Donald Trampa qarşı kampaniya…

ABŞ-da yüzdən çox tanınmış şəxs Respublikaçılar partiyasından prezidentliyə namizəd, ölkədə gərginliyi artıran bəyanatlar səsləndirən Donald Trampa qarşı kampaniya başladıblar. Həmin şəxslər ABŞ prezidenti vəzifəsinə can atan “milyarderin namizədliyinin real və həqiqi təhlükəsinə” diqqət çəkməyin vacib olduğunu hesab edirlər. “Policy.mic” portalının verdiyi xəbərə görə, “Nifrətə qarşı birlik” (United Against Hate) adlandırılan kampaniya “MoveOn.org” təşkilatı tərəfindən həyata keçirilir. Kampaniyada aktyorlar Vudi Harrelson, Mark Ruffalo, Culian Mur, Oliviya Uayld, Meq Rayan, Brayan Krenston, Nil Patrik Harris, Sintiya Nikson, rejissor Maykl Man, musiqiçilər Mobi, Talib Kveli və bir başqaları iştirak edirlər. Onlar sayta ünvanladıqları məktubda “öz imkanlarından və nüfuzlarından istifadə edərək Donald Trampa və onun təmsil etdiyi nifrət ideologiyasına zərbə vurmaq” üçün çalışacaqlarını bildiriblər.xeber100.com

Hökumətin istefası müzakirə ediləcək

“Noi.md” saytının məlumatına görə,  Moldova parlamentinin bugünkü iclasında Pavel Filip hökumətinin fəaliyyətinə münasibətdə etimadsızlıq rəyi müzakirə ediləcək. Deputatlar Baş naziri dinləyəndən sonra bir qrup sosialistin, kommunistin və liberal-demokratın (cəmi 34 deputat) irəli sürdüyü etimadsızlıq rəyini dəstəkləyib-dəstəkləməmək barədə qərar qəbul edəcəklər. Təşəbbüs qrupunun fikrincə, indiki hökumət səriştəsizdir, xalq tərəfindən dəstəklənmir, Moldovanın isə ölkə vətəndaşlarının tələbatını təmin edəcək yeni hökumət proqramına ehtiyacı var. Pavel Filip bütün bu ittihamları rədd edərək vurğulayıb ki, müxalifət partiyaları nəyin bahasına olursa-olsun hakimiyyətə gəlmək istəyirlər, bunun üçün yeganə əlçatan vasitə siyasi sabitliyi pozmaqdır. Qeyd edək ki, hökumətə etimadsızlıq rəyi seçilmiş deputatların dörddəbir hissəsinin təşəbbüsü ola bilər. Etimadsızlıq rəyini təsdiq etmək üçün isə azı 51 səs lazımdır.xeber100.com

Nyu-Yorkun hava limanlarında uçuşlar ləğv edilib

Hava şəraiti ilə əlaqədar Nyu-Yorkun hava limanlarında uçuşlar ləğv olunub. “airport-jfk.com” saytının verdiyi xəbərə görə, iyulun 26-da Nyu-York hava limanlarında əlverişsiz hava şəraiti ilə əlaqədar 154 aviareys ləğv olunub, 208-i təxirə salınıb. Güclü külək və şimşəklə müşayiət olunan şiddətli yağışla əlaqədar Con Kennedi adına Beynəlxalq Hava Limanında 57 aviareys ləğv edilib, 95-i təxirə salınıb. La-Quardia aeroportunda isə 97 uçuş ləğv olunub, 113-ü təxirə salınıb.xeber100.com

Anadolu Agentliyinin məlumatı…

Türkiyə Prezidenti Rəcəb Tayyib Ərdoğan və Rusiya Prezidenti Vladimir Putin avqustun 9-da Sankt-Peterburqda görüşəcəklər. Anadolu Agentliyinin məlumatına əsasən, bu barədə Türkiyə Baş nazirinin müavini Mehmet Şimşək məlumat verib. Görüş Türkiyə Prezidentinin Rusiyaya səfəri çərçivəsində baş tutacaq.xeber100.com

RİA Novosti agentliyinin məlumatına əsasən…

Rusiyanın Saxalin vilayətinin Kuril adaları yaxınlığında 5,6 bal gücündə zəlzələ baş verib. RİA Novosti agentliyinin verdiyi xəbərə görə, yeraltı təkanlar  yerli vaxtla 06:03-də Sakit okeanda, 120 km dərinlikdə  qeydə alınıb. Yerli vaxtla saat 06:24-də eyni ərazidə 3,6 bal gücündə təkrar zəlzələ baş verib.Yerli FHN mərkəzinin məlumatına əsasən, regionun yaşayış məntəqələrində yeraltı təkanlar hiss olunmayıb. Zəlzələ ilə əlaqədar sunami xəbərdarlığı elan edilməyib.xeber100.com

