Pentaqonun mətbuat xidmətindən verilən məlumata görə, aprelin 6-da axşam ABŞ Hərbi Dəniz Qüvvələri (HDQ) Suriyadakı Şayrat aerodromuna zərbələr endirilib. Şayrat aerodromuna zərbələr zamanı Şərqi Aralıq dənizindəki “USS Porter” və “USS Ross” eskadra mina gəmilərdən buraxılmış, yerüstü hədəflərin məhv edilməsi üçün nəzərdə tutulan “Tomaqavk” raketlərindən (TLAM) istifadə edilib. Suriyanın Homs vilayətində yerləşən Şayrat aerodromundakı təyyarələrin, onlar üçün yüksək dərəcədə qorunan sığınacaqların, neft və logistika anbarlarının, döyüş sursatı bunkerlərinin, hava hücumundan müdafiə sistemlərinin və radarların məhv edilməsi üçün ümumilikdə 59 raket buraxılıb.Əməliyyatdan iki saat sonra Prezident Tramp Suriya aerodromuna ABŞ-ın zərbələri ilə əlaqədar bəyanatla çıxış edib. ABŞ Prezidenti deyib ki, Suriya Prezidenti Bəşər əl-Əsəd dinc sakinlərə qarşı dəhşətli kimyəvi hücum edib, bu zaman əsəb-iflic təsirinə malik olan ölümsaçan zəhərli maddələrdən istifadə edilib. Tramp bəyan edib ki, bu kimyəvi hücum Suriyadakı hərbi aerodromdan başlandığı üçün o, həmin aerodroma məqsədyönlü şəkildə zərbə endirilməsi barədə əmr verib.xeber100.com
