Dövlət əmlakının özəlləşdirilməsi ilə bağlı növbəti hərrac keçirilib

Noyabrın 1-də Əmlak Məsələləri Dövlət Komitəsi (ƏMDK) tərəfindən dövlət əmlakının özəlləşdirilməsi ilə bağlı növbəti hərrac keçirilib. Azərtac xəbər verir ki, budəfəki hərracda ümumilikdə 19 dövlət əmlakı olmaqla bir səhmdar cəmiyyəti, 17 kiçik dövlət müəssisə və obyekti, eləcə də bir nəqliyyat vasitəsi özəlləşdirilib. Bu hərrac da, əvvəlki hərraclar kimi, tamamilə açıq və şəffaf şəraitdə baş tutub və istənilən vətəndaşın və ya media üzvünün iştirakına heç bir məhdudiyyət olmayıb. Həm bu hərracın, həm də respublikanın digər şəhər və rayonlarında keçirilən hərracların gedişatı əyani müşahidə şəklində böyük monitorlarda canlı izlənilib. Bildirilib ki, hərraca çıxarılmış və özəlləşdirilmiş hər bir kiçik dövlət müəssisə və obyekti orta və kiçik portfelli biznesin qurulması və inkişafı üçün potensial daşınmaz əmlaklardır. Hərracda özəlləşdirilmiş iri dövlət müəssisəsi olan “Pirallahı Çörək” Səhmdar Cəmiyyəti isə yeyinti sənayesi sahəsinə aiddir. Müəssisənin özəlləşdirilməsi sonradan qoyulacaq investisiya nəticəsində fəaliyyətin tam bərpası və gələcəkdə yeni iş yerlərinin yaradılmasına səbəb olacaq.Növbəti belə hərrac noyabrın 8-də keçiriləcək və 77 dövlət müəssisə və obyekti özəlləşməyə çıxarılacaq.xeber100.com

Rabitə və Yüksək Texnologiyalar Nazirliyinin məlumatı…

Noyabrın 1-dən Bakı və Sumqayıt şəhərlərində, eləcə də Abşeron yarımadasında tam olaraq açıq paketli rəqəmli televiziya yayımına keçilib. Rabitə və Yüksək Texnologiyalar Nazirliyi əhalinin diqqətinə çatdırır ki, oktyabrın 31-dən etibarən Bakı şəhəri və Abşeron yarımadasında analoq televiziya yayımı dayandırılıb. Müasir televizorlar, o cümlədən 2010-cu ildən etibarən istehsal olunan bütün televizorlar rəqəmli yayımlanan siqnalları heç bir əlavə qurğu olmadan qəbul edir. Rəqəmli yayımı qəbuletmə imkanı olmayan televizorlar üçün isə dekoderləri (“Set-Top-Box”) istifadə haqda təlimatla birgə poçt şöbələrindən əldə etmək mümkündür. Noyabrın 1-dən etibarən Bakı, Abşeron və Sumqayıt sakinləri bu qurğuları poçt şöbələrindən 22 manat ödəməklə əldə edə bilərlər. Rəqəmli yayım siqnallarını qəbul etmək üçün xüsusi antenaya ehtiyac yoxdur. Belə ki, analoq yayım üçün istifadə olunan antena vasitəsilə rəqəmli formatda TV proqramları izləmək mümkündür. Nazirlikdən Azərtac-a bildilib ki, rəqəmli televiziya yayımına keçid əhaliyə ölkənin istənilən ərazisində televiziya proqramlarının yüksək keyfiyyətlə, o cümlədən HD standartında izləməyə, təsvir və səs siqnallarının kənar maneələr və informasiya itkisi olmadan qəbul edilməsinə geniş imkanlar yaradacaq. Xatırladaq ki, respublikanın digər ərazilərində tam olaraq rəqəmli televiziya yayımına cari il dekabrın 1-dən keçiləcək və analoq yayım dayandırılacaq. Qeyd edək ki, Naxçıvan Muxtar Respublikasında açıq paketli rəqəmli televiziya yayımına 10 dekabr 2014-cü il tarixindən keçilib. Rəqəmli televiziya yayımına keçidlə bağlı yaranan hər hansı problem və sualla bağlı Rabitə və Yüksək Texnologiyalar Nazirliyinin 14-11 nömrəli “Qaynar xətt”inə zəng etmək olar.xeber100.com

