“Human” adlı fotosərgi açılıb

İyulun 29-da Azərbaycan Rəssamlar İttifaqının Vəcihə Səmədova adına sərgi salonunda gənc fotoqraf-rəssam Babək Sübhaninin “Human” adlı fotosərgisi açılıb. Azərtac xəbər verir ki, “Media Company” şirkətinin “İmzamı tanı” layihəsi çərçivəsində reallaşan sərgi Mədəniyyət və Turizm Nazirliyi və Rəssamlar İttifaqının birgə təşkilatçılığı ilə baş tutub. Tədbirdə Rəssamlar İttifaqının katibi, Xalq Rəssamı Ağəli İbrahimov çıxış edərək sərginin əhəmiyyətindən danışıb. Qeyd olunub ki, sərgidə nümayiş olunan portretlərdə Azərbaycanın tanınmış teatr aktyorları və rejissorlarının fotoları öz əksini tapıb. Həmçinin, ekspozisiyada mim obrazlarının ifasında qadına qarşı şiddət, intihara qarşı insanların biganəliyi yer alıb. Sərgiyə təqdim olunan 85-dək foto portretin mükəmməlliyindən danışılıb. Xalq Artisti Ramiz Novruz çıxış edərək nümayiş olunan əsərlərin müəllifin birillik zəhmətinin bəhrəsi olduğunu vurğulayıb. Çıxışlarda sərginin təşkilində əməyi keçən hər kəsə minnətdarlıq ifadə edilib. Daha sonra qonaqlar sərgi ilə tanış olublar. Sərgi avqustun 7-dək davam edəcək.xeber100.com

“Qarabağın həsrət salnaməsi”…

Avqustun 2-də Nizami Kino Mərkəzində Milli Kino Günü münasibətilə keçiriləcək tədbirdə Ayaz Salayevin “Qarabağın həsrət salnaməsi” layihəsinin təqdimatı olacaq. Azərtac xəbər verir ki, C.Cabbarlı adına “Azərbaycanfilm” kinostudiyasının istehsalı olan “Qarabağın həsrət salnaməsi” internet-layihənin məqsədi internet vasitəsilə həmvətənlərimizin Qarabağ probleminə baxışlarını təqdim etməkdir. Hər bir Azərbaycan vətəndaşı özünün Qarabağ problemi haqqında hesab etdiyi ən vacib bir neçə cümləni kameraya deyir. Bu sözlərdən ibarət iki dəqiqəlik video çarxlar internetdə yerləşdiriləcək. Bu video çarxlar vasitəsilə xalqımızın Qarabağa necə dəyər verdiyi, heç bir zaman onun itkisi ilə barışmayacağı və işğal altında olan torpaqlarımızı son qarışınadək qaytarmayanadək rahat olmayacağı bəyan edilir. Layihə həm yerli, həm də beynəlxalq auditoriya üçün nəzərdə tutulub. Sosial şəbəkələrlə yanaşı, bu video çarxların seansdan əvvəl kinoteatrlarda, televiziya kanallarında və digər yerlərdə nümayişi planlaşdırılır. Xatırladaq ki, Milli Kino Günündə “Azərbaycanfilm” kinostudiyasında çəkilmiş “40-cı paraleldə” gənclər kinoalmanaxının təqdimatı keçiriləcək. Almanaxa rejissor Amil Məmiyevin “Qara bağ”, Zamin Məmmədovun “Onun atası”, Emin Mirabdullayevin “Postskriptum”, Emin Əfəndiyevin “Hədiyyə” qısametrajlı filmləri daxildir.xeber100.com

VII Avropa kino festivalı keçiriləcək

Bu il noyabrın 3-də Bakıda Avropa kino festivalı  start götürəcək. Apa-nın xəbərinə görə, bununla bağlı “Park Cinema” kinoteatrlar şəbəkəsinin direktoru Namiq Quliyevlə Avropa İttifaqının Azərbaycandakı nümayəndəliyinin siyasət, iqtisadiyyat, mətbuat və informasiya şöbəsinin rəhbəri Auşra Raişite-Daukantien arasında keçirilən görüşdə razılığa gəlinib. Sayca 7-ci olan festival 10 gün davam edəcək. Qeyd edək ki, 2015-ci ildə VI Avropa kino festivalının proqramına 16 ölkədə - Almaniya, Finlandiya, Çexiya, Böyük Britaniya, Avstriya, Xorvatiya, Belçika, Rumıniya, İtaliya, Estoniya, Fransa, İspaniya, Latviya, Macarıstan, Bolqarıstan, İsveç və əlbəttə ki, Azərbaycanda istehsal olunmuş filmlər daxil edilib.xeber100.com

