“Oskar” mükafatının 90-cı təqdimat mərasimində

“Suyun forması” filmi “Oskar” mükafatının 90-cı təqdimat mərasimində “Ən yaxşı film” nominasiyasında qalib gəlib. 2017-ci ildə kinematoqraf sahəsində xidmətlərə görə Amerika Kino Akademiyasının “Oskar” mükafatının təqdimat mərasimi martın 4-də Los-Anceles şəhərində, Hollivudun dünya şöhrətli “Dolbi” teatrında keçirilib. Mərasimi komik aktyor Cimmi Kimmel aparıb.Sem Rokuel “Ebbinqin sərhədində üç bilbord, Missuri” filmindəki roluna görə “Ən yaxşı ikinci dərəcəli aktyor”; Ellison Henni “Tonya hamıya qarşı” filmindəki roluna görə “Ən yaxşı ikinci dərəcəli aktrisa”, Heri Oldman “Qaranlıq zamanlar” filmində Uinston Çörçil roluna görə “ Ən yaxşı aktyor”, Frensis Makdormand “Ebbinqin sərhədində üç bilbord, Missuri” filmində Mildred Heyz roluna görə “Ən yaxşı aktrisa” nominasiyalarında qalib gəliblər.Bundan əlavə, “Ən yaxşı qısametrajlı animasiya filmi” nominasiyasında “Əziz basketbol”, “Ən yaxşı tammetrajlı animasiya filmi” nominasiyasında “Kokonun sirri”, “Ən yaxşı qısametrajlı sənədli film” nominasiyasında “Cənnət 405-ci şosedəki tıxacdır”, “Ən yaxşı tammetrajlı sənədli film” nominasiyasında “İkar”; “Ən yaxşı qısametrajlı bədii film” nominasiyasında “Lal uşaq”, “Xarici dildə ən yaxşı film” nominasiyasında çilili rejissor Sebastyan Lelionun “Fantastik qadın” filmləri “Oskar”a layiq görülüblər.Cordan Pil “Rədd ol” filminin ssenarisinə görə “Ən yaxşı orijinal ssenari”, bəstəkar Aleksandr Despla “Suyun forması” filmi üçün yazdığı musiqiyə görə “Ən yaxşı film musiqisi”, Kristen Anderson-Lopes və Robert Lopes “Kokonun sirri” filmi üçün yazdıqları ”Remember Me” (“Məni xatırla”) mahnısına görə “Ən yaxşı film mahnısı”, meksikalı rejissor Gilyermo Del Toro “Suyun forması” filminə görə “Ən yaxşı rejissor işi” nominasiyalarında “Oskar” mükafatının qalibi olublar.xeber100.com

5,6 bal gücündə zəlzələ baş verib

Yaponiyanın cənub-qərbində yerləşən Okinava prefekturası yaxınlığında 5,6 bal gücündə zəlzələ baş verib.NHK telekanalı xəbər verir ki, yeraltı təkanlar martın 2-nə keçən gecə yerli vaxtla saat 22:40-da qeydə alınıb. Zəlzələnin episentrinin İriomote adası yaxınlığında, ocağının isə 15 kilometr dərinlikdə yerləşdiyi bildirilir.Dağıntılar və zərərçəkənlər barədə məlumat verilmir. Sunami təhlükəsi elan edilməyib.xeber100.com

Yaponiya hökuməti qərar qəbul edib

Yaponiya hökuməti fevralın 26-da Papua-Yeni Qvineyada baş vermiş güclü zəlzələnin nəticələrinin aradan qaldırılması üçün bu ölkəyə yardım göstərilməsi barədə qərar qəbul edib.Yaponiya Xarici İşlər Nazirliyindən Azərtac-ın bu ölkədəki bürosuna verilən məlumatda bildirilir ki, yardımlar Yaponiya Beynəlxalq Əməkdaşlıq Agentliyinin (JİCA) xətti ilə göstəriləcək.Məlumatda qeyd edilir ki, Yaponiya hökuməti Papua-Yeni Qvineya dövlətinin xahişini nəzərə alaraq yaranmış humanitar problemlərin aradan qaldırılması üçün lazımi yardımı göstərəcək.Xatırladaq ki, fevralın 26-da Papua-Yeni Qvineyanın mərkəzi hissəsində 7,5 bal gücündə zəlzələ baş verib. Təbii fəlakət dağıntılara və çoxlu sayda insanların xəsarət almasına səbəb olub. Yerli hökumətin rəsmi məlumatına görə, zəlzələ nəticəsində bu günədək 67 nəfər həlak olub, əsasən dağlıq ərazidə yerləşən təqribən 140 min nəfərə isə zərər dəyib.xeber100.com

