Azərbaycan Mikromaliyyə Assosiasiyasının bəyanatı

Azərbaycan Mikromaliyyə Assosiasiyasının (AMFA) üzv təşkilatları bəyanat yayıb.AMFA-dan Azərtac-a bildirilib ki, Ermənistanın Azərbaycana qarşı sentyabrın 27-də səhər saatlarından başlayan növbəti təcavüz aktı mənfur düşmənin öz işğalçı siyasətindən əl çəkmədiyini bir daha ortaya qoyub. Ermənistan silahlı qüvvələrinin bölmələri bir neçə istiqamətdən müxtəlif silahlardan, o cümlədən ağır artilleriyadan istifadə edərək dinc sakinləri, yaşayış məntəqələrini və mülki obyektləri, eləcə də hərbi mövqelərimizi atəşə tutublar. Düşmənin təxribatları nəticəsində mülki əhali və hərbçilərimiz arasında itki və yaralıların da olması Azərbaycan Mikromaliyyə Assosiasiyasının üzv təşkilatlarını sarsıdıb. Azərbaycanın Silahlı Qüvvələri düşmən təxribatının qarşısını alıb və əks-hücumla torpaqlarımızın azad edilməsi uğrunda əməliyyatlara başlayıb.Biz, ictimai birlik olaraq, dövlətimizin, Ordumuzun və Ali Baş Komandanın yanında olduğumuzu, dövlətimizin yürütdüyü siyasəti tam dəstəklədiyimizi bir daha bəyan edirik. Şanlı Ordumuzun işğal altında olan torpaqlarımızı azad etmək istiqamətində irəliləyişləri hər bir üzvümüzü sevindirir və qürurlandırır. İnanırıq ki, 30 ilə yaxın bir müddətdə Ermənistanın işğalı altında olan Azərbaycan torpaqlarının azad ediləcəyi gün uzaqda deyil.Ordumuza şanlı zəfər, xalqımıza qələbə sevinci arzulayırıq!Hər şey Vətən üçün, hər şey Qələbə üçün!xeber100.com

“Brent” markalı neftin bir barrelinin qiyməti 0,18 dollar azalıb

Dünya birjalarında neft qiymətləri ucuzlaşır.Azərtac xəbər verir ki, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,18 dollar geriləyərək 42,25 dollar, Nyu-Yorkun NYMEX (“New York Mercantile Exchange”) birjasında “Light” markalı neftin bir barrelinin qiyməti isə 0,23 dollar ucuzlaşaraq 40,37 dollar olub.xeber100.com

Azərbaycan ərazisində hərbi vəziyyətin elan edilməsi ilə əlaqədar…

Azərbaycan ərazisində hərbi vəziyyətin elan edilməsi ilə əlaqədar Heydər Əliyev Beynəlxalq Aeroportu müvəqqəti olaraq məhdud iş rejiminə keçir.Heydər Əliyev Beynəlxalq Aeroportunun mətbuat xidmətindən Azərtac-a bildirilib ki, bununla əlaqədar, "Azərbaycan Hava Yolları"nın Bakı-Naxçıvan-Bakı istiqamətində sentyabrın 30-dək (30 sentyabr daxil olmaqla) nəzərdə tutulmuş bütün reysləri dayandırılıb.Eyni zamanda, AZAL aviaşirkətinin oktyabrın 1-nə nəzərdə tutulmuş Bakı-London-Bakı, həmçinin oktyabrın 2-si tarixinə nəzərdə tutulmuş Bakı-Berlin-Bakı istiqamətində aviareysləri ləğv edilib.AZAL aviaşirkətinin ləğv edilmiş reyslərinin sərnişinləri aviabiletlərini cərimə ödənilmədən digər tarixlərə dəyişə və ya ödənilmiş vəsaiti geri ala bilərlər.Bundan əlavə, “Fly Dubai” aviaşirkəti sentyabrın 29-u, oktyabrın 1-i və 3-ü nəzərdə tutulmuş Dubay-Bakı-Dubay istiqamətində reyslərini, "Aeroflot" aviaşirkəti oktyabrın 1-i və 4-ü tarixinə nəzərdə tutulmuş Moskva-Bakı-Moskva istiqamətində aviareyslərini və "Belavia" aviaşirkəti oktyabrın 2-si və 4-ü tarixlərinə nəzərdə tutulmuş Minsk-Bakı-Minsk istiqamətində aviareyslərini ləğv edib.Qeyd olunan ləğv edilmiş reyslərin sərnişinləri əlavə məlumat üçün adıçəkilən aviaşirkətlərə müraciət edə bilərlər.xeber100.com

