İçməli suyun verilməsində məhdudiyyətlər olacaq

Magistral su xəttində baş vermiş qəza ilə əlaqədar oktyabrın 10-da gün ərzində Xətai rayonunun Lütfi-zadə (keçmiş Telnov), Əliağa Şıxlinski, Səmədbəy Mehmandarov, İnqilab İsmayılov, Nəsrəddin Tusi küçələrinə, Gəncə prospekti və Seyid Əzim Şirvani küçəsinin bir hissəsinə içməli suyun verilməsində məhdudiyyət olacaq.Bu barədə Azərtac-a “Azərsu” ASC-dən bildirilib.xeber100.com

Metro stansiyaların sayının 25-dən 51-ə çatdırılması planlaşdırılıb

Metro nəqliyyatı sistemi Bakı şəhərinin ictimai nəqliyyat sistemində aparıcı rol oynamaqda davam edəcək və aqlomerasiyanın ən sıx məskunlaşmış əraziləri ilə mərkəz ərazilər arasında əsas ictimai nəqliyyat əlaqəsini təmin edəcək.Azərtac xəbər verir ki, bu barədə ictimaiyyətə təqdim olunan Bakı şəhərinin Baş planının layihəsində deyilir.Bildirilir ki, “28 May” stansiyası metro şəbəkəsinin mühüm əhəmiyyətə malik mərkəzi qovşağı olaraq qalacaq.2027-ci ilədək “28 May”-“Cəfər Cabbarlı” keçid stansiyasında yaşıl və qırmızı xətlərinin bir-birindən ayrılması və yeni dəstəkləyici infrastrukturun yaradılması planlaşdırılır.2040-cı ilədək metro xətləri şəbəkəsinin ümumi uzunluğunun hazırkı 36,7 kilometrdən 76,2 kilometrə, stansiyaların sayının isə 25-dən 51-ə çatdırılması nəzərdə tutulur.xeber100.com

Beynəlxalq Aeroporta dəmir yolu xətti çəkiləcək

2027-ci ilin sonunadək Abşeron yarımadasında 20 dəmir yolu sərnişin stansiyasının yenidən qurulması, aktivləşdirilməsi və ya inşası, o cümlədən Biləcəri stansiyası ilə Bakı Dəmir Yolu Vağzalı arasında “Şimal-Cənub” istiqamətindəki dəhlizboyu 4 yeni stansiyanın tikintisi nəzərdə tutulur.Azərtac xəbər verir ki, bu barədə ictimaiyyətə təqdim olunan Bakı şəhərinin Baş planının layihəsində deyilir.Sənədə görə, Lökbatan qəsəbəsindən keçən dəmir yolu infrastrukturunun yenidən qurulması və sərnişin stansiyası kimi xidmət göstərməsi, Lökbatandan Bakı Dəmir Yolu Vağzalına müntəzəm şəhərətrafı dəmir yolu reyslərinin açılması planlaşdırılır.Bakıxanov stansiyasından Zirəyə doğru uzanan və Bülbülə, Əmircan, Suraxanı, Yeni Suraxanı, Binə, Qala, Dübəndi və Zirədə yenidən qurulacaq 8 stansiyadan ibarət xəttin bərpası, habelə “Qaradağ-Güzdək”, “Zabrat-Maştağa-Zağulba” dəmir yolu dəhlizlərinin və Qaradağ rayonu ərazisində 2 yeni dayanacaq məntəqəsinin yaradılması nəzərdə tutulur.Bunlarla yanaşı, Heydər Əliyev Beynəlxalq Aeroportuna yeni dəmir yolunun çəkilməsi, Heydər Əliyev Beynəlxalq Aeroportundan Yeni Suraxanı və Binə qəsəbələrinə doğru uzanan yeni dəmir yolu xəttinin inşası, o cümlədən Hövsan dəmir yolu stansiyasının fəaliyyətinin bərpası planlaşdırılır.Şəhər mərkəzinin yarımadanın şimal istiqaməti ilə birbaşa dəmir yolu bağlantısının təmin edilməsi və dəmir yolu nəqliyyatının əhatə dairəsinin genişləndirilməsi məqsədilə 2040-cı ilədək yeni “Binəqədi-Mehdiabad-Fatmayı-Pirşağı” dəmir yolu dəhlizinin yaradılması nəzərdə tutulur.2040-cı ilədək Abşeron yarımadası üzrə dəmir yolu şəbəkəsinin ümumi uzunluğunun 198 kilometrdən 280 kilometrə, stansiyaların sayının isə 26-dan 55-ə çatdırılması planlaşdırılır.Hazırda şəhər ərazisində bir sıra istifadə olunmayan dəmir yolu təhkim zolağı və istifadə olunmayan yük xətləri var. Qeyd olunan mövcud infrastruktur yenidən aktivləşdirilə və “tramvay-elektrik qatarı” sisteminin tətbiqində bu infrastruktur imkanlarından istifadə oluna bilər.xeber100.com

