Banklar Assosiasiyasının təşkilatçılığı ilə konfrans keçiriləcək

Mayın 26-da Azərbaycan Banklar Assosiasiyasının (ABA) təşkilatçılığı ilə bank və maliyyə bazarlarının kibertəhlükəsizliyi ilə bağlı konfrans keçiriləcək.Azərtac ABA-ya istinadla xəbər verir ki, konfransa maliyyə-iqtisad sahəsində tənzimləyici və nəzarət orqanlarının, kommersiya banklarının yuxarı menecmentləri, biznes və ictimai təşkilatların rəhbərləri, IT təşkilatları, telekommunikasiya şirkətləri, beynəlxalq maliyyə institutları, həmçinin digər ölkələrdən nümayəndələr dəvət olunub.xeber100.com

IV İslam Həmrəyliyi Oyunlarının bağlanış mərasimi günü…

IV İslam Həmrəyliyi Oyunlarının bağlanış mərasimi günü avtobuslarla 23 min 164 sərnişin Bakı Olimpiya Stadionu ərazisinə daşınıb.Azərtac xəbər verir ki, bu barədə Bakı Nəqliyyat Agentliyinin ictimaiyyətlə əlaqələr və maarifləndirmə şöbəsinin müdiri Mais Ağayev deyib.O bildirib ki, IV İslam Həmrəyliyi Oyunlarının bağlanış mərasimi günü üç ekspress xətt üzrə müəyyən olunmuş istiqamətlərdən (metronun “20 Yanvar”, “Gənclik” və “Qara Qarayev” stansiyaları yaxınlığındakı dayanacaqlardan) biletli tamaşaçıların Bakı Olimpiya Stadionuna, eləcə də mərasim bitdikdən sonra geri daşınması 02:00-dək Bakı Nəqliyyat Agentliyi tərəfindən təmin edilib. Plana əsasən nəzərdə tutulan nəqliyyat əməliyyatları üçün Bakı Olimpiya Stadionunun İctimai Nəqliyyat Terminalına ümumilikdə 433 nəqliyyat vasitəsi cəlb olunub. 36 avtobus isə ehtiyat olaraq hazır vəziyyətdə saxlanılıb.M.Ağayevin sözlərinə görə, saat 09:00-dan saat 12:00-dək ekspress xətt üzrə hərəkət edəcək avtobuslar texniki müayinədən keçirilərək Bakı Olimpiya Stadionunun İctimai Nəqliyyat Terminalına toplanıb və sürücülərin tibbi müayinədən keçirilməsi yerinə yetirilib. Nəticədə 7 nəfər sürücü yüksək qan təzyiqi səbəbindən xətdən kənarlaşdırılıb.“Bağlanış mərasimi zamanı 23 min 164 sərnişin stadion ərazisinə, mərasim bitdikdən sonra isə 22 min 651 sərnişin stadiondan təyin olunmuş məntəqələrə daşınıb. X1 xətti üzrə 137 avtobus ilə 9138 sərnişin gətirilib, 103 avtobus ilə 7092 sərnişin aparılıb. Eyni zamanda X2 xətti üzrə 157 avtobus ilə 9240 sərnişin stadiona ərazisinə, 160 avtobus ilə 9467 sərnişin isə stadion ərazisindən gətirilib. X3 xətti üzrə isə 125 avtobus ilə 4386 sərnişin stadiona daşınıb, 107 avtobus ilə 5692 sərnişin stadiondan aparılıb. Əlavə olaraq 11 avtobus ilə 400 nəfər Polis Akademiyasının müdavimi daşınıb”, - deyə M.Ağayev vurğulayıb.M.Ağayev qeyd edib ki, ekspress xətt avtobusları ilə müəyyən edilən dayanacaqlara daşınan sərnişinlərin müxtəlif istiqamətlərdə rahat gedişini təmin etmək məqsədilə bütün marşrut xətləri üzrə sərnişin avtobuslarının gecə saat 02:30-dək fəaliyyət göstərməsi təmin edilib. Bununla yanaşı metronun “Həzi Aslanov” stansiyası yaxınlığında bir nəfər könüllü BNA əməkdaşları tərəfindən minik avtomobili ilə Buzovna qəsəbəsinə yola salınıb. Ekspress xətt avtobuslarından istifadə edən sərnişinlərdən biri mobil telefonunu (sonradan aparılan araşdırma nəticəsində onun İran İslam Respublikasının vətəndaşı olduğu müəyyən edilib) digər biri isə içərisində pulqabı, iki ədəd mobil telefon və şəxsi əşyaları olan əl çantasını unudub. Qeyd edilən əşyaların Bakı Nəqliyyat Agentliyi tərəfindən sahiblərinə verilməsi təmin edilib.

