Dünya Səhiyyə Təşkilatının məlumatına görə…

Hər il oktyabrın 10-u Dünya Psixi Sağlamlıq Günü kimi qeyd edilir. Bu gün 1992-ci ildən Ümumdünya Psixi Sağlamlıq Federasiyasının təşəbbüsü ilə BMT-də qeyd olunan beynəlxalq günlər siyahısına daxil edilib. Dünya Səhiyyə Təşkilatının (DST) məlumatına görə, hazırda dünyada 450 milyondan çox insan psixi xəstəlikdən əziyyət çəkir. DST-nin hesablamalarına görə, fövqəladə hallarda psixi pozuntu göstəriciləri, bir qayda olaraq 2 dəfə artır. Psixi pozuntular infeksion və qeyri-infeksion xəstəliklərin inkişafının risk amillərinə aid edilir. Dünya Psixi Sağlamlıq Gününün məqsədi psixi sağlamlıq probleminə yanaşmada dünya əhalisinin məlumatlılıq səviyyəsini yüksəltməkdir. Bu gün psixi sağlamlığın möhkəmləndirilməsi istiqamətində qlobal səviyyədə daha çox açıq müzakirələrə imkan yaradır.xeber100.com

Səhiyyə Nazirliyinin məlumatı…

Ölkəmizdə nikaha daxil olmaq istəyənlərin icbari tibbi müayinəsi tətbiq olunduğu vaxtdan bu ilin sentyabr ayının sonuna qədər 197554 nəfər tibbi müayinədən keçib. Səhiyyə Nazirliyinin mətbuat xidmətindən Azərtac-a verilən məlumata görə, yalnız sentyabr ayı ərzində nikaha daxil olmaq istəyən 10990 nəfər müayinə edilib. İndiyədək müayinələrdən keçmiş şəxslərdən bəzilərində müxtəlif xarakterli infeksiyalar aşkarlanıb. Ümumilikdə isə müayinədən keçən şəxslərin əksəriyyətinin sağlamlıq durumunun qənaətbəxş olduğu müəyyən edilib. Müayinələr nəticəsində ailə qurmaq istəyən 9131 nəfərdə talassemiya daşıyıcılığı, 749 nəfərdə sifilis, 133 nəfərdə isə QİÇS aşkar olunub. Qeyd edək ki, “Ailə Məcəlləsində dəyişikliklərin edilməsi haqqında” Qanunun tətbiqi ilə əlaqədar 2015-ci il iyunun 1-dən etibarən nikaha daxil olmaq istəyən vətəndaşlar mütləq tibbi müayinədən keçməlidirlər. Bu məqsədlə səhiyyə müəssisələrində hər cür zəruri şərait yaradılıb. Tibbi müayinə və məsləhətlər nikaha daxil olmaq istəyən şəxslərin və ya onlardan birinin yaşayış yeri üzrə Səhiyyə Nazirliyi tərəfindən müəyyən edilmiş dövlət və bələdiyyə tibb müəssisəsində həyata keçirilir.xeber100.com

Beynəlxalq Həkimlər Günü…

Dünyanın bir çox ölkələrində hər il oktyabr ayının birinci bazar ertəsi Beynəlxalq Həkimlər Günü kimi qeyd olunur. Bu gün bütün dünya həkimlərinin həmrəylik və birliyini nümayiş etdirir. Çünki həkimin əsas məqsədi istənilən millətdən olan pasiyentlərin sağlamlığını qorumaq və yaxşılaşdırmaqdır. Bu bayramın yaradılmasının təşəbbüskarları Dünya Səhiyyə Təşkilatı və “Sərhədsiz həkimlər” beynəlxalq tibbi humanitar təşkilatıdır. Məhz bu müstəqil, qeyri-hökumət təşkilatı olan “Sərhədsiz həkimlər”in əməkdaşları insanlara milli və dini mənsubiyyətinə fərq qoymadan tibbi yardım edir, müxtəlif epidemiyaların, silahlı münaqişələrin və təbii fəlakətlərin qurbanlarına yardım göstərir. Həmçinin könüllülər təşkilatı QİÇS və narkomaniya ilə mübarizəyə yönəlmiş profilaktik və maarifləndirmə işi ilə məşğuldur.xeber100.com

