Anadolu Agentliyi: Kağıthane-İstanbul Hava Limanı xətti istifadəyə verilib

Türkiyənin ən sürətli metro xətti olan Kağıthane-İstanbul Hava Limanı xətti istifadəyə verilib. Anadolu Agentliyi xəbər verir ki, yeni metro xəttinin açılış mərasimində Prezident Rəcəb Tayyib Ərdoğan da iştirak edib. Kağıthane-İstanbul Hava Limanı metro xəttinin uzunluğu 34 kilometrdir və Kağıthane, Eyüpsultan və Arnavutköy rayonlarından keçir. Metro xətti üzərində 9 stansiya var və gündəlik 800 min sərnişin tutumuna malikdir. Qatarlar yeni xətt üzrə 90-120 km/saat sürətlə hərəkət edəcək.xeber100.com

“Tsxaltubo-Axaltsixe-Tortum” elektrik ötürücü xətti tikiləcək

Gürcüstan ilə Türkiyənin enerji sistemlərini birləşdirəcək yeni “Tsxaltubo-Axaltsixe-Tortum” elektrik ötürücü xətti tikiləcək. Gürcüstan hökuməti elektrik xətlərinin tikintisinin birinci mərhələsinin icrasına cari ildə başlamağı planlaşdırır. Layihə Buxarestdə imzalanan “Yaşıl enerjinin inkişafı və ötürülməsi sahəsində strateji tərəfdaşlıq haqqında Saziş” çərçivəsində reallaşacaq. Elektrik ötürücü xətlərinin tikintisi layihəsi Almaniyanın “KfW” bankının maliyyə dəstəyi ilə həyata keçiriləcək və onun dəyəri, təxminən 62 milyon avro təşkil edəcək. Layihəyə əsasən, 2023-cü ildə birinci mərhələdə uzunluğu 103 kilometr olan 500 kV-luq “Tsxaltubo-Axaltsixe” elektrik ötürücü xətlərinin tikilməsi planlaşdırılır. İkinci mərhələdə isə 34 kilometr uzunluğunda 400 kV-luq “Axaltsixe-Tortum” layihəsinin həyata keçirilməsi nəzərdə tutulur.xeber100.com

Xarici KİV: 130 milyon dollar olan limanın inşası planlaşdırılır

Yəmən rəhbərliyi iki ay ərzində Əl-Məhra əyalətinin şərqindəki Kişn rayonunda limanın tikintisinə başlamağı planlaşdırır. Xarici KİV-lərə istinadla xəbər verir ki, bu barədə Yəmənin nəqliyyat nazirinin müavini Naser Şurayf bildirib. O qeyd edib ki, layihənin dəyəri 130 milyon dollar qiymətləndirilir. Bildirilib ki, limana faydalı qazıntıların daşınması üçün 45 milyon dollarlıq yolun tikintisi də nəzərdə tutulur.xeber100.com

Qar fırtınası ilə əlaqədar Nyu-York ştatında fövqəladə vəziyyət elan edilib

ABŞ Prezidenti Co Bayden qar fırtınası ilə əlaqədar Nyu-York ştatında fövqəladə vəziyyət elan edib. TASS agentliyi xəbər verir ki, bu barədə Ağ evin saytındakı açıqlamada bildirilib. Qeyd olunub ki, Bayden ölkənin Daxili Təhlükəsizlik Departamentinə və ABŞ Federal Fövqəladə Halların İdarə Olunması Agentliyinin mütəxəssislərinə sakinlərə kömək etmək tapşırığı verib. Xatırladaq ki, ötən həftə ABŞ ərazisinin böyük bir hissəsi güclü külək və qar yağması ilə müşayiət olunan fırtınaya məruz qalıb. Bir çox ştatlarda temperatur rekord həddə aşağı düşüb.xeber100.com

İslam Əməkdaşlıq Təşkilatının İnformasiya Departamentinin müraciəti

İslam Əməkdaşlıq Təşkilatının (İƏT) İnformasiya Departamenti feysbuk və bəzi rəqəmsal platformalarda təşkilatın Baş katibi Hissein Brahim Tahanın adına açılmış feyk hesablarla bağlı sosial media şəbəkələri istifadəçilərinə müraciət edib. İƏT-in Baş katibliyindən bildiriblər ki, bu hesablar ayrı-ayrı şəxslər tərəfindən təşkilatın istiqamətlərinə uyğun olmayan məqsədlər üçün yaradılıb. Müraciətdə qeyd olunub ki, bununla əlaqədar olaraq, bu saxta hesablar vasitəsilə dostluq xahişi, mesaj və ya müxtəlif məzmunlu bildirişlər alan hər kəs fırıldaqçılıq və ya çaşdırıcı əməliyyatlara məruz qala bilər və bunun qarşısını almaq məqsədilə onların diqqətli olmaları xahiş olunur. İƏT-in Baş katibliyi, həmçinin təşkilatın adından çıxış edən hər hansı qeyri-rəsmi medianın qanunsuz fəaliyyəti ilə bağlı lazımi hüquqi tədbirlərin görülməsi üçün müvafiq orqanlara məlumat verilməsini xahiş edib.xeber100.com