Rusiya Prezidenti Federal Məclisə müraciətlə çıxış edib

Rusiya Prezidenti Vladimir Putin ölkənin Federal Məclisinə müraciətlə çıxış edib. Bu il Rusiya liderinin çıxışı 1 saat 55 dəqiqə davam edib.Azərtac xəbər verir ki, müraciətin birinci hissəsi Rusiyanın sosial-iqtisadi inkişafı məsələlərinə, ikinci hissəsi isə hərbi müdafiə və beynəlxalq təhlükəsizlik mövzusuna həsr olunub.Ölkədaxili məsələlərdən danışan V.Putin Rusiyanın texnoloji sıçrayışa hazır olduğunu, dinamik inkişaf üçün yeni ideyalara və təşəbbüslərə açıq olmağın vacibliyini qeyd edib. Prezident yaxın illərdə yoxsulluğun azaldılması, adambaşına düşən ÜDM-in artırılması, iqtisadiyyatın artım sürətinin yüksəldilməsini əsas istiqamətlər kimi müəyyənləşdirib.Rusiya Prezidenti ölkədə hərbi sənayenin inkişafından da danışıb. O bildirib ki, Rusiya raketdən müdafiə sistemlərinin qeydə ala bilmədiyi və ballistik trayektoriyadan istifadə etməyən strateji silah növlərinin, yüksək dəqiqliyə malik hipersəs aviasiya-raket kompleksinin, qitələrarası “Smart” ballistik raketlərinin, məhdudiyyətsiz hərəkət radiusu və əvvəlcədən müəyyən edilməyən uçuş trayektoriyası olan nüvə enerjili qanadlı raketlərin istehsalına başlayır. Rusiya Prezidenti, həmçinin ölkəsində dərin sularda qitələrarası məsafəni çox böyük sürətlə qət edən bilən sualtı pilotsuz qayıqların hazırlandığını bildirib. Eyni zamanda, Rusiya dövlətinin başçısı qeyd edib ki, ölkənin artan hərbi gücü heç kimə qarşı yönəlməyib: “Bizim bu potensialı kiməsə qarşı tətbiq etmək barədə planımız yoxdur. Biz heç kimi hədələmirik, heç kimdən nəsə qoparmaq fikrində deyilik”.Xatırladaq ki, bu il Rusiya Prezidenti Federal Məclisə müraciətini Kremldə deyil, “Manej” Mərkəzi Sərgi Salonunda ünvanlayıb. Daha bir yenilik isə müraciətin video-slaydlarla müşayiət olunmasıdır. Bunun üçün salonda böyük ekranlar quraşdırılıb. Tədbirdə iştirak etmək üçün 705 jurnalist akkreditasiya olunub. Rusiya Prezidenti ildə bir dəfə Federal Məclisin hər iki palatasına müraciətlə çıxış edir.xeber100.com

Ukrayna Fövqəladə Hallar üzrə Dövlət Xidmətinin məlumatı

Martın 1-də qeyri-sabit hava şəraiti səbəbindən Ukraynanın 6 şəhərində hava limanları fəaliyyətini dayandırıb.Azərtac xəbər verir ki, Ukrayna Fövqəladə Hallar üzrə Dövlət Xidmətinin məlumatına görə, Dnepr, Poltava, Sumı, Zaparojye, Vinnitsa, Krivoy Roq şəhərlərinin aeroportlarında uçuşlar ləğv olunub.Bundan başqa, 170-ə yaxın yaşayış məntəqəsi hələ də işıqsız qalır.Kiyev şəhərində küçələrin qardan təmizlənməsi işinə hərbçilər cəlb edilib.xeber100.com

ABŞ və Cənubi Koreya hərbi təlimlərə başlayır

ABŞ və Cənubi Koreyanın mütəmadi birgə təlimlərinin keçirilməsi praktikası 2018-ci il aprel ayının ilk həftəsində bərpa olunacaq.Interfax informasiya agentliyi xəbər verir ki, bunu Vaşinqtonda keçirilən seminarda çıxış edən Cənubi Koreya prezidentinin təhlükəsizlik məsələləri üzrə müşaviri Mun Çon İn bildirib.“Buna baxmayaraq, təlimlər keçirilmədən öncə ABŞ və Şimali Koreya arasında danışıqlar baş tutacaq, ola bilər ki, hər hansı bir kompromis əldə olundu”, - deyə cənubi koreyalı məmur əlavə edib.Xatırladaq ki, müştərək hərbi təlimlər Cənubi Koreyada keçirilən Qış Olimpiya Oyunları zamanı tərəflərin qarşılıqlı razılığı əsasında dayandırılmışdı.xeber100.com

ABŞ Geoloji Xidmətinin məlumatı

Fevralın 26-da Papua-Yeni Qvineyada silsilə zəlzələlər baş verib.Azərtac ABŞ Geoloji Xidmətinə istinadla xəbər verir ki, 7,6 bal gücündə ilk zəlzələ yerli vaxtla gecə saat 3:44 dəqiqədə Porqera şəhərindən 92 kilometr qərbdə qeydə alınıb. Yeraltı təkanın ocağı 10 kilometr dərinlikdə yerləşib.Bunun ardınca həmin zəlzələnin afterşoku olan və ümumi gücü 5 baldan yuxarı 10-dan artıq yeraltı təkan qeydə alınıb.Silsilə zəlzələlər nəticəsində baş verən dağıntılar və xəsarət alanlar barədə hələlik məlumat verilmir.xeber100.com

