VIII Beynəlxalq Musiqi Festivalının proqramı açıqlanıb

Qeyd etdiyimiz kimi sentyabrın 18-dən 27-dək Bakıda Üzeyir Hacıbəyliyə həsr olunmuş VIII Beynəlxalq Musiqi Festivalının keçirilməsi planlaşdırılır.  Mədəniyyət və Turizm Nazirliyinin məlumatına görə, on gün ərzində M. Maqomayev adına Azərbaycan Dövlət Filarmoniyasında, kamera və orqan musiqisi zalında, Azərbaycan Dövlət Akademik Opera və Balet Teatrında, Azərbaycan Bəstəkarlar İttifaqında, Bakı Musiqi Akademiyasında və digər konsert salonlarında Rusiya, ABŞ, İsrail, Almaniya, Türkiyə, Gürcüstandan tanınmış musiqiçilər və kollektivlər – “Orfeon” xoru, Gürcüstan kamera xoru, Piter Laul, Ü.Mahmudbəyli, K.Moskoviç, R.İsmayılova, Haqai Şaham, Elnarə Kərimova və başqaları iştirak edəcəklər. Festival çərçivəsində F.Əmirov adına Azərbaycan Dövlət Mahnı və Rəqs Ansamblının 80 illiyinə həsr olunmuş yubiley tədbiri, Muzey Mərkəzində “Azərbaycan bəstəkarları və musiqişünasların elektron kataloqu”nun təqdimat mərasimi keçiriləcək.xeber100.com

“Azərbaycan teatrı 2009-2019-cu illərdə”…

Noyabrın 6-dan 10-dək Mədəniyyət və Turizm Nazirliyinin təşkilatçılığı ilə IV Bakı Beynəlxalq Teatr Konfransı keçiriləcək. Konfrans “Azərbaycan teatrı 2009-2019-cu illərdə” Dövlət Proqramının icrası və “Multikulturalizm ili” çərçivəsində təşkil olunacaq. Konfransın əsas mövzusu “Multikulturalizm və teatr” olacaq. Tədbir çərçivəsində beynəlxalq ekspertlər tərəfindən ustad dərsləri və treninqlərin keçirilməsi də nəzərdə tutulur. Konfransda 40-dan çox ölkədən 150-dək teatr mütəxəssisi iştirak edəcək. Azərtac xəbər verir ki, bu məlumatı mədəniyyət və turizm nazirinin müavini Ədalət Vəliyev beynəlxalq konfransa hazırlıqla bağlı keçirilən toplantıda bildirib. Nazir müavini deyib: “Dünyanın məşhur teatr, incəsənət xadimləri – rejissorlar, aktyorlar, dramaturqlar, kossenaristlər, bir neçə ölkənin teatr xadimləri ittifaqlarının, beynəlxalq teatr festivallarının, teatrla bağlı tanınmış qurumların, eləcə də müxtəlif ölkələrin teatr rəhbərləri tədbirdə iştirak üçün təşkilat komitəsinə müraciət ediblər. Müzakirə olunacaq mövzular, treninqlərdə dinləniləcək məruzələr, ümumilikdə konfransın gündəliyində yer alan məsələlər teatr bilicilərinin canlı ünsiyyətini təmin etməklə yanaşı, uğurlu nəticəyə, qarşılıqlı yeni əlaqələrin qurulmasına zəmin yaradacaq”. Ədalət Vəliyev IV Bakı Beynəlxalq Teatr Konfransının yüksək səviyyədə təşkil olunması üçün bir sıra tapşırıqlar da verib. Həmçinin, tədbirin açılış və bağlanış mərasimlərinin təşkili, tərcüməçilərlə təminat, könüllülərin iştirakı, müxtəlif mədəni tədbirlərin keçirilməsi və konfransın mətbuatda geniş işıqlandırılması üçün görülməli olan işləri diqqətə çatdırıb.xeber100.com

Türkiyədə beynəlxalq musiqi festivalı keçirilir

Türkiyənin Muğla Böyükşəhər bələdiyyəsinin təşkilatçılığı ilə Muğla şəhərində Beynəlxalq Zurna Festivalı keçirilir. Anadolu xəbər agentliyinin məlumatına görə, festivalda Türkiyə, Azərbaycan, İngiltərə, Fransa, Yunanıstan, Bolqarıstandan və digər ölkələrdən 17-dək sənətkar iştirak edir. Muğladakı teatrların birində baş tutan festival üç gün davam edəcək. Festivalın keçirilməsinin əsas məqsədi zurna ifaçılıq mədəniyyətinin təbliği və gənc ifaçı nəslə bu sənəti daha da sevdirməkdən ibarətdir. Festivalda Azərbaycanı Əməkdar Artist Şirzad Fətəliyev təmsil edir. Bu festival artıq üçüncü dəfədir ki, Muğlada reallaşdırılır.xeber100.com