Kataloniyanın müstəqilliyi haqqında referendum olmayacaq

İspaniyanın Baş naziri Pedro Sançes Kataloniyanın müqəddəratının təyin edilməsi haqqında referendumun olmayacağını deyib. İspaniya mediası xəbər verir ki, Baş nazirin sözlərinə görə, ölkə konstitusiyasında “müəyyən bir ərazinin müstəqillik hüququ” nəzərdə tutulmayıb. Bir müddət öncə Kataloniyanın Baş naziri Pere Araqones gələn il regionun müstəqilliyinə dair referendumun keçirilməsi məsələsində irəliləyiş əldə olunacağına ümid etdiyini bildirib. İspaniyanın Nazirlər Kabineti isə hər zaman Kataloniyanın müstəqilliyi ilə bağlı referendumun əleyhinə çıxıb. Qeyd edək ki, 2017-ci il oktyabrın 1-də Kataloniyada müstəqilliklə bağlı səsvermə keçirilib. Madrid bu referendumu qeyri-qanuni adlandırıb və onun nəticələrini tanımayıb. Həmin il oktyabrın 27-də Kataloniya parlamenti müstəqilik barədə qətnamə qəbul etdikdən sonra İspaniya hakimiyyəti ölkə tarixində ilk dəfə konstitusiyanın 155-ci maddəsini işə salaraq regionun özünüidarə hüququnu məhdudlaşdırıb.xeber100.com

TASS informasiya agentliyinin məlumatına görə…

Serbiyada ammonyakla dolu bir neçə vaqon aşıb. TASS informasiya agentliyi xəbər verir ki, bu barədə ölkənin Daxili İşlər Nazirliyi məlumat yayıb. Məlumata görə, dəmir yolunun Sopotski-Xan qəsəbəsinə yaxın olan Pirot-Staniçenye hissəsində ammonyakla dolu bir neçə vaqon aşıb. Hüquq-mühafizə orqanları hadisə yerinə yaxın yaşayan vətəndaşlardan evdən çıxmamağı xahiş edib. Pirot-Bela-Palanka istiqamətində avtomobillərin hərəkəti dayandırılıb, sürücülərə başqa yoldan istifadə etmək tövsiyə olunub. Qəza ammonyak sızması ilə nəticələnib. Həmin ərazidə yollarda görüntü zəifdir. Hadisə yerində polis, xilasedicilər və yanğınsöndürən briqadası işləyir.xeber100.com

CNN telekanalı: Qar fırtınası 26 nəfərin həyatına son qoyub

Son günlər ABŞ-da davam edən qar fırtınası və soyuq hava səbəbindən azı 26 nəfər ölüb, yüz minlərlə insan işıqsız qalıb. Bu barədə CNN telekanalı məlumat yayıb. Milli meteoroloji xidmətin açıqlamasında bildirilir ki, bəzi ərazilərdə açıq havada dayanmaq bir neçə dəqiqə ərzində donmaya səbəb ola bilər. Məlumata görə, ABŞ-da 250 min ev və müəssisə elektriksiz qalıb. Onların yarısı Nyu-York və Men ştatlarının ərazisindədir. Elektrik enerjisi şirkətləri ekstremal hava şəraiti ilə əlaqədar şəbəkələrdə artan yüklənmə səbəbindən istehlakçılardan enerjiyə, qaza və istiliyə qənaət etməyi xahiş edir. Dekabrın 23-24-də aviaşirkətlər 8,4 mindən çox, dekabrın 25-də isə 1350-dən çox reysi ləğv edib. Proqnoza görə, gələn həftənin sonunda ABŞ-da normadan yüksək temperaturlu isti hava olacağı gözlənilir.

Assosiated Press: Frankfurtda 170-dən çox reys ləğv olunub

Almaniyanın ən böyük beynəlxalq hava limanı olan Frankfurt aeroportunun işi buzlanma səbəbindən pozulub. Assosiated Press agentliyinə istinadla xəbər verir ki, bazar ertəsi günü səhər saatlarında Frankfurt aeroportunda 176 aviareys ləğv edilib. Hava limanının mətbuat xidmətinin məlumatına görə, bu günə ümumilikdə təxminən 1,1 min uçuş planlaşdırılır. Yeni ləğvetmə və gecikmə halları istisna olunmur. Səyahətçilərə uçuşların statusunu əvvəlcədən öyrənmək tövsiyə edilir. Aeroportun mətbuat xidməti, eyni zamanda, bildirib ki, hələlik uçuşların tam dayandırılması nəzərdə tutulmur.xeber100.com

Avropa İttifaqı Şurası Xorvatiyanın Şengenə daxil olmasını təsdiqləyib

Avropa İttifaqı (Aİ) Şurasının dövlət və hökumət başçıları Xorvatiyanın Şengenə daxil olmasını təsdiqləyiblər və ümidvar olduqlarını bildiriblər ki, Bolqarıstan və Rumıniya bunu 2023-cü ildə edəcək. TASS informasiya agentliyi xəbər verir ki, bu barədə Avropa İttifaqı Şurasının Prezidenti Şarl Mişel Brüsseldə Aİ sammitinin yekunlarına dair mətbuat konfransında bildirib. Avropa Komissiyasının Prezidenti Ursula Fon der Lyayen isə deyib ki, Bolqarıstan və Rumıniyanın Şengenə mümkün qədər tez qoşulması üçün Avropa Komissiyası əlindən gələni edəcək. Xatırladaq ki, Aİ-nin Daxili İşlər və Ədliyyə Şurasının dekabrın 8-də keçirilmiş iclasında Xorvatiyanın Şengen zonasına qoşulması təsdiqlənib, Rumıniya və Bolqarıstanın müraciətləri isə Avstriya və Niderlandın etirazları səbəbindən qəbul edilməyib.xeber100.com