Milli Kino Günü ilə bağlı bir qrup kino xadimi mükafatlandırılıb

Azərbaycan Respublikası Kinematoqrafçılar İttifaqı 2 avqust – Milli Kino Günü ilə bağlı bir qrup kino xadiminə pul mükafatları təqdim edib. İttifaqın mətbuat xidmətindən Azərtac-a bildirilib ki, mükafatlar Azərbaycan kinosunda uzun müddət səmərəli fəaliyyət göstərdiklərinə və Milli Kino Günü münasibətilə verilib. Təqdim edilən pul mükafatlarından başqa, ittifaqın özünün təsis etdiyi Milli Kino Mükafatı da öz sahibinə verilib. Bu il Milli Kino mükafatına (2000 manat) Xalq Artisti Eldar Quliyev layiq görülüb. Həmçinin yubilyarlar - Xalq Artisti Ramiz Fətəliyev, Əməkdar İncəsənət xadimləri Oqtay Babazadə, Yavər Rzayev, Fuad Vəlixanov, Əməkdar Mədəniyyət işçiləri Tağı Babayev, Rəfiqə Budaqlı, Əməkdar Rəssam Fikrət Ələkbərova 500 manat mükafat təqdim edilib. Bununla yanaşı, ittifaq tərəfindən veteranlara - Əməkdar Mədəniyyət işçiləri Natalya Şneyer, Şahin Qalabəyov, Lidiya Şarkovkina, Rimma Abdullayeva, Pərviz Quliyev, Ənvər Əbluc, Nəriman Şıxəliyev, Akif Rüstəmov, Vladimir Dudniçenko, Elman Əliyev və Kamal Seyidova 300 manat məbləğində pul mükafatı verilib.

Azərbaycanın təbliği ilə bağlı sərgilər açılıb

Fransanın Kann şəhərində Azərbaycanın tarixini və mədəniyyətini, ölkələrimiz arasında əlaqələri əks etdirən sərgilər açılıb. Sərgilərdən biri “Partizanın izi ilə” adlanır. Bu sərgi İkinci Dünya müharibəsinin iştirakçısı, Fransa Müqavimət Hərəkatının görkəmli nümayəndəsi Əhmədiyyə Cəbrayılova həsr olunub. Ekspozisiyada azərbaycanlı partizanın həyat və döyüş yolunu əks etdirən eksponatlar, o cümlədən Əhmədiyyə Cəbrayılovun şəxsi arxivindən götürülmüş fotolar nümayiş etdirilir. Azərbaycana aid sərgilərdən biri də “Bir günəş altında” layihəsi çərçivəsində açılıb. Bu layihə çərçivəsində Azərbaycanda multikulturalizmə və tolerantlığa həsr olunan sərgi və film böyük maraqla qarşılanıb. Sərgidəki fotolar və film Azərbaycanın müxtəlif guşələrində çəkilib. Burada 20 azsaylı xalqın tarixini, mədəniyyətini və adət-ənənələrini əks etdirən foto və videomateriallar əsasında sərgi iştirakçılarına Azərbaycandakı tolerantlıq haqqında ətraflı məlumat verilir. Sərginin “Danışan başlar” adlı bölməsində isə müxtəlif azsaylı xalqların və etnosların nümayəndələri öz dillərində maraqlı hekayələri nəql edirlər.“Gəncə və Qəbələ: iki şəhər fransız fotoqrafların gözü ilə” sərgisində isə Azərbaycan təbiətinin gözəllikləri, özünəməxsus mədəniyyət və adət-ənənələri təqdim edilir. Sərginin təşkili məqsədilə fransız fotoqraflar Samuel Qrataka və Jan-Fransua Rozye 2016-cı ilin aprelində Gəncəyə və Qəbələyə səfər edib, Azərbaycanın qədim tarixə, eləcə də müasir turizmdə aparıcı rola malik hər iki şəhərinin mənzərələrini, abidələrini, gündəlik həyatını fotoaparatın yaddaşına köçürüblər.xeber100.com

“Retro Bakı” layihəsi davam edir

Bakı Şəhər Mədəniyyət və Turizm Baş İdarəsinin təşkilatçılığı ilə həyata keçirilən yeni “Retro Bakı” layihəsi davam edir. Baş İdarədən Azərtac-a bildirilib ki, layihə çərçivəsində növbəti konsert iyulun 30-u və 31-də Fəvvarələr Meydanında baş tutacaq. Bu həftə “Retro Bakı”nın qonaqları Əməkdar Artist Elza Seyidcahan, tanınmış müğənnilər İlqar Sahil, Leyla Ramazanlı, Səbinə İsmayılova, Cəmilə Rəhimova, Samir Cabbarov, Aysel Mayılova və “Azad” rəqs qrupu olacaq. Qeyd edək ki, layihə çərçivəsində tədbirlər hər həftə sonu - şənbə və bazar günləri axşam saatlarında keçirilməklə oktyabrın ortalarınadək davam edəcək. Layihənin məqsədi XX əsrin 60-70-ci illərində Bakıda dəbdə olan musiqini yenidən canlandırmaq və yay aylarında əhalinin asudə vaxtını səmərəli keçirməsinə nail olmaqdır.xeber100.com

