Azərbaycan Dövlət Kukla Teatrı müsabiqə elan edib

Abdulla Şaiq adına Azərbaycan Dövlət Kukla Teatrı 85 illik yubileyi münasibətilə balaca istedadlar arasında müsabiqə elan edib. Belə ki, teatrın nəzdində fəaliyyət göstərən “Oyuq” teatr-studiyasına istedadlı uşaqların qəbuluna başlanılıb. Teatrın mətbuat xidmətindən Azərtac-a bildirilib ki, sentyabrın 6-dan 26-dək davam edəcək müsabiqədə 5-15 yaşlı uşaqlar iştirak edə bilərlər. Teatr üçün həvəskar aktyorların yetişdirilməsi məqsədilə keçirilən müsabiqədə iştirak etmək istəyənlər Azərbaycan Dövlət Kukla Teatrına (saat 13:00-15:00) müraciət etməlidirlər. Peşəkar aktyorluq və rejissorluq, xoreoqrafiya və vokal üzrə pedaqoqların seçəcəyi uşaqlardan tələb olunan əsas keyfiyyətlər səhnədə özünü sərbəst ifadə, səs və xoreoqrafiya bacarıqlarıdır. Qeyd edək ki, fəaliyyətində “Azərbaycan teatrı 2009-2019-cu illərdə” Dövlət Proqramındakı teatr-studiyaları ilə bağlı bəndi rəhbər tutan “Oyuq” illərdi keçdiyi uğurlu yaradıcılıq yolu ilə öz fərqini göstərə bilib. Belə ki, studiyanın yetirmələri Türkiyə, Rusiya, Makedoniya və Bolqarıstanda təşkil olunan beynəlxalq festival və müsabiqələrdə uğurla təmsil olunaraq dəfələrlə yüksək mükafatlara layiq görülüblər.xeber100.com

Venesiya kinofestivalına start verilib

73-cü Venesiya kinofestivalına start verilib. Azərtac xəbər verir ki, 20 ekran əsərinin mübarizəyə qoşulduğu festival bu il Demiyena Şazellanın “La la lənd” filmi ilə açılıb. Festival çərçivəsində məşhur rejissor Mel Gipsonun yeni filminin təqdimatı da nəzərdə tutulub. Həmçinin, festivalda rejissoru Emir Kusturicanın “Samanyolunda gəzinti” filmi də böyük maraq doğurub. O, filmdə həm də aktyor kimi çıxış edir və məşhur aktrisa Monika Beluçi ilə tərəf müqabili olub. Qeyd edək ki, qaliblər sentyabrın 10-da müəyyənləşəcək. İlk dəfə 1933-cü ildə keçirilən festivalın məqsədi dünya kino mədəniyyəti ilə yaxından tanış olmaqdır. Xatırladaq ki, ötən il Azərbaycan da “Nabat” filmi ilə festivalın əsas proqramına daxil olan “Horizontlar” proqramı çərçivəsində təmsil olunub.xeber100.com

“Azərbaycan kinosu gecəsi” layihəsinə start verilib

Azərbaycanın Los-Ancelesdəki baş konsulluğunun və buradakı Azərbaycan icmasının birgə təşkilatçılığı ilə Los-Ancelesdə “Azərbaycan kinosu gecəsi” adlı layihəyə start verilib. Layihə çərçivəsində müntəzəm şəkildə Azərbaycan kino sənətinin nümunələrinin Los-Ancelesdə nümayişi planlaşdırılır. Bu səpkidə ilk nümayiş sentyabrın 2-də keçirilib. Azərbaycanın Los-Ancelesdəki baş konsulluğunda keçirilən tədbirdə Elçin Musaoğlunun ssenarisi və rejissorluğu əsasında 2009-cu ildə çəkilmiş, bir neçə beynəlxalq mükafata layiq görülmüş “40-cı qapı” filmi nümayiş etdirilib. Tədbirin açılışında çıxış edən Azərbaycanın Los-Ancelesdəki baş konsulu Nəsimi Ağayev ABŞ-da, xüsusilə də Kaliforniya ştatında Azərbaycanın daha da tanıdılmasının yüksək önəm daşıdığını qeyd edib. O, ölkəmizin xaricdə təbliğində Azərbaycan kinematoqrafiyasının xüsusi rol oynadığını diqqətə çatdırıb. N.Ağayev bildirib ki, məhz bu baxımdan Azərbaycan icması ilə birgə başladılan bu yeni layihəyə baş konsulluq dəstəyini davam etdirəcək.xeber100.com