“Jazeera Airways” aviaşirkəti birbaşa uçuşlara başlayır

İyun ayının 23-dən etibarən Küveytin “Jazeera Airways” aviaşirkəti Bakıya birbaşa uçuşlara başlayır.Azərtac xəbər verir ki, aviareyslər həftədə iki dəfə olmaqla bazar ertəsi və cümə günləri həyata keçiriləcək.Məlumatda bildirilir ki, Küveyt vətəndaşları üçün Azərbaycana viza almaq prosedurları sadələşdirilib. Bu ölkənin vətəndaşları “ASAN Visa” sistemi vasitəsilə onlayn rejimdə 3 gün ərzində viza ala biləcəklər.Qeyd edək ki, bu günədək Küveyt və Bakı arasında çarter reysləri həyata keçirilirdi.xeber100.com

Bakı Fond Birjasında hərrac keçiriləcək

Mayın 24-də Bakı Fond Birjasında (BFB) Azərbaycan Mərkəzi Bankının qısamüddətli notlarının yerləşdirilməsi üzrə hərrac keçiriləcək.BFB-dən Azərtac-a bildiriblər ki, hərraca çıxarılan notların həcmi 25 milyon manat, bir notun nominal dəyəri 100 manat, tədavül müddəti 28 gündür. Notlar iyunun 21-də ödəniləcək.Mərkəzi Bank qısamüddətli notların buraxılışı, yerləşdirilməsi və tədavülü haqqında qaydalara əsasən, hərraclarda bank lisenziyasına malik olan hüquqi şəxslər iştirak edə bilər. Banklar birjada BFB-nin üzvü olan investisiya şirkətləri vasitəsilə qatıla bilər. Dəyişikliyə əsasən, hər bir bank tərəfindən təqdim edilən sifarişlərin ümumi sayı 2-dən (1 rəqabətli və 1 qeyri-rəqabətli) artıq olmamalıdır.Hərrac zamanı notların buraxılışının 20 faizdən artıq olmamaq şərti ilə qeyri-rəqabətli sifarişlərin qəbul edilməsinə icazə verilir.xeber100.com

“Azəravtoyol” ASC-də infotur təşkil edilib

Estoniyanın Yol Agentliyinin əməkdaşları üçün “Azəravtoyol” ASC-də infotur təşkil edilib.“Azəravtoyol” ASC-nin mətbuat xidmətindən Azərtac-a bildirilib ki, Estoniyanın Yol Agentliyinin əməkdaşları ölkəmizdə səfərdədirlər. Xarici qonaqlar üçün “Azəravtoyol” ASC-də infotur təşkil edilib. İnfotur “Azəravtoyol” ASC-nin inzibati binasından başlayıb.3 gün davam edəcək infoturun məqsədi müxtəlif ölkələrin, o cümlədən Azərbaycanın da yol tikintisi və texniki qulluq sistemləri ilə tanış olmaq və yol üzrə yerli qurumlar, şirkətlər və mühəndislərlə qarşılıqlı təcrübə mübadiləsi aparmaqdır.Estoniyanın Yol Agentliyinin 18 nəfərdən ibarət nümayəndə heyəti səfər çərçivəsində Azərbaycanın yol tikinti proqramlarının icrası və inkişafı, həmçinin yol sistemi ilə tanış olacaq, sifarişçilərlə görüşəcəklər.Qeyd edək ki, Estoniyanın Yol Agentliyinin mühəndisləri infotur zamanı Bakı-Şamaxı avtomobil yolunun 4 zolağa genişləndirilməsi, Ələt-Astara-İran İslam Respublikası ilə dövlət sərhədi avtomobil yolunda tikinti layihələri, həmçinin Bakı şəhərində yol infrastrukturunun yenidən qurulması çərçivəsində aparılan işlərlə tanış olacaqlar.İnfotur may ayının 26-da başa çatacaq.xeber100.com

Mərkəzi Bank mayın 24-nə olan USD/AZN rəsmi məzənnəsini açıqlayıb

Azərbaycan Mərkəzi Bankı (AMB) mayın 24-nə olan USD/AZN rəsmi məzənnəsini açıqlayıb.Bankdan Azərtac-a bildiriblər ki, Azərbaycan Mərkəzi Bankının mayın 24-nə USD/AZN rəsmi məzənnəsi 1,7021 manat səviyyəsində müəyyən olunub.xeber100.com

