Terror aktı ilə bağlı canlı yayım qadağan olunub

İstanbuldakı Atatürk Hava Limanında baş vermiş terror aktı ilə bağlı yerli televiziya kanallarında hadisə yerindən canlı yayım qadağan olunub. Bu barədə Türkiyənin Radio və Televiziya  Təşkilatı (RTÜK) qərar qəbul edib. Qeyd edək ki, ədliyyə naziri Bəkir Bozdağın məlumatına görə, terror aktı zamanı ən azı 10 nəfər həlak olub, iyirmidən çox insan yaralanıb.xeber100.com

“Türk axını” layihəsi üzrə dialoqa hazırlıq

Rusiyanın enerji nəhəngi “Gazprom” şirkəti “Türk axını” qaz boru kəməri (Turkish Stream) layihəsi üzrə Türkiyə tərəfi ilə danışıqların yenidən başlanması üçün dialoqa hazırdır. Azərtac TASS informasiya agentliyinə istinadla xəbər verir ki, bu barədə “Gazprom”un rəsmi nümayəndəsi Sergey Kupriyanov deyib. O bildirib ki, “Gazprom” “Türk axını” layihəsi üzrə dialoqa hər zaman açıq olub. Qeyd edək ki, iyunun 27-də Türkiyə Prezidenti Rəcəb Tayyib Ərdoğan rusiyalı həmkarı Vladimir Putinə məktub göndərib. Məktubda Türkiyə ilə Rusiya arasında ənənəvi dostluq əlaqələrinin bərpa olunması, regiondakı böhranların həlli ilə bağlı əməkdaşlıq və terrorçuluqla birgə mübarizə aparılmasının vacibliyinə dair vacib məqamlar əks olunub.Xatırladaq ki, ötən ilin noyabrında Rusiyaya məxsus “Su-24” tipli döyüş təyyarəsinin Türkiyə tərəfindən vurulmasından sonra “Gazprom”un idarə heyətinin sədri Aleksey Miller “Türk axını” layihəsi ilə bağlı Türkiyə ilə danışıqların dayandırıldığını demişdi. “Gazprom” “Türk axını” kəmərinin ötürücülük qabiliyyətini iki dəfəyədək azaldaraq kəmərlə 32 milyard kubmetr təbii qazın nəql olunmasına da qərar vermişdi. “Türk axını” ilə Rusiya qazının Türkiyədən keçməklə Avropaya çatdırılması nəzərdə tutulurdu. Kəmərlə 16 milyard kubmetr qazın Avropanın, qalan hissəsinin isə Türkiyənin daxili tələbatının ödənilməsi üçün istifadə edilməsi planlaşdırılırdı. Layihə üzrə iki boru kəmərinin tikilməsi nəzərdə tutulurdu.xeber100.com

Seçkilərlə bağlı kampaniyaya start verilib

Yaponiyada siyasi partiyalardan olan namizədlər və onların əməkdaşları parlamentin yuxarı palatasına iyulun 10-da keçiriləcək seçkilərlə bağlı hazırlıq işlərinə başlayıblar. Mövcud qanunvericiliyə əsasən, bu gündoğar ölkədə hər üç ildən bir parlamentin həmin palatasının 242 deputatından yarısı təzələnir. Bunlardan 73-ü seçki dairələri üzrə, 48-i isə proporsional qaydada seçilir. Baş nazir Şinzo Abe bildirib ki, onun rəhbərlik etdiyi hakim blok qarşıdakı seçkilərdə üstünlüyü saxlamağa və 121 yerdən 61-ni qazanmağa çalışacaq. Ş.Abe parlamentin seçkilərdən dərhal sonra keçiriləcək sessiyasında konstitusiyaya nəzərdə tutulan düzəlişləri reallaşdırmaq niyyətində olduğunu da bildirib. Həmin düzəlişləri qəbul etmək üçün ölkə üzrə milli referendumun təşkili nəzərdə tutulur. Referendumun keçirilməsi üçün isə Baş nazir parlamentin hər iki palatasının üzvlərinin üçdə iki hissəsinin dəstəyini əldə etməlidir. Hazırda hakim koalisiya aşağı palatada kifayət qədər deputat yerinə malikdir. Bu isə o deməkdir ki, həmin yaşda olan 2 milyon 400 min gənc ilk dəfə seçkilərdə iştirak edəcək.xeber100.com