Milli Dram Teatrı beynəlxalq festivalda…

Azərbaycan Dövlət Akademik Milli Dram Teatrı sentyabrın 15-də keçiriləcək II Şəki beynəlxalq teatr festivalında “Ölülər” tamaşasını göstərəcək. Teatrın mətbuat xidmətinin məlumatına görə, Cəlil Məmmədquluzadənin “Ölülər” pyesi əsasında hazırlanan səhnə əsərinin quruluşçu rejissoru teatrın bədii rəhbəri və direktoru, Xalq Artisti Azərpaşa Nemətdir. Tamaşada bəstəkar Qara Qarayevin “Ölülər” əsəri üçün bəstələdiyi musiqi yeni versiyada təqdim olunur. Baş rolları Xalq Artisti Nurəddin Mehdixanlı və aktyor Anar Heybətov ifa edəcəklər.xeber100.com  

“Port Baku Mall”da sərgi açılıb

Tanınmış rəssam və rejissor Nazim Məmmədovun xatirəsinə həsr olunmuş sərgi açılıb. Qeyd edək ki, “Port Baku Mall”da açılan sərgidə rəssamın bir- birindən maraqlı əl işləri nümayiş olunub. Sentyabrın 12-dək davam edəcək sərgidə unudulmaz sənət adamının 50-dən çox əsəri təqdim edilib. Qeyd edilib ki, ilk cizgi fılmlərinin müəllifi olan sənətkar Azərbaycanda animasiya janrının inkişafına əvəzsiz töhfələr verib. Onun adı ən sevımlı cizgi fılmləri ilə bağlıdır. O, rəsm, uşaq kitab illüstrasiyası ilə yanaşı, həm də rəngkarlıq, qrafika janrı ilə də məşğul olub. Rəssamın əsərləri ölkəmizlə yanaşı, xaricdə də tanınır. Xatırladaqq ki, Nazim Məmmədov 2004-cü il oktyabrın 29-da Bakıda vəfat edib.xeber100.com

“Bal-Maskarad” operasının premyerası keçiriləcək

Opera və Balet Teatrında Cüzeppe Verdinin “Bal-Maskarad” operasının premyerası keçiriləcək. Teatrın mətbuat xidmətindən Apa-ya verilən məlumata görə, opera sentyabrın 24-də VIII Beynəlxalq Üzeyir Hacıbəyli Musiqi Festivalı çərçivəsində tamaşaçılara təqdim olunacaq. Səhnə əsərinin əsas partiyalarında Belarusun əməkdar artisti Stanislav Trifonov, Azərbaycanın əməkdar artistləri Fərid Əliyev, İlahə Əfəndiyeva, İnarə Babayeva, Səbinə Vahabzadə, solistlər Tural Ağasıyev, Əliəhməd İbrahimov və Tələt Hüseynov çıxış edəcəklər. Tamaşanın musiqi rəhbəri və dirijoru beynəlxalq müsabiqələr laureatı Əyyub Quliyev, xormeysteri əməkdar incəsənət xadimi Sevil Hacıyeva, konsertmeysteri Nərgiz Ağayevadır. “Bal-Maskarad” operasının ilk premyerası 17 fevral 1859-cu ildə Romanın Apollo teatrında baş tutub. Operanın librettosu fransız dramaturqu Ejen Skribanın tarixi faktlar əsasında qələmə aldığı pyesin motivləri əsasında yazılıb.

Opera və Balet Teatrı 108-ci mövsümü açmağa hazırlaşır

Azərbaycan Dövlət Akademik Opera və Balet Teatrı 108-ci mövsümü “Leyli və Məcnun”la açacaq.  Teatrın sentyabr ayı üçün repertuarını təqdim edirik: 18 sentyabr – “Leyli və Məcnun” (3 pərdəli opera) 24 sentyabr – “Bal-maskarad” (premyera, konsert ifasında opera) 25 sentyabr – “Min bir gecə” (2 pərdəli balet) 28 sentyabr – “Şah İsmayıl” Tamaşalar saat 19:00-da başlanır.