XIII Beynəlxalq bilik, iqtisadiyyat və menecment konfransı keçirilib

"AtaBank" ASC İqtisad Universitetində (UNEC) keçirilən "XIII Beynəlxalq bilik, iqtisadiyyat və menecment konfransı"nın sponsoru olub.Bankdan Azərtac-a bildiriblər ki, "İslam Həmrəyliyi İli" çərçivəsində keçirilən konfransın təşkilatçıları UNEC-lə yanaşı, Türk Dünyası İqtisadçılar Birliyi, Türkiyənin İstanbul Sabahattin Zaim Universiteti, Bandırma On Yedi Eylül Universiteti, Bilik, “İqtisadiyyat və Menecment” jurnalı olub.Konfransda Azərbaycanla yanaşı, Türkiyə, İran, ABŞ, Avstraliya, Özbəkistan, Pakistan daxil olmaqla bir çox ölkənin elm adamları iştirak ediblər.""XIII Beynəlxalq bilik, iqtisadiyyat və menecment konfransı" ictimai elmlər sahəsində dünyanın nüfuzlu ənənəvi elmi platformasıdır. "AtaBank" Azərbaycan post-neft dövründə ölkənin iqtisadi inkişafını məhz bilik və innovasiyalara əsaslanan iqtisadiyyatın qurulmasında görür. Müasir dövrdə ixtisaslı mütəxəssislər olmadan davamlı iqtisadi inkişafdan, yenilikdən söhbət gedə bilməz. Bankımızın korporativ sosial məsuliyyət siyasətinə elmin də dəstəklənməsi daxildir. İctimai elmlər sahəsində dünyanın nüfuzlu ənənəvi elmi platformasına sponsor olmağımız bu siyasətimiz çərçivəsində təmin edilib",- deyə "AtaBank" ASC-nin kommunikasiyalar və PR şöbəsinin rəisi Oruc İbrahimov bildirib.Sonda "AtaBank" ASC-yə elmi konfransa göstərdiyi maliyyə dəstəyinə görə təşəkkürnamə təqdim olunub.xeber100.com

Neftin qiyməti müxtəlif istiqamətlərdə dəyişib

Dünya birjalarında neftin qiyməti müxtəlif istiqamətlərdə dəyişib.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,40 dollar bahalaşaraq 50,73 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,27 dollar ucuzlaşaraq 53,60 dollar olub.AZƏRTAC xəbər verir ki, “AzəriLayt” markalı neftin bir barrelinin qiyməti isə 0,47 dollar bahalaşaraq 54,72 dollar təşkil edib.xeber100.com

MDB-yə üzv dövlətlərin Turizm üzrə Şurasının növbəti iclası keçirilib

Rusiya Federasiyasının Sankt-Peterburq şəhərində MDB-yə üzv dövlətlərin Turizm üzrə Şurasının növbəti iclası keçirilib. Tədbirdə ölkəmizi Mədəniyyət və Turizm Nazirliyinin aparat rəhbəri Rafiq Bayramov və beynəlxalq əməkdaşlıq şöbəsinin məsləhətçisi Araz Bağırlı təmsil ediblər. Rusiya Dövlət Ermitaj Muzeyində keçirilən iclasda Rusiyanın mədəniyyət nazirinin müavini Alla Manilova ölkələr arasında turizm sahəsində əməkdaşlığın perspektivlərini, qanunvericilik təcrübələrinin qarşılıqlı öyrənilməsinin zərurətini vurğulayıb, Rusiyada turizm qanunvericiliyinin təkmilləşdirilməsi üçün atılan addımlar barədə məlumat verib.MDB ölkələri ilə turizm əlaqələrimizə də toxunan R.Bayramov, ölkələri birləşdirən turizm marşrutları və qastronomik turizm haqqında danışaraq Rusiyadan olan turistlər üçün Azərbaycanın top 5 ölkə arasında olduğunu bildirib.xeber100.com

Dövlət Statistika Komitəsinin məlumatı

2017-ci ilin yanvar-aprelində ölkədə 86,4 min yeni, o cümlədən 79,6 min daimi iş yerləri açılıb.Dövlət Statistika Komitəsindən Azərtac-a verilən məlumata görə, bu dövrdə yaradılmış iş yerlərinin 87,5 faizi qeyri-dövlət sektorunda açılıb.Yeni iş yerlərinin 23,1 faizi Bakı şəhərinin, 0,7 faizi Naxçıvan Muxtar Respublikasının, 76,2 faizi regionların, o cümlədən 25,7 faizi Aran, 13,9 faizi Lənkəran, 11,3 faizi Gəncə-Qazax, 5,8 faizi Dağlıq Şirvan, 5,7 faizi Şəki-Zaqatala, 5,6 faizi Abşeron, 4,7 faizi Quba-Xaçmaz, 3,2 faizi Yuxarı Qarabağ, 0,3 faizi isə Kəlbəcər-Laçın iqtisadi rayonlarının payına düşüb.Daimi iş yerlərinin 5,8 faizi yeni yaradılmış müəssisə və təşkilatlarda, 13,2 faizi mövcud müəssisə və təşkilatlarda, 0,9 faizi fəaliyyətini bərpa etmiş müəssisə və təşkilatlarda, 80,1 faizi isə fərdi sahibkarlıq subyektləri tərəfindən yaradılıb.Hüquqi şəxslər tərəfindən yaradılmış daimi iş yerlərinin 24,3 faizi ticarət, nəqliyyat vasitələrinin təmiri, 20,0 faizi tikinti, 8,4 faizi emal sənayesi, 6,6 faizi su təchizatı, tullantıların təmizlənməsi və emalı, 6,1 faizi nəqliyyat və anbar təsərrüfatı, 5,9 faizi dövlət idarəetməsi və müdafiə, sosial təminat, 4,9 faizi daşınmaz əmlakla əlaqədar əməliyyatlar, 4,3 faizi turistlərin yerləşdirilməsi və ictimai iaşə, 3,8 faizi inzibati və yardımçı xidmətlərin göstərilməsi, 15,7 faizi isə digər iqtisadi fəaliyyət növləri üzrə açılıb.xeber100.com