5,1 bal gücündə zəlzələ baş verib

İyunun 22-də İndoneizya sahillərində 5,1 bal gücündə zəlzələ baş verib. Bu barədə ABŞ Geoloji Xidməti məlumat yayıb. Yeraltı təkanların episentri Sibolqa şəhərindən 176 kilometr cənub-qərbdə, ocağı dəniz dibinin 33,8 kilometr dərinliyində yerləşib. Dağıntılar və zərərçəkənlər barədə məlumat verilmir. Sunami təhlükəsi elan olunmayıb.xeber100.com

Turizm obyektlərinə nəzarət gücləndirilir

Bolqarıstanın Gəlirlər üzrə Milli Agentliyinin əməkdaşları bu il vergilərin və yığımların yerli otel, restoran və digər əyləncə müəssisələri sahibləri tərəfindən düzgün ödənildiyini yoxlamaq üçün Qara dəniz ətrafında yerləşən kurortlara göndəriliblər. Azərtac “vergiler.az” saytına istinadla bildirir ki, artıq vergi əməkdaşları Burqas və Varna şəhərlərinin hava limanlarında ölkəyə gələn turistlərin sayını qeydiyyata almağa başlayıblar ki, onlardan tutulan vergilərin real gəlirlərlə müqayisəsini aparmaq mümkün olsun. Agentliyin məlumatına görə, bu il ölkədəki hər bir kassa aparatı nəzarətdə olacaq. Bolqarıstanın vergi xidməti bu il yalnız bir mövsüm üçün təşkil edilmiş turizm firmalarına xüsusi diqqət yetirəcək. Artıq ölkədə vergi yayındırmaqda şübhəli bilinən və düzgün bəyannamələr təqdim etməyən firmaların yoxlanılmasına başlanılıb. Hökumət rəsmilərinin sözlərinə görə, turizm firmalarının əksəriyyəti bəyannamədə Bolqarıstan qanunçuluğunda nəzərdə tutulan minimal gəlir həddini qeyd etsə də, ən bahalı daşınmaz əmlak alırlar.xeber100.com

Silah satışına nəzarət barədə qanun layihəsi qəbul edilməyib

ABŞ senatı silah satışına nəzarət barədə səsverməyə çıxarılan 4 qanun layihəsinin heç birini qəbul etməyib. Azərtac Euronews telekanalına istinadla xəbər verir ki, demokrat-senatorların səsverməyə çıxardığı layihə silah almaq istəyən hər kəsin şəxsiyyətinin mütləq şəkildə yoxlanılmasını nəzərdə tutur. Səsvermənin gedişində respublikaçılar demokratların layihəsini həddən artıq sərt adlandıraraq rədd edib, demokratlar isə öz növbələrində respublikaçıların layihəsini yetərincə effektiv saymayıb. Senatorlar qrupu həftənin sonunadək kompromisli qanun layihəsi hazırlamağa ümid edir. Son sosioloji sorğunun nəticəsinə görə, ölkədə silah satışına nəzarətin tətbiq edilməsini istəyən amerikalıların sayı 71 faizə çatıb. Xatırladaq ki, zorakılığa meylli insanlara silah satışının məhdudlaşdırılmasına dair qanunun qəbul edilməsinin vacibliyi barədə mübahisələr bu yaxınlarda Floridanın Orlando şəhərində yerləşən gecə klubunda insanların kütləvi şəkildə güllələnməsi ilə nəticələnən faciəvi hadisədən sonra yenidən qızışıb.xeber100.com

BMT-nin yaydığı hesabata görə…

BMT-nin Qaçqınlar üzrə Ali Komissarlığının Ümumdünya Qaçqınlar Günü münasibətilə yaydığı hesabata görə, 2015-ci ildə dünyada qaçqın, məcburi köçkün və sığınacaq axtaran insanların sayı 65,3 milyon nəfər olub. Hələ 2011-ci ildə BMT dünyadakı qaçqınların sayının 42,5 milyona çatdığını elan etmişdi. Cəmi beş il keçməsinə baxmayaraq bu kədərli rekordu daha böyük rəqəmlə yeniləmək lazım gəlib. Hesabatda bildirilir ki, planetimizdə hər 113-cü insan qaçqınlıq həyatı yaşamağa məcburdur və cəmi bir il ərzində qaçqınların sayı 12,4 milyon çoxalıb. Yeni qaçqın kütləsinin yarıdan çoxu cəmi üç ölkənin payına düşür: Suriya (4,9 milyon nəfər), Əfqanıstan (2,7 milyon nəfər) və Somali (1,1 milyon nəfər). Türkiyə artıq ikinci ildir ki, ən çox qaçqın qəbul edən ölkələr siyahısında ilk yerdə durur. Bu ölkəyə pənah gətirən qaçqınların sayı 2,5 milyondan artıqdır. Ekspertlərin rəyincə, “soyuq müharibə” dövründən qalmış və həllini gözləyən münaqişələr, eləcə də son illərdə alovlanan yeni münaqişə ocaqları və vətəndaş müharibələri qaçqınların sayının sürətlə artmasının əsas səbəbləridir.xeber100.com