Beynəlxalq Musiqi Festivalına hazırlıqla bağlı müşavirə keçirib

Sentyabrın 6-da mədəniyyət və turizm nazirinin müavini Ədalət Vəliyev Milli Kitabxanada “Üzeyir musiqi günü” və Üzeyir Hacıbəyli Beynəlxalq Musiqi Festivalına hazırlıqla bağlı müşavirə keçirib. Tədbirdə nazirliyin müvafiq şöbə və sektorlarının, teatr-konsert müəssisələrinin, muzeylərin rəhbərləri iştirak ediblər. Nazirlikdən Azərtac-a bildirilib ki, müşavirədə çıxış edən Ədalət Vəliyev “Üzeyir musiqi günü” haqqında məlumat verib. Bildirib ki, bu mötəbər gün 1995-ci ildə ümummilli lider Heydər Əliyev tərəfindən rəsmiləşdirilib. 2009-cu ildən isə Üzeyir bəyin doğum günü həm də Bakıda və bölgələrimizdə keçirilən beynəlxalq festivalla qeyd olunur. Mədəniyyət və turizm nazirinin iyul ayında imzaladığı əmrdə festivalla bağlı görüləcək bütün işlər öz əksini tapıb.xeber100.com

“Musiqi sülhə səsləyir” adlı tədbir təşkil olunacaq

Sentyabrın 7-də Azərbaycan Musiqili Mədəniyyəti Dövlət Muzeyində “Musiqi sülhə səsləyir” adlı tədbir təşkil olunacaq. Azərtac xəbər verir ki, Mədəniyyət və Turizm Nazirliyinin, Azərbaycan Bəstəkarlar İttifaqı və Musiqili Mədəniyyəti Dövlət Muzeyinin birgə təşkilatçılığı ilə keçiriləcək tədbir Beynəlxalq Sülh Günü münasibətilə “Sülh aylığı” çərçivəsində baş tutacaq. Tədbir çərçivəsində Azərbaycan Bəstəkarlar İttifaqının katibi, Milli Konservatoriyanın və Bakı Musiqi Akademiyasının professoru, Əməkdar İncəsənət Xadimi Cəlal Abbasovla görüş keçiriləcək. Bəstəkar sülh mövzusunda yazdığı əsərləri və gələcək yaradıcılıq planları barədə söhbət açacaq, tədbir iştirakçılarının suallarını cavablandıracaq. Tədbirdə C. Abbasovun BMT-nin mükafatına layiq görülmüş “İf İ could see you again...” adlı IV simfoniyasının videoyazısı və “Sülhün səsi” adlı III simfoniyasından videofraqment nümayiş olunacaq. Bununla yanaşı, Əməkdar Artist Fəridə Məmmədova və İlahə Sadıqzadənin repertuarında müxtəlif musiqi nömrələri səsləndiriləcək. Qeyd edək ki, Cəlal Abbasov, həm də BMT-nin “Ümumdünya insan hüquqları haqqında Bəyannaməsinin 50 illiyinə həsr olunmuş” müsabiqənin qalibidir.xeber100.com

Kinofilmlərin nümayişi zamanı reklam yayımlanması qadağan edilib

Azərbaycanda kinofilmlərin nümayişi zamanı reklam yayımlanması qadağan edilib. Azərtac xəbər verir ki, Nazirlər Kabineti “Filmlərin yayımı və nümayişi Qaydaları”na etdiyi dəyişikliyə əsasən kino xidməti göstərilərkən reklam kinoteatrın foyesində yayımlana bilər. Kinofilmlərin (əvvəli istisna olmaqla) nümayişi zamanı reklam yayımlanması qadağandır.xeber100.com

