“Financial Times” qəzeti yazır…

Avropa İttifaqı Rusiyaya qarşı yeni sanksiyaların olmayacağını düşünür, çünki yeni məhdudiyyətlər özü ilə daha çox istisnalar gətirəcək. “Financial Times” qəzeti bu barədə öz mənbələrinə istinadla məlumat yayıb. Ekspertlər hesab edir ki, Avropa İttifaqının bir neçə ölkəsi Rusiya iqtisadiyyatının sanksiyalara məruz qalmayan sahələri olmadan mövcudluğunu davam etdirə bilməz. Nəşrin fikrincə, Rusiyaya qarşı yeni məhdudiyyətlərdə çox güman ki, yalnız fiziki şəxslərin siyahısı genişləndiriləcək və artıq qüvvədə olan qadağalar sərtləşdiriləcək. Qeyd edək ki, Avropa Komissiyasının rəhbəri Ursula fon der Lyayen Aİ-nin mart ayındakı sammiti çərçivəsində keçirilən mətbuat konfransda Rusiyaya qarşı 11-ci sanksiyalar paketinin artıq tətbiq olunan məhdudiyyətlərdən yayınma ilə mübarizəyə yönələcəyini bildirib.xeber100.com

Avropa İttifaqının ballistik raketinin buraxılışını pisləyən bəyanatında

Şimali Koreyanın kütləvi qırğın silahlarının çatdırılması vasitələrini inkişaf etmək niyyəti beynəlxalq sülh və təhlükəsizliyi təhdid edir. Bu ölkə BMT Təhlükəsizlik Şurasının qətnamələrini pozan bütün qeyri-qanuni və təhlükəli fəaliyyətləri dayandırmalıdır. Bu barədə Avropa İttifaqının (Aİ) Şimali Koreyanın yeni tipli uzaqmənzilli ballistik raketinin buraxılışını pisləyən bəyanatında yer alıb. Bəyanatda Aİ Şimali Koreyanın bütün nüvə, digər kütləvi qırğın silahlarından, ballistik raket proqramlarından tamamilə imtina edərək BMT Təhlükəsizlik Şurasının qətnamələrindən irəli gələn öhdəliklərinə dərhal əməl olunması zərurəti qeyd edilib. Brüssel hesab edir ki, bu, Koreya yarımadasında davamlı sülh və təhlükəsizliyin yeganə yoludur. “Şimali Koreya Nüvə Silahlarının Yayılmaması Müqaviləsinə əsasən nüvə silahına malik dövlət statusuna və ya bu məsələ ilə bağlı hər hansı digər xüsusi statusa malik ola bilməz və heç vaxt olmayacaq”, - bəyanatda deyilir. Bundan əvvəl Şimali Koreyanın yeni qitələrarası ballistik raketi (Hvason-18) sınaqdan keçirdiyi barədə məlumat yayılmışdı.xeber100.com

Birləşmiş Millətlər Təşkilatının Təhlükəsizlik Şurasının bəyanatı

Birləşmiş Millətlər Təşkilatının Təhlükəsizlik Şurası Sudandakı münaqişə tərəflərini dərhal hərbi əməliyyatları dayandırmağa və dialoqa qayıtmağa çağırıb. Bu barədə təşkilatın müvafiq bəyanatında deyilir. Təhlükəsizlik Şurasının üzvləri Sudan Silahlı Qüvvələri ilə Çevik Reaksiya Qüvvələri arasında baş verən hərbi toqquşmalardan dərin narahat olduqlarını və mülki əhali də daxil olmaqla insanların həlak olması və yaralanmasından təəssüfləndiklərini bildiriblər. Qeyd edək ki, Sudanda xüsusi təyinatlı qüvvələrlə ordu birləşmələri arasında toqquşmalarda ölənlərin sayı 56-ya çatıb.xeber100.com

Panamanın cənub sahillərində zəlzələ qeydə alınıb

Panamanın cənub sahillərində 6,6 bal gücündə zəlzələ qeydə alınıb. Bu barədə ABŞ-ın Geoloji xidməti bildirib. Yeraltı təkanların episentri David şəhərindən 94 km cənubda yerləşib. Zəlzələnin ocağı 10 km dərinlikə olub. Xəsarət alanlar və dağıntılar barədə məlumat daxil olmayıb. Sunami təhlükəsi elan edilməyib.xeber100.com

274 milyon avro məbləğində yeni yardım paketi ayrılacaq

Niderland Ukraynaya 274 milyon avro məbləğində yeni yardım paketi ayıracaq. TASS xəbər verir ki, ayrılan məbləğin təxminən 180 milyon avrosu humanitar yardım, səhiyyə, enerji təchizatı, mənzil və infrastrukturun bərpası və kənd təsərrüfatı torpaqlarının minalardan təmizlənməsinə yönəldiləcək. 94 milyon avro isə Ukrayna ilə NATO arasında əməkdaşlığın gücləndirilməsi və Ukrayna mədəniyyətinin qorunmasına xərclənəcək. Qeyd edək ki, bu yardım Niderland hökumətinin bu il Ukraynaya dəstək üçün ayırdığı 2,5 milyard avroya daxildir.xeber100.com