“Azeri Light” markalı neftin qiyməti 0,90 dollar ucuzlaşıb

Azərbaycan neftinin qiyməti ucuzlaşıb.Azərtac xəbər verir ki, “Azeri Light” markalı neftin bir barrelinin qiyməti 0,90 dollar ucuzlaşaraq 40,58 dollar təşkil edib.Qeyd edək ki, Azərbaycan neftinin bir barrelinin qiyməti bu il aprelin 21-də minimuma enərək 15,81 dollar, 2008-ci ilin iyulunda isə maksimuma yüksələrək 149,66 dollar olub.xeber100.com

XXIII Avrasiya İqtisadi Zirvə görüşü başlayıb

Oktyabrın 7-də İstanbulda öz işinə başlayan XXIII Avrasiya İqtisadi Zirvə görüşü Azərbaycan Prezidenti İlham Əliyevin türk millətinə mesajının oxunması ilə açıq elan edilib.Azərtac xəbər verir ki, Türkiyədə fəaliyyət göstərən “Mərmərə Qrupu” Strateji və Sosial Araşdırmalar Vəqfi tərəfindən təşkil olunan toplantı onlayn formatda baş tutub.Dünyanın 45 ölkəsinin qatıldığı görüşdə açılış nitqi ilə çıxış edən “Mərmərə Qrupu” Strateji və Sosial Araşdırmalar Vəqfinin rəhbəri Akkan Suver Türkiyənin Aralıq dənizindəki haqları, işğalçı Ermənistan tərəfindən son günlər törədilən təxribatlar və qanuna zidd hərəkətlər, dünyanın qloballaşmaya olan ehtiyacı barədə danışıb.Bu ilin əvvəlindən bütün dünyanı öz təsiri altına salan pandemiya ilə birgə mübarizənin vacibliyini vurğulayan A.Suver bu məqsədlə builki zirvə görüşünün bir sülh və rifah layihəsi olan “Kəmər və Yol Təşəbbüsünün işığında” şüarı altında keçirildiyini deyib.Zirvə görüşünün üç hissədən ibarət birinci günündə Azərbaycanın Energetika naziri Pərviz Şahbazov, nazir müavini Elnur Soltanov, Türkiyənin Xarici İşlər nazirinin müavini Yavuz Selim Kıran, İstanbulun Avcılar Bələdiyyəsinin sədri Turan Hançerli, “SOCAR Turkey Enerji A.Ş.”nin (STEAŞ) xarici əlaqələr üzrə departamentinin rəhbəri Murat Lekompte, İstanbul Hazır Geyim və Geyim İxracatçıları Birliyinin (İHKİB) sədri Mustafa Gültepe, Türkiyə İxracatçılar Məclisinin rəhbəri İsmail Gülle, İstanbul Tarix Sənət və Mədəniyyət Araşdırma Mərkəzinin (İRCİCA) Baş direktoru, professor Halid Eren, TÜRKSOY-un Baş katibi professor Asəf Hacıyev, Türkiyə və Avropada Təhlükəsizlik və Əməkdaşlıq Təşkilatının (AGİT) rəhbəri George Tsereteli və İstanbul Valisi Ali Yerlikaya, eləcə də Türkmənistan, Bolqarıstan, İtaliya, Monqolustan, Avstriya, Albaniya, Belçika, Qırğızıstan, Rumıniya, Özbəkistan, Çin və digər dövlətlərin hökumət nümayəndələri çıxış ediblər.Tədbirdə COVID-19 peyvəndinin hazırlanması istiqamətində görülən işlərdən bəhs edilib, “Türk Hava Yolları” və “SOCAR”-ın tanıtım filmləri nümayiş olunub.Tədbir oktyabrın 8-də davam edəcək.xeber100.com

“Azərbaycan Hava Yolları” QSC-nin məlumatı

Ermənistan silahlı qüvvələri son günlər ərzində uzaqməsafəli təsir radiuslu raketlər tətbiq etməklə Azərbaycanın ərazisini intensiv atəşə tutmaqda davam edir ki, bu da Azərbaycanın hava məkanından keçməklə beynəlxalq uçuşlar həyata keçirən mülki hava gəmiləri üçün ciddi təhlükə yaradır.“Azərbaycan Hava Yolları” QSC-nin (AZAL) mətbuat xidmətindən Azərtac-a bildirilib ki, Ermənistanın mülki obyektlərə hücumu beynəlxalq humanitar hüquq normalarını, xüsusilə, Cenevrə Konvensiyasının müddəalarını kobud şəkildə pozur. Bu hücumlar Ermənistan tərəfindən dövlət səviyyəsində terror aktlarının həyata keçirildiyini bir daha təsdiq edir.“Azərbaycan Hava Yolları” QSC-nin məlumatında bildirilir: “Ermənistan tərəfinin qanunsuz hərəkətləri bizi ciddi narahat edir, bütün dünya ictimaiyyətini Ermənistanı bütün beynəlxalq qayda və normalara zidd olan bu cür addımlardan çəkindirməsinə çağırırıq”.xeber100.com