7,5 bal gücündə zəlzələ baş verib

Papua-Yeni Qvineyada baş verən 7,5 bal gücündə zəlzələ nəticəsində azı 3 nəfər həlak olub. Ölənlərin arta biləcəyi istisna olunmur.Azərtac xəbər verir ki, Yeni Zelandiyanın “Radio New Zealand” radiosunun yaydığı məlumata görə, təkanlar fevralın 26-da yerli vaxtla saat 03:44-də Porqera şəhərindən 89 kilometr cənub-qərbdə qeydə alınıb. Zəlzələnin ocağı yer səthindən 35 kilometr dərinlikdə yerləşib.Yerli səhiyyə xidmətinin rəhbəri Cozef Birisinin məlumatına əsasən, təbii fəlakət nəticəsində həyatını itirən 3 nəfərin cəsədi Mendi şəhərinin xəstəxanasına gətirilib.Regionda bir çox avtomobil yolu və çaylar torpaq sürüşmələrinə məruz qalıb, çox sayda ev dağılıb. Bu səbəbdən həlak olanların sayının artacağı gözlənilir. Təsdiqlənməmiş məlumatlara görə, Xela vilayətində azı 10 nəfər ölüb.Hazırda zəlzələdən zərər çəkən rayonlara xilasedicilər və hərbçilər göndərilib.xeber100.com

KXDR-ə qarşı sanksiyalar sərtləşdirilib

Avropa İttifaqı KXDR-ə qarşı ticarət məhdudiyyətlərinin gücləndirilməsi və şimali koreyalı işçilərin geri göndərilməsi də daxil olmaqla sanksiyaları sərtləşdirib. TASS informasiya agentliyi xəbər verir ki, bu, Aİ Şurasının xarici işlər nazirləri səviyyəsində yayılan bəyanatında bildirilir.Yeni tədbirlər KXDR-ə bütün növ neft məhsullarının kommersiya ixracatına tam qadağa qoyulmasını, həmçinin Aİ ölkələri tərəfindən humanitar ehtiyaclar üçün Pxenyana göndərilə biləcək yanacağın maksimal həcminin ildə 2 milyon bareldən 500 min barelə qədər azaldılmasını nəzərdə tutur. Avropa İttifaqı KXDR-dən bütün növ qida və kənd təsərrüfatı məhsullarının, həmçinin daş və taxta idxalını tam qadağan edib. Eyni zamanda, bu ölkəyə bütün növ sənaye avadanlıqlarının, yük maşınlarının, həmçinin dəmir, polad və onların ərintilərinin və digər metalların ixracı qadağan olunub.Aİ Şurası, həmçinin 24 ay ərzində Avropa İttifaqı ölkələrində müqavilə üzrə işləyən bütün KXDR vətəndaşlarının repatriasiyası barədə qərar qəbul edib.Xatırladaq ki, Koreya yarımadasında vəziyyət KXDR-in raket-nüvə proqramının son zamanlar aktivləşməsi səbəbindən ciddi surətdə gərginləşib. BMT Təhlükəsizlik Şurası Şimali Koreyanın 2017-ci il noyabrın 29-da keçirdiyi qitələrarası raket sınağına cavab olaraq dekabrın 22-də bu ölkəyə qarşı beynəlxalq sanksiyaları kəskin şəkildə sərtləşdirən qətnamə qəbul edib. Sənəd Pxenyana xam neftin və neft emalı məhsullarının çatdırılmasına yeni məhdudiyyətlər qoyur, həmçinin 24 ay ərzində bütün koreyalı işçilərin vətənlərinə göndərilməsini tələb edir. Bu tədbirlərin Pxenyanı nüvə silahının sonrakı inkişafı və onun çatdırılması imkanlarından məhrum edəcəyi gözlənilir.xeber100.com

BMT atəşkəs rejiminin tətbiqinə dair qətnaməni qəbul edib

BMT Təhlükəsizlik Şurası Suriyada 30 günlük atəşkəs rejiminin tətbiqi və ölkə ərazisində humanitar əməliyyatların aparılmasına dair qətnaməni yekdilliklə qəbul edib."RİA Novosti"nin verdiyi xəbərə görə, sənəd humanitar yardımları çatdırmaq, yaralı və ağır xəstələrin tibbi təxliyəsini həyata keçirmək üçün münaqişənin bütün tərəflərindən toqquşmaları azı 30 gün müddətinə dərhal dayandırmağı və humanitar fasiləni təmin etməyi tələb edir.Sənədə əsasən, atəşkəs rejimi İŞİD, “Cəbhə ən Nüsrə” və “Əl Qaidə” kimi terror təşkilatlarına və onlarla əlaqəli qruplaşmalara şamil edilmir.xeber100.com