Hindistan Meteoroloji Departamentinin məlumatı…

Hindistanda 2016-cı il ərzində sərt hava şəraiti və təbii fəlakətlər nəticəsində 1,6 min insan həyatını itirib. Bu barədə məlumat ölkənin Meteoroloji Departamentinin məruzəsində əksini tapıb.Xarici KİV-lər xəbər verir ki, ən çox insan tələfatı adətən aprel-iyun aylarına təsadüf edən istilər nəticəsində baş verib. Şiddətli istilər 700 nəfərə qədər insanın həyatına son qoyub. Həmin vaxt Racastan ştatının Pxalodi şəhərində müsbət 51 dərəcə istilik rekordu qeydə alınıb.İnsan ölümünə görə ikinci yeri yağışların səbəb olduğu daşqınlar tutub. Musson mövsümündə çayların məcrasından çıxması nəticəsində ölkədə ümumilikdə 475 insan həlak olub ki, onlardan 175 nəfəri Bihar ştatının payına düşüb.xeber100.com

“Manas” Beynəlxalq Aeroportu müvəqqəti olaraq bağlanıb

Bişkekdəki “Manas” Beynəlxalq Aeroportu yaxınlığında Türkiyənin AST şirkətinə məxsus Boeing 747-400 yük təyyarəsinin qəzaya uğraması nəticəsində ölənlərin sayı 42-yə çatıb. Ölənlərin 37-si təyyarə düşən qəsəbənin sakinləri, 5-i ekipaj üzvüdür. Qəza nəticəsində ciddi xəsarət alan 11 nəfər xəstəxanalara yerləşdirilib. Hadisə ilə bağlı hava limanı müvəqqəti olaraq bağlanıb.Qırğızıstan Baş nazirinin birinci müavini, qəza ilə bağlı yaradılan Hökumət Komissiyasının rəhbəri Muxammedkalıy Abulqaziyev deyib ki, ilkin məlumata görə, təyyarə hava şəraitinin pis olması və ekipajın vəziyyəti düzgün qiymətləndirə bilməməsi səbəbindən qəzaya uğrayıb.xeber100.com

ABŞ-da aksiyalar başlayıb

Yeni seçilmiş ABŞ Prezidenti Donald Trampın andiçmə mərasiminə bir həftə qalmış Vaşinqtonda vətəndaş hüquqları hərəkatının fəalları etiraz aksiyasına başlayıblar.Nümayişçilər Donald Tramp hakimiyyətinin növbəti dörd ili ərzində bərabərlik və ədalət uğrunda mübarizəni etiraz aksiyaları ilə davam etdirəcəklərini bildirirlər. Nümayişçilərin şüarlarından biri “Ədalət yoxdursa, deməli, sülh yoxdur” olub. Bu yolla onlar azlıqların hüquqlarına və Donald Trampın prezidentliyi dövründə ləğv edəcəyini söz verdiyi “Pasiyentlərin müdafiəsi və əlçatan tibbi xidmət haqqında” Qanunun (Obamacare) qorunub saxlanmasına dəstəklərini ifadə ediblər.xeber100.com

“RİA Novosti” agentliyinin məlumatına görə…

Liviya sahillərində göyərtəsində 110 miqrantın olduğu gəmi batıb.“RİA Novosti” agentliyi xəbər verir ki, onlardan 4-nü xilas etmək mümkün olub. Səkkiz nəfərin cəsədi tapılıb.Bu barədə Beynəlxalq Miqrasiya Təşkilatının nümayəndəsi Flavio di Cakomo bildirib.Hadisə Liviya sahilindən 50 kilometr aralıda baş verib.xeber100.com

5,5 bal gücündə zəlzələ baş verib

Sakit okeanın cənubunda, Fici adaları sahillərində ardıcıl zəlzələlər baş verib. Bu barədə ABŞ Geoloji Xidməti məlumat yayıb. 5,5 bal gücündə ilk zəlzələ yerli vaxtla saat 06:25 dəqiqədə qeydə alınıb. Yeraltı təkanların episentri Nandi şəhərindən 171 kilometr cənub-qərbdə, ocağı isə 10 kilometr dərinlikdə yerləşib. Dağıntılar və zərərçəkənlər barədə hələlik məlumat verilmir.Şənbə günü səhər saatlarında 6,1 bal gücündə daha bir zəlzələ qeydə alınıb. Növbəti yeraltı təkanın episentri Nandi şəhərindən 185 kilometr cənub-qərbdə, ocağı 60 kilometr dərinlikdə yerləşib. Sunami təhlükəsi elan olunmayıb.xeber100.com

