Cüdo üzrə açıq Avropa kuboku yarışı start götürüb

Bu gün İspaniyanın paytaxtı Madriddə cüdo üzrə açıq Avropa kuboku yarışı start götürüb.Cüdoçularımız yarışın birinci günündə iki medal qazanıblar. Gümüş medalı komandamızın aktivinə Nazir Talıbov (60 kq) yazdırıb. Bürünc medalı isə qadın cüdoçumuz Leyla Əliyeva (48 kq) qazanıb.Qeyd edək ki, Azərbaycanı yarışda 13 idmançı təmsil edir.Qırx ölkədən 400-dən çox idmançının mübarizə apardığı yarış iki gün davam edəcək.xeber100.com

Azərbaycan yığması bu gün UEFA Millətlər Liqasında növbəti oyununu keçirəcək

Futbol üzrə Azərbaycan yığması bu gün UEFA Millətlər Liqasında növbəti oyununu keçirəcək.Millimiz C Liqasının 3-cü qrupunda Slovakiya yığmasını qəbul edəcək. "Dalğa Arena"da oynanılacaq qarşılaşma saat 20:00-da başlayacaq. Görüşün baş hakimi litvalı Donatas Rumsas olacaq.Azərbaycan seçməsi ilk görüşündə səfərdə Qazaxıstana 0:2 hesabı ilə uduzub, daha sonra isə Serbiyada Belarusla qolsuz bərabərə qalıb.Millimiz indiyədək Slovakiya ilə 6 dəfə üz-üzə gəlib. Bu matçların 5-də məğlub olan yığma yalnız 2001-ci ildə Bakıda dünya çempionatının seçmə mərhələ oyununda qələbə qazanıb. Komandanın qollarını Vadim Vasilyev və Zaur Tağızadə vurub.Qrupun digər görüşündə Belarus Serbiyada Qazaxıstanla qarşılaşacaq.xeber100.com

Azərbaycan Həndbol Federasiyasının məlumatına görə…

Qadın həndbolçulardan ibarət Azərbaycan millisi V İslam Həmrəyliyi Oyunlarına hazırlığı davam etdirir.Azərbaycan Həndbol Federasiyasının mətbuat xidmətindən bildiriblər ki, avqustda keçiriləcək yarışlara hazırlaşan komanda hazırlığın ilkin mərhələsinə mayın 15-də Bakıda start verib. İyirmi iki həndbolçunun cəlb olunduğu toplanışa baş məşqçi Slavisa Ristiçeviç rəhbərlik edir. Köməkçi məşqçi Fuad Yangildindir.Məşqlər “Sərhədçi” Olimpiya İdman Mərkəzi və “Dinamo” İdman Cəmiyyətində keçirilir.İyunun 15-də Bakıda yekunlaşacaq toplanış ardınca ölkə xaricində davam etdiriləcək.Milli iyunun 24-dək Gürcüstanda hazırlıq keçəcək. Həmin təlim-məşq toplanışında bir neçə yoxlama oyununun keçirilməsi planlaşdırılır.Hazırlıq planına əsasən, seçmə komanda digər toplanışlara da qatılacaq.Qeyd edək ki, avqustun 9-18-də Türkiyənin Konya şəhərində keçiriləcək İslam Oyunlarındakı rəqiblər hələlik məlum deyil.xeber100.com

