“Arşın mal alan” operettası özbək dilində nümayiş etdirilib

Özbəkistandakı səfirliyimizin dəstəyi ilə Daşkənddəki "Kitab aləmi" Satış və İnformasiya Mərkəzində dahi bəstəkarımız Üzeyir Hacıbəylinin "Arşın mal alan" operettası özbək dilində nümayiş etdirilib. Operetta “Özbəkteatr” yaradıcılıq mərkəzi və Daşkənddəki "Diydor” teatr studiyası tərəfindən səhnələşdirilib. Tamaşanın rejissoru Baxadır Yuldaşevdir. Mərkəzin direktoru Şuxratcon Axundcanov Özbəkistanda Azərbaycan mədəniyyəti, incəsənəti, musiqisi və ədəbiyyatına böyük maraq olduğunu qeyd edib. Bildirib ki, məhz bu səbəbdən də həyata keçirdikləri layihəyə ilk dəfə məşhur “Arşın mal alan” əsəri ilə başlanılıb. O, gələcəkdə də Azərbaycan və özbək mədəniyyətinin təbliği ilə bağlı AMM ilə birgə layihələr həyata keçirəcəklərini söyləyib.xeber100.com

Uşaq musiqi festivalı keçiriləcək

Sentyabrın əvvəlində start verilən “Zima” adlı uşaq musiqi festivalına ərizələrin qəbulu başa çatıb. Mədəniyyət tədbirləri sırasında ən parlaq hadisəyə çevriləcək “Zima” adlı uşaq musiqi festivalının potensial iştirakçılarının canlı dinləmələr mərhələsinə start verilib. Oktyabrın 17-dən etibarən isə uşaqların festivala hərtərəfli hazırlığına başlanılacaq. Qeyd edək ki, festivala Heydər Əliyev Sarayında yekun vurulacaq.

MDB yaradıcı ziyalılarının 11-ci forumu keçiriləcək

Oktyabrın sonunda Bişkekdə Müstəqil Dövlətlər Birliyinin (MDB) 25 illiyi ilə bağlı MDB yaradıcı ziyalılarının və alimlərinin 11-ci forumu keçiriləcək. Qırğızıstanın Mədəniyyət, İnformasiya və Turizm Nazirliyinin təşkilatçılığı ilə tarix və mədəniyyət ili çərçivəsində keçiriləcək tədbirdə MDB ölkələrindən, o cümlədən Azərbaycandan 150-dən artıq tanınmış ziyalı, elm və mədəniyyət xadiminin iştirakı nəzərdə tutulur.xeber100.com

Pantomima Teatrı təqdim edir…

Azərbaycan Dövlət Pantomima Teatrı həmişə olduğu kimi, bu dəfə də balaca teatrsevərləri yaddan çıxarmayıb. Belə ki, oktyabrın 16-da teatrın səhnəsində Bəxtiyar Xanızadənin müəllifi olduğu “Fəlakət və insan” əsəri əsasında səhnələşdirilmiş eyniadlı tamaşa nümayiş olunacaq. Teatrın mətbuat xidmətindən bildirilib ki, səhnə əsəri maarifləndirici xarakter daşıyır. Teatrın gənc aktyoru Bəhruz Əhmədlinin quruluşunda təqdim ediləcək əsərin müəllifi, teatrın baş rejissoru, Xalq Artisti Bəxtiyar Xanızadədir. Tamaşa uşaq və yeniyetmələrə təbii fəlakətlər zamanı necə qorunmağın yollarını göstərəcək.xeber100.com

Mədəniyyət və Turizm Nazirliyinin dəstəyi ilə…

Oktyabrın 14-də İstiqlal Muzeyində Mədəniyyət və Turizm Nazirliyinin dəstəyi ilə Azərbaycan Dövlət Rəssamlıq Akademiyasının dekorativ-tətbiqi sənət fakültəsi tərəfindən hazırlanan dövlət müstəqilliyimizin 25 illiyinə həsr olunmuş “Gəncliyin seçimi – müstəqillik” adlı sərgi keçiriləcək. Muzeydən Azərtac-a bildirilib ki, sərgidə akademiyanın tələbələrinin əsərləri nümayiş olunacaq. Tədbirdə muzeyin direktoru Fəridə Şəms, Azərbaycan Dövlət Rəssamlıq Akademiyasının rektoru, akademik Ömər Eldarov, Xalq Rəssamı Fuad Salayevin və başqalarının çıxışı nəzərdə tutulub.xeber100.com

