Bolqarıstana səfər edənlərə 3 günlük viza veriləcək

İyul ayının 1-dən etibarən Bakı-İstanbul-Sofiya, Bakı-İstanbul-Varna, Bakı-İstanbul-Burqas istiqamətində reyslər həyata keçirilir. Dövlət Avtomobil Nəqliyyatı Xidmətinin rəsmisi Şəfa Mehmanqızı "Apa-Economics"ə bildirib ki, bununla əlaqədar olaraq Bakı Beynəlxalq Avtovağzalı ilə Bolqarıstan səfirliyi arasında aparılan danışıqlara əsasən, vətəndaş aldığı gediş biletini səfirliyə təqdim etməklə, 3 gün ərzində Bolqarıstan vizası ala biləcək. Qeyd edək ki, reyslər həftənin 2-4-6-cı günləri həyata keçirilir. Biletin qiyməti 130 manatdır.xeber100.com

Azərbaycan nefti Ceyhan limanından dünya bazarına çıxarılıb

Bu ilin iyununda 2 milyon 143 min 253 ton Azərbaycan nefti Ceyhan limanından dünya bazarına çıxarılıb. SOCAR-ın mətbuat xidmətindən Azərtac-a bildirilib ki, bu həcmin 1 milyon 424 min 400 tonunu Azərbaycan Respublikası Dövlət Neft Fondunun nefti təşkil edib. Cari ilin yanvar-iyun aylarında Ceyhan limanından ixrac edilən neftin həcmi 14 milyon 774 min 660 ton olub. Ümumiyyətlə, Bakı–Tbilisi–Ceyhan əsas ixrac neft boru kəməri (BTC) istismara verilən gündən bu il iyulun 1-dək Ceyhan limanından 305 milyon 962 min 432 ton Azərbaycan nefti dünya bazarına yola salınıb.xeber100.com

“Farnborough Airshow–2016” çərçivəsində aparıcı aviatikinti şirkətləri ilə razılaşmalar əldə edilib

"Azərbaycan Hava Yolları" (AZAL) QSC-nin prezidenti Cahangir Əsgərovun rəhbərlik etdiyi Azərbaycan nümayəndə heyəti Böyük Britaniyada "Farnborough Airshow-2016" beynəlxalq aerokosmik salonunda iştirak edib. "Azərbaycan Hava Yolları" QSC-nin mətbuat xidmətindən Azərtac-a bildirilib ki, tədbir çərçivəsində Azərbaycan tərəfi "Boeing", "İlyuşin", "Antonov" və sair kimi böyük aviatikinti şirkətləri ilə danışıqlar aparıb. "Boeing" şirkətinin baş vitse-prezidenti Martin Benrott və korporasiyanın satış üzrə direktoru Serdar Gürz ilə görüşdə 2018-2020-ci illərdə 10 ədəd “Boeing 737 MAX” təyyarəsinin tədarükü məsələsi müzakirə olunub. Eyni zamanda, görüşdə sözügedən layihənin maliyyələşdirilməsi məsələsi müzakirə edilib. Həmin gün "Ukrayna aviatikinti şirkəti" Korporasiyasının şura rəhbəri Mixail Qvozdev və "Antonov" dövlət müəssisəsinin prezidenti Aleksandr Kotsyuba ilə Azərbaycanda “Аn-178” nəqliyyat təyyarələrinin istehsalı və texniki xidmət göstərilməsinin təşkili layihəsi üzrə danışıqların üçüncü mərhələsi keçirilib. Həmçinin "Azərbaycan Hava Yolları" QSC-nin prezidenti C.Əsgərov və "İlyuşin Finans Ko." şirkətinin baş direktoru Aleksandr Rubtsov arasında “МC-21” təyyarələrinin lizinqə verilməsi haqqında danışıqlar aparılıb. Qeyd edək ki, iyun ayında tərəflər 10 yeni “МС-21” orta magistral təyyarələrin lizinqə verilməsinə dair niyyət memorandumu imzalamışlar. Təyyarələrin tədarükü 2019-2020-ci illər üçün nəzərdə tutulub. Görüşdə dünyada ən böyük seriyalı yük təyyarəsi olan “Аn-124-100” (Ruslan) təyyarəsinin maliyyə lizinqinə verilməsi üzrə müqavilə imzalanıb. C.Əsgərov və Birləşmiş Aviatikinti Korporasiyasının (BAK) prezidenti Yuriy Slyusarın iştirakı ilə müqaviləni “Silk Way Holding”in prezidenti Zaur Axundov və "İlyuşin Finans Ko." şirkətinin baş direktoru Aleksandr Rubtsov imzalayıblar. "Аn-124-100” təyyarəsinin alınması Azərbaycan mülki aviasiyasının inkişafında yeni mərhələ olacaq, ölkəmizin dünya yük aviadaşımaları bazarında mövqelərini möhkəmləndirməyə və rəqabət üstünlüyünü artırmağa imkan verəcək. Son 10 il ərzində biz Heydər Əliyev Beynəlxalq Hava Limanını yük aviadaşımaları üzrə böyük nəqliyyat qovşağına çevirmişik. Bu gün Azərbaycanın mülki aviasiyası özünü Şərq və Qərbi birləşdirən Böyük İpək Yolu layihəsinin rəsmi aviadaşıyıcısı kimi tanıdıb. Biz sərnişin aviadaşımaları sahəsində də bu uğurları qazanmaq üçün bütün səyləri göstəririk", - deyə C.Əsgərov bildirib.xeber100.com

