Bosniya və Herseqovina Nazirlər Şurasının növbədənkənar iclasında

Bosniya və Herseqovina Nazirlər Şurası zəlzələlərdən zərər çəkənlərə yardım məqsədilə Türkiyəyə təxminən 10 milyon türk lirəsi məbləğində vəsaitin ayrılması təklifini qəbul edib. Şuranın növbədənkənar iclasında sözügedən maliyyə yardımının zəlzələnin fəsadlarının aradan qaldırılması üçün Türkiyəyə göndəriləcəyi bildirilib. Həmçinin Bosniya və Herseqovinanın axtarış-xilasetmə işlərinə dəstək olmaq üçün bu vaxtadək zəlzələ bölgələrinə 129 nəfərlik heyət göndərdiyi də qeyd olunub.xeber100.com

“Equinor” kompaniyası rekord məbləğdə illik gəlir əldə etdiyini açıqlayıb

Avropanın ən iri enerji şirkətlərindən biri olan Norveçin “Equinor” kompaniyası rekord məbləğdə illik gəlir əldə etdiyini açıqlayıb. 2022-ci ildə dünyada enerji daşıyıcılarının qiymətlərinin artması fonunda şirkətin gəlirləri üç dəfədən də çox artaraq bir il əvvəlki 10 milyard dollardan 28,7 milyard dollara qalxıb. Bununla yanaşı, “Equinor”un satışları da 66 faiz artaraq 150,8 milyard dollar təşkil edib. “Equinor” özünün britaniyalı rəqibləri “Shell” və BP, həmçinin amerikalı “ExxonMobil” və “Chevron” kimi, gəlirlərini Ukraynadakı müharibə nəticəsində artırıb. Belə ki, Rusiyadan təbii qazın Avropaya nəqlinin dayandırılması ötən il qiymətlərin rekord səviyyəyə qalxmasına səbəb olub. “Equinor” şirkətinin lider olduğu Norveç isə Avropada ən böyük qaz tədarükçüsünə çevrilib. Gəlirlərin rekord səviyyədə artması Norveç şirkətinə imkan verəcək ki, öz səhmdarları ilə münasibətlərdə daha səxavətli olsun. Şirkət dividendlərin ödənilməsi və səhmlərin alınmasına 17 milyard dollar yönəltməyi planlaşdırır. “Equinor”, həmçinin bəyan edib ki, cari ildə neft-qaz hasilatının 3 faiz artırılması istiqamətində işlərə 10-11 milyard dollar sərmayə qoyacaq.xeber100.com

Birləşmiş Millətlər Təşkilatı Türkiyədə zəlzələ bölgələrinə səfər edəcəklər

Birləşmiş Millətlər Təşkilatı (BMT) rəsmiləri yaxın günlərdə Türkiyədə zəlzələ bölgələrinə səfər edəcəklər. Bunu BMT Baş katibinin mətbuat katibinin müavini Fərhan Haq deyib. Onun sözlərinə görə, BMT-nin Baş katibi Antonio Quterreş zəlzələdən zərər çəkmiş ölkələrin rəhbərləri ilə əlaqə saxlayıb və təşkilatın fövqəladə hallar qruplarının bölgəyə səfərbər olunduğunu bildirib.xeber100.com

Finlandiya hökuməti humanitar yardım paketi ayrılması barədə qərar qəbul edib

Finlandiya hökuməti Türkiyə və Suriyada zəlzələ zonasında olan zərərçəkənlərə təcili humanitar yardım paketi ayrılması barədə qərar qəbul edib. Finlandiyanın xarici siyasət idarəsi xəbər verir ki, bu ölkənin hökuməti Türkiyə və Suriyaya 1 milyon avro məbləğində humanitar yardım göndərəcək. Nazirliyin məlumatında bildirilir ki, humanitar yardım Beynəlxalq Qırmızı Xaç və Qırmızı Aypara cəmiyyətləri vasitəsilə çatdırılacaq. Təqdim ediləcək paketə ərzaq məhsulları, çadırlar və dərman preparatları daxildir.xeber100.com

Norveç hökuməti zəlzələdən zərər çəkənlərə yardım ayırır

Norveç hökuməti Türkiyə və Suriyadakı zəlzələ qurbanlarına 150 milyon kron (təqribən 14,4 milyon ABŞ dolları) yardım ayırır. Krallıq hökumətinin qərarı ilə BMT, Qızıl Xaç və regionda fəaliyyət göstərən Norveçin əsas humanitar təşkilatlarına həm Türkiyədə, həm də Suriyada zəlzələdən zərər çəkmiş bölgələrdə apardıqları işlərə dəstək vermək məqsədilə 150 milyon kron maliyyə vəsaiti ayrılır. Bununla yanaşı, Norveç yaranan böhranın koordinasiyasına töhfə vermək üçün regiona dörd nəfərdən ibarət xüsusi ekspert qrupu yönəldəcək. Məsələ ilə bağlı çıxış edən Norveçin Baş naziri Yonas Qar Styore bildirib ki, qışın soyuğunda yaranmış fövqəladə vəziyyət kritikdir. Norveçin xarici işlər naziri Anniken Huitfeldt deyib: “Bu böyük faciədir və artıq bəllidir ki, həm Türkiyədə, həm də Suriyada humanitar ehtiyaclar çox böyükdür. Yaranmış vəziyyət çoxları üçün çıxılmazdır. Bizim ayırdığımız vəsait zəlzələdən zərərçəkənlərə yardıma gedir. Zəlzələnin miqyasını nəzərə alaraq, biz əlavə dəstək göstərməyi nəzərdən keçirəcəyik”.xeber100.com

