Araşdırma komitəsinin yaradılması məsələsi müzakirə olunub

Fransa Milli Assambleyasının xarici məsələlər üzrə komitəsinin iyunun 29-da keçirilmiş iclasında Fransa ilə Azərbaycan arasında ikitərəfli siyasi, iqtisadi və diplomatik münasibətlərə dair xüsusi araşdırma komitəsinin yaradılması məsələsinə dair müzakirə aparılıb. Bu təklif Milli Assambleyanın mərkəzçi UDİ (Demokrat və Bitərəflərin Birliyi) qrupunun üzvləri, başda ermənipərəst mövqeyi ilə tanınan Fransua Roşbluan, Tyeri Benua, Şarl de Kurson və digər deputatlar tərəfindən irəli sürülmüşdü. Məsələ ilə bağlı çıxış edən deputat Elizabet Giqu bu təklifin hüquqi cəhətdən qəbul edilə bilməsinin qeyri-mümkün olduğunu, onun qeyri-müəyyən formada tərtib edildiyini, komitənin qayda və prosedurlarına uyğun gəlmədiyini söyləyib. O, həmçinin Fransanın Ermənistan-Azərbaycan, Dağlıq Qarabağ münaqişəsinin həllində vasitəçilik edən Minsk qrupunun həmsədr ölkəsi olmasını əsaslandıraraq rəsmi Parisin belə məsələlərdə bitərəf qalmasının zəruriliyini vurğulayıb. Müzakirələr zamanı çıxış edən xarici məsələlər üzrə komitənin üzvlərinin əksəriyyəti belə bir təklifin qəbul edilməsini Fransanın Ermənistan-Azərbaycan münaqişəsinin həllindəki vasitəçi roluna kölgə sala biləcəyini bildiriblər. Onlar, həmçinin Fransa ilə Azərbaycan arasında ticarət dövriyyəsini qeyd edərək bu təklifin sıx iqtisadi əlaqələrə mənfi təsir göstərə biləcəyini vurğulayıblar. Fransua Roşbluan irəli sürdüyü təklifinin müdafiəsi üçün ayrılmış çıxışında Azərbaycana qarşı əsassız ittihamlar irəli sürməyə, hər vəchlə bu təklifi keçirməyə cəhd göstərsə də, sonda səsvermə zamanı təklif rədd edilib və qəbuledilməz elan olunub.xeber100.com

“The Wall Street Journal”ı yazır…

Birləşmiş Ərəb Əmirliklərinin (BƏƏ) iki ən böyük dövlət investisiya fondu birləşib. “The Wall Street Journal”ı yazır ki, BƏƏ azalan neft gəlirləri fonunda iqtisadiyyatını yenidən formalaşdırmaq məqsədilə iki ən böyük bankının investisiya fondlarını birləşdirmək qərarı verib. Abu Dabinin Vəliəhdi Şeyx Məhəmməd bin Zayed Əl Nəhyan ölkənin iki böyük bankı olan “International Petroleum Investment Company” (IPIC) ilə “Mubadala Development Co.”nun investisiya fondlarının birləşməsini istəyib. “Sovereign Wealth Fund” İnstitutuna görə, IPIC və “Mubadala” investisiya fondları hər biri 66 milyard dollarlıq dəyər ilə dünyanın ən böyük 25 dövlət fondu sırasında yer alır.xeber100.com

Polşada xatirə simvolları söküləcək

Polşanın hakimiyyət orqanları sovet dövründə bu ölkənin hər yerində ucaldılmış 200-dən çox heykəl, monument və xatirə simvollarının sökməyə hazırlaşırlar. Sovet dövründən qalmış abidələri ölkənin şimalında, vaxtilə sovet hərbi bazasının yerləşdiyi Borne-Sulinovo şəhərinin yaxınlığında açıq səma altında yerləşən muzeydə saxlamaq planlaşdırılır. Parkın 2017-ci ilin sentyabr ayında açılması nəzərdə tutulur. Polşa Dövlət Milli Xatirə İnstitutunun hesablamalarına görə, 229 monument sökülməlidir. İnstitutun vitse-prezidenti Pavel Ukelski bildirib ki, hərbi qəbiristanlıqlarda qoyulmuş abidələr sökülməyəcək. O deyib: “Polşa dövləti müharibə dövründə həlak olmuş sovet əsgərlərinin məzarlarının qorunmasına bundan sonra da maksimum hörmətlə yanaşacaq”.xeber100.com

