I Azərbaycan-Qazaxıstan turizm forumu keçiriləcək

Qazaxıstanın paytaxtı Astana şəhərində iyunun 28-də I Azərbaycan-Qazaxıstan turizm forumu keçiriləcək.Azərbaycanın Qazaxıstandakı səfirliyi, Qazaxıstanda fəaliyyət göstərən Azərbaycanlı Sahibkarlar İttifaqının dəstəyi ilə keçirilən forumda Azərbaycan və Qazaxıstan turizm potensialının təqdimatı, turoperatorların, turizm şirkətlərinin nümayəndələrinin işgüzar görüşləri, turizm agentlikləri üçün işçi platforma, iştirakçılar üçün “B2B” (üzbəüz) görüşlər təşkil ediləcək.xeber100.com  

“Azərbaycan Hava Yolları”nın məlumatına görə…

"Azərbaycan Hava Yolları" Qapalı Səhmdar Cəmiyyəti (AZAL) oktyabrın 29-dan etibarən Bakıdan Tailandın paytaxtı Banqkok şəhərinə (Suvarnabhumi Beynəlxalq Hava Limanı) müntəzəm sərnişin reyslərini həyata keçirməsinə başlayacaq. Qeyd edək ki, bu, Azərbaycanın paytaxtından Cənub-Şərqi Asiyaya ilk birbaşa müntəzəm sərnişin aviareysidir.Bu barədə “Azərbaycan Hava Yolları” QSC-nin mətbuat xidmətindən Azərtac-a məlumat verilib.Bakıdan Banqkoka aviareyslər çərşənbə axşamı və bazar günləri ekonom və “VIP-klub” sinif salonlu rahat “Boeing-767” laynerləri ilə yerinə yetiriləcək. Banqkokdan Bakıya aviareyslər isə bazar ertəsi və çərşənbə günləri həyata keçiriləcək.Banqkoka yeni reyslər "Azərbaycan Hava Yolları"nın digər reysləri ilə rahat calanacaq ki, bu da Britaniyanın nüfuzlu “Skytrax” agentliyinin qiymətləndirməsinə görə postsovet məkanında ən yaxşı hava limanı elan edilən Heydər Əliyev Beynəlxalq Aeroportu vasitəsilə Avropa və MDB ölkələrindən transfer daşınmaları planlaşdırmağa imkanı verəcək.Aviabiletin qiymətinə baqajın (23 kiloqrama kimi) pulsuz daşınması, soyuq və isti yeməklərin tam çeşidi daxildir.xeber100.com

“Kapital Bank” yeni kredit kampaniyası təqdim edir

“Kapital Bank” 26 iyun – Silahlı Qüvvələr Günü münasibətilə iyunun 19-dan 3-dək hərbçilərə güzəştlə yeni kredit kampaniyası təqdim edir.Bankdan Azərtac-a bildiriblər ki, aksiya çərçivəsində “Kapital Bank”a müraciət edən hərbçilərə illik faiz dərəcəsində 2 faiz endirim edilir. Kredit rəsmiləşdirilməsi zamanı komissiya 0 faiz təşkil edəcək.Qeyd edək ki, “Kapital Bank”da “Gündəlik tələbat krediti”nin məbləği 300–20 000 manat təşkil edir, müddəti isə 3 aydan 36 ayadək rəsmiləşdirilə bilər. Bu məhsul üzrə kreditlər əməkhaqqı və ya təqaüdünü “Kapital Bank”dan alan müştərilərə şamil edilir. Kredit rəsmiləşdirilməsi üçün əməkhaqqı və ya təqaüd kartı, həmçinin şəxsiyyəti təsdiq edən sənəd tələb olunur.xeber100.com