Bloomberg agentliyi: G7 dizel yanacağı üçün 100-110 dollar qiymət həddini dəstəkləyir

G7 Avropa İttifaqı tərəfindən Rusiyanın dizel yanacağının bir bareli üçün müəyyənləşdirilən 100-110 dollar qiymət həddini dəstəkləyir. Bloomberg agentliyi bu barədə G7-də olan mənbələrinə istinadla məlumat yayıb. Məlumata görə, Avropa İttifaqı dizel yanacağının bareli üçün yuxarı qiymət həddini 100 dollar müəyyən etmək istəsə də, “yeddilik” limitin bir qədər yüksək olmasında israrlıdır. G7 ölkələri hesab edir ki, həddən artıq ucuz qiymət yanacağın qiymətində sıçrayışa və Avropa bazarında qıtlığa səbəb ola bilər. Bu barədə müzakirələrin davam edəcəyi və fevralın əvvəlinə qədər sazişə nail olunacağı gözlənilir. Yanvarın 27-də Londonun ICE birjasında dizel yanacağının bir barelinin qiyməti 125 dollar təşkil edib.

Çexiyada keçirilən prezident seçkilərində istefada olan general qələbə qazanıb

Çexiyada keçirilən prezident seçkilərində istefada olan general, NATO-nun hərbi komitəsinin sabiq sədri Petr Pavel qələbə qazanıb. Çexiya televiziyası xəbər verir ki, sabiq Baş nazir Andrey Babiş rəqibi Petr Pavelə çatacaq qədər səs toplaya bilməyəcək. Çexiyanın Baş naziri Petr Fiala mətbuat konfransında Petr Pavelin qalib gəldiyini təsdiqləyib və ölkənin dördüncü prezidenti seçilməsi münasibətilə onu təbrik edib. Çexiya Statistika Komitəsinin məlumatına görə, Petr Pavel prezident seçkilərinin ikinci turunda səslərin 95,5 faizi sayıldıqdan sonra 57,59 faiz səs toplayıb. Onun rəqibi Andrey Babiş isə seçicilərin yalnız 42,4 faizinin dəstəyini qazanıb. Seçkilərdə fəallıq 70,17 faiz təşkil edib.xeber100.com

İtaliyanın “Eni” neft-qaz şirkəti təbii qaz hasilatına dair müqavilə imzalayıb

İtaliyanın “Eni” neft-qaz şirkəti və Liviyanın Milli Neft Korporasiyası (NOC) arasında təbii qaz hasilatına dair müqavilə imzalanıb. İtaliyanın Baş naziri Ciorcia Meloninin Liviyaya səfəri zamanı imzalanan müqavilə çərçivəsində dənizdə qaz hasilatının artırılması nəzərdə tutulur. Qaz hasilatına 2026-cı ildə başlanması və gündəlik 750 milyon standart kubfut qaz səviyyəsinə çatdırılması planlaşdırılır. Müqavilə 8 milyard ABŞ dolları dəyərində qiymətləndirilir. Baş nazir C.Meloni Liviyanın İtaliya üçün prioritet ölkə olduğunu bildirib.xeber100.com

Çexiyada prezident seçkilərinin ikinci turunda səsvermə başlayıb

Bu gün Çexiyada prezident seçkilərinin ikinci turunda səsvermə başlayıb. BBC News telekanalı xəbər verir ki, seçkilərin ilk turunda səkkiz namizəd arasında ən çox səs toplayaraq ikinci tura çıxan sabiq baş nazir Andrey Babiş və istefada olan ordu generalı Petr Pavel prezidentlik müddəti başa çatan Miloş Zemanın xələfi olmaq uğrunda mübarizə aparır. Petr Pavel hələ kommunist dövründə hərbi kəşfiyyat sahəsində hazırlıq keçməsinə baxmayaraq, prezidentlik uğrunda mübarizənin lideri sayılır. O, Çexiyanın Avropa İttifaqı və NATO ilə əlaqələrini genişləndirməyin, avronun ölkədə tədavülə buraxılmasının və proqressiv siyasətin tərəfdarıdır. Andrey Babiş isə baş naziri postunu tutduğu dövrlərdə Avropa İttifaqının siyasətinə zidd gedən macarıstanlı həmkarı Viktor Orbanla sıx əlaqələr saxlayıb. Seçkilərin nəticələri yanvarın 28-də günorta saatlarında elan ediləcək.xeber100.com

Avropa İttifaqı İstanbulda forum keçirməyi planlaşdırır

Avropa İttifaqı (Aİ) fevralın 22-də İstanbulda Ukrayna ilə bağlı forum keçirmək planlaşdırır. Bu barədə Aİ-nin Türkiyədəki nümayəndə heyətinin rəhbəri Nikolaus Meyer-Landrut bildirib. Onun sözlərinə görə, bu tədbirə Ukrayna hökumətinin nümayəndəsinin dəvət edilməsi nəzərdə tutulur. Digər iştirakçılar, eləcə də Türkiyənin təmsilçilik səviyyəsi ilə bağlı diplomat məlumat verməyib. “Görüş Aİ tərəfindən Ukraynaya dəstək elan etmək üçün bir fürsət ola bilər”, - deyə nümayəndə heyətinin rəhbəri qeyd edib.xeber100.com