Dollar banknotlarından faydalı şəkildə istifadə edilməsinə qərar verilib

ABŞ-ın Federal Ehtiyat Sistemi (FES) köhnə dollar banknotlarından faydalı şəkildə istifadə edilməsinə qərar verib. Azərtac  “banks.eu” saytına istinadla xəbər verir ki, FES-in dövriyyədən çıxmış pulların yenidən emal edilməsi sistemi köhnə banknotları gübrəyə çevirəcək. İndiyədək dövriyyədən çıxarılan və doğranılan pullar zibil qutusuna atılırdı. İndi yeni emal üçün nəzərdə tutulmuş innovativ sistem həmin pulları faydalı gübrəyə çevirəcək. Köhnə dollarlarla gübrələnmiş torpaqdan meyvə-tərəvəz və digər bitkilərin, ağacların yetişdirilməsi üçün istifadə etmək olar. "Federal Ehtiyat Bankında gündə orta hesabla təxminən 6 milyon dövriyyədən çıxmış dollar banknotları məhv edilir", – deyə bankın baş biznes-analitiki Din Voys bildirib.xeber100.com

Ağ Ev Türkiyədəki terror hücumunu pisləyib

Ağ Ev administrasiyası İstanbulun Atatürk Hava Limanındakı terror hücumunu pisləyib. Ağ Ev sözçüsü Coş Earnest yazılı açıqlamasında törədilən qanlı hadisədə həyatını itirənlərin ailələrinə başsağlığı verib. Anadolu xəbər agentliyinin məlumatın görə açıqlamada onlarla insanın öldüyü və yaralandığı İstanbul Atatürk Hava Limanında baş verənlər kəskin şəkildə pislənilib. Ağ Ev sözçüsü vurğulayıb ki, terror təhdidinə qarşı mübarizəmizi davam etdirərkən, dünyadakı digər dost və müttəfiqlərimizlə, NATO müttəfiqi və tərəfdaşımız olan Türkiyəyə sarsılmaz dəstəyimizi davam etdiririk.xeber100.com

“Le Figaro”nun məlumatına görə…

Fransa vətəndaşlarının 45%-i Avropa İttifaqını (Aİ) tərk etməyə dair referendumun keçirilməsi ideyasını dəstəkləyir. Trend "Le Figaro" qəzetinə istinadən xəbər verir ki, bu barədə "TNS Sofres" araşdırma şirkəti tərəfindən keçirilmış ictimai fikir sorğusu nəticəsində bəlli olub. Sorğuya əsasən, fransızların 44 %-i belə təşəbbüsün əleyhinədir. 45 % Fransa vətəndaşı isə bildirib ki, ölkənin Aİ-ni tərk etməsini istəmirlər.  Sorğu iştirakçılarının 45 %-i Böyük Britaniyada keçirilmiş referendumun nəticələrini təəssüf hissi ilə qarşılayıblar, 36 %-i isə dəstəkləyib.xeber100.com

Məcburi həqiqi hərbi xidmətin ləğv olunması ilə bağlı sərəncam imzalanıb

“Müdafiə naziri Tina Xidaşelinin məcburi hərbi xidmətin ləğv olunması ilə bağlı müstəqil qərar verməyə haqqı yox idi”. “Qruziya Online”nin verdiyi məlumata görə, bu sözləri Gürcüstan prezidenti Georgi Marqvelaşvili deyib. O bildirib ki, məsələ çağırışın ləğv olunması ilə deyil, müdafiə nazirinin öz kvotasını istifadə etməməsi ilə bağlıdır: “Onun nə dərəcədə doğru olmasından asılı olmayaraq, bu kimi qərarlar bir rəsmi şəxs tərəfindən verilməməli, məsələyə həm hökumətin, həm də Təhlükəsizlik Şurasının kollegiya iclasında baxılmaldır”. Prezident müdafiə naziri tərəfindən verilən qərardan əvvəlcədən xəbərdar olmadığını söyləyib. Xatırladaq ki, Gürcüstanın müdafiə naziri Tina Xidaşeli ölkəsində məcburi həqiqi hərbi xidmətin ləğv olunması ilə bağlı sərəncam imzalayıb.xeber100.com

