“News Best Global Universities Ranking” beynəlxalq reytinq siyahısına daxil edilib

Çexiyanın 6 ali məktəbi dünyanın 1000 ən yaxşı universitetinin hər il tərtib edilən “News Best Global Universities Ranking” beynəlxalq reytinq siyahısına daxil edilib.Azərtac xəbər verir ki, Çexiya ali məktəbləri arasında birinci yeri Karl Universiteti tutur. Dünyanın 1250 ali məktəbini əhatə edən tədqiqatın nəticəsində tərtib olunmuş reytinq siyahısında bu universitet 196-cı yeri tutur. Keçən il müvafiq araşdırma 750 ali məktəbi əhatə edirdi.Çexiya universitetləri arasında ikinci yeri Praqadakı Çexiya Texniki Universiteti (ČVUT) tutur (ümumi reytinqdə 410-cu yer). Olomoutsdakı Palatski adına Universitet isə dünyanın ən yaxşı 1000 ali məktəbi arasında 479-cu yerdədir.Dünyada ən uğurlu və nüfuzlu 1000 ali məktəb siyahısına Çexiyanın 6 universiteti, o cümlədən Brnodakı Masarik adına Universitet, Çeşske-Budeyovitsadakı Cənubi Çexiya Universiteti, Brnodakı Texniki Universitet daxildir.ABŞ-dakı Harvard Universiteti dünyanın ən nüfuzlu universiteti hesab edilib.xeber100.com

YUNESKO-nun məlumatı əsasında…

Noyabrın 2-də bütün dünyada “Jurnalistlərə qarşı cəzasız cinayətlərə son qoyulması günü” qeyd olunur.Azərtac YUNESKO-nun məlumatlarına istinadla bildirir ki, təkcə son 5 ildə (2012-2016-cı illərdə) dünyada 530, son 11 ildə isə 930 jurnalist həlak olub.BMT-nin məlumatlarına görə, 2017-ci ilin ilk on ayı ərzində 47 KİV əməkdaşı öldürülüb. Bu halda orta hesabla hər 10 hadisədən 9-da belə cinayətləri törədənlər cəzasız qalır.BMT-nin məlumatına görə, 2012-ci ildən bəri ərəb ölkələri regionu jurnalistlər üçün ən təhlükəli regiondur. Bu isə, ilk növbədə, Suriya, İraq və Yəməndə silahlı münaqişələrlə əlaqədardır.BMT Baş Assambleyasının 2013-cü ildə qəbul edilmiş qətnaməsinə əsasən noyabrın 2-si “Jurnalistlərə qarşı cəzasız cinayətlərə son qoyulması günü” elan edilib. Bu tarix 2013-cü il noyabrın 2-də Fransa radiosunun Malidə qətlə yetirilmiş iki jurnalistinin xatirəsinə ehtiram əlaməti kimi seçilib.xeber100.com

TASS informasiya agentliyinin məlumatı

İspaniya Ali Məhkəməsi Kataloniya parlamenti rəhbərliyinin 6 üzvünü, o cümlədən spiker Karme Forkadeli ifadələrinin alınması üçün çağırıb.TASS informasiya agentliyi xəbər verir ki, onlar noyabrın 2-də və 3-də ifadə verməli və məhkəməyə vəkillərin müşayiəti ilə gəlməlidirlər.Bu qərar prokurorluq regionun müstəqilliyinin elan edilməsində məsul olan parlament üzvlərinə qarşı iddia qaldırdıqdan sonra verilib. Onlar qiyamda, üsyanda və dövlət vəsaitinin israfında ittiham olunurlar.Şübhəlilər ifadə vermək üçün məhkəməyə gəlməkdən boyun qaçırsalar, prokurorluq onların həbsində israr edəcək.xeber100.com

