Çexiyada prezident seçkilərinin ikinci turunda səsvermə başlayıb

Bu gün Çexiyada prezident seçkilərinin ikinci turunda səsvermə başlayıb. BBC News telekanalı xəbər verir ki, seçkilərin ilk turunda səkkiz namizəd arasında ən çox səs toplayaraq ikinci tura çıxan sabiq baş nazir Andrey Babiş və istefada olan ordu generalı Petr Pavel prezidentlik müddəti başa çatan Miloş Zemanın xələfi olmaq uğrunda mübarizə aparır. Petr Pavel hələ kommunist dövründə hərbi kəşfiyyat sahəsində hazırlıq keçməsinə baxmayaraq, prezidentlik uğrunda mübarizənin lideri sayılır. O, Çexiyanın Avropa İttifaqı və NATO ilə əlaqələrini genişləndirməyin, avronun ölkədə tədavülə buraxılmasının və proqressiv siyasətin tərəfdarıdır. Andrey Babiş isə baş naziri postunu tutduğu dövrlərdə Avropa İttifaqının siyasətinə zidd gedən macarıstanlı həmkarı Viktor Orbanla sıx əlaqələr saxlayıb. Seçkilərin nəticələri yanvarın 28-də günorta saatlarında elan ediləcək.xeber100.com

Avropa İttifaqı İstanbulda forum keçirməyi planlaşdırır

Avropa İttifaqı (Aİ) fevralın 22-də İstanbulda Ukrayna ilə bağlı forum keçirmək planlaşdırır. Bu barədə Aİ-nin Türkiyədəki nümayəndə heyətinin rəhbəri Nikolaus Meyer-Landrut bildirib. Onun sözlərinə görə, bu tədbirə Ukrayna hökumətinin nümayəndəsinin dəvət edilməsi nəzərdə tutulur. Digər iştirakçılar, eləcə də Türkiyənin təmsilçilik səviyyəsi ilə bağlı diplomat məlumat verməyib. “Görüş Aİ tərəfindən Ukraynaya dəstək elan etmək üçün bir fürsət ola bilər”, - deyə nümayəndə heyətinin rəhbəri qeyd edib.xeber100.com

Konstitusiya dəyişiklikləri ilə bağlı referendum baş tutmayıb

Slovakiyada yanvarın 21-də konstitusiya dəyişiklikləri ilə bağlı referendum baş tutmayıb. Referendumun hüquqi qüvvəyə malik olması üçün tələb olunan seçicilərin azı 50 faizinin iştirakı baş verməyib, referendumda əhalinin 27,25 faizi iştirak edib. Referendumda iştirak edənlərin 97,5 faizi konstitusiya dəyişikliyinə tərəfdar olsalar da, bu nəticə qanunvericilikdə dəyişiklik üçün formal olaraq heç bir əhəmiyyət daşımayacaq. Müxalifət partiyalarının təşəbbüsü ilə ümumxalq səsverməsinə çıxarılan məsələ, digər Avropa ölkələrində olduğu kimi, növbədənkənar və ya erkən parlament seçkilərinə getməyə icazə verən dəyişiklik olub. Mövcud Slovakiya Konstitusiyasına əsasən, dörd il müddətinə seçilmiş parlament hökumət istefaya getdiyində və yeni koalisiya üçün parlamentdə səs çoxluğu olmadığında belə növbədənkənar seçkilərə gedə bilməz. Ölkənin Konstitusiya Məhkəməsi 2021-ci ildə növbədənkənar seçkilərin hazırkı qanunvericiliklə mümkün olmadığını təsbit etmiş, lakin eyni zamanda konstitusiya dəyişikliyini tövsiyə etmişdi. Bunun ardınca müxalifət partiyaları ötən ilin yayında 400 min seçici imzası toplayaraq referendum keçirilməsinə nail olmuşdu.xeber100.com  

Anadolu Agentliyi: Kağıthane-İstanbul Hava Limanı xətti istifadəyə verilib

Türkiyənin ən sürətli metro xətti olan Kağıthane-İstanbul Hava Limanı xətti istifadəyə verilib. Anadolu Agentliyi xəbər verir ki, yeni metro xəttinin açılış mərasimində Prezident Rəcəb Tayyib Ərdoğan da iştirak edib. Kağıthane-İstanbul Hava Limanı metro xəttinin uzunluğu 34 kilometrdir və Kağıthane, Eyüpsultan və Arnavutköy rayonlarından keçir. Metro xətti üzərində 9 stansiya var və gündəlik 800 min sərnişin tutumuna malikdir. Qatarlar yeni xətt üzrə 90-120 km/saat sürətlə hərəkət edəcək.xeber100.com

“Tsxaltubo-Axaltsixe-Tortum” elektrik ötürücü xətti tikiləcək

Gürcüstan ilə Türkiyənin enerji sistemlərini birləşdirəcək yeni “Tsxaltubo-Axaltsixe-Tortum” elektrik ötürücü xətti tikiləcək. Gürcüstan hökuməti elektrik xətlərinin tikintisinin birinci mərhələsinin icrasına cari ildə başlamağı planlaşdırır. Layihə Buxarestdə imzalanan “Yaşıl enerjinin inkişafı və ötürülməsi sahəsində strateji tərəfdaşlıq haqqında Saziş” çərçivəsində reallaşacaq. Elektrik ötürücü xətlərinin tikintisi layihəsi Almaniyanın “KfW” bankının maliyyə dəstəyi ilə həyata keçiriləcək və onun dəyəri, təxminən 62 milyon avro təşkil edəcək. Layihəyə əsasən, 2023-cü ildə birinci mərhələdə uzunluğu 103 kilometr olan 500 kV-luq “Tsxaltubo-Axaltsixe” elektrik ötürücü xətlərinin tikilməsi planlaşdırılır. İkinci mərhələdə isə 34 kilometr uzunluğunda 400 kV-luq “Axaltsixe-Tortum” layihəsinin həyata keçirilməsi nəzərdə tutulur.xeber100.com