Ərdoğanla Putin arasında telefon danışığı olacaq

Ankara və Moskvadan gələn xəbərlər iki ölkə arasında təyyarə insidentindən sonra yaranmış soyuqluğun aradan qalxmağa başladığını göstərir. Belə ki, Moskvanın təşəbbüsü ilə iyunun 29-da Türkiyə Prezidenti Rəcəb Tayyib Ərdoğanla Rusiya lideri Vladimir Putin arasında telefon danışığı olacaq. Bu barədə Rusiya prezidentinin mətbuat katibi Dmitri Peskov açıqlama verib. Azərtac xəbər verir ki, xarici KİV-lər bir qədər əvvəl Rəcəb Tayyib Ərdoğanın Vladimir Putinə ünvanladığı məktubda Su-24-ün vurulmasına görə üzr istədiyini, pilotların ölümü ilə bağlı başsağlığı verdiyini və təzminat ödəməyə hazır olduqlarını təsdiqlədiyi barədə məlumatlar yayıb. Məlumatlarda, həmçinin Vladimir Putinin Rəcəb Tayyib Ərdoğana zəng edərək ona təşəkkür edəcəyi də qeyd olunur. Bu arada Türkiyə Prezidentə yaxın mənbələr Rəcəb Tayyib Ərdoğanın Rusiya liderinə məktubunda üzr istəmə ifadəsinin yer almadığını və sadəcə ölən pilotun ailəsinə xitabən məyusluq və başsağlığının ifadə olunduğunu, həmçinin təzminatla bağlı heç bir söz işlədilmədiyini bildirib. Onların sözlərinə görə, Türkiyənin Suriya, Ukrayna və Krım məsələsində mövqeyi dəyişməyib. Rusiyanın Türkiyəyə qarşı tətbiq etdiyi turizm məhdudiyyətlərini aradan qaldırmağa hazırlaşdığını bildirən mənbələr bunun ardından kənd təsərrüfatı məhsullarına embarqonun da ləğv ediləcəyini deyib.xeber100.com

Terror aktı ilə bağlı canlı yayım qadağan olunub

İstanbuldakı Atatürk Hava Limanında baş vermiş terror aktı ilə bağlı yerli televiziya kanallarında hadisə yerindən canlı yayım qadağan olunub. Bu barədə Türkiyənin Radio və Televiziya  Təşkilatı (RTÜK) qərar qəbul edib. Qeyd edək ki, ədliyyə naziri Bəkir Bozdağın məlumatına görə, terror aktı zamanı ən azı 10 nəfər həlak olub, iyirmidən çox insan yaralanıb.xeber100.com

“Türk axını” layihəsi üzrə dialoqa hazırlıq

Rusiyanın enerji nəhəngi “Gazprom” şirkəti “Türk axını” qaz boru kəməri (Turkish Stream) layihəsi üzrə Türkiyə tərəfi ilə danışıqların yenidən başlanması üçün dialoqa hazırdır. Azərtac TASS informasiya agentliyinə istinadla xəbər verir ki, bu barədə “Gazprom”un rəsmi nümayəndəsi Sergey Kupriyanov deyib. O bildirib ki, “Gazprom” “Türk axını” layihəsi üzrə dialoqa hər zaman açıq olub. Qeyd edək ki, iyunun 27-də Türkiyə Prezidenti Rəcəb Tayyib Ərdoğan rusiyalı həmkarı Vladimir Putinə məktub göndərib. Məktubda Türkiyə ilə Rusiya arasında ənənəvi dostluq əlaqələrinin bərpa olunması, regiondakı böhranların həlli ilə bağlı əməkdaşlıq və terrorçuluqla birgə mübarizə aparılmasının vacibliyinə dair vacib məqamlar əks olunub.Xatırladaq ki, ötən ilin noyabrında Rusiyaya məxsus “Su-24” tipli döyüş təyyarəsinin Türkiyə tərəfindən vurulmasından sonra “Gazprom”un idarə heyətinin sədri Aleksey Miller “Türk axını” layihəsi ilə bağlı Türkiyə ilə danışıqların dayandırıldığını demişdi. “Gazprom” “Türk axını” kəmərinin ötürücülük qabiliyyətini iki dəfəyədək azaldaraq kəmərlə 32 milyard kubmetr təbii qazın nəql olunmasına da qərar vermişdi. “Türk axını” ilə Rusiya qazının Türkiyədən keçməklə Avropaya çatdırılması nəzərdə tutulurdu. Kəmərlə 16 milyard kubmetr qazın Avropanın, qalan hissəsinin isə Türkiyənin daxili tələbatının ödənilməsi üçün istifadə edilməsi planlaşdırılırdı. Layihə üzrə iki boru kəmərinin tikilməsi nəzərdə tutulurdu.xeber100.com