“Visla” film festivalı çərçivəsində…

Oktyabrın 13-də Bakıda “Visla” film festivalı çərçivəsində altı polyak filmi nümayiş olunacaq. Azərtac xəbər verir ki, “Ladnmark Cinema”da nümayiş olunacaq filmləri paytaxt sakinləri ilə yanaşı, əcnəbi qonaqlar da izləyə biləcək. Festival çərçivəsində “Mənim qızlarım danadır”, “Qəddarlıq anatomiyası”, “Həyatın kralı”, “Kimya”, “Yad səma” və “Troya atının çəkisi” adlı ekran əsərləri təqdim ediləcək. Oktyabrın 19-dək davam edəcək film nümayişləri “Dəstəkləyirəm” Fondunun yardımı ilə baş tutacaq.xeber100.com

Rəsm əsərlərindən ibarət sərgi açılacaq

Oktyabrın 24-də Azərbaycan Rəssamlar İttifaqının V. Səmədova adına sərgi salonunda tanınmış rəssam Rəfail Əlizadənin sənət əsərlərindən ibarət fərdi rəsm sərgisi açılacaq. Mədəniyyət və Turizm Nazirliyi və Azərbaycan Rəssamlar İttifaqının birgə təşkilatçılığı ilə reallaşacaq sərgidə nümayiş olunacaq sənət əsərləri qrafika, rəngkarlıq və dekorativ sənət üslubundadır. Bu barədə Azərtac-a R. Əlizadə məlumat verib. Fırça ustası qeyd edib ki, sərgiyə təqdim ediləcək 70-dək sənət əsərində təbiət mənzərələri, vətənpərvərlik, humanizm və xeyirxahlıq kimi mövzular əks olunacaq. Uzun illərin zəhmətinin məhsulu olan sənət əsərlərindən ibarət sərgi rəssamın 70 illik yubileyi çərçivəsində gerçəkləşəcək. Sərgi bir həftə davam edəcək.xeber100.com

Beynəlxalq Caz Festivalı çərçivəsində…

Oktyabrın 27-də Sebastyan Studnitski triosu, eləcə də Sebastyan Studnitski “Memento” simli kvarteti Bakıda konsert proqramı ilə çıxış edəcək. Azərtac xəbər verir ki, “Landmark Rotunda” təşkil olunacaq konsertdə qrupun repertuarında hit olan mahnılarla yanaşı, dünya caz musiqisinə də müraciət olunacaq. Konsert proqramı Bakı Beynəlxalq Caz Festivalı çərçivəsində reallaşacaq. Məlumat üçün bildirək ki, oktyabrın 22-dən 30-dək Bakıda keçirilməsi nəzərdə tutulan Bakı Beynəlxalq Caz Festivalına dünyanın bir sıra tanınmış caz ifaçıları və kvortetləri qatılacaq.xeber100.com

Rus Dram Teatrında premyerası olacaq

Oktyabrın 30-da Səməd Vurğun adına Azərbaycan Dövlət Rus Dram Teatrında Yuri Polyakovun “Xalam bundu” komediyasının premyerası olacaq. Teatrın mətbuat xidmətindən Azərtac-a bildirilib ki, tamaşa Rus Dram Teatrının baş rejissoru, Xalq Artisti Aleksandr Şarovskinin quruluşunda təqdim ediləcək. Tamaşanın dekorasiya rəssamı Əməkdar Mədəniyyət İşçisi Aleksandr Fyodorov, geyim üzrə rəssamı Əməkdar Mədəniyyət İşçisi Olqa Abbasova, bəstəkarı Əməkdar İncəsənət Xadimi Cahangir Zülfüqarovdur. Baş rolları Xalq artistləri Məbud Məhərrəmov, Aleksandra Nikuşina, Səfa Mirzəhəsənov, Əməkdar artistlər Fuad Osmanov, Mələk Abbaszadə, Salman Bayramov, aktyorlar Mariya Dubovitskaya, Tamilla Abutalıbova, Oleq Əmirbəyov və başqaları ifa edəcək.xeber100.com

“YARAT Akademiyası” adlı layihəyə start verildi

“YARAT” Müasir İncəsənət Mərkəzi “YARAT Akademiyası” adlı layihəyə start verib. Azərtac xəbər verir ki, “YARAT Akademiyası” artıq ərizə qəbuluna başlayıb. Dekabradək davam edəcək ərizə qəbulu ilə hər kəs sözügedən sənət ocağına müraciət edə bilər. Layihənin əsas məqsədi tələbələr və incəsənətə marağı olan hər kəsdə bu sahəyə maraq oyatmaq və araşdırmaq imkanı yaratmaqdır.xeber100.com