Niyazi – 104

Avqustun 20-də maestro Niyazinin anadan olmasının 104-cü ili tamam olur. Azərtac xəbər verir ki, bu münasibətlə Azərbaycan Dövlət Musiqi Mədəniyyəti Muzeyinin filialı olan Niyazinin mənzil-muzeyinin kollektivi Fəxri xiyabanda maestronun məzarını ziyarət edəcək və sənətkarın mənzil-muzeyində “Açıq qapı” günü keçiriləcək. "Açıq qapı” günü çərçivəsində qonaqlara maestro haqqında olan sənədli filmlər, onun konsertlərindən, “Rast” muğam-baleti və “Çitra” baletindən videogörüntülər təqdim olunacaq. Musiqisevərlər gün ərzində maestronun mənzil-muzeyini ziyarət etmək imkanı əldə edəcəklər.xeber100.com

“Tarixi roman janrının banisi” adlı tədbir keçirilib…

Səbail rayon MKS-nin 3 saylı filialında dünya şöhrətli ingilis yazıçı Valter Skottun anadan olmasının 245 illiyinə həsr olunmuş “Tarixi roman janrının banisi” adlı tədbir keçirilib. Kitabxanadan Azərtac-a bildirilib ki, tədbir Bakı Şəhər Mədəniyyət və Turizm Baş İdarəsinin təşkilatçılığı ilə reallaşıb. Tədbirin təşkil olunmasında məqsəd yerli oxucuları dünya ədəbiyyatının görkəmli nümayəndələrinin yaradıcılığı ilə tanış etməkdən ibarətdir. Tədbirdə oxuculara məlumat verilib ki, yaradıcılığa XVIII əsrin 90-ci illərində poeziya ilə başlamış yazıçı 1802-ci ildə “Şotlandiyanın sərhəd nəğmələrində” adlı xalq nəğmələri kitabını çap etdirib. Bu topludan sonra yazıçı romantik poemalar yazmaq qərarına gəlib. Tarixi roman janrının yaradıcısı olan ədib otuzdan çox roman və povestin müəllifi kimi dünyada tanınır. Mühüm sosial-tarixi konfliktlər, xalqın və dövlətin taleyi, cəmiyyətin inkişafı, milli və sinfi mübarizə problemləri ilə bağlılıq V.Skottun tarixi romanlarının əsas xüsusiyyətlərindən sayılır. Diqqətə çatdırılıb ki, V.Skottun yaradıcılığı Avropa və Amerika ədəbiyyatında sosial roman janrının inkişafına güclü təsir göstərib. Sonda oxucular yazıçının əsərləri ilə yaxından tanış olma imkanı əldə ediblər.xeber100.com

Rəsm müsabiqəsinə start verilib

Bakı Xətai Sənət Mərkəzində ümumrespublika akvarel rəsm müsabiqəsi keçiriləcək. Azərtac sənət mərkəzinin saytına istinadla bildirir ki, müsabiqə Mədəniyyət və Turizm Nazirliyi, Azərbaycan Dövlət Rəsm Qalereyası və Bakı Xətai Sənət Mərkəzinin birgə təşkilatçılığı ilə reallaşacaq. İştirak etmək istəyənlər oktyabrın 30-dək əsərlərini Bakı Xətai Sənət Mərkəzinə təqdim etməlidir. Müsabiqənin təşkil olunmasında məqsəd akvareli yaşatmaq və gələcək inkişafına stimul yaratmaqdan ibarətdir. Müsabiqə çərçivəsində istedadlı rəssamların yüksək bədii dəyərə malik sulu boya ilə çəkilmiş yeni əsərləri seçilərək sərgilənəcək. Müsabiqəyə akvarel texnikası ilə çəkilmiş, öncə sərgilənməmiş əsərlər qəbul olunacaq.xeber100.com

