“Muğam axşamları” layihəsinin ikinci mərhələsində

Beynəlxalq Muğam Mərkəzində “Muğam axşamları” layihəsinin ikinci mərhələsinin ilk konserti oktyabrın 11-də gerçəkləşəcək.Azərtac xəbər verir ki, konsert “Mahur-hindi” və “Bayatı-kürd” muğamlarına həsr olunacaq.Konsertdə respublikanın tanınmış xanəndələri Xalq Çalğı Alətləri Ansamblının müşayiəti ilə muğamın müxtəlif şöbələrini ifa etməklə yanaşı, bəstəkar mahnıları və təsniflərə də yer verəcəklər.Qeyd edək ki, icrasına cari ilin may ayında “Rast” muğamı ilə start verilmiş möhtəşəm layihənin növbəti konserti noyabrın 1-də “Orta mahur” və “Rahab” muğamlarının səslənməsi ilə davam edəcək.xeber100.com

“YARAT” Müasir İncəsənət Mərkəzində sərgi açılıb

“YARAT” Müasir İncəsənət Mərkəzinin “Artım” layihə məkanında “Sıfır” adlı sərgi açılıb.Azərtac xəbər verir ki, “ARTIM LAB” layihə çərçivəsində baş tutan sərgi rəssam Faiq Əhmədin rəhbərliyi altında keçirilən ustad dərslərinin nəticəsidir. Yaradıcılıq prosesində rəssamlar boşluq və bütövlük vəziyyətini əks etdirərək, bu vəziyyətləri dərindən dərk etməyə çalışıblar. Rəssamlar, eyni zamanda, öz fərdiyyətindən uzaqlaşmağa və öz mahiyyətlərinin anlaşılmasına yaxınlaşmağa cəhd göstəriblər.Ustad dərslərinin hər biri öz reallığında olan rəssam və seyrçinin gözləntiləri və münasibətləri çərçivəsində yaradıcılıq prosesini nəzərdən keçirir. Ustad dərsi insanı ekzistensial məsələlərə qaytarır, tədbir iştirakçıları üçün isə istehsal dövriyyəsindən qurtulmaq və onu qısa müddətə dayandırmaq, individualist mədəniyyətin təzyiqindən və incəsənət bazarının diktə etdiyi rəqabətədavamlılıq standartlarından imtina etmək cəhdi idi.“ARTIM LAB” layihəsi çərçivəsində keçirilən bu 24 saatlıq sərgi bir eksperimentdir və sənətkarın ən sadə və eyni zamanda, ən əzəmətli yolla cəmiyyətlə necə vəhdət qurmaq sualına cavab əldə etməkdir.xeber100.com

Musiqili Teatrda yubiley tədbiri keçirilib

Musiqili Teatrının aktyoru Boris Qrafkinin 80 illiyi yubileyi münasibətilə tədbir keçirilib.Teatrın mətbuat xidmətindən bildirilib ki, tədbirdə Əməkdar Artisti Svetlana Bulax sənətkarın həyat və yaradıcılığıdan danışıb, aktyorun ifa etdiyi rolların həmişə tamaşaçılar tərəfindən böyük sevgi ilə qarşılandığını vurğulayıb: “Artıq 58-ci mövsümdür ki, Boris Fyodoroviç teatrın səhnəsinə çıxır. Onun 80 yaşı var, bu, hər aktyora nəsib olan xoşbəxtlik deyil. Mən bütün kollektivimiz adından B.Qrafkini yubileyi münasibətilə təbrik edir, ona uzun ömür, can sağlığı, bundan sonra daha da gümrah olmağı arzulayıram”.Sonra Boris Qrafkinin iştirakı ilə macar bəstəkarı İmre Kalmanın məşhur “Silva” operettası təqdim edilib. Əməkdar Artist Boris Lukinskinin quruluşunda izlənilən tamaşada yubilyar əsas rollardan birini - Knyaz Volyapuk obrazını canlandırıb.Səhnə əsəri maraqla qarşılanıb.xeber100.com

“Muğam axşamları” layihəsi çərçivəsində

Beynəlxalq Muğam Mərkəzində “Muğam axşamları” layihəsi çərçivəsində konsert proqramları təqdim ediləcək.Muğam Mərkəzindən Azərtac-a bildirilib ki, layihənin ikinci mərhələsi oktyabrın 11-dən dekabrın 27-dək davam edəcək. Bu dəfə konsertlərdə “Mahur-hindi”, “Bayatı-Kürd”, “Orta Mahur”, “Rahab”, “Bayatı-Qacar”, “Şahnaz”, “Qatar”, “Dəşti”, “Mirzə Hüseyn Segahı”, “Xaric Segah” muğamları, habelə “Heyratı”, “Mənsuriyyə”, “Qarabağ şikəstəsi”, “Osmanlı”, “Heydəri”, “Simayi-Şəms”, “Ovşarı”, “Arazbarı” kimi zərb muğamları səslənəcək.Biletləri şəhərin kassalarından və iticket.az saytından eldə etmək olar.Tədbirin informasiya dəstəkçiləri sırasında Azərbaycan Dövlət İnformasiya Agentliyi da yer alır.Qeyd edək ki, layihənin birinci mərhələsində reallaşan konsert proqramlarında yeddi əsas muğam tanınmış xanəndələr tərəfindən səslənib.xeber100.com

