VI Baltik konfransı keçiriləcək

Oktyabrın 24-26-da Riqada Böyük Britaniyanın “Confidence Capital” şirkətinin təşkilatçılığı ilə neft-qaz ticarəti və nəqli üzrə VI Baltik konfransı keçiriləcək. Konfransın media tərəfdaşlarından biri olan Azərtac xəbər verir ki, tədbirin proqramına Baltik regionunun və Şimal-Şərqi Avropanın neft və neft məhsulları bazarlarının xülasəsi və proqnozları, əsas ixrac istiqamətlərinin konyunkturasının – Amsterdam-Rotterdam-Antverpen üçbucağının təhlili, Çin, Şimali Amerika kimi arbitraj istiqamətləri daxildir. Görüşdə regionda nəqliyyat infrastrukturunun və əməliyyat imkanlarının inkişafı – boru kəməri layihələri, dəmir yolu və dəniz daşımaları, terminallar, Şərqi Baltik ölkələrinin qaz bazarları, regionun maye qazla təchizatı haqqında aktual informasiya veriləcək. Konfrans iştirakçıları Şərqi Baltik regionunda və Şimal-Şərqi Avropada ticarət əməliyyatlarının aparılmasına dair məsələləri müzakirə edəcək, mövcud infrastrukturdan istifadənin və alternativ ticarət marşrutlarının inkişafının yeni imkanlarını dəyərləndirəcəklər.xeber100.com

“Pulsuz danışıq dəqiqələri” aksiyası…

"Nikoyl" Bank və “Bakcell” mobil operatorunun birgə layihəsi davam edir. Beynəlxalq pul köçürmə sistemlərinin hər hansı birindən istifadə etdikdə "Nikoyl" Bank tərəfindən müştəriyə 10 dəqiqədən 50 dəqiqəyə kimi “Bakcell” danışıq dəqiqələri hədiyyə ediləcək. Bankdan Azərtac-a bildiriblər ki, müştəri 500-1000 məbləği arasında pul köçürməsi etdikdə 10 dəqiqə, 1001-5000 məbləği arasında pul köçürməsi etdikdə 20 dəqiqə, 5001-10000 məbləği arasında pul köçürməsi etdikdə 30 dəqiqə, 10001 məbləğindən artıq pul köçürməsi etdikdə 50 dəqiqə pulsuz danışıq dəqiqələri əldə edəcək. Hazırda bankda "Zolotaya Korona", "Contact", "Caspian Money Transfer", "Lider", "Western Union", "Blizko", "Monex" və "Forsaj" kimi pul köçürmə sistemləri mövcuddur.

“Biznes fəaliyyətində keyfiyyətin idarə edilməsi” mövzusunda təlim keçiriləcək

Noyabrın 7-də "Excelsior Hotel & Spa Baku" hotelinin təşkilatçılığı ilə ali məktəb tələbələri üçün "Biznes fəaliyyətində keyfiyyətin idarə edilməsi" mövzusunda təlim keçiriləcək. Bu barədə Azərtac-a "AtaHolding" ASC-dən məlumat verilib. "AtaHolding" Şirkətlər Qrupunun müvafiq bölmələrinin mütəxəssisləri tərəfindən aparılacaq təlim tələbələrə biznesin bu mühüm sahəsində yeni biliklər əldə etməyə imkan verəcək.xeber100.com

“AGBank”dan xüsusi təkliflər…

“AGBank” Visa Gold, Visa Platinum və Visa İnfinite kart sahiblərinə xüsusi təkliflər təqdim edir. Bankdan Azərtac-a verilən məlumata görə, dəblə geyinməyi sevən “AGBank”ın Visa Gold kart sahiblərinə United Colours of Beneton, OVS Italian Fashion mağazalarında 15 faizədək endirim təklif olunur, onları, həmçinin dünyaca məşhur olan ispan uşaq ayaqqabısı brendi Pablosky mağazasında 15 faiz endirim gözləyir. Kino həvəskarları isə Park Cinemada bütün seanslara 7,5 faiz endirim əldə edə biləcəklər. Visa İnfinite kart sahiblərinə isə Lacoste, İceberq İtalyan moda evi, Monnalisa mağazalarında 15 faiz endirim təqdim edilir. Visa İnfinite kart istifadəçiləri Xalca Restaurant & Lounge restoranında 15 faiz və həmişə gözəl görünməyə üstünlük verənlərə isə Beauttech gözəllik salonunda bütün xidmətlərə 10 faiz endirim təklif olunur.  