“Başlanğıc” adlı fərdi rəsm sərgisi açılacaq

Avqustun 26-da Azərbaycan Rəssamlar İttifaqının Vəcihə Səmədova adına sərgi salonunda gənc rəssam Leyla Əzimbəyovanın “Başlanğıc” adlı fərdi rəsm sərgisi açılacaq. Sərgi Mədəniyyət və Turizm Nazirliyi və Azərbaycan Rəssamlar İttifaqının birgə təşkilatçılığı ilə keçiriləcək. Rəssamlar İttifaqından Azərtac-a bildirilib ki, sərgidə nümayiş olunacaq sənət əsərləri gözəllik duyğusu, işıqlı rənglərin çoxluğu, həyatsevərlik və xeyirxahlıq kimi mövzuları əhatə edir. Həmçinin, əsərlərdə müxtəlif fəlsəfi yanaşma və emosional hisslərin rənglərlə ifadəsi də öz əksini tapıb.xeber100.com

“Mr. Azerbaijan 2016” model müsabiqəsi keçirilib

Bu il Bakıda gənc oğlanlar arasında “Mr. Azerbaijan 2016” model müsabiqəsi keçirilib. 6 ay davam edən müsabiqənin qalibi münsiflər və kənar səsvermənin nəticələrinə uyğun olaraq Pərviz Xəlilov olub. Müsabiqənin şərtlərinə görə sosial şəbəkələrdə aparılan səsvermə nəticəsində P. Xəlilov yüksək səslə qalibiyyətə doğru irəlləyib. O, münsiflər heyyətinin rəğbətini qazananaraq “Mr. Azerbaycan 2016” tituluna layiq görülüb.xeber100.com  

Antonio Banderas geyim kolleksiyası yaradır

56-cı doğum gününü qeyd edən məşhur aktyor Antonio Banderas əlamətdar gündə ilk kişi geyimi kolleksiyasını təqdim edib. Londonun prestijli Sentral Sent-Martins (Central St.Martins College) kollecində təhsilini başa vuran Banderas dizayner peşəsinə yiyələnməyi düşünür. İlk kolleksiyasını hazırlayarkən ispaniyalı aktyor, rejissor, rəqqas, müğənni və model - bunlar hamısı Banderasa aiddir, Skandinaviyanın Selected Homme (Seçilmiş kişi) istehsalçısı ilə əməkdaşlıq edib. Antonio Banderasın geyim kolleksiyası "Ehtiras. Ruh. Həyat" adlanır. Onun bildirdiyinə görə, məhz cins şalvar, ensiz palto, klassik köynək və pololar, xüsusi kostyum və dəri pencəklər ehtirası hər şeydən yaxşı büruzə verir. Qeyd edək ki, Banderas 2014-cü ildə keçmiş həyat yoldaşı Melani Qriffitlə birgə çəkildiyi "Sığortaçı" filmindən sonra daha çox epizodik rollarla yer alıb.xeber100.com

“Uçmağı bizimlə öyrən” adlı uşaq əyləncə festivalı təşkil olunacaq

Sentyabrın 10-da YARAT Müasir İncəsənət Məkanında “Uçmağı bizimlə öyrən” adlı uşaq əyləncə festivalı təşkil olunacaq. Azərtac YARAT Müasir İncəsənət Məkanın “facebook”dakı səhifəsinə istinadla bildirir ki, festival uşaqlara yaratmağı öyrətmək, onların gələcəyinin daha da parlaq olmasına çalışmaq məqsədi daşıyır. Belə ki, festival çərçivəsində balaca fidanları macəra və həyəcan dolu bir gün gözləyir.xeber100.com