Xarici KİV: 130 milyon dollar olan limanın inşası planlaşdırılır

Yəmən rəhbərliyi iki ay ərzində Əl-Məhra əyalətinin şərqindəki Kişn rayonunda limanın tikintisinə başlamağı planlaşdırır. Xarici KİV-lərə istinadla xəbər verir ki, bu barədə Yəmənin nəqliyyat nazirinin müavini Naser Şurayf bildirib. O qeyd edib ki, layihənin dəyəri 130 milyon dollar qiymətləndirilir. Bildirilib ki, limana faydalı qazıntıların daşınması üçün 45 milyon dollarlıq yolun tikintisi də nəzərdə tutulur.xeber100.com

Qar fırtınası ilə əlaqədar Nyu-York ştatında fövqəladə vəziyyət elan edilib

ABŞ Prezidenti Co Bayden qar fırtınası ilə əlaqədar Nyu-York ştatında fövqəladə vəziyyət elan edib. TASS agentliyi xəbər verir ki, bu barədə Ağ evin saytındakı açıqlamada bildirilib. Qeyd olunub ki, Bayden ölkənin Daxili Təhlükəsizlik Departamentinə və ABŞ Federal Fövqəladə Halların İdarə Olunması Agentliyinin mütəxəssislərinə sakinlərə kömək etmək tapşırığı verib. Xatırladaq ki, ötən həftə ABŞ ərazisinin böyük bir hissəsi güclü külək və qar yağması ilə müşayiət olunan fırtınaya məruz qalıb. Bir çox ştatlarda temperatur rekord həddə aşağı düşüb.xeber100.com

İslam Əməkdaşlıq Təşkilatının İnformasiya Departamentinin müraciəti

İslam Əməkdaşlıq Təşkilatının (İƏT) İnformasiya Departamenti feysbuk və bəzi rəqəmsal platformalarda təşkilatın Baş katibi Hissein Brahim Tahanın adına açılmış feyk hesablarla bağlı sosial media şəbəkələri istifadəçilərinə müraciət edib. İƏT-in Baş katibliyindən bildiriblər ki, bu hesablar ayrı-ayrı şəxslər tərəfindən təşkilatın istiqamətlərinə uyğun olmayan məqsədlər üçün yaradılıb. Müraciətdə qeyd olunub ki, bununla əlaqədar olaraq, bu saxta hesablar vasitəsilə dostluq xahişi, mesaj və ya müxtəlif məzmunlu bildirişlər alan hər kəs fırıldaqçılıq və ya çaşdırıcı əməliyyatlara məruz qala bilər və bunun qarşısını almaq məqsədilə onların diqqətli olmaları xahiş olunur. İƏT-in Baş katibliyi, həmçinin təşkilatın adından çıxış edən hər hansı qeyri-rəsmi medianın qanunsuz fəaliyyəti ilə bağlı lazımi hüquqi tədbirlərin görülməsi üçün müvafiq orqanlara məlumat verilməsini xahiş edib.xeber100.com

Kataloniyanın müstəqilliyi haqqında referendum olmayacaq

İspaniyanın Baş naziri Pedro Sançes Kataloniyanın müqəddəratının təyin edilməsi haqqında referendumun olmayacağını deyib. İspaniya mediası xəbər verir ki, Baş nazirin sözlərinə görə, ölkə konstitusiyasında “müəyyən bir ərazinin müstəqillik hüququ” nəzərdə tutulmayıb. Bir müddət öncə Kataloniyanın Baş naziri Pere Araqones gələn il regionun müstəqilliyinə dair referendumun keçirilməsi məsələsində irəliləyiş əldə olunacağına ümid etdiyini bildirib. İspaniyanın Nazirlər Kabineti isə hər zaman Kataloniyanın müstəqilliyi ilə bağlı referendumun əleyhinə çıxıb. Qeyd edək ki, 2017-ci il oktyabrın 1-də Kataloniyada müstəqilliklə bağlı səsvermə keçirilib. Madrid bu referendumu qeyri-qanuni adlandırıb və onun nəticələrini tanımayıb. Həmin il oktyabrın 27-də Kataloniya parlamenti müstəqilik barədə qətnamə qəbul etdikdən sonra İspaniya hakimiyyəti ölkə tarixində ilk dəfə konstitusiyanın 155-ci maddəsini işə salaraq regionun özünüidarə hüququnu məhdudlaşdırıb.xeber100.com

TASS informasiya agentliyinin məlumatına görə…

Serbiyada ammonyakla dolu bir neçə vaqon aşıb. TASS informasiya agentliyi xəbər verir ki, bu barədə ölkənin Daxili İşlər Nazirliyi məlumat yayıb. Məlumata görə, dəmir yolunun Sopotski-Xan qəsəbəsinə yaxın olan Pirot-Staniçenye hissəsində ammonyakla dolu bir neçə vaqon aşıb. Hüquq-mühafizə orqanları hadisə yerinə yaxın yaşayan vətəndaşlardan evdən çıxmamağı xahiş edib. Pirot-Bela-Palanka istiqamətində avtomobillərin hərəkəti dayandırılıb, sürücülərə başqa yoldan istifadə etmək tövsiyə olunub. Qəza ammonyak sızması ilə nəticələnib. Həmin ərazidə yollarda görüntü zəifdir. Hadisə yerində polis, xilasedicilər və yanğınsöndürən briqadası işləyir.xeber100.com