“Moody’s”in eskpertlərinin fikrincə…

“Moody's” beynəlxalq reytinq agentliyi Azərbaycan Beynəlxalq Bankının törəmə bankı olan “Azərbaycan Beynəlxalq Bankı-Moskva”nın yerli və xarici valyutada uzunmüddətli depozit reytinqini “В3” səviyyəsindən “В2” səviyyəsinə artırıb. Bankdan Azərtac-a verilən məlumata görə, “Azərbaycan Beynəlxalq Bankı-Moskva”nın kredit qabiliyyətinin qiymətləndirilməsi (BCA) b3-dən b2 pilləsinə yüksəlib. Eyni zamanda, uzunmüddətli risk qabiliyyəti də indi B-2 deyil, daha yüksək B-1 səviyyəsində dəyərləndirilib. Bankın uzunmüddətli depozit reytinqi üzrə proqnoz stabil qiymətləndirilib. Bu reytinq “Azərbaycan Beynəlxalq Bankı” ASC-nin sağlamlaşdırılması tədbirləri çərçivəsində Azərbaycan hökumətinin banka dəstəyindən sonra “ABB-Moskva”nın getdikcə güclənən mövqeyi ilə bağlı “Moody's”in rəyini əks etdirir. Bu ilin ikinci rübündə “ABB-Moskva”nın nizamnamə kapitalının 2 milyard rubla qədər artırıldığı, beləliklə, bankın kapitalının 70 faiz genişləndiyi qeyd edilir. Agentliyin rəyinə əsasən, sentyabrın 1-nə “Bazel III” normativləri üzrə “ABB-Moskva”nın məcmu kapitalının adekvatlığı (Н1.0) və 1-ci dərəcəli kapitalın nisbəti (Н1.2) 22,4 faiz və müvafiq olaraq 8,3 faiz artıb ki, bu da Rusiya Federasiyası Mərkəzi Bankının tələblərindən yüksəkdir. “Moody's”in eskpertləri ümid edir ki, Azərbaycan Beynəlxalq Bankının kapital artımı və aktivlərinin sağlamlaşdırılması yaxın 12-18 ayda da davam etdiriləcək. Problemli kreditlərinin azalmasına, mənfəətliyinin bərpasına, eləcə də Azərbaycan Beynəlxalq Bankının depozit reytinqinin yüksəlməsinə müvafiq olaraq “ABB Moskva”nın reytinqi daha da yüksələ bilər.xeber100.com

“Azər Türk Bank”ın məlumatına görə…

“Azər Türk Bank” avqustun 18-dən etibarən start verdiyi “Çək, Qazan!” kampaniyasına yekun vurub. Bankdan Azərtac-a bildiriblər ki, 10 həftə ərzində davam edən kampaniyanın hər həftə təyin olunan qaliblərinə qazandıqları dəyərli hədiyyələr təqdim edilib. “Çək, Qazan!” kampaniyası bu həftə ərzində iştirakçılar arasından həftənin cümə günü baş tutacaq səsvermədə son qalibin təyin olunması ilə başa çatıb. Bu, bank tərəfindən həyata keçirilən sonuncu kampaniya deyil. Tezliklə, bu kampaniya yeni formatda təqdim ediləcək.xeber100.com

Dünya birjalarında neftin qiyməti…

Dünya birjalarında neftin qiymətinin ucuzlaşması davam edir. Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,19 dollar ucuzlaşaraq 48,51 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti isə 0,23 dollar azalaraq 49,48 dollar olub.xeber100.com

Beynəlxalq ödəniş sisteminin reklam aksiyasına start verilib

“AtaBank” ASC ilə “MasterCard” beynəlxalq ödəniş sisteminin yeni birgə reklam aksiyasına start verilib. Bankdan Azərtac-a bildiriblər ki, kampaniyanın şərtlərinə görə, “AtaBank”ın “MasterCard” sahibləri “UBER X”də qeydiyyatdan keçərək 10 manatadək ilk 2 gedişi pulsuz əldə edirlər. “UBER X” aksiyası dekabrın 31-dək etibarlıdır. Qeyd edək ki, “AtaBank”ın “MasterCard Gold” və “MasterCard Platinum” kart sahibləri “UBER Select”də qeydiyyatdan keçib 10 manata qədər olan ilk 3 gedişi pulsuz əldə edirlər. “UBER Select” aksiyası gələn il fevralın 1-dək qüvvədədir. Aksiya iştirakçısı olmaq üçün mobil telefona “Uber” əlavəsini yükləmək (“AppStore”, “Google Play” və “Windows Market”də yükləmək mümkündür), qeydiyyatdan keçmək, “AtaBank”ın “MasterCard” kartları vasitəsilə ödəniş etmək, “Promokodlar” bölməsində “MasterCardBaku” promo kodunu daxil edib lazımi ünvana sifariş vermək lazımdır. Aksiyada yalnız “MasterCard” vasitəsilə “Uber”də qeydiyyatdan keçmiş yeni istifadəçilər iştirak edə bilərlər.xeber100.com

