Britaniya Kolumbiyası əyalətində əhali təxliyə edilir

Kanadanın  baş verən şiddətli meşə yanğınları ilə əlaqədar yerli əhali təxliyə edilir. TASS agentliyinin məlumatına görə, Vest Kelouna şəhərində 156 yaşayış evinin  sakinləri evlərini tərk etmək məcburiyyətində qalıb. Ötən sutka ərzində yanğınların sahəsi 25 hektara qədər artıb. Güclü külək vəziyyəti daha da ağırlaşdırır. Qeyd edək ki, Vest Kelouna Britaniya Kolumbiyası əyalətinin ən iri Vankuver şəhərindən 380 km qərbdə yerləşir.xeber100.com

TASS agentliyinin məlumatına görə…

Müvəqqəti olaraq vəzifəsindən kənarlaşdırılan Braziliya prezidenti Dilma Rousseff könüllü olaraq istefa verməyəcəyini bəyan edib. TASS agentliyinin məlumatına görə, bu barədə Dilma Rousseff jurnalistlərə verdiyi açıqlamada bildirib. “Mən qətiyyən istefa vermək niyyətində deyiləm. İmpiçment prosesini isə dövlət çevrilişinə cəhd kimi qiymətləndirirəm. Üzərimdə qurulan qurama və məzhəkə dolu məhkəmənin yeganə məqsədi qeyri-qanuni yolla yeni dövlət başçısı seçməkdir. Hazırda prezident səlahiyyətlərini icra edən Mişel Temer tək mənə qarşı deyil, seçicilərə qarşı xəyanətkarlıq edib. O, məhz mənim hökumət proqramıma uyğun olaraq vitse-prezident kürsüsünə əyləşib”, deyə  Dilma Rousseff vurğulayıb. Braziliya Senatı müvəqqəti olaraq vəzifəsindən kənarlaşdırılan prezident Dilma Rousseffin impiçmenti məsələsinə avqustun 25-də baxacaq. Dilma Rousseffin vəzifədən 180 gün müddətinə kənarlaşdırılmasından sonra vitse-prezident Mişel Temer  yeni hökumət qurub. Qeyd edək ki, 2011-ci ildən ölkəyə rəhbərlik edən D.Roussefin adı bir neçə korrupsiya qalmaqalında hallanıb. Qalmaqallardan biri “Petrobras” Dövlət Neft Şirkəti ilə bağlıdır. Həmçinin, D. Rousseff büdcə vəsaitlərini 2014-cü ildə yenidən prezident seçilməyə yönəltməkdə və vergilərlə bağlı qanun pozuntularında şübhəli bilinir.xeber100.com

Anadolu informasiya agentliyinin məlumatına əsasən…

Türkiyə Böyük Millət Məclisi Təl-Əviv və Ankara arasında münasibətlərin nizamlanmasına dair sazişi ratifikasiya edib. Anadolu informasiya agentliyinin məlumatına görə, İsrail 2010-cu ildə ölkələr arasında münasibətlərin korlanmasına gətirib çıxaran “Mavi mərmərə” insidenti nəticəsində həlak olanların ailələrinə 20 milyon dollar təzminat ödəməlidir. İsrail ilə Türkiyə münasibətlərin tənzimlənməsi barədə sazişi iyunun 28-də imzalayıblar. Sənədin qüvvəyə minməsi üçün onu hər iki ölkənin parlamenti təsdiq etməlidir. Saziş ratifikasiya edildikdən sonra səfirlərin mübadiləsi baş tutacaq. Həmçinin tərəflər insidentlə bağlı iddialardan imtina edəcək, İsrail hərbçiləri cinayət və hüquqi məsuliyyət daşımayacaqlar.xeber100.com

Rumıniya sərhəddə nəzarəti gücləndirib

Qeyri-qanuni miqrasiyanın qarşısını almaq üçün Rumıniyanın Daxili İşlər Nazirliyi Serbiya ilə sərhəddə nəzarəti gücləndirib. Belə ki, sərhədçilərlə yanaşı, jandarm xidməti də sərhədin qorunmasına cəlb olunacaq. Sərhədə termal kamera ilə təchiz olunan vertolyot nəzarət edəcək. Qeyd edək ki, Serbiyadan Rumıniyaya qeyri-qanuni keçmək istəyənlərin sayı iyulun əvvəlində 3112 nəfərə çatıb.xeber100.com

Euronews telekanalının məlumatına görə…

London metropoliteni tarixində ilk dəfə fasiləsiz iş rejiminə keçib. Lakin hələ ki, qatarlar cəmi iki xətdə - “Victoria line” və “Central line” xətlərində və həftədə yalnız iki gün – cümə və bazar günləri bütün sutka ərzində işləyəcək. Payız aylarında onlara daha 3 xətt qoşulacaq. Euronews telekanalının məlumatına görə, London metropoliteni administrasiyasının hesablamasına əsasən yeni iş rejimdə iki gün ərzində 5 xətt 200 min sərnişinə xidmət göstərə biləcəklər. Paytaxt metrosunun fasiləsiz iş rejiminə keçirilməsi ideyası uzun müddət idi ki, müzakirə olunurdu. Lakin metropolitenin operatoru olan “Transport for London” kompaniyası ilə həmkarlar ittifaqı arasında yaranan mübahisə onun icrasına əngəl törədirdi.xeber100.com

