Mahmudov, Renat Dadaşov, Ramil Şeydayev, Abbas Hüseynov, Eddi İsrafilov, Bədavi Hüseynov, Cəlal Hüseynov və Riçard Almeyda yer alıblar.Belarus yığmasının heyətində meydana Pavel Pavlyuçenko, Kirill Peçenin, Valeri Boçerov, Ruslan Xadarkeviç, Vladislav Malkeviç, Sergey Politeviç, Qleb Şevçenko, Maks Ebonq, İvan Bahar, Yevgeni Yablonski və Vladislav Klimoviç çıxacaqlar.Qeyd edək ki, “Dalğa Arena”da oynanılacaq qarşılaşma saat 20:00-da başlayacaq.xeber100.com

Azərbaycan Şahmat Federasiyasının təşkilatçılığı ilə ölkə çempionatına start verilib

Azərbaycan Şahmat Federasiyasının (AŞF) təşkilatçılığı ilə 60 yaşdan yuxarı şahmatçılar arasında ölkə çempionatına start verilib. Veteranlar arasında keçirilən çempionatın açılış mərasimində çıxış edən federasiyasının prezidenti, Beynəlxalq Şahmat Federasiyasının vitse-prezidenti Mahir Məmmədov veteran şahmatçılar arasında yarışların təşkilinin vacib olduğunu söyləyib. AŞF rəhbəri veteran şahmatçılara daim diqqət ayrılacağını bildirib və Azərbaycan çempionatında qalib olacaq iştirakçının FIDE tərəfindən təşkil olunacaq dünya çempionatında iştirak edəcəyini sözlərinə əlavə edib.AŞF-nin birinci vitse-prezidenti Faiq Həsənov çempionatdan maraqlı mübarizə gözlədiyini vurğulayaraq iştirakçılara uğurlar arzulayıb.Sonra Mahir Məmmədov birinci lövhədə ilk gedişi edib.Veteran şahmatçılar arasında ən yaşlı iştirakçı 1939-cu il təvəllüdlü Orxan Əfəndiyevdir. İsveçrə sistemi üzrə keçirilən yarış 9 turdan ibarətdir. İyirmi altı şahmatçının iştirak etdiyi çempionatın ümumi mükafat fondu 3 min manat təşkil edir.xeber100.com

“Red Bull Racing” komandası qələbə dubluna imza atıb

“Red Bull Racing” komandası Formula 1 Azərbaycan Qran-Prisində qələbə dubluna imza atıb.Formula 1 üzrə dünya çempionatının səkkizinci mərhələsi olan Bakı mərhələsində Avstriya komandasının hər iki pilotu podiumda yer alıb. Belə ki, Maks Ferstappen yarışın qalibi olsa da, onun komanda yoldaşı Serxio Peres yürüşü ikinci pillədə tamamlayıb. Bu, komandanın cari mövsümdə üçüncü belə uğurudur. Komanda tarixində 20 dəfə qələbə dublu sevinci yaşayıb.Qeyd edək ki, ilk üçlüyü “Mercedes”in pilotu Corc Rassel qapayıb.xeber100.com

Bakı Şəhər Halqası Əməliyyat Şirkəti: Formula 1 Azərbaycan Qran-Prisi uğurlu keçdi

Formula 1 Azərbaycan Qran-Prisi çox uğurlu keçdi. Heç bir problemlə üzləşmədik. Altıncı Qran-Pridə "Red Bull Racing" komandasının pilotu Maks Ferstappen qalib oldu. Hər il müxtəlif qaliblər görürük. Bu dəfə də Azərbaycan Qran-Prisində “Bakı sindromu” qırılmadı".Bunu Bakı Şəhər Halqası Əməliyyat Şirkətinin icraçı direktoru Arif Rəhimov Formula 1 Azərbaycan Qran-prisi ilə bağlı danışarkən deyib.A.Rəhimov əvvəlcədən "Red Bull Racing" komandasını favorit saydığını söyləyib: "Mən fikirləşirdim ki, Maks Ferstappen, ya da onun komanda yoldaşı Serxio Peres qalib olacaq”.Qeyd edək ki, Maks Ferstappen 2022-ci il Formula 1 Azərbaycan Qran-Prisinin qalibi olub.xeber100.com

Formula 1 Azərbaycan Qran-Prisinin sıralanma turu başa çatıb

Formula 1 Azərbaycan Qran-Prisinin sıralanma turu başa çatıb.“Ferrari” komandasının pilotu Şarl Lekler yürüşü lider kimi tamamlayıb.İlk üçlükdə “Red Bull Racing” komandasının pilotları Serxio Peres və Maks Ferstappen yer alıblar.Sıralanma turunun nəticələrinə əsasən, iyunun 12-də keçiriləcək əsas yarışda pilotların düzülüşü müəyyənləşib.Builki dünya çempionata martın 18-20-də Bəhreyn Qran-Prisi ilə start verilib. Sonrakı mərhələlər Səudiyyə Ərəbistanı, Avstraliya, İtaliya, ABŞ, İspaniya və Monakoda keçirilib. Yeddi mərhələdən sonra pilotların siyahısına “Red Bull Racing” komandasının niderlandlı sürücüsü Maks Ferstappen başçılıq edir. Onun aktivində 125 xal var. Ferstappendən 9 xal geri qalan Şarl Lekler (“Ferrari”) ikinci sırada qərarlaşıb. İlk beşliyi 110 xalla Serxio Peres (“Red Bull Racing”), 84 xalla Corc Rassel (“Mercedes”) və 83 xalla Karlos Saynz (“Ferrari”) tamamlayırlar.Konstruktorlar kubokunun lideri isə “Red Bull Racing” (235 xal) komandasıdır. “Ferrari” 199 xalla ikinci, “Mercedes” isə 134 xalla üçüncü pillədə yer alıb. Sonrakı yerlərdə “Maklaren” (59), “Alfa Romeo” (41), “Alpine Reno” (40), “Apfatauri” (17), “Haas Ferrari” (15), “Aston Martin” (7) və “Uilliyams” (3) komandaları qərarlaşıblar.Qeyd edək ki, Azərbaycan Formula 1 yarışlarına altıncı dəfədir ev sahibliyi edir. Avropa Qran-Prisi adlandırılan ilk yarış 2016-cı ildə təşkil olunub. Bu yarışda “Mercedes” komandasının pilotu Niko Rosberq birinci olub. Növbəti ildən Azərbaycan Qran-Prisi adını alan yarışlarda Daniel Rikkardo (“Red Bull Racing” - 2017), Lusi Hamilton (“Mercedes” - 2018), Valtteri Bottas və Luis Hamilton (“Mercedes” - 2019), Serxio Peres (“Red Bull Racing” – 2021) qalib gəliblər. 2020-ci ildə Formula 1 Azərbaycan Qran-Prisi koronavirus pandemiyası səbəbindən keçirilməyib.xeber100.com