Suriya problemi müzakirə edilib

Rusiya və Türkiyə prezidentləri Vladimir Putin və Rəcəb Tayyib Ərdoğan arasında telefon danışığı olub. Azərtac xəbər verir ki, bu barədə Rusiya Prezidentinin mətbuat xidməti məlumat yayıb. Xəbərdə qeyd olunur ki, Türkiyə tərəfinin təşəbbüsü ilə baş tutan danışıqlar zamanı əsas diqqət Suriyadakı vəziyyətə yönəldilib. Tərəflər Suriyada münaqişənin nizamlanması üzrə səylərin koordinasiyası məqsədilə müxtəlif kanallar vasitəsilə əlaqələri davam etdirmək barədə razılaşıblar.xeber100.com

Ən güclü nüvə sınağı keçirilib

Koreya Xalq Demokratik Respublikası növbəti, beşinci nüvə sınağını keçirib. Azərtac xəbər verir ki, bu barədə Yonhap agentliyi Koreya Respublikasının Müdafiə Nazirliyinin məlumatına istinadla xəbər yayıb. “Mövcud məlumatlara əsasən deyə bilərik ki, Şimali Koreyada nüvə sınağı keçirilib”, - deyə hərbçilərin bəyanatında bildirilir. Nazirlik partlayışın gücünün 10 kiloton olduğunu açıqlayıb. Hərbçilər qeyd edirlər ki, hazırkı sınaq indiyədək ən güclüsü olub. Müqayisə üçün bu ilin yanvarındakı nüvə partlayışının gücünün 6 kiloton olduğu bildirilir. Vəziyyətlə əlaqədar Koreya Respublikasının Təhlükəsizlik Şurasının iclası keçiriləcək. Hökumət bu məsələni müvafiq beynəlxalq qurumlarla müzakirə etməyi nəzərdə tutur.xeber100.com

Özbəkistanda prezident seçkiləri keçiriləcək

Özbəkistan parlamentinin nümayəndəsi ölkədə prezident seçkilərinin 3 ay ərzində keçiriləcəyini bildirib. Azərtac xarici KİV-lərə istinadla xəbər verir ki, Özbəkistan konstitusiyasına uyğun olaraq ölkə prezidenti vəzifələrini icra edə bilmədiyi təqdirdə onun səlahiyyətləri müvəqqəti olaraq parlamentin yuxarı palatasının sədrinə həvalə edilir və 3 ay ərzində dövlət başçısı postuna seçkilər keçirilir. Özbəkistan Ali Məclisi Senatının sədri Niqmatulla Yuldaşev namizədliyini geri götürdüyü üçün parlamentin hər iki palatasının iclasında Baş nazir Şövkət Mirziyev müvəqqəti olaraq prezident səlahiyyətlərini icra etmək üçün təyinat alıb.xeber100.com

Yeni hava taksisi istifadəyə veriləcək

Gürcüstanda “Aviator” brendi altında yeni hava taksisinin (aviataksi) istifadəyə verilməsi nəzərdə tutulub. Layihənin təşəbbüskarı olan “Adjara Group” şirkətinin baş direktoru Valeri Çexeriya jurnalistlərə bildirib ki, artıq ABŞ-dan 8 yerlik “Beechcraft” tipli kiçik təyyarələr də alınıb. Hazırda şirkət aviataksi üçün lisenziyanın alınması məsələsini həll edir. O, aviataksidə sərnişin biletlərinin qiyməti barədə məlumat verməyib. Bildirib ki, aviataksilər Tbilisidən Batumi, Kazbeqi və Svaneti istiqamətlərində uçacaq. Gələcəkdə şirkət ölkənin digər turizm bölgələrinə də belə reysləri açmağı planlaşdırır.xeber100.com

Türkiyə hökuməti qış vaxtına keçidlə bağlı qərar qəbul edib

Türkiyə hökuməti qış vaxtına keçidin ləğv olunması barədə qərar qəbul edib. Anadolu agentliyi xəbər verir ki, rəsmi qəzetdə dərc olunmuş sənədə əsasən, “günəş enerjisindən istifadə edilməsinin artırılması məqsədi ilə” saatların əqrəbləri bundan sonra geri çəkilməyəcək. Bu qərarın Türkiyə Energetika və Təbii Resurslar Nazirliyinin təklifi əsasında qəbul edildiyi bildirilir. Xatırladaq ki, Azərbaycanla Türkiyə arasında vaxt fərqi bundan sonra il boyu bir saat olaraq qalacaq.xeber100.com