Azərbaycan Dövlət Kukla Teatrı müsabiqə elan edib

Abdulla Şaiq adına Azərbaycan Dövlət Kukla Teatrı 85 illik yubileyi münasibətilə balaca istedadlar arasında müsabiqə elan edib. Belə ki, teatrın nəzdində fəaliyyət göstərən “Oyuq” teatr-studiyasına istedadlı uşaqların qəbuluna başlanılıb. Teatrın mətbuat xidmətindən Azərtac-a bildirilib ki, sentyabrın 6-dan 26-dək davam edəcək müsabiqədə 5-15 yaşlı uşaqlar iştirak edə bilərlər. Teatr üçün həvəskar aktyorların yetişdirilməsi məqsədilə keçirilən müsabiqədə iştirak etmək istəyənlər Azərbaycan Dövlət Kukla Teatrına (saat 13:00-15:00) müraciət etməlidirlər. Peşəkar aktyorluq və rejissorluq, xoreoqrafiya və vokal üzrə pedaqoqların seçəcəyi uşaqlardan tələb olunan əsas keyfiyyətlər səhnədə özünü sərbəst ifadə, səs və xoreoqrafiya bacarıqlarıdır. Qeyd edək ki, fəaliyyətində “Azərbaycan teatrı 2009-2019-cu illərdə” Dövlət Proqramındakı teatr-studiyaları ilə bağlı bəndi rəhbər tutan “Oyuq” illərdi keçdiyi uğurlu yaradıcılıq yolu ilə öz fərqini göstərə bilib. Belə ki, studiyanın yetirmələri Türkiyə, Rusiya, Makedoniya və Bolqarıstanda təşkil olunan beynəlxalq festival və müsabiqələrdə uğurla təmsil olunaraq dəfələrlə yüksək mükafatlara layiq görülüblər.xeber100.com

Venesiya kinofestivalına start verilib

73-cü Venesiya kinofestivalına start verilib. Azərtac xəbər verir ki, 20 ekran əsərinin mübarizəyə qoşulduğu festival bu il Demiyena Şazellanın “La la lənd” filmi ilə açılıb. Festival çərçivəsində məşhur rejissor Mel Gipsonun yeni filminin təqdimatı da nəzərdə tutulub. Həmçinin, festivalda rejissoru Emir Kusturicanın “Samanyolunda gəzinti” filmi də böyük maraq doğurub. O, filmdə həm də aktyor kimi çıxış edir və məşhur aktrisa Monika Beluçi ilə tərəf müqabili olub. Qeyd edək ki, qaliblər sentyabrın 10-da müəyyənləşəcək. İlk dəfə 1933-cü ildə keçirilən festivalın məqsədi dünya kino mədəniyyəti ilə yaxından tanış olmaqdır. Xatırladaq ki, ötən il Azərbaycan da “Nabat” filmi ilə festivalın əsas proqramına daxil olan “Horizontlar” proqramı çərçivəsində təmsil olunub.xeber100.com

“Azərbaycan kinosu gecəsi” layihəsinə start verilib

Azərbaycanın Los-Ancelesdəki baş konsulluğunun və buradakı Azərbaycan icmasının birgə təşkilatçılığı ilə Los-Ancelesdə “Azərbaycan kinosu gecəsi” adlı layihəyə start verilib. Layihə çərçivəsində müntəzəm şəkildə Azərbaycan kino sənətinin nümunələrinin Los-Ancelesdə nümayişi planlaşdırılır. Bu səpkidə ilk nümayiş sentyabrın 2-də keçirilib. Azərbaycanın Los-Ancelesdəki baş konsulluğunda keçirilən tədbirdə Elçin Musaoğlunun ssenarisi və rejissorluğu əsasında 2009-cu ildə çəkilmiş, bir neçə beynəlxalq mükafata layiq görülmüş “40-cı qapı” filmi nümayiş etdirilib. Tədbirin açılışında çıxış edən Azərbaycanın Los-Ancelesdəki baş konsulu Nəsimi Ağayev ABŞ-da, xüsusilə də Kaliforniya ştatında Azərbaycanın daha da tanıdılmasının yüksək önəm daşıdığını qeyd edib. O, ölkəmizin xaricdə təbliğində Azərbaycan kinematoqrafiyasının xüsusi rol oynadığını diqqətə çatdırıb. N.Ağayev bildirib ki, məhz bu baxımdan Azərbaycan icması ilə birgə başladılan bu yeni layihəyə baş konsulluq dəstəyini davam etdirəcək.xeber100.com

Milli Dram Teatrı beynəlxalq festivalda…

Azərbaycan Dövlət Akademik Milli Dram Teatrı sentyabrın 15-də keçiriləcək II Şəki beynəlxalq teatr festivalında “Ölülər” tamaşasını göstərəcək. Teatrın mətbuat xidmətinin məlumatına görə, Cəlil Məmmədquluzadənin “Ölülər” pyesi əsasında hazırlanan səhnə əsərinin quruluşçu rejissoru teatrın bədii rəhbəri və direktoru, Xalq Artisti Azərpaşa Nemətdir. Tamaşada bəstəkar Qara Qarayevin “Ölülər” əsəri üçün bəstələdiyi musiqi yeni versiyada təqdim olunur. Baş rolları Xalq Artisti Nurəddin Mehdixanlı və aktyor Anar Heybətov ifa edəcəklər.xeber100.com