“Su-27” və “Miq-29”dan ibarət 5 qırıcı briqadası yaradıb

Ukrayna Silahlı Qüvvələrinin Hərbi Hava Qüvvələri hazırda “Su-27” və “Miq-29” qırıcılarından ibarət beş briqadaya malikdir. Bu barədə Ukrayna Silahlı Qüvvələrinin Hərbi Hava Qüvvələrinin spikeri Yuri İqnatın telemarafonun efirində məlumat verib. "Döyüş təyyarələrinin Ukrayna verilməsi tarixi addımdır. Bu gün belə təyyarələrdən ibarət beş qırıcı briqadamız var: iki “SU-27” və üç “MİQ-29” briqadası, deyə İqnat bildirib. Onun sözlərinə görə, bu tip silahların ötürülməsi istiqamətində atılan ilk addım digər ölkələr üçün bir işarədir. "Növbəti addım kimi müasir qabaqcıl aviasiya platformalarının göndərilməsi olacaq", - deyə spiker vurğulayıb.xeber100.com

G7 ölkələrinin ədliyyə nazirləri iyul ayında Tokioda görüşəcək

Yeddilər qrupu (G7) ölkələrinin ədliyyə nazirləri iyul ayında Tokioda keçiriləcək görüşdə Ukraynaya təcavüz səbəbindən Rusiyaya qarşı xüsusi tribunalın qurulmasını müzakirə edə bilərlər. Ədliyyə məsələləri üzrə Avropa Komissarı Didye Reynders bunu Kyodo agentliyinə müsahibəsində deyib. O, hazırda Yeddilər qrupuna sədrlik edən Yaponiyanın öz statusundan istifadə edərək tribunalın yaradılması istiqamətində Asiyanın digər ölkələrinə təsir göstərəcəyinə və beynəlxalq ictimaiyyətin dəstəyini qazanacağına ümidvar olduğunu bildirib. Didye Reyndersin sözlərinə görə, hazırda Avropa İttifaqı Ukrayna da daxil olmaqla, müxtəlif ölkələrdən olan hakimlərin iştirakı ilə “xüsusi məhkəmənin” və ya “hibrid məhkəmənin” qurulması məsələsinin müzakirə edilməsi üçün ədliyyə orqanları və Beynəlxalq Cinayət Məhkəməsi ilə birgə çalışır. Qeyd edək ki, martın 17-də Beynəlxalq Cinayət Məhkəməsi ukraynalı uşaqların “qanunsuz deportasiyası” ittihamı ilə Rusiyanın dövlət başçısı Vladimir Putinin və Rusiya Prezidenti yanında uşaq hüquqları üzrə müvəkkil Mariya Lvova-Belovanın həbsinə order verib.xeber100.com    

Aprelin 2-də prezident seçkilərinin ikinci turu keçirilir

Aprelin 2-də Monteneqroda prezident seçkilərinin ikinci turu keçirilir. Martın 19-da keçirilən seçkilərin ilk turunda ən çox səs toplayan hazırki Prezident Milo Cukanoviç və Avropa Hərəkatının rəhbəri Yakov Milatoviç ikinci turda mübarizə aparırlar. Dövlət Seçki Komissiyasının məlumatına görə, 542 min 154 nəfər ölkə daxilində və xaricdə səsvermə hüququna malikdir. 61 yaşlı Milo Cukanoviç 1990-cı ildə çoxpartiyalı sistemə keçən Monteneqroda altı dəfə Baş nazir, iki dəfə (1997-2003 və 2018-2023-cü illər) prezident olub. Onun səlahiyyət müddəti mayın 19-da başa çatacaq. Xatırladaq ki, prezident seçkilərinin ilk turunda seçici fəallığı 63,1 faiz olub, M.Cukanoviç səslərin 35,3 faizini, Y.Milatoviç isə 29,2 faizini toplayıb.xeber100.com

Finlandiyada parlament seçkilərində səsvermə başa çatıb

Finlandiyada parlament seçkilərində səsvermə başa çatıb. Xarici KİV-lər xəbər verir ki, bu barədə ölkənin Ədliyyə Nazirliyi məlumat yayıb. İlkin nəticələrin bazar günü axşam açıqlanacağı gözlənilir. Yekun nəticələr aprelin 5-də açıqlanacaq. Seçkilərdə qeydə alınmış 22 partiyadan 2424 namizəd iştirak edib. Martın 22-dən 28-dək keçirilmiş erkən səsvermə zamanı sakinlərin 39,8 faizi (1 701 525 seçici) öz mövqeyini ifadə edib ki, bu da ölkə üçün yeni rekorddur. Finlandiyada əvvəlki parlament seçkiləri 2019-cu ilin yazında keçirilib. Nəticədə beş partiyanın nümayəndələrindən hökumət formalaşdırılmışdı.xeber100.com

Mayın 14-də Türkiyədə prezident və parlament seçkiləri keçiriləcək

Türkiyənin Ali Seçki Şurası (MSK) qarşıdakı prezident seçkiləri üçün səsvermə bülletenlərində namizədlərin adlarının yer alacağı sıranın müəyyən edilməsi üzrə püşkatma keçirib. Anadolu agentliyi xəbər verir ki, püşkatmanın nəticəsinə əsasən, Türkiyənin hazırkı Prezidenti Rəcəb Tayyib Ərdoğanın adı bülletendə birinci yazılacaq. İkinci yerdə Məmləkət Partiyasının sədri Muharrem İncenin, üçüncü yerdə Millət İttifaqının namizədi və Cümhuriyyət Xalq Partiyasının sədri Kemal Kılıçdaroğlunun, dördüncü – sonuncu sırada isə Ata İttifaqının namizədi Sinan Oğanın adı qeyd olunacaq. Mayın 14-də Türkiyədə prezident və parlament seçkiləri keçiriləcək. Əgər prezident seçkilərinin ilk turunda namizədlərin heç biri 50 faizdən çox səs toplaya bilməsə, mayın 28-də səsvermənin ikinci turu baş tutacaq.xeber100.com