Türkiyədəki vəziyyət müzakirə olunacaq

AŞPA-nın payız sessiyasında Fransa prezidenti Fransua Oland, Almaniyanın xarici işlər naziri, ATƏT-in fəaliyyətdə olan sədri Frank Valter Ştaynmayer və Türkiyənin xarici işlər naziri Mövlud Çavuşoğlu çıxış edəcəklər. AŞPA saytının verdiyi məlumata görə, payız sessiyası oktyabrın 10-14-də keçiriləcək. Sessiya zamanı Türkiyədəki vəziyyət, Ukrayna münaqişəsi, surroqatlıqla bağlı uşaq hüquqları, maliyyə və sosial ədalətin təminatı məsələləri, Beynəlxalq Cinayət Məhkəməsi ilə əməkdaşlıq müzakirə olunacaq. Estoniya xarici işlər naziri Jürgen Liqi sədrlik etdiyi AŞ Nazirlər Komitəsinin fəaliyyəti barədə hesabat verəcək. Payız sessiyasında 2016-cı il üzrə “Vatslav Havel” insan haqları mükafatının qalibinin adı açıqlanacaq. Sessiyanın açılış günündə Büro iclası da keçiriləcək. İclasda Azərbaycanda sentyabrın 26-də Konstitusiyaya dəyişikliklərlə bağlı referendum və Avropa İnsan Haqları Məhkəməsinə azərbaycanlı hakimin seçilməsi məsələsi müzakirə ediləcək.xeber100.com

Kubada 1,3 milyon insan təxliyyə edilib

Bir neçə saat əvvəl Haiti və Dominikan Respublikasından keçən “Metyu” qasırğası artıq Kubanın şərqində də daşqınlar və dağıntılar törədib. Qasırğa son dərəcə təhlükəli kimi qiymətləndirilir. Leysanla müşayiət olunan qasırğanın mərkəzində küləyin sürəti saatda 220 kilometrə çatıb. Azərtac xarici KİV-lərə istinadla xəbər verir ki, qasırğa səbəbindən Kubada 1 milyon 300 min insan təxliyyə edilib. ABŞ Qasırğaların Monitorinqi Mərkəzinin məlumatına əsasən qasırğa Baham adalarına doğru irəliləyir. “Metyu” son 10 ildə Karib hövzəsində baş verən ən şiddətli qasırğadır.xeber100.com

Fövqəladə vəziyyət barədə qanun ləğv edilib

Myanmada 60 ildən çox davam edən və hökumət tərəfindən, həmçinin siyasi təqiblər üçün istifadə edilən fövqəladə vəziyyət barədə qanun Prezident Txin Çjonun qərarı ilə ləğv olunub. TASS informasiya agentliyi xəbər verir ki, bir zamanlar Birma adlanan Myanmada fövqəladə vəziyyət barədə qanun ölkə Britaniya müstəmləkəsindən qurtulduqdan bir qədər sonra - 1950-ci ildə qəbul edilmişdi. Sənəd sabotaj və dövlətə xəyanətə görə ömürlük həbs və ya ölüm hökmü cəzasını nəzərdə tuturdu. Yalan məlumat yayma və ictimai əxlaq normalarının pozulması kimi cinayətlərə görə isə uzunmüddətli həbs cəzaları tətbiq olunurdu. Müşahidəçilər qeyd edirlər ki, Birma xuntası zamanı qanun hökumət tərəfindən siyasi rəqiblərə qarşı da istifadə edilib. Sentyabrın sonlarında ölkə parlamenti qanunverici aktın ləğv olunmasını təsdiqləyib. Qeyd edək ki, Myanma 1962-ci ildən etibarən hərbçilərin idarəsi altında olub. Ölkədə demokratiyaya doğru ilk addımlar yalnız 2010-cu ildən atılmağa başlayıb. Bu ilin əvvəlində respublikanın icraedici və qanunverici hakimiyyəti Nobel sülh mükafatı laureatı Aun San Su Çjinin başçılıq etdiyi Demokratiya uğrunda Milli Liqaya keçib. Parlament Txin Çjonu prezident seçib. O, hərbi diktatura ilə əlaqəsi olmayan ilk dövlət başçısı kimi tarixə düşüb.xeber100.com

Dünya Robotlar Sammiti keçiriləcək

Yaponiya hökuməti 2020-ci ildə Dünya Robotlar Sammitinin keçirilməsi barədə qərar qəbul edib. Sammit zamanı həmin maşınlar dəqiqlik, sürət və keyfiyyət kateqoriyaları üzrə yarışacaqlar.Bu barədə Yaponiyanın iqtisadiyyat, ticarət və sənaye naziri Hiroşiqe Seko Tokioda keçirilən mətbuat konfransında məlumat verib. Nazir deyib: “Ümid edirik ki, bütün dünyadakı ən yaxşı robotları və bu sahədə olan ideyaları bir yerə cəmləyə biləcəyik”.xeber100.com

Rusiya Mərkəzi Bankının məlumatına görə…

Rusiya Mərkəzi Bankının rəhbəri Elvira Nabiullina neftin qiymətinin 25 dollara düşməsi vəziyyətində belə fəlakət yaşanmayacağını deyib. “gazeta.ru” xəbər verir ki, E.Nabiullina, neft qiymətlərinə bağlı iqtisadi artım modelinin artıq təsirli olmadığını deyib. O, yeni modelin investisiyaya söykənən olmasının vacibliyini bildirib.xeber100.com

5,7 bal gücündə zəlzələ baş verib

Filippin sahillərində 5,7 bal gücündə zəlzələ baş verib. TASS agentliyinin məlumatına görə, yeraltı təkanların episentri Balinqasey şəhərindən 4 km şimal-qərbdə, ocağı isə 23 km dərinlikdə yerləşib. Dağıntı və zərərçəkənlər barədə məlumat yoxdur.xeber100.com