Avtobusların hərəkəti saat 06:00-dan 20:00-dək təşkil ediləcək

Azərbaycan ərazisində hərbi vəziyyətin elan olunması ilə əlaqədar şəhərlərarası avtobusların hərəkəti bu gündən etibarən saat 06:00-dan 20:00-dək təşkil ediləcək.Dövlət Avtomobil Nəqliyyatı Xidmətindən (DANX) Azərtac-a bildirilib ki, bu, həm regionlar, həm də Bakı-Sumqayıt istiqamətində hərəkət edən avtobuslara aiddir. Səbəb isə ondan ibarətdir ki, ictimai nəqliyyat sürücülərinin idarə etdikləri avtobusları qaraja qoyduqdan sonra evlərinə qayıtmaları üçün vaxt tələb olunur.xeber100.com

Avtonəqliyyat vasitələrinin hərəkəti məhdudlaşdırılacaq

Paytaxtın bu ərazisində avtonəqliyyat vasitələrinin hərəkəti məhdudlaşdırılacaq.Azərbaycan Avtomobil Yolları Dövlət Agentliyinin (AAYDA) İctimaiyyətlə əlaqələr şöbəsindən Azərtac-a bildirilib ki, aparılan təmir işləri ilə əlaqədar Biləcəri-Binəqədi yolunun Binəqədi şosesinə birləşən hissəsində sentyabrın 26-sı və 27-si hərəkət qismən məhdudlaşdırılacaq.Sürücülərə sözügedən ərazidə sıxlıq yaranmasın deyə öncədən hərəkət istiqamətlərinə uyğun alternativ yollardan istifadə etmələri tövsiyə olunur.xeber100.com

Dövlət Statistika Komitəsinin məlumatı əsasında…

Bu ilin yanvar-avqust aylarında ölkədə 15 min 575,1 ton kolbasa məmulatları istehsal olunub.Dövlət Statistika Komitəsindən Azərtac-a bildirilib ki, ötən ilin eyni dövrü ilə müqayisədə kolbasa məmulatlarının istehsalı 10 min 383,4 ton artıb. Sentyabrın 1-nə hazır məhsul ehtiyatı 18,7 ton təşkil edib.xeber100.com

