TASS agentliyinin məlumatına görə…

Cənubi Afrika Respublikasının Prezidenti Ceykob Zumanın istefasından sonra ölkə parlamenti yeni prezident seçib.TASS agentliyi xəbər verir ki, bu gün Milli Assambleyanın iclasında deputatlar tərəfindən irəli sürülmüş yeganə namizəd - CAR-ın hakim Afrika milli konqresi partiyasının lideri Siril Ramafosanın prezident seçilməsi barədə qərar qəbul olunub. Bu barədə Konstitusiya Məhkəməsinin sədri Moxoenq Moxoenq məlumat verib.Parlamentin buraxılmasında və növbədənkənar seçkilər keçirilməsində israr edən müxalifət partiyaları öz namizədlərini irəli sürməməyi qərara alıblar. “İqtisadi azadlıq uğrunda mübarizlər” sol-radikal partiyasının parlament fraksiyası Ramafosanın namizədliyinə qarşı bir neçə uğursuz cəhddən sonra etiraz əlaməti olaraq iclasın başlanğıcında salonu tərk edib.Xatırladaq ki, hakim partiya istefaya getməsi üçün Prezident Ceykob Zumaya iki gün vaxt vermişdi və o, dünən axşam keçirdiyi mətbuat konfransında vəzifəsindən rəsmən getdiyini bəyan edib. Zuma bəyanatında bu addımı partiyasının parçalanmaması naminə atdığını deyib. Onun ikinci prezidentlik müddəti 2019-cu ilin mayında başa çatmalı idi.xeber100.com

Suriyadakı vəziyyətlə bağlı məsələlər müzakirə olunub

Səudiyyə Ərəbistanının Kralı Salman bin Əbdüləziz Əl Səud ilə Türkiyə Prezidenti Rəcəb Tayyib Ərdoğan arasında baş tutan telefon söhbətində ikitərəfli münasibətlər və Suriyadakı vəziyyətlə bağlı məsələlər müzakirə olunub.Azərtac Krallığın KİV-lərinə istinadən xəbər verir ki, R.T.Ərdoğan Suriyanın Afrin bölgəsində PYD, YPG və İŞİD terror qruplaşmalarına qarşı aparılan “Zeytun budağı” əməliyyatının gedişi barədə Səudiyyə Kralını məlumatlandırıb. Hər iki ölkənin liderləri Suriyanın ərazi bütövlüyünə ehtiramlarını bildirərək, böhranın siyasi vasitələrlə nizamlanmasının vacibliyini, bu məsələdə birgə səylərin və əməkdaşlığın zəruriliyini qeyd ediblər.Səudiyyə Ərəbistanı Kralı Suriya böhranı ilə bağlı Cenevrə prosesini və beynəlxalq səyləri dəstəklədiyini bildirib. Prezident Ərdoğan, öz növbəsində, qeyd edib ki, Astana prosesi və Soçidə keçirilən Suriya Milli Dialoq Konqresi Cenevrə danışıqlarının ayrılmaz hissəsidir. Dövlət başçıları ikitərəfli münasibətləri daha da möhkəmləndirmək əzmində olduqlarını təsdiqləyərək qeyd ediblər ki, Səudiyyə Vəliəhdi Məhəmməd bin Salmanın Türkiyəyə qarşıdakı səfəri ikitərəfli və regional məsələlərə dair fikir mübadiləsi baxımından böyük əhəmiyyət kəsb edir.xeber100.com

Cənubi Koreya və KXDR arasında tarixi görüş başlayır

Koreya Xalq Demokratik Respublikasının nümayəndə heyəti Cənubi Koreya prezidenti Mun Çje İn ilə görüşmək üçün dövlət başçısının Seuldakı iqamətgahına gəlib.TASS agentliyinin verdiyi xəbərə görə, Şimali Koreyanın nümayəndə heyətinə ölkə rəhbəri Kim Çen Inın bacısı Kim Yo Çjon başçılıq edir.Məlumata əsasən, danışıqlardan sonra Mun Çje İn və Kim Yo Çjon hər iki tərəfin nümayəndə heyətlərinin iştirakı ilə nahar edəcəklər. Bu, KXDR liderinin ailə üzvünün Cənubi Koreyaya ilk səfəridir.Bundan əvvəl Cənubi Koreyanın prezidenti və KXDR rəhbərinin bacısı Pxençxanda Qış Olimpiya Oyunlarının açılış mərasimində bir-birilərinin əllərini sıxıblar.xeber100.com