Şərqi Asiya sammiti işə başlayıb

Laosun Ventyan şəhərində Şərqi Asiya sammiti işə başlayıb. Azərtac Interfax informasiya agentliyinə istinadla xəbər verir ki, sammitdə 18 ölkənin - ASEAN-nın “onluq” ölkələri və onların dialoq tərəfdaşlarının (Avstraliya, Hindistan, Çin, Koreya Respublikası, Yeni Zelandiya, Rusiya, ABŞ və Yaponiya) nümayəndə heyətlərinin rəhbərləri iştirak edirlər. Ventyan şəhərinə, həmçinin BMT-nin Baş katibi Pan Gi Munun da gəldiyi bildirilir. Sammitdə maliyyə, energetika, ekologiya, fövqəladə reaksiya, səhiyyə, regional əməkdaşlıq məsələlərinin müzakirə ediləcəyi gözlənilir. Həmçinin aktual beynəlxalq və regional problemlər ətrafında da danışıqlar aparıla bilər.xeber100.com

Anadolu Agentliyinin məlumatına əsasən…

Ankara Polis İdarəsi 8 min 500 polisin iştirakı ilə geniş “əmin-amanlıq əməliyyatı”na başlayıb. Anadolu Agentliyi bildirir ki, bu əməliyyat daxili işlər nazirinin göstərişi ilə yaxınlaşan Qurban bayramı öncəsi təhlükəsizliyi təmin etmək məqsədilə keçirilir. Əməliyyat çərçivəsində paytaxtın 70 nöqtəsində vətəndaşların sənədləri yoxlanılır. Həmçinin, qurbanlıq satışını həyata keçirən heyvan bazarlarında da nəzarət gücləndirilib.xeber100.com

Almaniya dünyada birinci olacaq

Almaniyanın müsbət ticarət saldosu 2016-cı ildə 310 milyard dollar ilə rekord səviyyəyə yüksələrək ən böyük müsbət ticarət saldosuna malik olan Çini geridə qoyacaq. “cnnturk.com” məlumat verir ki, Münxen Mərkəzi İqtisadiyyat İnstitutu olan IFO-nun açıqlamasında ilin birinci yarısında Almaniyanın ixracatının idxalatı 159 milyard dollar üstələdiyi və bunun əsasən Avropanın digər ölkələri ilə aparılan ticarət əlaqələri hesabına baş verdiyi bildirilib. İnstitut açıqlamasında müsbət ticarət saldosunun ümumi daxili məhsulun 8,9 faizinə bərabər olacağını bəyan edib.xeber100.com

TRT kanalının məlumatına görə…

Türkiyənin milli istehsalı olan və həssas idarəolunan SOM raketi terrorla mübarizədə istifadəyə hazırdır. Türkiyənin TRT kanalı xəbər verir ki, SOM qardaş ölkənin istehsal etdiyi yüksək standartlara uyğun olan silahlardan biridir. SOM raketi 500 kilometr məsafədə yerləşən, güclü mühafizə olunan quru və dəniz hədəflərini son dərəcə dəqiqliklə vura bilir. Raketin ən əsas xüsusiyyəti çətin iqlim şəraitində dözümlü, yüksək partlayıcı təsiri malik olmasıdır. Bu silahın bütün komponentləri Türkiyədə istehsal olunur. SOM raketi naviqasiya, qlobal yerləşdirmə sistemləri və görüntüləmədə infraqırmızı axtarış başlığına sahibdir. Qırıcı təyyarələrdən ayrılandan sonra qanadları açılaraq hərəkət edən raketin mühərriki bir qədər sonra çalışmağa başlayır və naviqasiya sistemi əsasında hədəfə doğru istiqamət götürür. GPS siqnalı kəsildikdə, yaxud qarışdırıldıqda belə əvvəldən qəbul edilən məlumatlar sayəsində düzgün istiqamətdə hərəkət edir və hədəfə dəqiqliklə yaxınlaşır. Beləliklə uzun məsafədəki hədəfləri hava şəraitindən asılı olmayaraq, asanlıqla və dəqiq vura bilir. Raketin xarici görünüşü onun qarşı tərəfin hava müdafiə sistemlərinin radarlarından gizlənməsinə imkan verir. Hazırda SOM-u daha da inkişaf etdirmək və atəş məsafəsini 500 kilometrdən 2500 kilometrədək artırmaq üçün iş aparılır.xeber100.com

Beynəlxalq Uşaq Fondunun məlumatı…

BMT-nin Beynəlxalq Uşaq Fondu (UNICEF) dünyada 28 milyon uşağın müharibələr səbəbindən evlərini tərk etmək məcburiyyətində qaldığını bildirib. Anadolu informasiya agentliyi xəbər verir ki, təşkilat təqdim etdiyi məruzədə qaçqın durumuna düşən uşaqların sayının son 10 ildə təxminən iki dəfə artdığına diqqət çəkib. Sənəddə evlərini tərk etmək məcburiyyətində qalan 28 milyon uşağın 10 milyonunun mühacir statusu aldığı bildirilir. Məruzəyə əsasən, mühacir uşaqların 45 faizi Suriya və Əfqanıstandandır. UNICEF-in 2015-ci ildə verdiyi məlumata əsasən, uşaqlar dünya əhalisinin üçdə birini təşkil edir. Müharibələr səbəbindən evlərini tərk edən insanların isə yarısı uşaqlardır.xeber100.com