Milli təhlükəsizliyin qorunması məqsədi ilə…

Britaniya hökuməti milli təhlükəsizliyin qorunması məqsədi ilə ölkə ərazisində 18 milyard funtsterlinq dəyərində yeni atom elektrik stansiyasının tikintisinə icazə verib. Qeyd edək ki, stansiya Somerest bölgəsində Bristol kanalının sahilində tikiləcək. İnşaat işləri Çin və Fransanın birgə maliyyə dəstəyi ilə aparılacaq.xeber100.com

TASS informasiya agentliyinin məlumatına görə…

Ştatın baş prokuroru Erik Şnaydermanın sözlərinə görə, qurum xeyriyyə sahəsində qanuna əməl olunması ilə əlaqədar “Donald J.Trump Foundation” fondunda yoxlamalar aparır. TASS informasiya agentliyi xəbər verir ki, təhqiqat son zamanlar aşkara çıxan bəzi şübhəli əməliyyatlar səbəbindən başlayıb. ABŞ prezidenti postuna Respublika Partiyasından namizəd Donald Trampın xeyriyyə fondunun fəaliyyəti son aylar KİV-lərin diqqətini çəkib. Jurnalist təhqiqatı aparan “Washington Post” qəzeti milyarderin 2008-ci ildən yaratdığı fonda bir sent belə köçürmədiyini aşkarlayıb. Bundan başqa nəşrin iddiasına görə, Tramp xeyriyyəçilik üçün yığılan vəsaiti öz məqsədlərinə xərcləyib. Biznesmeni, həmçinin 2013-cü ildə “Tramp universiteti” adlı təşkilatın əleyhinə araşdırma aparmaq istəyən Florida ştatının prokuroru Pem Bondinin hesabına qanunsuz pul köçürməkdə də ittiham edirlər. “Forbes” jurnalının məlumatına əsasən, tikinti imperiyasının başçısı olan Donald Trampın varidatı 4,5 milyard dollar həcmində qiymətləndirilir. Biznesmenin özü isə 10 milyard dollardan çox kapitala malik olduğunu iddia edir.xeber100.com

Avropa Komissiyasının təklifi…

Avropa Komissiyası 2020-ci ilədək Avropanın bütün şəhər mərkəzlərində pulsuz internet quraşdırmaq, 2025-ci ilədək isə Avropa İttifaqının bütün ərazisini G5 nəsil rabitə ilə təmin etmək təklifini irəli sürüb. RİA Novosti informasiya agentliyi xəbər verir ki, bu təklifi komissiyanın sədri Jan-Klod Yunker Avropa parlamentinin Strasburqda keçirilən plenar sessiyasındakı illik nitqində səsləndirib. O, qeyd edib ki, “biz rabitəyə malik olmalıyıq, bizim iqtisadiyyatımızın və xalqın buna ehtiyacı var”. Buna görə də komissiya Avropa kommunikasiya bazarında islahatlar aparmağı təklif edir. Komissiya sədrinin fikrincə, avropalılar yeni şəbəkə və xidmətlərə investisiya qoysalar, bu, növbəti onillikdə minimum 1,3 milyon yeni iş yeri yaratmağa imkan verəcək.xeber100.com

Türkmənistanda Konstitusiya Qanunu qəbul edilib

Xəbər verildiyi kimi, Türkmənistanın paytaxtında Ağsaqqallar Şurasının iclası işinə başlayıb. Azərtac xəbər verir ki, iclasda Türkmənistan Konstitusiyasının yeni redaksiyasının təsdiq edilməsi haqqında Konstitusiya Qanunu qəbul edilib. Konstitusiya Qanununun qəbulu siyasi sistemin təkmilləşdirilməsinə, dövlət və cəmiyyətin mərhələli şəkildə demokratikləşdirilməsinə yönələn Konstitusiya islahatlarının məntiqi davamıdır. Bu prosesin mühüm nəticələrindən biri Türkmənistanda ölkə tarixində ilk dəfə olaraq İnsan Haqları Müvəkkili vəzifəsinin təsis edilməsidir. Konstitusiya Qanunu qəbul edilməzdən əvvəl siyasi partiyalarda, ictimai təşkilatlarda, əmək kollektivlərində geniş müzakirə edilib. Qanunun qəbulunda vətəndaşlardan daxil olan təklif və arzular nəzərə alınıb.xeber100.com

İslam Universiteti fəaliyyətə başlayıb

İspaniyanın Bask vilayətindəki San-Sebastyan şəhərində İslam Universiteti fəaliyyətə başlayıb. Ölkədə ilk belə təhsil müəssisəsi olan universitetdə yerli məscidlər üçün kadrlar hazırlanacaq, İslam dini onu öyrənmək istəyənlərə akademik səviyyədə tədris olunacaq. Universitetin yaradıcısı Rəşid Butrabux bildirib ki, əsas məqsəd internetdə yayılan zərərli dini təbliğata, ekstremist ideyalara qarşı mübarizə aparmaqdır.xeber100.com