“Reuters”in verdiyi xəbərə görə…

“Türkiyə mövcud halı ilə yaxın bir zamanda Avropa İttifaqına üzv olacaq vəziyyətdə deyil. Hətta uzun müddət üçün bu, belə olacaq”. "Reuters"in verdiyi xəbərə görə, bu sözləri Avropa Komissiyasının prezidenti Jan Klod Yunker “France 2” televiziyasına müsahibəsində deyib. O bildirib ki, ölüm cəzasının bərpa ediləcəyi təqdirdə, Türkiyənin quruma üzvlük prosesi dərhal dayandırılacaq. Qeyd edək ki, daha əvvəl Avropa İttifaqının xarici siyasət və təhlükəsizlik məsələləri üzrə ali komissarı Federika Moqerini də ölüm hökmü bərpa edilən ölkənin Avropa İttifaqına üzv ola bilməcəyi ilə bağlı açıqlama vermişdi.xeber100.com

Anadolu agentliyinin məlumatına əsasən…

Bu gün Türkiyə Prezidenti Rəcəb Tayyib Ərdoğan bir neçə siyasi partiya liderləri ilə görüşəcək. Anadolu agentliyinin məlumatına görə, görüş Rəcəb Tayyib Ərdoğanın dəvəti ilə Prezident Sarayında baş tutacaq. Görüşdə Cümhuriyyət Xalq Partiyasının sədri Kamal Kılıçdaroğlu, Millətçi Hərəkat Partiyasının sədri Dövlət Baxçalı və hakim Ədalət və İnkişaf Partiyasının sədri Binəli Yıldırım iştirak edəcək. Qeyd edək ki, iyulun 24-də Ərdoğan Türkiyə Silahlı Qüvvələrinin Baş Qərargah rəisi, ordu generalı Hulusi Akarı qəbul edib. Bildirilir ki, bu, dövlət çevrilişinə cəhddən sonra prezidentlə Hulusi Akar arasında ilk görüşdür.xeber100.com

“Funai Electric” şirkəti istehsalın dayandırılacağını bəyan edib

Dünyada hələ də videomaqnitofonlardan müxtəlif lent yazılarına baxmaq üçün istifadə edən kifayət qədər insan qalıb. Ancaq ötən illər ərzində bu qurğulara tələbatın kəskin azalması faktını inkar etmək olmaz. Bu səbəbdən klassik videomaqnitofonların istehsalı ilə məşğul olan sonuncu Yaponiya istehsalçısı – “Funai Electric” şirkəti istehsalın dayandırılacağını bəyan edib. “ictnews” saytının verdiyi xəbərə görə, şirkət nümayəndələrinin sözlərinə görə, ötən il dünyada təxminən 750 min videomaqnitofon satılmışdısa, hazırda bu rəqəm kəskin azalıb. Bundan başqa, belə qurğuların istehsalı üçün lazım olan komplekt hissələrinin tədarükündə problemlər müşahidə olunur. Bütün bunlar “Funai Electric” rəhbərliyini istehsalı dayandırmaqla bağlı qərar qəbul etməyə sövq edib. Məlumata görə, “Funai Electric” şirkəti sonuncu videomaqnitofonu iyulun sonunda istehsal ediləcək.xeber100.com

Anadolu agentliyinin verdiyi xəbərə görə…

Çin, Efiopiya və Çinin birgə həyata keçirməsi planlaşdırılan 4 milyard dollarlıq təbii qaz layihəsi hər il Efiopiyadan Çinə 10 milyon kubmetr mayeləşdirilmiş təbii qaz-LNG ixracını nəzərdə tutur. Anadolu agentliyinin verdiyi xəbərə  görə, layihə yaxın zamanlarda icra edilməyə başlanacaq. Layihə Cibuti və Efiopiya arasında inşa ediləcək təbii qaz boru kəməri, qazı mayeləşdirən zavod və Cibutinin Damerjog bölgəsində tikiləcək ixrac terminalından ibarətdir. Hər il 12 milyard kubmetr təbii qaz daşıyacaq layihə 700 kilometrlik bir boru kəmərində ibarət olacaq. Həmçinin layihə üzrə Efiopiya hər il Çinə 10 milyon kubmetr LNG ixrac edəcək. Üç ildə həyata keçirilməsi planlaşdırılan layihəni Çinin “POLY-GCL Petroleum Group” şirkəti icra edəcək.xeber100.com

Ukrayna Prezident Administrasiyasının məlumatına əsasən…

Ukraynanın şərqində vəziyyət yenidən gərginləşib.  Rusiya mətbuatının yaydığı məlumata görə, bu barədə informasiyanı Ukrayna Prezident Administrasiyası yayıb. Administrasiya dünən atəşkəsin pozulması nəticəsində 6 ukraynalı hərbçinin həlak olduğunu, 13 nəfərin yaralandığını bildirib. Atəşkəsin pozulması Luqansk vilayəti istiqamətində qeydə alınıb. Qeyd edək ki, Donbass konflikti 2014-cü ildən etibarən start götürüb.xeber100.com