Bakcell şirkəti abunəçilərinə SMSRadar xidmətini təqdim edir

Azərbaycanın İlk Mobil Operatoru və Aparıcı Mobil İnternet Provayderi Bakcell şirkəti abunəçilərinə SMSRadar xidmətini təqdim edir. Aylıq abunə haqqı cəmi 1 AZN olan bu xidmət sayəsində abunəçilər yol hərəkəti qaydalarını pozduqda qayda pozuntusunun vaxtı və cərimə haqqında ətraflı məlumat qeyd olunan SMS alacaqlar. SMSRadar adlı bu innovativ xidmətdən faydalanmaq üçün istənilən tarifdən istifadə edən Bakcell abunəçisi idarə etdiyi nəqliyyat vasitəsinin nömrəsini (misal: 00-XX-000) SMS vasitəsilə 5666 qısa nömrəsinə yollamalıdır. “Abunəçilərimizin rahatlığının və yollarda təhlükəsizliyin təmin olunması məqsədilə istifadəyə verdiyimiz bu xidmət avtomobil idarə edənlər üçün çox faydalı olacaq. Hər kəsi yol hərəkəti qaydalarına riayət etməyə və yol hərəkətinin bütün iştirakçılarına hörmətlə yanaşmağa çağırırıq”,-deyə Bakcell şirkətinin baş marketinq və satış direktoru cənab Fedja Hadziç bildirib. Sürət həddini aşmış nəqliyyat vasitəsi barədə məlumat abunəçilərə dərhal, yol hərəkəti qaydalarının digər pozuntuları barədə məlumat isə müvafiq sistemdə qeyd olnandan sonra göndərilir.xeber100.com .

Mərkəzi Bank manatın bu günə olan rəsmi məzənnəsini açıqlayıb

Azərbaycan Mərkəzi Bankı (AMB) manatın bu günə olan rəsmi məzənnəsini açıqlayıb. AMB-dən "APA-Economics"ə verilən məlumata görə, ABŞ-ın milli valyutası olan dolların manata qarşı məzənnəsi iyul ayının 11-i ilə müqayisədə 0,2% artaraq 1,5518 manat təşkil edib. Avro da manata nisbətən bahalaşıb. Avrozonanın vahid valyutası manata nisbətən 0,5% möhkəmlənərək 1,7191 manat olub. Əsas ticarət tərəfdaşlarımızdan biri olan Rusiyanın milli valyutası rubl manata nisbətən 0,4% möhkəmlənərək 0,0242 manat səviyyəsində qalıb. Türkiyə lirəsi manata nisbətən bahalaşıb. Belə ki, qardaş ölkənin milli valyutası 0,2% zəifləyərək 0,5346 manata enib. Rəsmi məzənnəyə əsasən, 1 ingilis funt sterlinqi 2,0284 manatdır. Beləliklə, funt sterlinq manata qarşı 1,1%-lik bahalaşma nümayiş etdirib. Gürcüstan larisinin məzənnəsi isə 0,3% artaraq 0,6617 manata düşüb.xeber100.com

Azərbaycan-BMT Tərəfdaşlıq Çərçivə sənədinin imzalanması mərasimi baş tutub

Bu gün Bakıda Azərbaycan-BMT Tərəfdaşlıq Çərçivə sənədinin imzalanması mərasimi baş tutub. "Apa-Economics" xəbər verir ki, sənədi Azərbaycanın iqtisadiyyat naziri Şahin Mustafayev və BMT-nin rezident əlaqələndiricisi Qulam İshaqzai imzalayıb. Tərəfdaşlıq Çərçivə sənədi "Azərbaycan-2020: Gələcəyə baxış" konsepsiyası çərçivəsində nəzərdə tutulan milli məqsədlərə müvafiq olaraq 2016-2020-ci il müddətinə imzalanıb. Sənədin əsasını 2030-cu il üçün davamlı inkişaf gündəliyi təşkil edəcək və bununla da davamlı inkişaf məqsədləri təsbit olunacaq. Ş. Mustafayev qeyd edib ki, sənəd hazırlanarkən milli və beynəlxalq tərəfdaşlar, elm və ictimaiyyət nümayəndələri ilə sıx əməkdaşlıq qurularaq strateji sahələrin müəyyənləşdirilməsi üzrə müzakirələr keçirilib. "Çərçivə sənədi aşağıdakı iqtisadiyyatın şaxələndirilməsi, layiqli əməyi özündə ehtiva edən dayanıqlı iqtisadi inkişafın təşviqi, institusional potensialın gücləndirilməsi, səmərəli ictimai və sosial xidmətlər, ətraf mühitin idarə edilməsinin təkmilləşdirilməsi, risk və təbii fəlakətlərə qarşı dayanıqlılığın artırılması kimi strateji fəaliyyət sahələrini əhatə edir. Konsepsiyada müasir çağırışlara cavab olaraq qeyri-neft sektorunun daha sürətli inkişafına nail olmaq, iqtisadi səmərəliliyin və rəqabətqabiliyyətliliyinin artırılması vəzifələri məqsəd kimi qoyulub", - deyə nazir qeyd edib. M. İshaqzainin sözlərinə görə, imzalanan sənəd təxminən 2 il ərzində Azərbaycan hökuməti və BMT sistemində təmsil olunan qurumlar arasında aparılan sıx məsləhətləşmələr və müzakirələrin nəticəsidir: "Tərəfdaşlıq sənədinin əsas məqsədi milli inkişaf gündəliyinə dəstək verməkdən ibarətdir. Bu sənəd Azərbaycan üçün çox taleyüklü zamanda imzalanır. Çünki hal-hazırda Azərbaycan hökuməti iqtisadi islahatlar və şaxələndirmə üçün müvafiq yol xəritəsi hazırlayır. BMT Azərbaycanın yanındadır və bu proseslərin həyata keçirilməsində öz töhfəmizi verməyə hazırıq".xeber100.com