Əmlak Məsələləri Dövlət Komitəsi yeni hərrac elan edib

Əmlak Məsələləri Dövlət Komitəsi (ƏMDK) tərəfindən iyulun 18-də keçiriləcək yeni hərrac elan edilib. Hərraca ümumilikdə 124 əmlak çıxarılıb. Bunlardan 25-i səhmdar cəmiyyət, 21-i kiçik dövlət müəssisə və obyekti, 73-ü istifadəsiz qeyri-yaşayış sahəsi, 5-i isə nəqliyyat vasitəsidir. Hərracda müxtəlif təyinatlı müəssisələrin olması investorların seçim imkanını artırır.Komitədən Azərtac-a bildirilib ki, hərraca çıxarılan kiçik dövlət müəssisəsi və obyektləri məişət, iaşə, qida, toxuculuq, təmir, sənaye və digər sahələrə aiddir. Bu əmlaklardan 4-ü paytaxtın Sabunçu rayonunda, digərləri isə Gəncə, İmişli, Şirvan, Qazax, Sumqayıt və başqa bölgələrdə yerləşir. Kiçik dövlət müəssisələrinin əksəriyyəti torpaq sahəsi ilə birgə özəlləşdirilməyə çıxarılıb.xeber100.com

“Azərbaycan Dəmir Yolları” QSC-nin məlumatı

İyulun əvvəlində Bakı-Tbilisi-Qars dəmir yolunun istifadəyə verilmə tarixi məlum olacaq.Azərtac xəbər verir ki, bu barədə “Azərbaycan Dəmir Yolları” QSC-nin sədri Cavid Qurbanov jurnalistlərə açıqlamasında deyib.O bildirib ki, iyulun 4 ya 5-də Türkiyənin Qars vilayətində Türkiyənin nəqliyyat, dənizçilik və rabitə naziri Əhməd Arslan, Gürcüstanın dəmir yolu rəisi və nəqliyyat naziri ilə birlikdə Bakı-Tbilisi-Qars dəmir yolunun istifadəyə verilməsi tarixi müəyyən ediləcək. “Bu görüşdən sonra artıq dəqiq tarix barədə məlumat verə biləcəyik”, - deyə C.Qurbanov bildirib.xeber100.com

Dövlət Statistika Komitəsinin məlumatına görə…

Cari ilin yanvar-may aylarında neft sektoru üzrə əsas kapitala 3 milyard 663,5 milyon manat vəsait yönəldilib.Dövlət Statistika Komitəsindən Azərtac-a verilən məlumata görə, ötən beş ayda neft sektorunda 10 milyard 420,2 milyon manat dəyərində ümumi məhsul istehsal olunub.Sənayenin neft sektorunda isə istehsal əvvəlki ilin müvafiq dövrü ilə müqayisədə 7,1 faiz azalıb. Sənaye məhsulunun 70,2 faizi mədənçıxarma sektorunda istehsal olunub.Bu ilin ilk dörd ayında mədənçıxarma sənayesində orta aylıq əmək haqqı 3 min 159 manat təşkil edib.xeber100.com

Bakı Fond Birjasında hərrac keçiriləcək

İyunun 20-də Bakı Fond Birjasında (BFB) Maliyyə Nazirliyinin Dövlət Qısamüddətli İstiqrazlarının yerləşdirilməsi üzrə hərrac keçiriləcək.BFB-dən Azərtac-a bildiriblər ki, istiqrazların hər birinin ümumi həcmi 10 milyon manat və 15 milyon manat, hər bir istiqrazın nominal dəyəri 100 manat, tədavül müddəti 182 və 364 gün, ödəmə tarixi iyunun 19-u və dekabrın 19-dur. “PAŞA Kapital” QSC anderrayter vəzifəsində çıxış edir.Hərrac zamanı qeyri-rəqabətli sifarişlərin istiqrazların buraxılışının 20 faizdən artıq olmamaq şərti ilə qəbul edilməsinə icazə verilir.xeber100.com