Prezident seçkilərinin vaxtı dəyişdirilib

Avstriyada prezident seçkilərinin təşkili ilə bağlı hüquqi-texniki problemlər silsiləsi davam etməkdədir. Avstriyanın daxili işlər naziri Volfqanq Sobotka sentyabrın 12-də keçirilən mətbuat konfransında oktyabrın 2-nə təyin edilmiş təkrar prezident seçkilərinin vaxtının dəyişdirildiyini elan edib. Mərkəzi seçki komissiyasının rəhbəri funksiyasını daşıyan nazirin sözlərinə görə, səsvermə hüququndan məktubla istifadə etmək istəyən vətəndaşlara göndərilmiş zərflərdəki texniki qüsurlar seçkilərin düzgün və qanunauyğun baş tutmasını təmin edə bilmir. Buna görə də seçkiləri təşkil edən mərkəzi qurum olaraq Daxili İşlər Nazirliyində təkrar seçkilərin dekabrın 4-də keçirilməsi barədə qərar qəbul olunub.xeber100.com

Anadolu Agentliyinin məlumatına görə…

Amerika Birləşmiş Ştatlarının Prezidenti Barak Obama və ailəsi İslam dünyasını Qurban bayramı münasibətilə təbrik edib. Anadolu Agentliyi xəbər verir ki, Qurban bayramının yardım etmək baxımından önəmini vurğulayan Barak Obama qarşıdurmaların yaşandığı bir çox ölkədən milyonlarla insanın daha yaxşı həyat üçün başqa ölkələrə üz tutduğunu xatırladıb. Obama təbrikində ABŞ-ın qaçqınları bundan sonra da qəbul edəcəyini bildirərək deyib: “Bu il Qurban bayramını qeyd edərkən dünyada milyonlarla qaçqının bu müqəddəs günləri ailələrindən uzaqda, gələcəklərinə əmin olmadan, ancaq yaxşı bir gələcək üçün ümidlə keçirdiklərini bilirik. Biz də özümüzü müharibədən qaçanların, daha yaxşı həyat axtaran insanların yerinə qoyaraq, onları açıq ürəklə qəbul etməyə davam edəcəyik”.xeber100.com

Yunanıstanda fövqəladə vəziyyət elan olunub

türkiyə mətbuatının məlumatına görə, Yunanıstanın şimalındakı Tasos adasında yanğınlar səbəbindən fövqəladə vəziyyət elan edilib. Aliki, Prinos, Raxoni, Kazaviti, Sotiros rayonlarında da yanğınlara görə vəziyyət ağır olaraq qalır. Yanğınlar dağlıq rayonlarda daha ağır fəsadlar törədir.xeber100.com

Rakka şəhərini azad etmək üçün…

Türkiyənin “Yeni Şafak” qəzeti yazır ki, Qurban bayramından sonra Rakka əməliyyatı ilə bağlı ABŞ hərbi nümayəndə heyəti Ankaraya gələcək, planlaşdırılan əməliyyatın detalları müzakirə ediləcək. Hazırda Türkiyə hökuməti və ordu rəhbərliyi Rakkanın sosial-mədəni quruluşunu, 2013-cü ildən sonra şəhərdə baş verən prosesləri, İŞİD-in bölgədə döyüş qabiliyyətini və Rakka əməliyyatından sonra ortaya çıxa biləcək bütün ssenariləri araşdırır. ABŞ nümayəndə heyətinin səfərinə qədər bu araşdırmalar yekunlaşdırılacaq və görüşdə Rakka əməliyyatının bütün aspektləri müzakirə olunacaq. Türkiyənin Rakkanın azad edilməsində iştirak etməsi üçün ABŞ qarşısında irəli sürəcəyi iki əsas şərdən biri PKK terror təşkilatının Suriya qolu olan PYD-nin silahlı qanadı YPG-nin əməliyyata qatılmamasıdır. Türkiyə YPG-nin əsas rol oynadığı Suriya Demokratik Qüvvələrini də heç bir halda Rakkka əməliyyatında görmək istəmir. Ankara Rakka əməliyyatının koalisiya qüvvələrinin ortaq əməliyyatı olaraq həyata keçirilməsini zəruri sayır. Türkiyənin ikinci şərti Münbiçlə bağlıdır. Türkiyə PYD və ona bağlı SuriyaDemokratik Qüvvələrinin Münbiçdən çəkilməsini, Rakka əməliyyatı zamanı Münbiçin quru qüvvələrinin əsas bazası olmasını zəruri sayır. Bu halda Türkiyə ordusunun dəstəklədiyi müxalif Azad Suriya Ordusu Rakka əməliyyatında əsas rolu öz üzərinə götürəcək. Türkiyə bu iki şərtin yerinə yetiriləcəyi halda, Rakka əməliyyatı zamanı müxalif Azad Suriya Ordusuna tank və digər zirehli birləşmələrlə dəstək verməyə, o cümlədən Türkiyə ordusunun xüsusi təyinatlı bölmələrinin də müxaliflərlə birgə quru əməliyyatında iştirak etməsinə hazırdır.xeber100.com  

TASS-ın məlumatına görə…

Suriyada hökumət qüvvələri ilə silahlı müxalifət qrupları arasında atəşkəs rejimi qüvvəyə minib. TASS-ın xəbərinə görə, Qurban bayramı ilə əlaqədar elan edilən 48-saatlıq atəşkəs rejiminin uzadılacağı gözlənilir. Sentyabrın 10-da ABŞ və Rusiya Federasiyası arasında imzalanan razılaşmaya əsasən sentyabrın 12-si, saat 00:00-dan etibarən Suriyada hökumət qüvvələri və müxalifətin silahlı qrupları arasında atəşkəs qüvvəyə minir. Razılaşma İsveçrənin Cenevrə şəhərində Rusiya xarici işlər naziri Sergey Lavrov və ABŞ dövlət katibi Con Kerrinin arasında keçirilən 13 saatlıq görüşdən sonra əldə edilib.xeber100.com