Yaponiya hökumətinin müraciəti qəbul olunub

Noyabrın 1-də Yaponiya hökumətinin üzvləri xüsusi iclasda istefa barədə ərizələrini Baş nazir Şinzo Abeyə təqdim ediblər. Onların müraciəti qəbul olunub.Bir neçə saatdan sonra parlamentin hər iki palatası yeni Baş naziri seçəcək və o, yeni nazirləri təyin edəcək. Yaponiya qanunlarına əsasən, Baş nazir oktyabrın 22-də keçirilmiş seçkilər nəticəsində parlamentdə yer qazanan partiyaların nümayəndələri tərəfindən səs çoxluğu ilə seçilir.Qaydaya əsasən partiyalar öz liderlərinin namizədliyini irəli sürürlər. Beləliklə, ölkənin Baş naziri vəzifəsini parlamentdə daha çox yer qazanan partiyanın lideri tutur. Oktyabrın 22-də keçirilmiş seçkilərdə Ş.Abenin rəhbərlik etdiyi Yaponiya Liberal Demokratik Partiyası qalib gələrək 465 deputat yerindən 284-nü qazanıb. Bu, ona Baş nazir vəzifəsində qalmaq imkanı yaradıb.Ş.Abe avqustda formalaşdırdığı hökumətin son tərkibində dəyişikliklər etməyəcəyini artıq bəyan edib. Beləliklə, Ş.Abenin Yaponiyanın 98-ci Baş naziri seçilməsindən sonra Nazirlər Kabinetinin yeni tərkibi son üç ayda olduğu kimi qalaraq dəyişməyəcək. Bundan sonra hökumətin tərkibinin İmperator tərəfindən təsdiqi mərasimi keçiriləcək.xeber100.com

Kataloniya parlamenti seçkilərə qədər fəaliyyətini dayandırıb

İspaniya hökuməti tərəfindən istefaya göndərilən Kataloniya parlamenti bu qərarı qəbul edib və növbədənkənar seçkilərə qədər fəaliyyətini dayandırıb. Bu barədə qanunverici orqanın mətbuat xidməti məlumat yayıb.Azərtac xarici KİV-lərə istinadla xəbər verir ki, regional parlamentin oktyabrın 31-nə təyin edilən iclası ləğv olunub.Regionun müstəqilliyi haqqında qətnaməyə səs verən “Solçu Respublikaçılar” partiyası Baş nazir Mariano Rahoyun növbədənkənar seçkilər təyin etmək “səlahiyyətinin” olmadığını bildirib. Buna baxmayaraq, partiya seçkilərdə iştirak etmək niyyətindədir.Müstəqilliyin ən qatı tərəfdarlarından biri - parlamentin spikeri Karme Forkadel dekabrın 21-də keçiriləcək seçkilərə qədər rəsmən öz vəzifəsində qalacaq.Xatırladaq ki, oktyabrın 27-də Kataloniya parlamenti müstəqilliyin elan olunması haqqında qətnaməyə səs verib. Amma sənəd nə Kataloniya parlamentinin, nə də muxtariyyət hökumətinin rəsmi bülletenində dərc olunmayıb. Qanuna əsasən, bütün sənədlər bülletendə dərc edildikdən sonra qüvvəyə minir.Qətnamənin qəbulundan dərhal sonra İspaniya senatı Kataloniyaya qarşı ölkə konstitusiyasının indiyə qədər istifadə olunmayan 155-ci maddəsini işə salmaq barədə qərar qəbul edib. Baş nazir Mariano Rahoy Kataloniya hökumətinin başçısı Karles Puçdemonu və hökumət üzvlərini vəzifədən kənarlaşdırıb. Həmçinin regional parlament buraxılıb və dekabrın 21-nə növbədənkənar seçkilər təyin olunub.xeber100.com

Hərbi Hava Qüvvələri təlimlərə başlayıb

Bu gün səhər saatlarında İran İslam Respublikası Ordusunun Hərbi Hava Qüvvələri (HHQ) təlimlərə başlayıb. İranın İsfahan şəhəri yaxınlığında yerləşən hərbi aeroportundan havaya qalxan hərbi təyyarələr döyüş tapşırığını yerinə yetirirlər.İran HHQ-nin nümayəndəsi general Məsud Hoşruz mətbuata açıqlamasında bildirib ki, təlimlərin məqsədi hərbi təyyarələrin və şəxsi heyətin döyüş qabiliyyətini yoxlamaqdır.xeber100.com