Bakıda Formula 2 yarışlarının sıralanma turuna start verilib

İyunun 10-da Bakıda Formula 2 yarışlarının sıralanma turuna start verilib.Formula 2 yarışlarında hər biri iki pilotla təmsil olunan 11 komanda birincilik uğrunda mübarizə aparır.Formula 1 Azərbaycan Qran-Prisi çərçivəsində keçirilən yarışda əvvəlcə pilotlar sərbəst yürüşlərdə güclərini sınayıblar. Qırx beş dəqiqə davam edən sərbəst yürüş “Hitech Grand Prix” komandasının estoniyalı pilotu Yuri Vipsin qələbəsi ilə başa çatıb. İlk üçlüyü “Carlin” komandasının üzvü Liam Louson və “Hitech Grand Prix” komandasının pilotu Markus Armstronq tamamlayıblar.İyunun 11-də saat 13:30-da sprint, ertəsi gün saat 11:05-də isə əsas yarış keçiriləcək. Sprint yarışında pilotlar 21, əsas yarışda isə 29 dövrə vuracaqlar.On dörd mərhələdən ibarət yarışa noyabrın 18-20-də Əbu-Dabidə yekun vurulacaq. Bakı yürüşünə qədər keçirilmiş beş yarışın nəticəsinə görə, pilotların sıralamasına “MP Motorsport” komandasının üzvü Felipe Druqoviç 113 xalla başçılıq edir. Komandaların sıralamasında isə “MP Motorsport” 135 xalla birincidir.xeber100.com

Yeniyetmələrdən ibarət cüdo millimiz təlim-məşq toplanışına başlayıb

Yeniyetmələrdən ibarət cüdo millimiz təlim-məşq toplanışına başlayıb.Komandamız 32 nəfərlik heyətlə “Judo Club 2012”nin baş məşqçisi Rüstəm Alimlinin rəhbərliyi altında hazırlıq keçir.Təlim-məşq toplanışının təşkilində məqsəd iyunun 23-26-da Xorvatiyanın Poreç şəhərində yeniyetmələr arasında keçiriləcək Avropa çempionatında yüksək nəticə əldə etməkdir.Qeyd edək ki, idmançıların hazırlığı iyunun 17-dək davam edəcək.xeber100.com

15 İyun – Milli Qurtuluş Gününə həsr olunmuş açıq turnir başa çatıb

2005-2006-cı il təvəllüdlü oğlan voleybolçular arasında 15 İyun - Milli Qurtuluş Gününə həsr olunmuş açıq turnir başa çatıb.4 komandanın - “Masallı”, “Bakı”, “Sumqayıt” və “Cəlilabad”ın mübarizə apardığı yarış dairəvi sistemlə keçirilib.Görüşlərdən 9 xal toplayan “Bakı” yığması qalib adını qazanıb. “Cəlilabad” 6 xalla ikinci, “Masallı” 3 xalla üçüncü yerləri tutublar.Azərbaycan Voleybol Federasiyası və Masallı Rayon Gənclər və İdman İdarəsinin birgə təşkilatçılığı ilə keçirilən turnirin qaliblərinə kubok və diplomlar verilib.xeber100.com

Azərbaycan Ağır Atletika Federasiyasının məlumatına görə…

Sumqayıt Şəhər Gənclər və İdman Baş İdarəsinin təşkilatçılığı ilə 2005-ci il və daha kiçik təvəllüdlü oğlan və qızlar arasında ağır atletika üzrə şəhər birinciliyi keçirilib.Azərbaycan Ağır Atletika Federasiyasından bildiriblər ki, Sumqayıt Olimpiya İdman Kompleksində təşkil olunan yarışda 30-dan artıq idmançı qalib adı uğrunda mübarizə aparıb.İki gün gərgin idman mübarizəsi şəraitində davam edən yarışda Zəhra Niftəliyeva (64 kq), Arzu Qədimova (71 kq) qızlar arasında, İbrahim Rəsulzadə (40 kq), Turan Abbasov (45 kq), Fərman Məhərrəmov (49 kq), Azər Mənsimov (55 kq), Turan Əliyev (61 kq), Fərid Mərdanov (67 kq), Fuad Qədimov (73 kq), Cavidan Muxtarlı (81 kq) və Rəbbani Niftəliyev (89 kq) oğlanlar arasında fəxri kürsünün ən yüksək pilləsinə qalxıblar.xeber100.com