“Avropa şəhərciyi – 2016” festivalı keçiriləcək

Avropa İttifaqının (Aİ) Azərbaycandakı nümayəndəliyi ittifaqa üzv ölkələrin Bakıdakı səfirlikləri ilə birlikdə və Dənizkənarı Bulvar İdarəsinin tərəfdaşlığı ilə “Avropa şəhərciyi - 2016” festivalı keçirəcək. Aİ-nın Azərbaycandakı nümayəndəliyindən Azərtac-a bildirilib ki, tədbir oktyabrın 1-də Dənizkənarı Milli Parkda təşkil olunacaq. Bu il Avropa İttifaqının ölkəmizdəki nümayəndəliyi Azərbaycan Respublikası ilə mövcud əməkdaşlığın 25 illiyini ittifaqa üzv ölkələrin Bakıdakı səfirlikləri ilə bir neçə tədbir çərçivəsində qeyd edir. Tədbirlərdən biri də 2013-cü ildən etibarən ardıcıl olaraq İçərişəhərdə keçirilən “Avropa şəhərciyi”dir. “Avropa şəhərciyi” bütün əhali üçün açıq ictimai məkanda təşkil edilən bir mərasimdir. Festivalın keçirilməsində məqsəd Avropa İttifaqına üzv ölkələrə öz mədəniyyət və ənənələrini nümayiş etdirmək üçün imkan yaratmaqdır. Bir gün davam edəcək bu festivala heç kəs laqeyd qala bilməyəcək. Belə ki, “Avropa şəhərciyi - 2016” festivalı çərçivəsində uşaq və böyüklər üçün çoxsaylı müsabiqə və viktorinalar, Avropa ölkələrinə virtual səyahət, milli rəqs və karaoke ifaları, feys-art, şahmat yarışı və s. təşkil olunacaq. Müsabiqə və viktorinaların qaliblərini isə xüsusi hədiyyələr gözləyir. Festivala gələn qonaqlar “Qaspaço” və “Paella” kimi tanınmış Avropa yeməklərinin hazırlanması üzrə kulinariya şousuna tamaşa etməklə yanaşı, pizza xəmirinin virtuoz-aşpaz tərəfindən havada fırladılması şousunu yaxından izləyə biləcəklər. “Avropa şəhərciyi - 2016” festivalının səhnəsində uşaqdan tutmuş böyüyə kimi hamını bir sıra sürprizlər gözləyir. Tədbirdə xüsusi olaraq uşaqlar üçün sehrbazın çıxışı və müxtəlif şoular təşkil olunacaq. Ardınca “Səs Azərbaycan” layihəsinin iştirakçıları öz ifalarını təqdim edəcəklər. Festival Avropadan dəvət olunmuş estrada ulduzunun möhtəşəm konsert proqramı ilə yekunlaşacaq.xeber100.com

22-ci Saraybosniya Film Festivalının tarixi açıqlanıb

Bu il Bosniya və Herseqovinada keçirilməsi nəzərdə tutulan 22-ci Saraybosniya Film Festivalının tarixi açıqlanıb. Anadolu xəbər agentliyinin məlumatına görə, festivalın açılış mərasimi avqustun 12-də olacaq. Həmçinin festival çərçivəsində veriləcək “Saraybosniyanın ürəyi” mükafatına sahib olan aktyorun adı da açıqlanıb. Bu, dünya şöhrətli amerikalı aktyor Robert de Nirodur. Mükafat aktyora festivalın açılış mərasimində təqdim olunacaq. Qeyd edək ki, bu mükafata bundan əvvəl dünya şöhrətli aktyorlar Ancelina Coli, Benicio Del Toro, Gael Garcia Bernal, Stiv Buscemi, Atom Egoyani, Jafar Panahi, Mike Lay, Bəl Tarr və Danis Tanovic layiq görülüb. Festival avqustun 20-dək davam edəcək.xeber100.com

Beynəlxalq Turizm Filmləri Festivalı keçiriləcək

2017-ci ilin iyun ayında Bakı Beynəlxalq Turizm Filmləri Festivalı keçiriləcək. Azərtac xəbər verir ki, bu barədə məlumat ölkəmizin üzv olduğu Beynəlxalq Turizm Filmləri Festivalları Komitəsinin (CIFFT) saytında yer alıb. Festivalda iştirak üçün 2017-ci il martın 31-dək müraciət etmək mümkündür. Festivalın məqsədi turizmin müxtəlif sahələrinə həsr olunan, daxili və beynəlxalq turizmin inkişafına təkan verə biləcək filmləri təbliğ etmək, ən yaxşı filmlərin müəlliflərini həvəsləndirməkdir. Festival tarixi və mədəni irsin beynəlxalq mərkəzlərindən biri olan Azərbaycanın turizm potensialına diqqət cəlb etməyi qarşısına məqsəd qoyub.xeber100.com