“Parisien” qəzeti yazır…

Fransalı inkassator Lionda qızını qaçıran cinayətkarlara 26 milyon avro verməyə məcbur olub. “Parisien” qəzeti xəbər verir ki, fevralın 8-də axşam saatlarında cinayətkarlar çilingər adı ilə qızın evinə girib və onu qaçırıblar. Bundan sonra onlar girovun İsveçrədə inkassator işləyən atası ilə əlaqə saxlayaraq qızının qarşılığında furqondakı nağd pulu tələb ediblər.Görüş İsveçrədə baş tutub. İnkassator cinayətkarlara 15 milyondan 30 milyonadək İsveçrə frankı (13-26 milyon avro) məbləğində pul verib. Bir qədər sonra jandarmeriya qızı Fransanın En departamentinin Tramua kommunasında aşkarlayıb.Hazırda Fransa polisi hadisə ilə bağlı təhqiqat aparır.xeber100.com

Tayvanın şərqində 6,5 bal gücündə zəlzələ baş verib

Tayvanın şərqində Hualyan şəhərində baş vermiş zəlzələ nəticəsində azı 188 nəfər xəsarət alıb.RİA Novosti agentliyi xəbər verir ki, xilasedicilərin səylərinə baxmayaraq, Hualyan şəhərinin “Marshal” otelində xeyli insan təcrid olunmuş vəziyyətdə qalır. Zəlzələnin gücü 6,5 bal, yeraltı təkanların episentri 11 kilometr dərinlikdə olub.KİV-lərin yaydığı məlumata görə, güclü yeraltı təkanlar nəticəsində azı beş bina dağılıb, 560 ev elektrik enerjisiz qalıb, körpülər zədələnib, yol örtüklərində, səkilərdə çatlar yaranıb.Tayvanın Müdafiə Nazirliyi 100 nəfər hərbi qulluqçunu axtarış-xilasetmə əməliyyatı üçün göndərib, yaxın vaxtlarda onlara 250 əsgər də qoşulmalıdır.xeber100.com

İtaliyada parlament seçkiləri keçiriləcək

Martın 4-də İtaliyada parlament seçkiləri keçiriləcək. Ölkənin sabiq Baş naziri Matteo Renzinin fikrincə, rəhbərlik etdiyi Demokratik Partiya ümumi rəy sorğusunda bir qədər də irəli gedərsə, seçkilərdə qalib gəlmək mümkün olacaq.İtaliyanın ANSA agentliyi xəbər verir ki, Matteo Renzi öz komandasını seçkilərdə uğursuz nəticələr deyil, qələbə qazanmaq üzərində diqqət cəmləməyə çağırıb.xeber100.com

“Popolare di Vicenza” bankından 106 milyon avro müsadirə edilib

İtaliyanın vergi polisi lisenziyası ləğv edilən “Popolare di Vicenza” bankından 106 milyon avro müsadirə edib.İtaliyanın ANSA agentliyi xəbər verir ki, “Popolare di Vicenza” ilə yanaşı, “Veneto”, “Banca Veneto” da pullara qənaət, dəyərsiz kağızlardan istifadə səbəblərinə görə ləğv edilən banklar sırasındadır.xeber100.com

“Reuters” xəbər agentliyinin məlumatı

“Reuters” xəbər agentliyinin məlumatına əsasən, Makedoniyanın Baş naziri Zoran Zaev ölkəsinin Yunanıstanla uzunsürən münaqişəsinə son vermək üçün ölkə adını dəyişdirməyə hazır olduğunu bildirib.Azərtac xəbər verir ki, Baş nazir iki ölkə arasında baş tutacaq danışıqların səmərəli keçməsinə ümid etdiyini vurğulayıb. Bildirilir ki, iki dövlətin diplomatları yeni adlar siyahısında Şimali Makedoniya, Yeni Makedoniya, Yuxarı Makedoniya adlarını müzakirə edəcəklər. Bundan öncə xəbər verilirdi ki, ölkənin yeni adı referendumda müəyyənləşdiriləcək.Makedoniya hökumətinin sözçüsü Mile Boşnjakovskinin Assosiated Press agentliyinə verdiyi məlumata əsasən, artıq hökumət Skopye aeroportunun adını dəyişərək “Skopye Beynəlxalq” aeroportu adlandırıb. Əvvəl aeroport Skopye “Makedoniyalı İsgəndər” adlanırdı. Eyni zamanda, hökumət əsas magistralın adını dəyişərək “Prijatelstvo” (Dostluq) təyin edib.Qeyd edək ki, Makedoniya və Yunanıstan birincinin adının dəyişdirilməsi zəminində uzun illərdir münaqişədədir. Yunanıstanın Makedoniyanın adının dəyişdirilməsi istəyinin əsas səbəbi Yunanıstanın bu adda bölgəsinin olmasıdır.xeber100.com