Formula 1 Azərbaycan Qran-Prisinin könüllüləri yarışa hazırdır

Formula 1 Azərbaycan Qran-Prisinin ayrılmaz hissəsi olan könüllülər yarışa hazırdır. Bu il yarışa 1500 yerli könüllü cəlb olunacaq. Yerli könüllülərlə yanaşı, həmçinin 100-ə yaxın xarici könüllü yarışın təşkilinə öz dəstəyini göstərəcək.Xarici könüllülər ABŞ, İrlandiya, İsveçrə, İndoneziya, Pakistan, Çin, Tanzaniya, Qana, Qazaxıstan kimi ölkələrdən yarışa qatılaraq yerli könüllülərlə birgə çalışacaqlar.Könüllülərin çoxu tribunalar, biletlər və kütləyə nəzarət kimi vəzifələri icra edəcəklər.Xatırladaq ki, Formula 1 Azərbaycan Qran-Prisi üçün 8 minə yaxın könüllü qeydiyyatdan keçib, onlardan 1500-ü müsahibə əsasında seçilərək yarışa cəlb olunub.xeber100.com  

Tacikistan millisi Azərbaycanda təlim-məşq toplanışına başlayıb

Yeniyetmə boksçulardan ibarət Tacikistan millisi Azərbaycanda təlim-məşq toplanışına başlayıb.Bakı Boks Mərkəzində keçirilən hazırlığa Azərbaycan millisinin üzvləri də qatılıblar. Komandalar təlim-məşq çərçivəsində sınaq qarşılaşmalarında da güclərini yoxlayıblar.Qeyd edək ki, Tacikistan yığmasının baş məşqçisi Xurşid Abdulloev ölkəmizdə onlara göstərilən qonaqpərvərlikdən razı qaldığını vurğulayıb. Onun sözlərinə görə, Azərbaycanda təlim-məşq toplanışı və buradakı yoldaşlıq görüşləri komandasında yer alan yeniyetmə boksçulara təcrübə baxımından çox faydalı olacaq.xeber100.com

Bakı Şəhər Halqası Əməliyyat Şirkətinin təşkilatçılığı ilə…

Bakı Şəhər Halqası Əməliyyat Şirkətinin (BŞH) təşkilatçılığı ilə “Dreamland” Qolf Klubunda qolf turniri keçirilib.Bakı Şəhər Halqasından Azərtac-a bildiriblər ki, formula 1 Azərbaycan Qran-Prisinə dəstək məqsədilə keçirilən turnirə 17 komanda olmaqla, yerli və xarici 68 qolfçu qatılıb.Dörd saat davam edən yarışda komandalar meydançada 18 dəlik üzrə mübarizə aparıblar.Turnirin qalibləri Elman Rzayev, Eldar Kərimov və Xəlil Hüseynov 62 zərbənin yekununda 55,3 balla ən yüksək pilləyə layiq görülüb. 65 zərbənin yekununda 56,6 bal qazanan Kris Viliams, Qrant Vatson, Alasteir Duqlas və Skot Paterson isə ikinci yerdə qərarlaşıb.Üçüncü yerin mükafatçıları isə 59 balla Robert Stivinson, Edvard Edqar, Con Salins və Andru İkstrums olub.“Bakı Şəhər Halqası kimi artıq beş ildir ki, bu turnirə dəstəyimizi göstəririk. Düşünürəm ki, bu dəfə də iştirakçılar maraqlı oyun nümayiş etdirdilər. “Dreamland” Qolf Klubuna bu xoş qonaqpərvərliyi üçün təşəkkür edirəm. Hər kəsi iyunun 10-12-də keçiriləcək yarışımıza dəvət edir, əyləncə dolu həftəsonu arzulayıram”, - deyə Bakı Şəhər Halqası Əməliyyat Şirkətinin kommersiya şöbəsinin rəhbəri Bülent Özerdim yarışla bağlı bildirib.xeber100.com