Beynəlxalq Karikatura Müsabiqəsi keçirilir

Azərbaycan Karikaturaçı Rəssamlar Birliyi VII “Molla Nəsrəddin-Azərbaycan-2016” Beynəlxalq Karikatura Müsabiqəsi keçirir. Müsabiqə Mədəniyyət və Turizm Nazirliyi, Azərbaycan Rəssamlar İttifaqının və Beynəlxalq Karikaturaçılar Təşkilatları Federasiyasının dəstəyi ilə reallaşacaq. Azərtac Azərbaycan Karikaturaçı Rəssamlar Birliyinin rəsmi saytına istinadla xəbər verir ki, builki beynəlxalq müsabiqənin mövzusu “Multikulturalizm” adlanır.Əsərlər beynəlxalq münsiflər heyəti tərəfindən qiymətləndiriləcək.xeber100.com

“Azərsun Holdinq” MMC-nin dəstəyi ilə tədbir keçiriləcək

İyulun 30-da Azərbaycan Xalça Muzeyinin uşaq muzeyi şöbəsinin təşəbbüsü, IDEA İctimai Birliyi və “Azərsun Holdinq” MMC-nin dəstəyi ilə “Ailə günü” adlı tədbir keçiriləcək. Muzeyin “Açıq qapı” günü çərçivəsində təşkil ediləcək tədbirin məqsədi valideyn və uşaq arasında ümumi maraqları birləşdirmək, ünsiyyət körpüsünü möhkəmləndirmək və ən əsası mədəniyyət və incəsənətimizi tanıtmaqdır. Muzeydən Azərtac-a bildirilib ki, tədbirin proqramında müxtəlif yaş hədləri nəzərə alınıb. İştirakçılar Azərbaycan xalçaçılığı, dekorativ-tətbiqi sənətinin tarix və mədəniyyəti ilə yaxından tanış olacaqlar. Onlar muzeydə təşkil olunan ustad dərslərində iştirak etməklə öz yaradıcı bacarıqlarından istifadə edərək özlərinin incəsənət nümunələrini hazırlayacaqlar. İştirakçıları tədbirdə muzeyin əməkdaşlarının köməyi ilə kompüter proqramında virtual xalçanın yaradılması, saxsı qablar üzərində xalça rəsmlərinin və akril boyalarla dibçəklərin üzərində rəngarəng təsvirlərin çəkilməsi, dekorativ bəzək əşyaları, qolbaqların hazırlanması və digər bir-birindən əyləncəli oyunlar və masaüstü tapşırıqlar gözləyir. Tədbirə qoşulan iştirakçılar məşhur xalçaçı rəssam Eldar Mikayılzadənin “Xalçanın yaranışı” adlı xalçasının rəsm pazllarını yığmaq imkanı əldə edəcəklər. Muzeyin əməkdaşı Püstə Ağayeva “Klassik və müasir süjetli xalçalar” mövzusunda mühazirə deyəcək və muzeyə mini ekskursiya təşkil olunacaq. Bundan əlavə, dəvət olunmuş aktyorlar tərəfindən uşaqlar üçün böyük maraq doğuracaq nağıllardan ibarət tamaşalar da təqdim ediləcək. Məlumat üçün bildirək ki, tədbirdə hemofiliya və talassemiya pasiyentləri tam olaraq ödənişsiz iştirak edə bilər. Qeyd edək ki, muzeydə “Ailə günü” tədbirinin hər ayın son şənbəsi “Açıq qapı” günü çərçivəsində keçirilməsi nəzərdə tutulur.xeber100.com

Milli Parkda rəqs üzrə açıq dərslər keçirilir

Dənizkənarı Milli Parkda rəqs üzrə açıq dərslər keçirilir. Azərbaycan Rəqs Assosiasiyasından (ARA) Azərtac-a bildirilib ki, dərslər pulsuz təşkil edilib. Açıq dərslər yay mövsümü ərzində Azərbaycan Gənclər İttifaqı (AGİ), ARA, Jam SS rəqs studiyası və Bulvar administrasiyasının dəstəyi ilə həyata keçirilir. Dərslərə qatılmaq istəyən şəxs hər bazar günü saat 18:00-dan 21:00-dək Dövlət Kukla Teatrının arxasındakı açıq meydançaya gələ bilər. Dərslər Jam SS studiyasının peşəkar müəllimləri tərəfindən keçirilir.xeber100.com

“Broadway Night Show” konserti keçiriləcək

Sentyabrın 24-də Heydər Əliyev Sarayında “Baku Sinfonietta” orkestrinin iştirakı ilə “Broadway Night Show” konserti keçiriləcək. Sarayın mətbuat xidmətindən Azərtac-a bildirilib ki, konsertdə tamaşaçılara sevilən “Walt Disney” musiqiləri təqdim olunacaq. Hər yaş dövründən tamaşaçılara maraqlı və baxımlı olan, rəngarəng süjet xətti ilə seçilən “Aslan Kral” (The Lion King), “Cəngəlliklər kitabı” (The Jungle Book), “Gözəl və bədheybət” (Beauty and the Beast), “Ələddin” (Aladdin), “Su Pərisi”(The Little Mermaid), “Mulan” (Mulan), “Pinokkio” (Pinocchio), “Anastasiya” (Anastasia) və s. ən məşhur “Walt Disney” cizgi filmlərindən kompozisiyalar səsləndiriləcək.xeber100.com