Miqrant kvotası ilə bağlı referendum baş tutmayıb

Macarıstanda miqrant kvotası ilə bağlı referendum formal olaraq baş tutmamış sayılıb. Səsverməyə gələnlərin sayı 44 faizdən bir qədər az olub. Ölkə qanunvericiliyinə görə isə, referendumun nəticələrinin tanınması üçün minimum 50 faiz seçicinin iştirakı tələb edilir. Euronews telekanalı xəbər verir ki, bununla yanaşı, səsvermə məntəqəsinə kim gəlibsə, birmənalı olaraq Avropa İttifaqının miqrasiya siyasətinə qarşı çıxıb. Baş nazir Viktor Orban səsvermənin nəticələrini şərh edərkən deyib: ”Brüssel yoxsa Budapeşt? Sual bundan ibarət idi. Biz müəyyənləşdirdik ki, qərar qəbul etmək hüququ tamamilə Budapeştdə qalır. İndi məsələ belədir: seçicilərin 92 faizinin “yox” dediyi təqdirdə, Avropa İttifaqı kimi demokratik bir birlik öz iradəsini yeridə bilərmi? Mən Macarıstan vətəndaşlarına söz verirəm ki, bunun baş verməməsi üçün hər şeyi edəcəyəm”. Xatırladaq ki, Avropa İttifaqı Komissiyası ötən il qeyri-leqal mühacirlərin Aİ üzvləri arasında Brüssel tərəfindən təyin olunan kvota üzrə bölüşdürülməsi ideyası ilə çıxış etmişdi. Bir çox ölkələr, xüsusən Şərqi və Mərkəzi Avropa ölkələri bu proqramı yerinə yetirməkdən imtina etmişdilər. Nəticədə qeyri-leqalların yalnız 1 faizini kvota üzrə yerləşdirmək mümkün olmuşdu.xeber100.com

Estoniya parlamenti ölkə prezidentini seçib

Estoniya parlamenti üçüncü cəhddə ölkə prezidentini seçib. Bu, əvvəllər Avropa Hesablama Palatasında Estoniyanın nümayəndəsi olan Kersti Kalyulaydır. RİA Novosti informasiya agentliyi xəbər verir ki, parlamentdə keçirilən seçkilərdə namizəd deputatların səslərinin üçdə iki hissəsini – 101 səsdən azı 68-ni toplamalıdır. Dövlət başçısı postuna yeganə namizəd olan Kersti Kalyulayda isə 81 deputat səs verib. Beləliklə də o, Estoniyanın ilk qadın prezidenti seçilib. Estoniyanın hazırki prezidenti Tomas Hendrik İlvesin səlahiyyət müddəti oktyabr ayında başa çatır. O, bu postu ikinci dəfə tutduğundan konstitusiyaya əsasən üçüncü müddətə seçilə bilməz. Xatırladaq ki, bundan əvvəl prezident seçməyə göstərilən iki cəhd nəticəsiz qalmışdı. Estoniyada prezident seçkilərinin iki səviyyəli seçki sistemi mövcuddur. Əvvəlcə dövlət başçısını parlament seçməyə çalışır. Əgər namizədlərdən heç biri lazımı qədər səs toplamasa, seçkilər seçənlər kollegiyasında davam etdirilir.xeber100.com

Hindistan telekanallarının yayımına qadağa qoyulub

Pakistanın elektron KİV-lərin fəaliyyətini tənzimləyən orqanı (Pakistan Electronic Media Regulatory Authority, PEMRA) oktyabrın 1-də ölkə ərazisində Hindistan informasiya kanallarının “qanunsuz” yayımını tam qadağan edən qərar verib. RİA Novosti informasiya agentliyi xəbər verir ki, qərar oktyabrın 15-dən qüvvəyə minəcək. Qadağaya məhəl qoymayaraq yayımı davam etdirən kabel televiziya kompaniyalarına qarşı sərt tədbirlər görüləcək. Bir qədər əvvəl Pakistandakı kinoteatrlar Hindistanın ölkə ərazisindəki 7 rayona zərbələr endirməsi nəticəsində iki pakistanlı hərbçinin ölümünə cavab olaraq hind filmlərini yayımlamaqdan imtina etdiyini bildirmişdi. Qeyd edək ki, yaraqlıların Kəşmirdə yerləşən hərbi hissəyə hücumundan sonra iki ölkə arasında gərginlik artmağa başlayıb. Həmin hadisə nəticəsində Hindistan ordusunun 18 hərbçisi həlak olmuşdu. Nyu-Deli yaraqlıların Pakistan ərazisindən gəldiyini iddia etsə də, İslamabad insidentlə əlaqəsinin olmadığını bildirib.xeber100.com

NHK TV-nin məlumatına görə…

Yaponiyanın avtomobil istehsalı sahəsində tanınmış “Nissan” şirkəti və onu fransalı tərəfdaşı “Renault” “Microsoft” şirkəti ilə birlikdə avtomobilləri internetlə birləşdirəcək yeni texnologiyaların üzərində işləməyə başlayıb. Bu texnologiya çoxlu sayda xidmətlərin göstərilməsinə şərait yaradacaq. NHK televiziya kanalının verdiyi məlumata görə, avtomobilin sürücüsü oturacağın yanında yerləşdiriləcək panelə toxunuşla sürətli yolda hərəkət və ya dayanacaq haqqını ödəyəcək. Bundan əlavə, istifadəçi smartfon və ya şəxsi kompyuteri vasitəsilə elektromobili yanacaqla dolduracaq və qapıları da açacaqdır.xeber100.com