“Evin sirləri” adlı sərgi açılıb

YARAT Müasir İncəsənət Mərkəzinin ARTIM Layihə Məkanında Azərbaycan rəssamlarının “Evin sirləri” adlı qrup sərgisi açılıb. Azərtac xəbər verir ki, sərgidə gənc rəssamlar - Mehriban Şəmsədinskaya, Zöhrab Salamzadə, Hətəm Əlizadə və Qafar Rzayevin əsərləri nümayiş olunub. Sərgidə nümayiş olunan əsərlərin mövzularının diapazonu həm sosioloji, həm də ümumi–məişət xarakterinə malikdir. Gənc fırça ustaları əsərlərində, ailə, ev, şəxsi və qeyri-şəxsi kənar problemlər mövzusunu, həmçinin insanın evdə olması ilə əlaqəli hər bir məsələni araşdırırlar. Layihənin başlıca məqsədi, ölkənin gənc nəslinin istedadlı nümayəndələrini incəsənət sahəsində karyera qurmağa təşviq etmək, habelə Azərbaycanın gənc rəssamlarına peşəkar səhnədə öz əsərlərini nümayiş etdirmək üçün müvafiq şərait yaratmaqdır. Qeyd edək ki, sərgi sentyabrın 15-dək davam edəcək.xeber100.com

Hind mədəniyyətini nümayiş etdirən sərgi açıldı

Bakıda Hind mədəniyyətini nümayiş etdirən sərgi açılıb. Azərtac xəbər verir ki, sərgi Hindistanın Bakıdakı səfirliyinin dəstəyi ilə keçirilir. Hər il ənənəvi olaraq təşkil olunan sərgi bu dəfə “Amay” ticarət mərkəzində keçirilir. Bu dəfə də qonaqlar sərginin pavilyonunda yer alan Hindistan mədəniyyət nümunələri ilə yaxından tanış olma imkanı əldə edəcəklər. Sərgidə hind rəqsləri və hind milli yeməkləri ilə yanaşı, Hindistandan gətirilən qızıl və gümüş əşyalar, tavalar, qazanlar, mebel, xalçalar, ədviyyatlar, çay və başqa məhsullar da nümayiş olunur. Həmçinin, pavilyonlarda müxtəlif növdə ipək, qumaş və pambıq parçalardan hazırlanmış geyimlər, kəlağayılar, yaylıqlar və dəsmallar da sərgilənir. Hər kəsin iştirak edə biləcəyi sərgidə ziyarətçilər hind musiqisi və incəsənəti ilə yaxından tanış ola bilər. Sərgi sentyabrın 18-dək davam edəcək.

“Ceyhun bəy Hacıbəylinin 125 illik yubileyinin keçirilməsi haqqında”…

Sentyabrın 18-də Üzeyir Hacıbəylinin ev muzeyində Ceyhun bəy Hacıbəylinin mühacirət həyatından bəhs edən “Qürbətdən gələn səslər” adlı kitabın təqdimat mərasimi keçiriləcək. Azərtac xəbər verir ki, təqdimat mərasimi Bakıda keçiriləcək Üzeyir Hacıbəyli VIII Beynəlxalq Musiqi Festivalı çərçivəsində baş tutacaq. Kitab Ceyhun bəy Hacıbəylinin Azərbaycan Respublikası Dövlət Ədəbiyyat və İncəsənət Arxivində mühafizə edilən arxiv sənədlərindən, məktublardan, epistolyar yazılarından və digər mənbələrdən olan sənədlərdən istifadə edilməklə hazırlanıb. Adı çəkilən nəşr Dövlət Ədəbiyyat və İncəsənət Arxivinin direktor müavini, tərcüməçi-jurnalist Aslan Kənanın tərcüməsi sayəsində ərsəyə gəlib. Əlli illik bir dövrü (1912-1962-ci illər) əks etdirən bu məktublarda şikayətlər, haqsızlıqlar, ağır həyat tərzi ilə yanaşı, mətbuat səhifələrində Azərbaycanla bağlı dərc olunan yazılar, vətəndə gedən hadisələr öz əksini tapıb. Qeyd edək ki, kitab “Ceyhun bəy Hacıbəylinin 125 illik yubileyinin keçirilməsi haqqında” Azərbaycan Respublikasının Prezidentinin 19 noyabr 2015-ci il tarixli Sərəncamına uyğun olaraq hazırlanıb.xeber100.com