“Made in Azerbaijan” möhürü ilə ixraca məhsul çıxarılıb

“SƏBA” Şirkətlər Qrupu Rusiyaya növbəti partiya quru süd məhsulunu ixrac edib. Şirkətin “Biləsuvar Aqro” MMC müəssisəsinin istehsalı olan məhsul bu dəfə “Made in Azerbaijan” brendi kimi göndərilib. Şirkətin ictimaiyyətlə əlaqələr xidmətindən Azərtac-a bildirilib ki, “İnvestisiyanın təşviqi sənədi”ni ilk almış şirkətlərdən biri kimi “SƏBA” öz yüksək keyfiyyətli məhsulunu “Made in Azerbaijan” nişanı ilə istehsal etməklə fəxr edir. “Biz əminik ki, Azərbaycan fermerlərindən toplanmış süddən emal etdiyimiz quru süd məhsulu xarici bazarda rəqabətə yüksək davamlılıq nümayiş etdirəcək”. “SƏBA” nişanı ilə qatıq, xama, yağ, kəsmik və bir sıra süd məhsulları da istehsal edir.xeber100.com

Dövlət Statistika Komitəsinin məlumatı…

Toxuculuq sənayesi, geyim, dəri və dəridən hazırlanan məmulatların, ayaqqabıların istehsalı sahələrində 90,6 milyon manat dəyərində məhsul istehsal edilib. Dövlət Statistika Komitəsindən Azərtac-a bildiriblər ki, əvvəlki ilin yanvar-sentyabr ayları ilə müqayisədə toxuculuq sənayesində 2,7 dəfə, geyim istehsalında 34,6 faiz artım, dəri və dəridən hazırlanan məmulatlar, ayaqqabı istehsalında isə 68,9 faiz azalma müşahidə olunub.

Şəhərsalma və Arxitektura Komitəsinin məlumatına əsasən…

Bakı şəhərində razılaşdırılmış 45 ərazi planlaşdırma layihələrinin sahəsi ümumilikdə 175 hektardan çoxdur. Pilot layihə çərçivəsində paytaxtda 5 il ərzində həyata keçiriləcək yenidənqurma işləri zamanı 324 min kvadratmetr yaşayış sahəsinin söküləcəyi nəzərdə tutulub. Bu barədə Azərtac-a Dövlət Şəhərsalma və Arxitektura Komitəsinin mətbuat xidmətindən məlumat verilib. Həmin ərazilərin əvəzinə bütün müasir tələblərə cavab verən 1,8 milyon kvadratmetr yaşayış sahəsinin tikilməsi planlaşdırılıb. Sənədlərdə layihələndirilən binaların sayı 350-dir. Söküləcək mənzillərin yerinə isə 18 min yeni mənzilin inşası nəzərdə tutulub. Qeyd olunub ki, ərazi planlaşdırma sənədlərinin 5 hektaradək ərazilər üçün (1 hektardan az olmayaraq) hazırlanması təcrübəsi dünya şəhərsalma praktikasında sınaqdan çıxmış ən mütərəqqi yanaşma sayılır.

“Unibank” yeni kampaniya keçirir

“Unibank” Mobil Bank istifadəçiləri üçün kampaniya keçirir. Bankdan Azərtac-a verilən məlumata görə, “Unibank Mobile” ilə bank əməliyyatı aparan müştərilər hər əməliyyatda 20 faiz endirim qazanacaqlar. İndi bu imkandan “Unibank Mobile” ilə əməliyyat aparan hər kəs istifadə edə biləcək. “Unibank”ın başladığı kampaniya çərçivəsində “Unibank Mobile” ilə aparılan “hesabdan-karta”, ”kartdan–hesaba” və “kartdan–karta” əməliyyatlarına komissiya haqlarında 20 faiz endirim edilir. “Unibank Mobile” istifadəçilərinin sayı artıq on minlərlədir. “Unibank Mobile” “Deloitte & Touche LLC” şirkəti tərəfindən 2016-cı il üçün MDB məkanında ən yaxşı mobil əlavələrdən biri hesab olunub. “Unibank Mobile” İOS və Android platformalarında işləyir. Müştərilər “Unibank”ın Mobil Bank xidmətini bu linkdən http://onelink.to/ffdbwf yükləyə bilərlər.xeber100.com