Mərkəzi Bank USD/AZN rəsmi məzənnəsini açıqlayıb

Azərbaycan Mərkəzi Bankı (AMB) oktyabrın 6-na olan USD/AZN rəsmi məzənnəsini açıqlayıb.AMB-dən Azərtac-a bildirilib ki, bankın oktyabrın 6-dan etibarən USD/AZN rəsmi məzənnəsi 1,7000 manat səviyyəsində müəyyən olunub.xeber100.com

“Hər şey Vətən üçün” aksiyası çərçivəsində…

“Hər şey Vətən üçün” aksiyası çərçivəsində təkər dolu növbəti yük avtomobil karvanı cəbhə bölgəsinə yola salınıb.Bakı Nəqliyyat Agentliyindən Azərtac-a bildirilib ki, bu dəfə 23 yük avtomobili ilə 16 mindən çox təkər göndərilib. “Hər şey Vətən üçün” aksiyasına “Təmiz Şəhər” ASC də qoşulub. Belə ki, yola salınan təkərlərin 10 mini Balaxanı poliqonundan toplanıb.Xatırladaq ki, iyul ayından düşmənin Tovuz rayonu istiqamətində törətdiyi təxribatlardan sonra Bakı Nəqliyyat Agentliyi Müdafiə Nazirliyi ilə birgə “Hər şey Vətən üçün” aksiyasına başlayıb. Ötən müddətdə cəbhəyə 83 yük avtomobili ilə 42 min 500-dən çox təkər göndərilib.xeber100.com

“Azərenerji” Açıq Səhmdar Cəmiyyətindən

Müzəffər Azərbaycan Ordusunun ərazi bütövlüyümüz uğrunda həyata keçirdiyi hərbi əməliyyatlara dəstək olaraq başlanan kampaniyada “Azərenerji” Açıq Səhmdar Cəmiyyəti (ASC) də fəal iştirak edir.ASC-dən Azərtac-a bildirilib ki, səhmdar cəmiyyətin rəhbərliyi və məsul vəzifələrdə çalışan şəxslər bir aylıq məvaciblərini Silahlı Qüvvələrə Yardım Fonduna ianə ediblər. Bundan əlavə ASC cəbhəyə yardım karvanı aparıb. Eyni zamanda, cəbhə bölgəsində gedən döyüşlərdə baş verən qəzaların aradan qaldırılmasında da ASC imkanlarını səfərbər edib.Qeyd edək ki, “Azərenerji” ASC-nin 103 əməkdaşı səfərbər olaraq döyüşlərə qatılıb. ASC-nin kollektivi Azərbaycan xalqına qələbə sevinci yaşatmaq əzmində olan Silahlı Qüvvələrimizlə qürur duyduqlarını bildiriblər.xeber100.com

Azərbaycan Mikromaliyyə Assosiasiyasının bəyanatı

Azərbaycan Mikromaliyyə Assosiasiyasının (AMFA) üzv təşkilatları bəyanat yayıb.AMFA-dan Azərtac-a bildirilib ki, Ermənistanın Azərbaycana qarşı sentyabrın 27-də səhər saatlarından başlayan növbəti təcavüz aktı mənfur düşmənin öz işğalçı siyasətindən əl çəkmədiyini bir daha ortaya qoyub. Ermənistan silahlı qüvvələrinin bölmələri bir neçə istiqamətdən müxtəlif silahlardan, o cümlədən ağır artilleriyadan istifadə edərək dinc sakinləri, yaşayış məntəqələrini və mülki obyektləri, eləcə də hərbi mövqelərimizi atəşə tutublar. Düşmənin təxribatları nəticəsində mülki əhali və hərbçilərimiz arasında itki və yaralıların da olması Azərbaycan Mikromaliyyə Assosiasiyasının üzv təşkilatlarını sarsıdıb. Azərbaycanın Silahlı Qüvvələri düşmən təxribatının qarşısını alıb və əks-hücumla torpaqlarımızın azad edilməsi uğrunda əməliyyatlara başlayıb.Biz, ictimai birlik olaraq, dövlətimizin, Ordumuzun və Ali Baş Komandanın yanında olduğumuzu, dövlətimizin yürütdüyü siyasəti tam dəstəklədiyimizi bir daha bəyan edirik. Şanlı Ordumuzun işğal altında olan torpaqlarımızı azad etmək istiqamətində irəliləyişləri hər bir üzvümüzü sevindirir və qürurlandırır. İnanırıq ki, 30 ilə yaxın bir müddətdə Ermənistanın işğalı altında olan Azərbaycan torpaqlarının azad ediləcəyi gün uzaqda deyil.Ordumuza şanlı zəfər, xalqımıza qələbə sevinci arzulayırıq!Hər şey Vətən üçün, hər şey Qələbə üçün!xeber100.com