11 min 968 yeni abonent qeydiyyata alınıb

İyunda “Azəriqaz” İstehsalat Birliyində (İB) əhali sektoru üzrə 11 min 968 yeni abonent qeydiyyata alınıb ki, bunun da 1551-i Bakı və Sumqayıt şəhərlərinin, eləcə də Abşeron rayonunun, 10 min 417-si isə regionların payına düşüb. Beləliklə də, ölkə üzrə təbii qazla təmin olunan abonentlərin sayı 1 milyon 918 min 710-a çatıb. SOCAR-ın mətbuat xidmətindən Azərtac-a bildirilib ki, iyulun 1-nə olan məlumata görə, əhali sektoru üzrə 130 min 964 məcburi köçkün ailəsi dövlət tərəfindən ayrılmış limitə uyğun olaraq təbii qazla təmin edilib. Bundan əlavə, 362 məscid və dini məbədə təbii qazdan əvəzsiz istifadəsi üçün limit ayrılıb.xeber100.com

Amerika fond bazarında əsas səhmlər bahalaşıb

Amerika fond bazarında Dow Jones indeksi 1,40% - 18 146,74 bəndədək, S&P 500 1,53% - 2 129,90 bəndədək, NASDAQ 1,64% - 4 956,76 bəndədək artıb. "APA-Economics" xəbər verir ki, Avropa fond bazarlarında FTSE 100 indeksi 0,87% - 6 590,64 bəndədək, Almaniya DAX-ı 2,24% - 9 629,66 bəndədək, Fransa CAC-40-ı 1,77% - 4 190,68 bəndədək bahalaşıb. COMEX-də sonuncu hərraclarda qızılın unsiyası 3,70 dollar azalaraq 1 358,40 dollara, gümüş isə 0,51 dollar bahalaşaraq 20,35 dollara satılıb.xeber100.com

“ASAN xidmət” mərkəzlərinə 6213 müraciət daxil olub

İyunda Bakıdakı 1, 2, 3, 4 və 5 saylı, eləcə də Bərdə, Sabirabad rayonlarındakı və Gəncə şəhərindəki “ASAN xidmət” mərkəzlərinə “Azəriqaz” İstehsalat Birliyi (İB) ilə bağlı ümumilikdə 6213 müraciət daxil olub. SOCAR-ın mətbuat xidmətindən Azərtac-a bildirilib ki, əsasən “smart” tipli qaz sayğacları ilə təchiz olunmuş istehlakçılara xidmətlərin göstərilməsi, “Azəriqaz” İB-nin müvafiq strukturlarından tələb olunan məlumatların alınması, həmçinin qazlaşdırma ilə bağlı texniki şərtlərin verilməsi barədə edilmiş müraciətlərin hamısı həllini tapıb. İstehlakçılarla münasibətlərin təkmilləşdirilməsi, göstərilən xidmətin keyfiyyətinin yüksəldilməsi məqsədilə “Azəriqaz” bu istiqamətdə fəaliyyətini bundan sonra da davam etdirəcək.xeber100.com

AMB vəsaitlərin cəlb edilməsi üzrə üçüncü dəfə depozit hərracı keçirəcək

Azərbaycan Mərkəzi Bankı (AMB) vəsaitlərin cəlb edilməsi üzrə üçüncü dəfə depozit hərracı keçirəcək. "Apa-Economics" xəbər verir ki, iyulun 11-də keçiriləcək dolayı depozit hərracında 50 mln. manat məbləğində vəsaitin cəlbi nəzərdə tutulur. Depozit hərracının müddəti 30 gün təşkil edir. "Bloomberg" ticarət platformasında keçiriləcək hərrac üzrə faiz dərəcələri 4,01%-6,99% təşkil edir.xeber100.com