“YARAT” Müasir İncəsənət Mərkəzinin təqdimatında

“YARAT” Müasir İncəsənət Mərkəzində rejissor Murad Əbiyevin “Dəniz suyu içən it” (The Salty Sea Dog) adlı qısametrajlı bədii filminin təqdimatı olub.Azərtac xəbər verir ki, cari ildə “Nərimanfilm” kinokompaniyasının bazası əsasında ekranlaşdırılan filmin süjet xətti qadın həyatında xəyanət və ağrı üzərində qurulub.Azərbaycan dilində nümayiş edilən film qonaqlar tərəfindən maraqla qarşılanıb.Qeyd edək ki, ekran əsəri “Calcutta İnternational Cul” film festivalında “Qadınlar haqqında film” kateqoriyasında avqust ayının ən yaxşı qısametrajlı filmi seçilib.xeber100.com

Avropa rəqsləri üzrə “Dünya çempionatı – 2017” keçiriləcək

Oktyabrın 28-də Rusiyanın Kreml Sarayında Avropa rəqsləri üzrə peşəkarlar arasında “Dünya çempionatı – 2017” keçiriləcək.Azərtac xəbər verir ki, dünya çempionatının təşkilatçısı Rusiyanın Əməkdar İncəsənət Xadimi, Rusiya Rəqs Birliyinin prezidenti, Dünya Rəqs Birliyinin (WDC) fəxri vitse-prezidenti Stanislav Popovdur.Ölkəmizi müsabiqədə Eldar Cəfərov və Anna Sajina təmsil edəcək.Qeyd edək ki, E.Cəfərov və A.Sajina 2005-ci ildən birlikdə rəqs edirlər. Cütlük elə həmin il ölkə çempionatında iştirak edib və qalib olub. Onlar bal rəqsləri, Latın Amerikası və 10 rəqs bölgüsü üzrə üçqat ölkə çempionudurlar. Həmçinin, rəqqaslar 2008-ci ilin sentyabr ayında keçirilmiş “Eurovison” rəqs müsabiqəsində ölkəmizi təmsil ediblər.xeber100.com

Beynəlxalq musiqi yarışmasına start verilib

Qazaxıstan televiziyasında “Silk Way Star” (“İpək yolunun ulduzları”) beynəlxalq musiqi yarışmasına start verilib. Layihənin ilk buraxılışında Böyük İpək yoluna daxil olan bir neçə ölkənin təmsilçisi çıxış edib.Azərtac Qazaxıstan telekanalına istinadla xəbər verir ki, layihənin məqsədi Böyük İpək yolunun birləşdirdiyi xalqların musiqisi vasitəsilə türkdilli ölkələrin mədəniyyət və ənənələrinin inkişafına kömək etməkdir. Qazaxıstan, Azərbaycan, Türkiyə, Qırğızıstan, Tacikistan, Özbəkistan, Gürcüstan, Tatarıstan və Başqırdıstandan olan müğənnilər üç ay ərzində yarışmada iştirak edəcəklər. İştirakçılar 12 müxtəlif konsert proqramı təqdim edəcəklər. Finalda ən istedadlı ifaçı və onun təmsil etdiyi ölkə qalib olacaq.xeber100.com

“Berlin-Bakı” qalereyasında sərgi açılacaq

Oktyabrın 15-də “Berlin-Bakı” qalereyasında “Azərbaycan Bolqarıstanla Berlində görüşür” adlı sərgi açılacaq.Azərtac qalereyanın saytına istinadla xəbər verir ki, sərgidə İbrahim Əhrari, Günay Şəmsi, Vəfa Rüstəmova, Anar Şəmsiyev, Antonia Duende, Nikolay İvanov, Dimitar Hinkov və Boriana Pertçinskanın əsərləri nümayiş etdiriləcək. Sərgi noyabrın 8-dək davam edəcək.“Berlin-Bakı” qalereyası Almaniya və Azərbaycan rəssamlarının, heykəltəraşlarının və digər incəsənət nümayəndələrinin əsərlərinin birgə sərgisinin təşkili və xalqlarımız arasında mədəni əlaqələri daha da genişləndirmək istiqamətində fəaliyyət göstərir. Qalereya müxtəlif ölkələrdən rəssamların, heykəltəraşların, fotoqrafların və perfomans təqdim edən sənətkarların üzünə açıqdır.xeber100.com

Opera və Balet Teatrının məlumatı

Oktyabrın 11-də Opera və Balet Teatrında Cüzeppe Verdinin “Traviata” operası nümayiş ediləcək.Teatrdan bildirilib ki, səhnə əsəri Azərbaycanın ilk qadın opera müğənnisi Şövkət Məmmədovanın anadan olmasının 120 illiyi çərçivəsində təqdim ediləcək.Qeyd edək ki, Milanda və Kiyevdə peşəkar musiqi təhsili almış Ş.Məmmədova uzun illər Opera və Balet Teatrının solisti olmaqla yanaşı, teatrın səhnəsində bir çox parlaq obrazlar - Nərgiz (“Nərgiz”), Gülzar (“Şah İsmayıl”), Şahsənəm (“Şahsənəm”), Cilda (“Riqoletto”), Violetta (“Traviata”), Rozina (“Sevilya bərbəri2) və digər onlarla yaddaqalan obrazlar qalereyası yaradıb.xeber100.com

“Turizm həftəsi” layihəsi çərçivəsində

Bakı şəhər Mədəniyyət və Turizm Baş İdarəsinin “Turizm həftəsi” layihəsi çərçivəsində “Ümid” uşaq sığınacağının sakinləri üçün 3D formatında çəkilmiş ABŞ istehsalı olan “Leqo Nindzyaqo” animasiya filmi nümayiş olunub.Azərtac xəbər verir ki, Nizami Kino Mərkəzində təqdim edilən ekran əsəri uşaqlar tərəfindən maraqla qarşılanıb.xeber100.com