Filippin Ali məhkəməsi hərbi rejim barədə qərar qəbul edib

Filippinin Ali məhkəməsi ölkənin cənubunda yerləşən Mindanao əyalətində hərbi vəziyyət rejiminin ilin sonuna qədər uzadılması barədə qərar qəbul edib.Azərtac xarici KİV-lərə istinadla xəbər verir ki, hərbi vəziyyətin uzadılmasını məhkəmənin 10 üzvü dəstəkləyib, 5 nəfər isə bunun əleyhinə çıxıb.Bir qədər əvvəl Filippin Prezidenti Rodriqo Duterte hərbi vəziyyət rejiminin bütün ölkə ərazisində tətbiq oluna biləcəyini istisna etmədiyini bildirmişdi.Xatırladaq ki, ötən ilin mayında “Əbu Sayyaf” və “Maute” müsəlman qruplaşmaları Mindanao əyalətinin Maravi şəhərinin nəzarətini ələ aldıqdan sonra bölgədə hərbi vəziyyət rejimi tətbiq olunub. Hökumət qüvvələri yalnız 5 ay davam edən ağır döyüşlərdən sonra şəhəri geri qaytara bilmişdi. Döyüşlərin gedişində Filippin ordusunun 160 hərbçisi həlak olmuş, 1,7 min hərbçi isə yaralanmışdı.xeber100.com  

Misir prezidentinin administrasiyası yeni paytaxtına köçürüləcək

Misir prezidentinin administrasiyası və hökuməti ölkənin tikilməkdə olan inzibati paytaxtına köçürüləcək.Azərtac xəbər verir ki, Misirin MENA informasiya agentliyinin yaydığı məlumata əsasən, bunu layihənin rəhbəri Əhməd Zəki Abdin jurnalistlərə bildirib. Onun sözlərinə görə, hökumət rayonunun salınması planlaşdırılan ərazidə tikinti işləri artıq başlayıb. Hökumət müəssisələri yeni administativ paytaxta 18 ay müddətində köçürüləcək. Bu, ilk növbədə prezident dəftərxanasına, Nazirlər Kabinetinə, parlamentə aiddir.Hökumət məhəlləsinin tikintisinə 35 milyard Misir funtu (iki milyard ABŞ dollarına yaxın) vəsait qoyulması planlaşdırılır. Eyni zamanda, yeni paytaxta gələn əməkdaşlar üçün yaşayış məhəllələri salınacaq və onlar burada güzəştli şərtlərlə mənzil ala biləcəklər.Yeni inzibati paytaxt Qahirədən 45 kilometr şərqdə səhrada salınacaq. Bu, əhalisi 20 milyon nəfər olan meqapolisin yükünün azaldılması ilə bağlıdır. Nazirlik və idarələrin, parlamentin, prezident administrasiyasının, ali təhsil müəssisələrinin, diplomatik nümayəndəliklərin yerləşəcəyi yeni paytaxtın ərazisi 700 kvadratkilometr təşkil edəcək. Burada yeddi milyon insanın məskunlaşacağı gözlənilir. Layihənin birinci növbəsinin dəyəri 45 milyard dollardır və hökumətin ilkin planına əsasən, bu mərhələ 2020-ci ilədək reallaşmalıdır.Bir müddət əvvəl Çinin China State Construction Engineering Corporation dövlət mühəndis-tikinti korporasiyası ölkənin yeni inzibati paytaxtında infrastruktur obyektlərinin tikintisi üçün Misir hökuməti ilə 2,7 milyard dollarlıq saziş imzalayıb.xeber100.com