İrqçilər etiraz aksiyası keçiriblər

Şənbə günü ağdərili irqçi və neonasist qruplar Tennessi ştatının Şelbivill və Merfrisboro şəhərlərində qaçqınların yerləşdirilməsinə qarşı etirazlarını bildirmək üçün bu şəhərlərdə mitinqlər keçiriblər. “Ağların həyatı daha vacibdir” şüarı altında keçirilən etiraz aksiyasının təşkil olunmasında iştirak edənlərin çoxu bu il avqust ayında Virciniya ştatının Şarlotsvil şəhərində neonasist yürüşün təşkil edilməsinin iştirakçılarıdır.Xatırladaq ki, avqust yürüşü bir nəfərin öldürülməsi və onlarca insanın yaralanması ilə nəticələnmişdi. Virciniyada olduğu kimi Tennessi ştatının şəhərlərində də belə aksiyanın çoxsaylı əleyhdarları nümayiş keçirərək toplaşaraq irqçiliyi pisləyib və tolerantlıq tələbləri irəli sürüblər.Şelbivill və Merfrisboro şəhərləri Tennessi ştatının əsas meqapolisi sayılan Neşvilin yaxınlığında yerləşir. Neşvildə Somali, İraq və digər ölkələrdən çoxsaylı qaçqınlar qəbul edilməsinə başlanıb.Nümayiş zamanı polis ilə bu nümayişin əleyhdarları arasında toqquşma qeydə alınmayıb.xeber100.com

RİA Novosti agentliyinin məlumatı

Qazaxıstan Prezidenti Nursultan Nazarbayev latın qrafikasına keçid haqqında fərman imzalayıb.RİA Novosti agentliyi xəbər verir ki, sənədə əsasən, yeni əlifbaya keçid 2025-ci ilədək mərhələli şəkildə həyata keçiriləcək.Prezident latın qrafikası əsasında hazırlanmış və 32 hərfdən ibarət olan Qazax əlifbasını təsdiqləyib. Xatırladaq ki, kiril qrafikalı Qazaxıstan əlifbasında 42 hərf var.Latın qrafikasına keçidlə bağlı tapşırıq Prezident Nursultan Nazarbayev tərəfindən 2017-ci ilin aprelində verilmişdi. Bu məqsədlə ümumxalq müzakirələri aparılmış və müvafiq layihə hazırlanmışdı.Qazaxıstanın informasiya və kommunikasiya naziri Dauren Abayevin sözlərinə görə, latın qrafikasına keçmək qərarı heç bir siyasi motivlə əlaqəli deyil.Bu gün postsovet məkanında latın qrafikasından Baltikyanı ölkələrdə, habelə türkdilli ölkələr olan Azərbaycan, Türkmənistan və Özbəkistanda istifadə olunur. Qırğızıstan parlamentinin deputatları latın qrafikasına keçmək haqqında məsələ qaldırsalar da, Prezident Almazbek Atambayev buna qarşı çıxıb.xeber100.com

BMT-nin insan hüquqları ilə bağlı hazırladığı hesabatda

İran BMT-nin insan hüquqları ilə bağlı hazırladığı hesabatı qərəzli hesab edir.Bu sözləri İranın Xarici İşlər Nazirliyinin rəsmi nümayəndəsi Bəhram Qasemi həftəlik mətbuat konfransında deyib.Onun sözlərinə görə, hesabat qeyri-obyektiv hazırlanıb və həqiqəti əks etdirmir. Hesabatın siyasi xarakter daşıdığını bildirən B. Qasemi İranda insanların hüquq və azadlıqlarının qorunduğunu bildirib.Xatırladaq ki, BMT-nin “İranda insan hüquqlarının vəziyyəti” ilə bağlı hazırladığı hesabatda İranda insan hüquqlarının kütləvi şəkildə pozulması, ölkədə edam hökmünün hələ də qüvvədə qalması göstərilib.xeber100.com

“Al Youm as Sabia” nəşri yazır…

Misirin “Al Youm as Sabia” nəşri ölkənin təhlükəsizlik qüvvələrindəki mənbəyə istinadla xəbər verir ki, Qahirədən cənub-qərbdə yerləşən Al-Vahat rayonundakı səhralıqda Misirin təhlükəsizlik qüvvələri tərəfindən həyata keçirilən antiterror əməliyyatının gedişində 13 terrorçu məhv edilib. “Al Youm as Sabia” nəşri bildirir ki, təhlükəsizlik qüvvələri ilə terrorçular arasında silahlı münaqişə nəticəsində 13 terrorçu məhv edilib. Həmin terrorçuların keçən cümə günü Al-Vahat rayonunda təhlükəsizlik qüvvələrinə hücumda əli olması güman edilir. Bu hücum nəticəsində 16 polis işçisi həlak olub, 15 terrorçu məhv edilib. Hazırda təhlükəsizlik qüvvələri terrorçuların məhv edilməsi üzrə əməliyyatı davam etdirirlər.xeber100.com