Sosial layihəyə start verilib

“Active Mom's Club” ictimai təşkilatı “Ana südü ilə qidalanma” adlı sosial layihə həyata keçirir. Təşkilatdan Azərtac-a bildirilib ki, layihənin əsas məqsədi ana südü ilə qidalanmanın təkcə körpələr üçün deyil, həm də analar üçün faydalarını ictimaiyyətin diqqətinə çatdırmaqdır. Təbiətdə məhz körpə üçün ana südündən daha yaxşı qida mövcud deyil, eyni zamanda, ana südü ilə qidalanma zamanı ana ilə körpə arasındakı əlaqə körpənin ruhi inkişafı üçün çox vacibdir. Dünya Səhiyyə Təşkilatının (DST) mütəxəssisləri yeni doğulan körpələrin 6 ayına kimi, daha sonra isə əlavə qidalar verməklə 2 il ana südü ilə qidalanmasını məsləhət görürlər. Ancaq DST-nin statistikasına əsasən, dünyada orta hesabla yalnız 38 faiz uşaq 6 aya qədər ana südü ilə qidalanır. Bu problem Azərbaycanda da olduqca aktualdır və ictimaiyyətə, xüsusilə də gənc valideynlərə bu barədə məlumatların çatdırılmasının yeni üsullarına ehtiyac duyulur. Active Mom`s Club”, həmçinin “Facebook” sosial şəbəkəsində özündə 3 min qadın üzvü birləşdirən qapalı qrup yaradıb.xeber100.com

Beynəlxalq elmi-praktiki konfrans keçirilib

Oktyabrın 1-də Azərbaycan Ürək və Damar Cərrahiyyəsi Cəmiyyəti (AÜDCC) Dünya Ürək Günü münasibətilə Bakıda “Həyatına enerji qat!” adlı beynəlxalq elmi-praktiki konfrans təşkil edib. Azərtac xəbər verir ki, konfransda ölkəmizdə fəaliyyət göstərən bütün dövlət və özəl klinikaların kardiologiya və ürək-damar cərrahiyyəsi sahəsində çalışan mütəxəssisləri iştirak ediblər. “Konfransda qardaş Türkiyədən dəvət etdiyimiz professor heyəti də iştirak edir. Kardiologiyanın və kardiocərrahiyyənin ən aktual məsələlərini yerli və xarici həmkarlarımızla müzakirə edəcəyik. Bunun paytaxt Bakıda və regionlarda fəaliyyət göstərən həkimlərə faydalı olacağını düşünürəm”, - deyə Mərkəzi Klinik Xəstəxananın baş həkimi, AÜDCC-nin sədri, tibb elmləri doktoru Kamran Musayev tədbirin açılışında çıxışında bildirib. Konfransda kardioloqların ürək-damar cərrahiyyəsində tətbiq olunan ən son yeniliklərlə bağlı məruzələri dinlənilib, fikir mübadiləsi aparılıb.xeber100.com

Əhaliyə tibbi xidmətin keyfiyyətinin yaxşılaşdırılması…

Sentyabrın 30-da Səhiyyə Nazirliyinin Sertifikasiya Komissiyasında əhaliyə tibbi xidmətin keyfiyyətinin yaxşılaşdırılmasına və peşəkar kadrların hazırlanmasına istiqamətlənən tədbirlərə həsr olunmuş mətbuat konfransı keçirilib. Mətbuat konfransında qeyd olunub ki, son illər ölkəmizin səhiyyə sahəsində zəruri islahatlar həyata keçirilir, tibb müəssisələri müasir avadanlıqla təchiz edilir, bu avadanlıqla işləyən tibb heyətinin bilik və təcrübə səviyyəsinə xüsusi diqqət yetirilir. Azərtac xəbər verir ki, Azərbaycanda həkimlərin sertifikasiyası prosesi 2011-ci ilin yanvar ayından başlayıb. İmtahanlar icbari qaydada aparılır. Sertifikasiyadan keçən mütəxəssislər və orta tibb işçiləri beş il ərzində tibbi praktika ilə məşğul olmaq hüququna malikdirlər. Vurğulanıb ki, bu prosesdə heç bir yaş senzi, habelə tibbi təhsilin alındığı ölkəyə tələblər yoxdur. Xarici ölkənin ali tibb məktəbinin məzunu olan vətəndaşların diplomları sertifikasiyadan əvvəl Təhsil Nazirliyinin nostrifikasiyasından keçməlidir. Sonra onlar sertifikat almaq üçün imtahana buraxılırlar. Test bazası hər il 20 faiz yenilənir. Sertifikasiya prosesini daha da təkmilləşdirmək və şəffaflığını təmin etmək üçün Nazirlər Kabineti 2015-ci il 1 dekabr tarixli 371 nömrəli Qərarı ilə “Praktik tibb və ya əczaçılıq fəaliyyəti ilə məşğul olan şəxslərin (işçilərin) sertifikasiyası Qaydası”na sənəd qəbulu və imtahan proseduru ilə bağlı müəyyən dəyişikliklər edib. Sertifikasiyadan keçməyən şəxslərin tibb və əczaçılıq fəaliyyəti ilə məşğul olması qadağandır. Qeyd olunub ki, imtahanlar yalnız Azərbaycan dilində aparılır. Bu günə qədər 22614 ali və 32272 orta tibb işçisinə sertifikasiya şəhadətnaməsi verilib.xeber100.com