Beynəlxalq konfrans işə başlayıb

Bu gün Parisdə Fələstin-İsrail nizamlanması üzrə beynəlxalq konfrans işə başlayıb. RİA Novosti informasiya agentliyi xəbər verir ki, konfransda 70-ə yaxın ölkənin nümayəndəsi iştirak edir. Fransanın hakimiyyət orqanları İsrailin Baş naziri Binyamin Netanyahunu və Fələstin lideri Mahmud Abbası konfransa dəvət ediblər. Lakin konfransı “aldadıcı” adlandıran Netanyahu Parisə gəlməyib.Fransanın təşəbbüsünü dəstəkləyən Mahmud Abbas bunun iki ölkə üçün həll tapmaqda bəlkə də son imkan olduğunu bildirib. Fransa Prezidenti Fransua Ollandın yaxın həftələrdə Fələstin lideri ilə görüşəcəyi gözlənilir.xeber100.com

İtaliya hökuməti yeni vergitutma qaydaları tətbiq edəcək

İtaliya hökuməti zəngin qeyri-rezidentləri ölkəyə cəlb etmək üçün yeni vergitutma qaydaları tətbiq etməyi planlaşdırır. Bu addımın atılması ölkənin 2017-ci il üçün təsdiq edilmiş büdcəsində nəzərə alınıb. “vergiler.az" saytı bildirir ki, yeni qaydaya əsasən, İtaliya əcnəbilərə xüsusi status verəcək, onlar ofşor zonalardan əldə etdikləri gəlirlərə görə bu ölkədə vergi ödəməkdən azad ediləcəklər.Qeyri-rezidentlər üçün vergitutmanın bu qaydası hər il 100 min avro yığım təqdim edilməsi halında mümkün olacaq.xeber100.com

Macarıstan məhkəməsinin qərarına əsasən…

Qucağında uşaq olan suriyalı qaçqına badalaq vurmuş N1TV özəl internet-telekanalının jurnalisti Petra Lasloya üç il şərti həbs cəzası verilib. Hökmü Macarıstanın Seqed şəhər məhkəməsi çıxarıb. Hadisə 2015-ci ildə ölkənin Serbiya sərhədi yaxınlığında - Macarıstanın cənubunda qaçqın qəbulu məntəqəsi yanında baş verib. Videoyazıda qucağında uşaq tutan suriyalıya jurnalistin necə badalaq vurması və bunun nəticəsində kişinin yıxılması aydın görünür. Videoçarx “YouTube” portalında yerləşdirilib və böyük əks-səda doğurub Petra Laslo işdən azad edilib, 2016-cı ilin sentyabrında isə Seqed şəhər prokuroru onun haqqında xuliqanlıq ittihamı üzrə istintaq işinə başlayıb.Jurnalist üzr istəyərək öz hərəkətinin səbəbini təlaş içində olması, ona tərəf qaçan insan izdihamından qorxması ilə izah edib.xeber100.com

Təhlükəsizlik üçün 300 milyon avro ayrılacaq

Parisin simvolu olan Eyfel qülləsinin təhlükəsizliyi və yenilənməsi üçün 300 milyon avro sərf olunacaq.Anadolu agentliyi xəbər verir ki, Paris Bələdiyyə Məclisi tərəfindən bu ayın sonunda səsverməyə çıxarılacaq 15 illik büdcə ilə Eyfelin yenilənməsi və təhlükəsizliyi təmin ediləcək.Parisin Sosialist Partiyasından olan bələdiyyə sədri Anne Hidalgo Parisin 2024-cü ildə keçiriləcək Yay Olimpiya Oyunlarına və “2025 Expo”ya namizəd olduğunu xatırladaraq həm Eyfel qülləsinin, həm də Parisin marka dəyərini artıracaqlarını deyib.Bələdiyyə məclisinin qəbul edəcəyi 15 illik plan üzrə hər il 20 milyon avro xərclənməsi planlaşdırılır.Dünyanın ən çox turist qəbul edən ilk 3 şəhəri arasında yer alan Parisdəki Eyfel qülləsini 2015-ci ildə təxminən 7 milyon turist ziyarət edib.xeber100.com

“Sberbank” robotlarla çalışmaq niyyətindədir

Rusiyanın "Sberbank"ı üç min əməkdaşını işdən azad edərək, onları robotlarla əvəzləmək niyyətindədir. "lenta.ru" xəbər verir ki, bu barədə bankın idarə heyətinin sədr müavini Vadim Kulik bildirib. Onun sözlərinə görə, robot-hüquqşünaslar artıq 2016-cı ilin sonunda işə salınıb. Hazırda robotlar digər istiqamətlər üzrə hazırlanır. Robotların əvəz edəcəyi bank əməkdaşlarının bir hissəsi yenidən təlim proqramında iştirak edəcək, digərləri isə ixtisar olunacaq.xeber100.com