Növbəti terror həyəcanı…

Brüssel polisi paytaxtın mərkəzində yerləşən “City 2” ticarət mərkəzi yaxınlığında üzərində partlayıcı kəmər olduğu ehtimal edilən bir nəfəri saxlayıb. Lakin sonradan onda partlayıcı qurğunun olması barədə məlumat təsdiqini tapmayıb. Azərtac Rusiyanın NTV telekanalına istinadla xəbər verir ki, bir qədər sonra KİV-lər Belçika polisi tərəfindən Skarbek kommunasında partlayıcı kəmər taxmış daha bir nəfərin saxlanıldığı barədə informasiya yayılıb. Bu informasiya da hələ ki, rəsmən təsdiq olunmayıb. Belçikanın Baş naziri Şarl Mişel insidentlə əlaqədar böhran qərargahının iclasını keçirib və vəziyyətin nəzarət altında olduğunu bildirib. Bununla yanaşı, Belçika Daxili İşlər Nazirliyinin nəzdində fəaliyyət göstərən Təhlükələrin Analizi üzrə Koordinasiya Mərkəzi təcili iclasın nəticəsinə əsasən Brüsseldə terror təhlükəsinin hazırkı 3-cü səviyyəsini dəyişməz saxlayıb.xeber100.com

İtaliyada bələdiyyə seçkilərinin ikinci turu başa çatıb

Bazar günü İtaliyada bələdiyyə seçkilərinin ikinci turu seçilib. Faktinfo-nun  xarici KİV-lərə əsasən verdiyi məlumata əsasən seçkinin nəticələri hakim Demokrat partiyası üçün məğlubiyyət sayıla bilər. Belə ki, baş nazir Matteo Renzinin rəhbərlik etdiyi Demokrat partiyası demək olar ki, bütün iri şəhərləri müxalifətə uduzub.Seçkilərin ən maraqlı nəticəsi paytaxt Romada və Turində qeydə alınıb. Belə ki, Roma tarixində şəhər merliyi uğrunda mübarizədə qadın namizəd qalib gəlib.Bu müxalifətdəki “5 ulduz” hərəkatının nümayəndəsi 37 yaşlı Virciniya Raccidir.Virciniya Racci böyük bir üstünlüklə (64 %) Roma bələdiyyəsinin rəhbəri vəzifəsinə seçilib.xeber100.com

ABŞ əleyhinə ən böyük aksiyalardan biri keçirilib

Bu gün Yaponiyanın Okinava adasında ABŞ əleyhinə son 20 ildə ən böyük aksiyalardan biri keçirilib. “Reuters” agentliyinin verdiyi məlumata görə, minlərlə insanın iştirak etdiyi bu aksiya ABŞ-ın Okinava adasının digər hissəsində hərbi baza yerləşdirmək planını təhlükə altında qoyur. Sonuncu dəfə Okinava adasında belə böyük aksiya 20 il əvvəl 3 amerikalı hərbçinin 12 yaşlı yapon qızı zorlamasından sonra keçirilib. Aksiyalardan sonra ABŞ və Yaponiya Futenma hərbi bazasının Okinavada əhalinin sıx yaşadığı rayondan adanın digər hissəsinə köçürülməsi barədə razılıq əldə edib. Lakin bu plan hələ də həyata keçirilməyib. Okinavada amerikalı hərbçilər əleyhinə hər il aksiya keçirilir. Bu il isə adada amerikalı hərbçilərin iştirak etdiyi iki böyük insident yaşanıb. Bu ilin mayında Yaponiya polisi 20 yaşlı Rina Simabururo adlı yapon qızı öldürməkdə şübhəli sayılan 32 yaşlı amerikalı Kennet Franklini həbs edib. Bundan sonra sərxoş amerikalı zabitin idarə etdiyi avtomobil qəzaya yol açıb. Hazırda Okinava adasında ABŞ hərbi bazasındakı 30 min hərbçi də daxil olmaqla, 50 min amerikalı var. Bu ada 1972-ci ilə qədər ABŞ-ın işğalı altında olub, indi də adanın 20 faizi amerikalı hərbçilərin nəzarətindədir.xeber100.com