Beynəlxalq konfrans keçiriləcək

Sentyabrın 29-u Dünya Ürək Günü kimi bütün dünyada qeyd ediləcək. Bu günlə əlaqədar Azərbaycan Ürək və Damar Cərrahiyyəsi Cəmiyyəti də ölkəmizdə bir sıra tədbirlər həyata keçirir. Cəmiyyətdən Azərtac-a bildiriblər ki, sentyabrın 29-da “Park Bulvar”da, sentyabrın 30-da “Metropark”da “Sağlam ürək” həftəsi çərçivəsində aksiyalar keçiriləcək. Aksiyalar zamanı Dünya Ürək Gününün mahiyyəti, ürək sağlamlığının qorunması üçün vacib olan amillər barədə ictimaiyyətə məlumat veriləcək, alış-veriş mərkəzlərində insanların ilkin tibbi müayinəsi, qanda şəkərin və xolesterolun miqdarı ölçüləcək, ürək sağlamlığının qorunması üçün tam ödənişsiz həkim məsləhətləri veriləcək. Oktyabrın 1-də isə Azərbaycan Ürək və Damar Cərrahiyyəsi Cəmiyyəti Səhiyyə Nazirliyi ilə birgə “Həyatına enerji qat!” adlı beynəlxalq elmi-praktiki konfrans təşkil edəcək. Mərkəzi Klinik Xəstəxananın baş həkimi, Azərbaycan Ürək və Damar Cərrahiyyəsi Cəmiyyətinin (AÜDCC) sədri, tibb elmləri doktoru Kamran Musayev bildirib ki, konfransda ölkəmizdə fəaliyyət göstərən bütün dövlət və özəl klinikaların kardiologiya və ürək-damar cərrahiyyəsi sahəsində çalışan mütəxəssisləri iştirak edə biləcək.xeber100.com

Bakı Sağlamlıq Mərkəzi hesabat konfransı keçirib

Sentyabrın 28-də Azərbaycanın ən böyük tibb müəssisəsi olan Bakı Sağlamlıq Mərkəzi kütləvi informasiya vasitələrinin nümayəndələri üçün hesabat konfransı keçirib. Azərtac xəbər verir ki, mərkəzin direktoru Hikmət Həsənov Bakı Sağlamlıq Mərkəzinin Prezident İlham Əliyevin 2010-cu il 6 avqust tarixli Sərəncamı əsasında inşa olunduğunu diqqətə çatdırıb. Bildirib ki, 50 min kvadratmetr sahəsi olan bu tibb müəssisəsi 550 çarpayılıqdır. Burada tibbin ən son elmi-texniki yenilikləri tətbiq olunur. Mərkəzdə tibbin bütün sahələri üzrə kompleks müayinə və müalicələrin aparılması üçün hər cür şərait yaradılıb. Bütün şöbələr dünyanın ən müasir tibbi texnika və avadanlığı ilə təchiz olunub. Bu texnikanın bir çoxu ölkəmizin tibb sistemində ilk dəfə tətbiq edilir. H.Həsənov qeyd edib ki, mərkəzdə 136 həkim, 59 rezident və 257 tibb bacısı əhalinin sağlamlığının qorunmasına xidmət edir.xeber100.com      