Dəniz Təhlükəsizliyi Komitəsinin 98–ci sessiyası işini yekunlaşdırıb

Beynəlxalq Dəniz Təşkilatının (BDT) Londonda yerləşən baş qərargahında bu qurumun Dəniz Təhlükəsizliyi Komitəsinin 98–ci sessiyası işini yekunlaşdırıb.Azərbaycan Dövlət Dəniz Administrasiyasının (ADDA) mətbuat xidmətindən Azərtac-a bildirilib ki, 1995–ci ildən Azərbaycan Respublikasının üzv olduğu bu beynəlxalq təşkilatın sessiyasında ADDA-nın rəisi Qüdrət Qurbanovun rəhbərliyi ilə nümayəndə heyəti təmsil edib.Sessiyada etimadnamələr haqqında məruzə, BDT-nin digər üzvlərinin qərarları, əsas sənədlərə dair düzəlişlərin qəbulu və nəzərdən keçirilməsi, BDT–nin sənədlərinin erkən tətbiqi, dənizdə təhlükəsizliyin artırılmasına dair tədbirlər, yeni gəmilərin inşa edilməsinə dair standartlar, yük və konteynerlərin daşınması, çirklənmənin qarşısının alınması və cavab tədbirləri, insan amili, təlim və növbəçəkmə, gəmi dizaynı və konstruksiyası, naviqasiya, kommunikasiya, axtarış və xilasetmə, gəmi sistemləri və avadanlıqları, yeni tədbirlərin tətbiq edilməsi üçün potensial imkanların yaradılması, dəniz üzgüçülüyünün təhlükəsizliyinin qiymətləndirilməsi, gəmilərə edilən silahlı basqın və dəniz quldurluğu, qeyri-qanuni miqrasiya, BDT alətlərinin implementasiyası, beynəlxalq təşkilatlarla əlaqələr və digər mühüm məsələlər müzakirə olunub.xeber100.com

Rusiya Mərkəzi Bankının məlumatına görə…

2018-ci ilin ortalarında dünya bazarında neftin orta qiyməti 25 dollar/barrel səviyyəsinə qədər ucuzlaşa bilər.Azərtac xəbər verir ki, bu barədə Rusiya Mərkəzi Bankı məlumat yayıb. Bank buna səbəb kimi Liviya və Nigeriyanın neft ixracını artırmasını, Çində iqtisadi artımın zəifləməsini və ümumilikdə enerji daşıyıcılarına tələbatın azalmasını göstərir.xeber100.com

“Azneft” İstehsalat Birliyində seminar keçirilib

“Azneft” İstehsalat Birliyində “Əməliyyatların səmərəliliyinin artırılması” mövzusunda seminar keçirilib.SOCAR-ın mətbuat xidmətindən Azərtac-a bildirilib ki, seminarda “Azneft”in aparıcı mütəxəssisləri, struktur bölmələrinin nümayəndələri, əməyin mühafizəsi xidmətlərinin işçiləri iştirak ediblər. Seminarda mövzu haqqında məlumat verilib, müəssisənin fəaliyyətində əməliyyat səmərəliliyinin artırılması üçün heyətin bilik və bacarıqlarının təkmilləşdirilməsinin vacibliyi qeyd edilib. Əməliyyatlarda vaxt itkisinin azaldılması, qəzaların sıfıra endirilməsi, eləcə də səmərəliliyin artırılmasına xidmət edən “5 niyə” sorğusunun analiz edilməsinin əhəmiyyəti vurğulanıb, bu analiz barədə ətraflı izahat verilib.Bildirilib ki, “5 niyə” sorğusunun analizi problemin kökünü tapmaq və ən ideal həll yolunu təklif etmək üçün mühüm vasitədir. Bu, qarşıda duran məsələnin mümkün səbəblərini aşkar edir və gələcək fəaliyyət planının düzgün qurulmasına istiqamət verir. Əməliyyatların səmərəliliyinin artırılması təhlükəsizlik səviyyəsinin yüksəldilməsinə zəmin yaradır.Sonda “Azneft” İstehsalat Birliyində son illər baş vermiş xoşagəlməz hadisələr “5 niyə” sorğusu ilə analiz edilib, belə hadisələrin gələcəkdə baş verməməsi üçün görüləcək tədbirlərin müxtəlif vasitələrlə dəyərləndirilməsinin vacibliyi qeyd olunub.xeber100.com