NHK televiziya kanalının verdiyi məlumata görə…

Yaponiya hökuməti 2017-ci maliyyə ili üçün ölkə tarixində ən böyük hərbi büdcə layihəsini təqdim etməyə hazırlaşır. NHK televiziya kanalının verdiyi məlumata əsasən, sənəddə Şimali Koreyanın ballistik raketlərinə qarşı müdafiənin gücləndirilməsinə və Şərqi Çin dənizində Çin ilə mübahisəli adaların mühafizəsi üçün yeni sualtı qayığın inşasına xüsusi diqqət yetirilir. Digər kütləvi informasiya vasitələrinin də bildirdiyi kimi, 2017-ci ildə müdafiə xərcləri üçün cari ildəkindən 2,3 faiz çox, təqribən 5 trilyon 160 milyard yen (təqribən 51 milyard 600 milyon dollar) vəsaitin ayrılmasına sorğu göndəriləcək. Yaponiyada hərbi xərclərin artırılması ilk növbədə Koreya Xalq Demokratik Respublikasının (KXDR) həyata keçirdiyi raket sınaqları ilə əsaslandırılır. Xüsusən son sınaqlar zamanı 1000 kilometr məsafəni qət edərək Yaponiyaya məxsus iqtisadi zonaya çatan ballistik raket Tokio və Vaşinqtona onu məhv etmək üçün lazımi vasitələrə malik olmalarına baxmayaraq, ciddi siqnal olub. NHK-nın məlumatına əsasən tələb olunan məbləğin 105 milyardı (təqribən 1,05 milyard dollar) yeni idarəolunan “Patriot” (PAC-3) raket komplekslərinin əldə edilməsi üçün nəzərdə tutulur.xeber100.com

Reuters agentliyinin məlumatına görə…

Vətəndaş müharibəsi bu günədək Yəmənə 14 milyard dollar ziyan vurub. Reuters agentliyinin məlumatına görə, ölkədə yenidənqurma işləri aparmaq üçün 7 milyard dollar, iqtisadiyyatı bərpa etmək üçün isə 7,3 milyard dollar vəsait tələb olunur. Dünya Bankı, BMT, İslam İnkişaf Bankı və Avropa İttifaqının birgə hesabatlarında bu barədə deyilir. Qeyd edək ki, ölkə 16 aydır Hüsi üsyanı ilə bərabər, “Əl-Qaidə” terror təşkilatı ilə də mübarizə aparır. Qarşıdurmalar nəticəsində 6500 insan öldürülüb, 2,5 milyon insan isə yaşayış yerini tərk edib.xeber100.com

ABŞ Geoloji Xidmətinin məlumatı…

Avqustun 18-də Avstraliyanın şərq sahillərində 5,7 bal gücündə zəlzələ baş verib. Bu barədə ABŞ Geoloji Xidməti məlumat yayıb. Yeraltı təkanlar yerli vaxtla 04:30-da Bouen şəhərinin 45 kilometr şərqində qeydə alınıb. Zəlzələnin ocağı 7,8 kilometr dərinlikdə yerləşib. Dağıntılar və zərərçəkənlər barədə məlumat verilmir. Geoloji xidmət zəlzələnin nəticələrinin yaşıl həddini müəyyən edib ki, bu halda da ciddi iqtisadi zərərin və qurbanların olacağı gözlənilmir.xeber100.com

Yeni ali hərbi məktəb yaradılıb

Boliviyada yeni ali hərbi məktəb yaradılıb. Gələcək zabitlərə burada imperializmə qarşı mübarizə yollarını öyrədəcəklər. Varnes şəhərindəki bu təhsil müəssisəsinin təntənəli açılış mərasimində çıxış edən Boliviya prezidenti Evo Morales bildirib ki, “antiimperialist hərbi akademiya”nın məqsədi “imperiyaların və kapitalizm strukturlarının mədəni, ideoloji və iqtisadi üstünlüyünə” qarşı mübarizə aparmaqdır.xeber100.com

“Financial Times” yazır…

"Gartner" analitik şirkəti qlobal smartfonlar bazarı üzrə hesabatını dərc edib. "Financial Times" nəşri yazır ki, "Apple" və "Xiaomi" şirkətləri "Oppo" kimi daha az tanınan Çin brendlərinin təzyiqi nəticəsində mövqeyini itirir. "Gartner"in məlumatına görə, 2016-cı ilin aprel-iyununda dünyada 344 milyon smartfon satılıb ki, bu da ötən illə müqayisədə 4.3 faiz daha yüksəkdir. Yaponiya istisna olmaqla bütün inkişaf etmiş regionlarda satış həcminin azalması qeydə alınıb. Latın Amerikası dövlətlərindən başqa, inkişaf etməkdə olan iqtisadiyyata malik ölkələrdə 9.9 faiz artım müşahidə olunub. Azərtac “dailycomm.ru” saytına istinadən xəbər verir ki, "Samsung Electronics" şirkəti qlobal smartfon bazarının lideridir. Cənubi Koreya nəhəngi "ağıllı" telefonların satışını 6.5 faiz artıraraq 76.7 milyona çatdırıb. "Apple" şirkətinin istehsalı olan "iPhone"un satış həcmi 7.7 faiz azalaraq 44.4 milyon təşkil edib. Kaliforniya nəhənginin bazar payı 14.6 faizdən 12.9 faizədək azalıb. Artıq 3 rüb ardıcıl "Apple" şirkətində azalma qeydə alınır. Avrasiya, Afrika və Şərqi Avropa ölkələrində “iPhone" smartfonlarına yüksək tələbat var. Ancaq Çində tələbatın 26 faiz azalması nəticəsində şirkət rübü artımla başa vura bilməyib. "Huawei" şirkəti ən böyük smartfon istehsalçılarının reytinqində üçüncü yerdə qərarlaşıb. Müvafiq dövrdə 30.7 milyon "Huawei" smartfonu satılıb, halbuki 2015-ci ilin aprel-iyununda bu göstərici 26.5 milyon olmuşdu.xeber100.com