Almaniyanın təcrübəsindən istifadə…

Səhiyyə naziri Oqtay Şirəliyevin Almaniyanın Azərbaycandakı səfiri Mixayel Kinsqrabla görüşündə hər iki ölkə arasında səhiyyə və tibb elmi sahəsində mövcud əlaqələrdən söhbət açılıb və gələcək perspektivlər müzakirə edilib. Səhiyyə Nazirliyin mətbuat xidmətindən Azərtac-a verilən məlumata görə, görüşdə səhiyyə naziri Oqtay Şirəliyev hazırda ölkələrimiz arasında əməkdaşlığın ən məhsuldar səviyyədə davam etdiyini bildirib. Qeyd olunub ki, onlarla azərbaycanlı müdavim hər il Almaniyanın ən nüfuzlu universitet klinikalarında səhiyyənin müxtəlif prioritet sahələri üzrə təkmilləşdirmə kurslarına göndərilir. Eyni zamanda, Almaniyanın nüfuzlu universitet klinikalarından gələn professor və müəllim heyəti ölkəmizdə keçirilən seminarlarda, elmi konfranslarda iştirak edirlər. Ölkəmizdə yeni tikilən klinikaların planlaşdırılması və layihələrinin hazırlanmasında Almaniyanın müsbət təcrübəsindən istifadə olunduğu diqqətə çatdırılıb. Vurğulanıb ki, Almaniyada istehsal olunan bir çox dərman vasitələri ölkəmizdə dövlət qeydiyyatından keçirilib və əczaçılıq marketlərinə çıxarılıb. Bundan əlavə, onlarla rezident təhsilini Almaniyanın universitet klinikalarında davam etdirib. M.Kinsqrab Azərbaycanda uğurla aparılan səhiyyə islahatlardan məmnunluqla danışıb. Qeyd edib ki, hazırda təcili tibbi yardım xidmətində istifadə edilən ambulansların Almaniyadan gətirilməsi böyük etimad və xoş münasibətlərin nəticəsidir. Görüşdə, həmçinin icbari tibbi sığortanın tətbiqi ilə əlaqədar Almaniyadan mütəxəssislərin Azərbaycana dəvət olunması məsələsi də gündəmə gətirilib.xeber100.com

“EstePerio-2016” beynəlxalq konqresi keçiriləcək

Səhiyyə Nazirliyinin dəstəyi ilə Əziz Əliyev adına Azərbaycan Dövlət Həkimləri Təkmilləşdirmə İnstitutunda (ADHTİ) oktyabrın 28-29-da "EstePerio-2016" ikinci beynəlxalq parodontologiya və estetik stomatologiya konqresi keçiriləcək. Nazirliyin mətbuat xidmətindən Azərtac-a bildirilib ki, konqres Azərbaycan Parodontologiya Cəmiyyəti, Azərbaycan Estetik Stomatologiya Assosiasiyası və ADHTİ-nin stomatologiya və üz-çənə cərrahiyyəsi kafedrasının birgə əməkdaşlığı ilə təşkil ediləcək. Konqresin məqsədi Azərbaycanda parodontologiya və estetik stomatologiya sahəsinin inkişaf etdirilməsinə yardım etmək, dövlət və özəl sektorda fəaliyyət göstərən stomatoloqlar arasında maarifləndirmə işi apararaq onların bilik və təcrübələrini təkmilləşdirməkdir. Tədbirə Böyük Britaniya, Belçika, Türkiyə, Rusiya və digər ölkələrdən parodontologiya və estetik stomatologiya sahəsində kliniki və elmi qabiliyyətlərinə görə beynəlxalq səviyyədə lider kimi tanınmış mütəxəssislər dəvət olunublar. Bu mütəxəssislərlə yanaşı, ölkəmizdə və xaricdə təhsil almış Azərbaycan alimləri və stomatoloqları da konqresin işində iştirak edəcəklər. Konqresdə elmi proqramla yanaşı, həkimlərimizin bu sahədəki praktik biliklərinin təkmilləşdirilməsi məqsədilə ustad dərsləri də keçiriləcək.xeber100.com