“Azəriqaz” İstehsalat Birliyinin məlumatı əsasında…

Təbii qaza görə borcu olan istixana sahiblərinin ödənişlərində irəliləyişlər hiss olunmaqdadır.“Azəriqaz” İstehsalat Birliyindən Azərtac-a bildirilib ki, cari il üzrə istixana fəaliyyəti ilə məşğul olan sahibkarlar üçün növbəti isitmə mövsümünün yaxınlaşmasına az müddət qalır. Bu ərəfədə borclu istixana sahiblərinin ödənişlərində irəliləyişlər hiss olunmaqdadır. Hazırda Bakı Regional Qaz İstismarı Departamentinin xidməti ərazisində fəaliyyət göstərən 227 istixana sahibkarlıq subyektinin istifadə edilən qaza görə ödənişləri 92,3 faiz təşkil edir. Şəmkir Regional Qaz İstismarı İdarəsinin xidməti ərazisində fəaliyyət göstərən 210 istixana sahibkarlıq subyektinin ödənişləri 67,1 faizdir. Salyan Regional Qaz İstismarı İdarəsinin xidməti ərazisində fəaliyyət göstərən 254 istixana sahibkarlıq subyektinin ödənişləri 89,6 faiz təşkil edir. Ümumilikdə, respublika üzrə istixana sahəsində fəaliyyət göstərən sahibkarların ödənişləri 85,1 faizə bərabərdir.Qeyd edək ki, pandemiya dövründə yaranmış borcun hissə-hissə ödənilməsi üçün bəzi sahibkarlar tərəfindən “Azəriqaz” İstehsalat Birliyinə müraciətlər daxil olmaqdadır. Ölkədə sahibkarlığın inkişafına göstərilən diqqətə dəstək olaraq birlik də bu kimi məsələlərin qarşılıqlı şəkildə həllinə önəm verir. Belə ki, borclu istixana sahibləri ilə debitor borcun ödənilməsi haqqında “Razılaşma protokolu” tərtib olunaraq cari istehlakla bərabər ötən isitmə mövsümü ərzində yaranmış borcun hissə-hissə ödənilməsinə mümkün şərait yaradılır. Bu kimi qarşılıqlı anlaşma üçün müraciət edən sahibkarlara Bakı şəhəri üzrə "Rəvan-Turan" MMC, "AS AQRO CO" MMC və sair, Şəmkir bölgəsi üzrə sahibkarlar Ələkbərov Dilqəm, Əliyev Hafiz, Musayeva Nigar, Quliyeva Aida və başqalarını, Salyan bölgəsi üzrə Dostəliyev Natiq və Əliyev Səxavəti göstərmək olar.xeber100.com

Bakı Fond Birjasında hərrac keçiriləcək

Sentyabrın 29-da Bakı Fond Birjasında (BFB) Maliyyə Nazirliyinin dövlət qısamüddətli istiqrazları üzrə hərrac keçiriləcək.BFB-dən Azərtac-a bildirilib ki, diskontlu, qısamüddətli dövlət istiqrazlarının həcmi 30 milyon AZN, nominal dəyəri 100 AZN, tədavül müddəti 364 gündür. İstiqrazlar 2021-ci il sentyabrın 28-də ödəniləcək. “PAŞA Kapital İŞ” QSC anderrayter vəzifəsində çıxış edir.Hərrac zamanı qeyri-rəqabətli sifarişlərin istiqrazların buraxılışının 20 faizdən çox olmamaq şərtilə qəbul edilməsinə icazə verilir. Hərracda iştirak etməkdə maraqlı şəxslər birja üzvü olan investisiya şirkətlərinə müraciət edə bilərlər.xeber100.com

Dövlət Statistika Komitəsinin məlumatı əsasında…

Cari ilin yanvar-avqust aylarında 64,7 milyon nəfər metrodan istifadə edib.Dövlət Statistika Komitəsindən Azərtac-a bildirilib ki, metro nəqliyyatının xidmətlərindən istifadə edən sərnişinlərin sayı 2019-cu ilin müvafiq dövrünə nisbətən 57 faiz azalıb.xeber100.com

Amerika Neft İnstitutunun məlumatı əsasında…

Birləşmiş Ştatların xam neft ehtiyatları azalır.Azərtac xəbər verir ki, bu barədə əsasən özəl sektorun maliyyələşdirdiyi Amerika Neft İnstitutu (API) məlumat yayıb. Bildirilir ki, ötən hesabat həftəsində ABŞ-ın xam neft ehtiyatları əvvəlki həftə ilə müqayisədə 9,52 milyon barrel azalıb. Bazar proqnozları isə ehtiyatların artacağı istiqamətində idi. Əvvəlki həftə neft ehtiyatları 3 milyon barrel artmışdı.Ölkədəki ehtiyatlarla bağlı rəsmi rəqəmlər ABŞ-ın Enerji İnformasiya Administrasiyası (EIA) tərəfindən açıqlanacaq.xeber100.com