Dünya birjalarında neftin qiyməti…

Dünya birjalarında neftin qiymətində cüzi ucuzlaşma müşahidə olunub. Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,09 dollar ucuzlaşaraq 50,35 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti isə 0,08 dollar azalaraq 51,95 dollar olub.xeber100.com

VII Azərbaycan-Rusiya Regionlararası Forumu keçiriləcək

Oktyabrın 31-dən noyabrın 1-dək Bakıda VII Azərbaycan-Rusiya Regionlararası Forumu keçiriləcək. Rusiya Federasiyasının Azərbaycan Respublikasındakı ticarət nümayəndəsi Eldar Tlyabiçevin Azərtac-a verdiyi məlumata görə, Forum çərçivəsində Azərbaycan ilə Rusiya ilə arasında regionlararası və sərhəd əməkdaşlığı məsələləri, perspektivli infrastruktur layihələri, regionlararası sahədə iqtisadi və maliyyə əməkdaşlığı, Rusiya-Azərbaycan humanitar məkanının problemləri və perspektivləri, iki ölkənin qarşılıqlı strateji əlaqələri nəzərdən keçiriləcək. Eyni zamanda, müxtəlif “dəyirmi masa”lar və iki ölkənin işgüzar dairələrinin nümayəndələri üçün əlaqə birjası təşkil ediləcək. Eldar Tlyabiçevin sözlərinə görə, bu gün Rusiya Federasiyasının 17 subyekti Azərbaycandakı tərəfdaşları ilə birlikdə ticari-iqtisadi, elmi-texniki və mədəni əməkdaşlıq haqqında sazişlər həyata keçirir. Rusiyanın 70-dən çox regionunun müəssisə və şirkətləri isə Azərbaycan Respublikası ilə ticarət əlaqələri saxlayır.xeber100.com

Vəsaitlərin cəlb edilməsi üzrə növbəti depozit hərracı keçiriləcək

Oktyabrın 17-də Azərbaycan Respublikasının Mərkəzi Bankı vəsaitlərin cəlb edilməsi üzrə növbəti depozit hərracı keçirəcək. Azərtac Mərkəzi Banka istinadla xəbər verir ki, dolayı hərracda 50 milyon manat məbləğində vəsaitin cəlbi nəzərdə tutulur. Depozit hərracının müddəti 28 gündür. "Bloomberg" ticarət sistemində keçiriləcək hərrac üzrə faiz dərəcələri 12,01-14,99 faiz təşkil edir.xeber100.com

Standartlaşdırma, Metrologiya və Patent üzrə Dövlət Komitəsinin məlumatı…

Oktyabrın 14-ü Beynəlxalq Standartlaşdırma günüdür və bu il “Standartlar güvən yaradır” devizi altında qeyd olunur. 1946-cı il oktyabrın 14-də 25 ölkənin nümayəndələri standartlaşdırma üzrə milli qurumların fəaliyyət güclərinin birləşdirilməsi və işlərinin koordinasiyasını həyata keçirmək üçün yeni təşkilatın yaradılması məqsədilə Böyük Britaniyanın paytaxtı Londonda toplaşıblar. Beynəlxalq Standartlaşdırma Təşkilatı (İSO) isə rəsmi olaraq bir il sonra fəaliyyətə başlayıb. Bu günün standartlaşdırma günü kimi qeyd edilməsi isə İSO-nun prezidenti Faruk Sunterin (Türkiyə) təşəbbüsü ilə 1970-ci ildən qərara alınıb. Həmin dövrdən indiyədək bu gün bütün standartlaşdırma üzrə digər qlobal təşkilatlar tərəfindən də qeyd edilir. İSO-ya üzv ölkələrdən başqa Beynəlxalq Elektrotexniki Komissiya (İEC), Beynəlxalq Telekommunikasiya Birliyi (İTU) və digər təşkilatlar da bu əlamətdar günün qeyd edilməsinə xüsusi önəm verirlər.Standartlaşdırma, Metrologiya və Patent üzrə Dövlət Komitəsindən Azərtac-a bildirilib ki, iqtisadiyyatın inkişafında standartlaşdırmanın rolu ildən-ilə artmaqdadır. Standartlaşdırmanın əsas məqsədləri istehsalın effektivliyinin artırılması, istehlakçılara çatdırılan mal, məhsul və xidmətlərin keyfiyyətinin yüksəldilməsi, insan sağlamlığının qorunması istiqamətində təhlükəsizlik normalarının daha da təkmilləşdirilməsi, ətraf mühitin qorunması, Ümumdünya Ticarət Təşkilatına üzvlük çərçivəsində tələblərdən biri olan Ticarətdə Texniki Maneələrin aradan qaldırılmasına yardımçı olan standartların yaradılmasından ibarətdir. xeber100.com

Sənaye zonaları yaradılacaq

Azərbaycanın regionlarında sənaye zonalarının yaradılması məqsədilə araşdırmalar davam etdirilir. Azərtac xəbər verir ki, bu barədə İqtisadiyyat Nazirliyinin kollegiya iclasında bildirilib. Diqqətə çatdırılıb ki, hazırda İqtisadiyyat Nazirliyi tərəfindən Ağstafa və Gəncədə yerli potensiala əsaslanan sənaye zonalarının yaradılması imkanları araşdırılır və işlər 3 ay ərzində yekunlaşdırılacaq.xeber100.com

Dünya birjalarında neftin qiyməti ucuzlaşıb

Dünya birjalarında neftin qiymətinin ucuzlaşması davam edir. Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,61 dollar ucuzlaşaraq 50,18 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,60 dollar azalaraq 51,81 dollar olub. Azərtac xəbər verir ki, “AzəriLayt” markalı neftin bir barrelinin qiyməti isə 0,67 dollar ucuzlaşaraq 52,21 dollar təşkil edib.xeber100.com